শ্ৰীমদ্ভাগৱতম্ ১.১

ওঁ নমো ভগৱতে ৱাসুদেৱায
জন্মাদ্যস্য যতোঽন্ৱযাদিতৰতশ্চাৰ্থেষ্ৱভিজ্ঞঃ স্ৱৰাট্
তেনে ব্ৰহ্ম হৃদা য আদিকৱযে মুহ্যন্তি যত্সূৰযঃ ।
তেজোৱাৰিমৃদাং যথা ৱিনিমযো যত্ৰ ত্ৰিসৰ্গোঽমৃষা
ধাম্না স্ৱেন সদা নিৰস্তকুহকং সত্যং পৰং ধীমহি ॥ ১ ॥

ধৰ্মঃ প্ৰোজ্ঝিতকৈতৱোঽত্ৰ পৰমো নিৰ্মত্সৰাণাং সতাং
ৱেদ্যং ৱাস্তৱমত্ৰ ৱস্তু শিৱদং তাপত্ৰযোন্মূলনম্ ।
শ্ৰীমদ্ভাগৱতে মহামুনিকৃতে কিং ৱা পৰৈৰীশ্ৱৰঃ
সদ্যো হৃদ্যৱৰুধ্যতেঽত্ৰ কৃতিভিঃ শুশ্ৰূষুভিস্তত্ক্ষণাত্ ॥ ২ ॥

নিগমকল্পতৰোৰ্গলিতং ফলং
শুকমুখাদমৃতদ্ৰৱসংযুতম্ ।
পিবত ভাগৱতং ৰসমালযং
মুহুৰহো ৰসিকা ভুৱি ভাৱুকাঃ ॥ ৩ ॥

নৈমিষেঽনিমিষক্ষেত্ৰে ঋষযঃ শৌনকাদযঃ ।
সত্ৰং স্ৱৰ্গাযলোকায সহস্ৰসমমাসত ॥ ৪ ॥

ত একদা তু মুনযঃ প্ৰাতৰ্হুতহুতাগ্নযঃ ।
সত্কৃতং সূতমাসীনং পপ্ৰচ্ছুৰিদমাদৰাত্ ॥ ৫ ॥

ত্ৱযা খলু পুৰাণানি সেতিহাসানি চানঘ ।
আখ্যাতান্যপ্যধীতানি ধৰ্মশাস্ত্ৰাণি যান্যুত ॥ ৬ ॥

যানি ৱেদৱিদাং শ্ৰেষ্ঠো ভগৱান্ বাদৰাযণঃ ।
অন্যে চ মুনযঃ সূত পৰাৱৰৱিদো ৱিদুঃ ॥ ৭ ॥

ৱেত্থ ত্ৱং সৌম্য তত্সৰ্ৱং তত্ত্ৱতস্তদনুগ্ৰহাত্ ।
ব্ৰূযুঃ স্নিগ্ধস্য শিষ্যস্য গুৰৱো গুহ্যমপ্যুত ॥ ৮ ॥

তত্ৰ তত্ৰাঞ্জসাযুষ্মন্ ভৱতা যদ্ৱিনিশ্চিতম্ ।
পুংসামেকান্ততঃ শ্ৰেযস্তন্নঃ শংসিতুমৰ্হসি ॥ ৯ ॥

প্ৰাযেণাল্পাযুষঃ সভ্য কলাৱস্মিন্ যুগে জনাঃ ।
মন্দাঃ সুমন্দমতযো মন্দভাগ্যা হ্যুপদ্ৰুতাঃ ॥ ১০ ॥

ভূৰীণি ভূৰিকৰ্মাণি শ্ৰোতৱ্যানি ৱিভাগশঃ ।
অতঃ সাধোঽত্ৰ যত্সাৰং সমুদ্ধৃত্য মনীষযা ।
ব্ৰূহি ভদ্ৰাযভূতানাং যেনাত্মা সুপ্ৰসীদতি ॥ ১১ ॥

সূত জানাসি ভদ্ৰং তে ভগৱান্ সাত্ৱতাং পতিঃ ।
দেৱক্যাং ৱসুদেৱস্য জাতো যস্য চিকীৰ্ষযা ॥ ১২ ॥

তন্নঃ শুশ্ৰূষমাণানামৰ্হস্যঙ্গানুৱৰ্ণিতুম্ ।
যস্যাৱতাৰো ভূতানাং ক্ষেমায চ ভৱায চ ॥ ১৩ ॥

আপন্নঃ সংসৃতিং ঘোৰাং যন্নাম ৱিৱশো গৃণন্ ।
ততঃ সদ্যো ৱিমুচ্যেত যদ্বিভেতি স্ৱযং ভযম্ ॥ ১৪ ॥

যত্পাদসংশ্ৰযাঃ সূত মুনযঃ প্ৰশমাযনাঃ ।
সদ্যঃ পুনন্ত্যুপস্পৃষ্টাঃ স্ৱৰ্ধুন্যাপোঽনুসেৱযা ॥ ১৫ ॥

কো ৱা ভগৱতস্তস্য পুণ্যশ্লোকেড্যকৰ্মণঃ ।
শুদ্ধিকামো ন শৃণুযাদ্যশঃ কলিমলাপহম্ ॥ ১৬ ॥

তস্য কৰ্মাণ্যুদাৰাণি পৰিগীতানি সূৰিভিঃ ।
ব্ৰূহি নঃ শ্ৰদ্দধানানাং লীলযা দধতঃ কলাঃ ॥ ১৭ ॥

অথাখ্যাহিহৰেৰ্ধীমন্নৱতাৰকথাঃ শুভাঃ ।
লীলা ৱিদধতঃ স্ৱৈৰমীশ্ৱৰস্যাত্মমাযযা ॥ ১৮ ॥

ৱযং তু ন ৱিতৃপ্যাম উত্তমশ্লোকৱিক্ৰমে ।
যচ্ছৃণ্ৱতাং ৰসজ্ঞানাং স্ৱাদু স্ৱাদু পদে পদে ॥ ১৯ ॥

কৃতৱান্ কিল কৰ্মাণি সহ ৰামেণ কেশৱঃ ।
অতিমৰ্ত্যানি ভগৱান্ গূঢঃ কপটমানুষঃ ॥ ২০ ॥

কলিমাগতমাজ্ঞায ক্ষেত্ৰেঽস্মিন্ ৱৈষ্ণৱে ৱযম্ ।
আসীনা দীৰ্ঘসত্ৰেণ কথাযাং সক্ষণা হৰেঃ ॥ ২১ ॥

ত্ৱং নঃ সন্দৰ্শিতো ধাত্ৰা দুস্তৰং নিস্তিতীৰ্ষতাম্ ।
কলিং সত্ত্ৱহৰং পুংসাং কৰ্ণধাৰ ইৱাৰ্ণৱম্ ॥ ২২ ॥

ব্ৰূহি যোগেশ্ৱৰে কৃষ্ণে ব্ৰহ্মণ্যে ধৰ্মৱৰ্মণি ।
স্ৱাং কাষ্ঠামধুনোপেতে ধৰ্মঃ কং শৰণং গতঃ ॥ ২৩ ॥