ଶ୍ରୀମଦ୍ଭାଗଵତମ୍ ୧.୧

ଓଁ ନମୋ ଭଗଵତେ ଵାସୁଦେଵାଯ
ଜନ୍ମାଦ୍ଯସ୍ଯ ଯତୋଽନ୍ଵଯାଦିତରତଶ୍ଚାର୍ଥେଷ୍ଵଭିଜ୍ଞଃ ସ୍ଵରାଟ୍
ତେନେ ବ୍ରହ୍ମ ହୃଦା ଯ ଆଦିକଵଯେ ମୁହ୍ଯନ୍ତି ଯତ୍ସୂରଯଃ ।
ତେଜୋଵାରିମୃଦାଂ ଯଥା ଵିନିମଯୋ ଯତ୍ର ତ୍ରିସର୍ଗୋଽମୃଷା
ଧାମ୍ନା ସ୍ଵେନ ସଦା ନିରସ୍ତକୁହକଂ ସତ୍ଯଂ ପରଂ ଧୀମହି ॥ ୧ ॥

ଧର୍ମଃ ପ୍ରୋଜ୍ଝିତକୈତଵୋଽତ୍ର ପରମୋ ନିର୍ମତ୍ସରାଣାଂ ସତାଂ
ଵେଦ୍ଯଂ ଵାସ୍ତଵମତ୍ର ଵସ୍ତୁ ଶିଵଦଂ ତାପତ୍ରଯୋନ୍ମୂଲନମ୍ ।
ଶ୍ରୀମଦ୍ଭାଗଵତେ ମହାମୁନିକୃତେ କିଂ ଵା ପରୈରୀଶ୍ଵରଃ
ସଦ୍ଯୋ ହୃଦ୍ଯଵରୁଧ୍ଯତେଽତ୍ର କୃତିଭିଃ ଶୁଶ୍ରୂଷୁଭିସ୍ତତ୍କ୍ଷଣାତ୍ ॥ ୨ ॥

ନିଗମକଲ୍ପତରୋର୍ଗଲିତଂ ଫଲଂ
ଶୁକମୁଖାଦମୃତଦ୍ରଵସଂଯୁତମ୍ ।
ପିବତ ଭାଗଵତଂ ରସମାଲଯଂ
ମୁହୁରହୋ ରସିକା ଭୁଵି ଭାଵୁକାଃ ॥ ୩ ॥

ନୈମିଷେଽନିମିଷକ୍ଷେତ୍ରେ ଋଷଯଃ ଶୌନକାଦଯଃ ।
ସତ୍ରଂ ସ୍ଵର୍ଗାଯଲୋକାଯ ସହସ୍ରସମମାସତ ॥ ୪ ॥

ତ ଏକଦା ତୁ ମୁନଯଃ ପ୍ରାତର୍ହୁତହୁତାଗ୍ନଯଃ ।
ସତ୍କୃତଂ ସୂତମାସୀନଂ ପପ୍ରଚ୍ଛୁରିଦମାଦରାତ୍ ॥ ୫ ॥

ତ୍ଵଯା ଖଲୁ ପୁରାଣାନି ସେତିହାସାନି ଚାନଘ ।
ଆଖ୍ଯାତାନ୍ଯପ୍ଯଧୀତାନି ଧର୍ମଶାସ୍ତ୍ରାଣି ଯାନ୍ଯୁତ ॥ ୬ ॥

ଯାନି ଵେଦଵିଦାଂ ଶ୍ରେଷ୍ଠୋ ଭଗଵାନ୍ ବାଦରାଯଣଃ ।
ଅନ୍ଯେ ଚ ମୁନଯଃ ସୂତ ପରାଵରଵିଦୋ ଵିଦୁଃ ॥ ୭ ॥

ଵେତ୍ଥ ତ୍ଵଂ ସୌମ୍ଯ ତତ୍ସର୍ଵଂ ତତ୍ତ୍ଵତସ୍ତଦନୁଗ୍ରହାତ୍ ।
ବ୍ରୂଯୁଃ ସ୍ନିଗ୍ଧସ୍ଯ ଶିଷ୍ଯସ୍ଯ ଗୁରଵୋ ଗୁହ୍ଯମପ୍ଯୁତ ॥ ୮ ॥

ତତ୍ର ତତ୍ରାଞ୍ଜସାଯୁଷ୍ମନ୍ ଭଵତା ଯଦ୍ଵିନିଶ୍ଚିତମ୍ ।
ପୁଂସାମେକାନ୍ତତଃ ଶ୍ରେଯସ୍ତନ୍ନଃ ଶଂସିତୁମର୍ହସି ॥ ୯ ॥

ପ୍ରାଯେଣାଲ୍ପାଯୁଷଃ ସଭ୍ଯ କଲାଵସ୍ମିନ୍ ଯୁଗେ ଜନାଃ ।
ମନ୍ଦାଃ ସୁମନ୍ଦମତଯୋ ମନ୍ଦଭାଗ୍ଯା ହ୍ଯୁପଦ୍ରୁତାଃ ॥ ୧୦ ॥

ଭୂରୀଣି ଭୂରିକର୍ମାଣି ଶ୍ରୋତଵ୍ଯାନି ଵିଭାଗଶଃ ।
ଅତଃ ସାଧୋଽତ୍ର ଯତ୍ସାରଂ ସମୁଦ୍ଧୃତ୍ଯ ମନୀଷଯା ।
ବ୍ରୂହି ଭଦ୍ରାଯଭୂତାନାଂ ଯେନାତ୍ମା ସୁପ୍ରସୀଦତି ॥ ୧୧ ॥

ସୂତ ଜାନାସି ଭଦ୍ରଂ ତେ ଭଗଵାନ୍ ସାତ୍ଵତାଂ ପତିଃ ।
ଦେଵକ୍ଯାଂ ଵସୁଦେଵସ୍ଯ ଜାତୋ ଯସ୍ଯ ଚିକୀର୍ଷଯା ॥ ୧୨ ॥

ତନ୍ନଃ ଶୁଶ୍ରୂଷମାଣାନାମର୍ହସ୍ଯଙ୍ଗାନୁଵର୍ଣିତୁମ୍ ।
ଯସ୍ଯାଵତାରୋ ଭୂତାନାଂ କ୍ଷେମାଯ ଚ ଭଵାଯ ଚ ॥ ୧୩ ॥

ଆପନ୍ନଃ ସଂସୃତିଂ ଘୋରାଂ ଯନ୍ନାମ ଵିଵଶୋ ଗୃଣନ୍ ।
ତତଃ ସଦ୍ଯୋ ଵିମୁଚ୍ଯେତ ଯଦ୍ବିଭେତି ସ୍ଵଯଂ ଭଯମ୍ ॥ ୧୪ ॥

ଯତ୍ପାଦସଂଶ୍ରଯାଃ ସୂତ ମୁନଯଃ ପ୍ରଶମାଯନାଃ ।
ସଦ୍ଯଃ ପୁନନ୍ତ୍ଯୁପସ୍ପୃଷ୍ଟାଃ ସ୍ଵର୍ଧୁନ୍ଯାପୋଽନୁସେଵଯା ॥ ୧୫ ॥

କୋ ଵା ଭଗଵତସ୍ତସ୍ଯ ପୁଣ୍ଯଶ୍ଲୋକେଡ୍ଯକର୍ମଣଃ ।
ଶୁଦ୍ଧିକାମୋ ନ ଶୃଣୁଯାଦ୍ଯଶଃ କଲିମଲାପହମ୍ ॥ ୧୬ ॥

ତସ୍ଯ କର୍ମାଣ୍ଯୁଦାରାଣି ପରିଗୀତାନି ସୂରିଭିଃ ।
ବ୍ରୂହି ନଃ ଶ୍ରଦ୍ଦଧାନାନାଂ ଲୀଲଯା ଦଧତଃ କଲାଃ ॥ ୧୭ ॥

ଅଥାଖ୍ଯାହିହରେର୍ଧୀମନ୍ନଵତାରକଥାଃ ଶୁଭାଃ ।
ଲୀଲା ଵିଦଧତଃ ସ୍ଵୈରମୀଶ୍ଵରସ୍ଯାତ୍ମମାଯଯା ॥ ୧୮ ॥

ଵଯଂ ତୁ ନ ଵିତୃପ୍ଯାମ ଉତ୍ତମଶ୍ଲୋକଵିକ୍ରମେ ।
ଯଚ୍ଛୃଣ୍ଵତାଂ ରସଜ୍ଞାନାଂ ସ୍ଵାଦୁ ସ୍ଵାଦୁ ପଦେ ପଦେ ॥ ୧୯ ॥

କୃତଵାନ୍ କିଲ କର୍ମାଣି ସହ ରାମେଣ କେଶଵଃ ।
ଅତିମର୍ତ୍ଯାନି ଭଗଵାନ୍ ଗୂଢଃ କପଟମାନୁଷଃ ॥ ୨୦ ॥

କଲିମାଗତମାଜ୍ଞାଯ କ୍ଷେତ୍ରେଽସ୍ମିନ୍ ଵୈଷ୍ଣଵେ ଵଯମ୍ ।
ଆସୀନା ଦୀର୍ଘସତ୍ରେଣ କଥାଯାଂ ସକ୍ଷଣା ହରେଃ ॥ ୨୧ ॥

ତ୍ଵଂ ନଃ ସନ୍ଦର୍ଶିତୋ ଧାତ୍ରା ଦୁସ୍ତରଂ ନିସ୍ତିତୀର୍ଷତାମ୍ ।
କଲିଂ ସତ୍ତ୍ଵହରଂ ପୁଂସାଂ କର୍ଣଧାର ଇଵାର୍ଣଵମ୍ ॥ ୨୨ ॥

ବ୍ରୂହି ଯୋଗେଶ୍ଵରେ କୃଷ୍ଣେ ବ୍ରହ୍ମଣ୍ଯେ ଧର୍ମଵର୍ମଣି ।
ସ୍ଵାଂ କାଷ୍ଠାମଧୁନୋପେତେ ଧର୍ମଃ କଂ ଶରଣଂ ଗତଃ ॥ ୨୩ ॥