శ్రీమద్భాగవతమ్ ౧.౧

ఓం నమో భగవతే వాసుదేవాయ
జన్మాద్యస్య యతోఽన్వయాదితరతశ్చార్థేష్వభిజ్ఞః స్వరాట్
తేనే బ్రహ్మ హృదా య ఆదికవయే ముహ్యన్తి యత్సూరయః ।
తేజోవారిమృదాం యథా వినిమయో యత్ర త్రిసర్గోఽమృషా
ధామ్నా స్వేన సదా నిరస్తకుహకం సత్యం పరం ధీమహి ॥ ౧ ॥

ధర్మః ప్రోజ్ఝితకైతవోఽత్ర పరమో నిర్మత్సరాణాం సతాం
వేద్యం వాస్తవమత్ర వస్తు శివదం తాపత్రయోన్మూలనమ్ ।
శ్రీమద్భాగవతే మహామునికృతే కిం వా పరైరీశ్వరః
సద్యో హృద్యవరుధ్యతేఽత్ర కృతిభిః శుశ్రూషుభిస్తత్క్షణాత్ ॥ ౨ ॥

నిగమకల్పతరోర్గలితం ఫలం
శుకముఖాదమృతద్రవసంయుతమ్ ।
పిబత భాగవతం రసమాలయం
ముహురహో రసికా భువి భావుకాః ॥ ౩ ॥

నైమిషేఽనిమిషక్షేత్రే ఋషయః శౌనకాదయః ।
సత్రం స్వర్గాయలోకాయ సహస్రసమమాసత ॥ ౪ ॥

త ఏకదా తు మునయః ప్రాతర్హుతహుతాగ్నయః ।
సత్కృతం సూతమాసీనం పప్రచ్ఛురిదమాదరాత్ ॥ ౫ ॥

త్వయా ఖలు పురాణాని సేతిహాసాని చానఘ ।
ఆఖ్యాతాన్యప్యధీతాని ధర్మశాస్త్రాణి యాన్యుత ॥ ౬ ॥

యాని వేదవిదాం శ్రేష్ఠో భగవాన్ బాదరాయణః ।
అన్యే చ మునయః సూత పరావరవిదో విదుః ॥ ౭ ॥

వేత్థ త్వం సౌమ్య తత్సర్వం తత్త్వతస్తదనుగ్రహాత్ ।
బ్రూయుః స్నిగ్ధస్య శిష్యస్య గురవో గుహ్యమప్యుత ॥ ౮ ॥

తత్ర తత్రాఞ్జసాయుష్మన్ భవతా యద్వినిశ్చితమ్ ।
పుంసామేకాన్తతః శ్రేయస్తన్నః శంసితుమర్హసి ॥ ౯ ॥

ప్రాయేణాల్పాయుషః సభ్య కలావస్మిన్ యుగే జనాః ।
మన్దాః సుమన్దమతయో మన్దభాగ్యా హ్యుపద్రుతాః ॥ ౧౦ ॥

భూరీణి భూరికర్మాణి శ్రోతవ్యాని విభాగశః ।
అతః సాధోఽత్ర యత్సారం సముద్ధృత్య మనీషయా ।
బ్రూహి భద్రాయభూతానాం యేనాత్మా సుప్రసీదతి ॥ ౧౧ ॥

సూత జానాసి భద్రం తే భగవాన్ సాత్వతాం పతిః ।
దేవక్యాం వసుదేవస్య జాతో యస్య చికీర్షయా ॥ ౧౨ ॥

తన్నః శుశ్రూషమాణానామర్హస్యఙ్గానువర్ణితుమ్ ।
యస్యావతారో భూతానాం క్షేమాయ చ భవాయ చ ॥ ౧౩ ॥

ఆపన్నః సంసృతిం ఘోరాం యన్నామ వివశో గృణన్ ।
తతః సద్యో విముచ్యేత యద్బిభేతి స్వయం భయమ్ ॥ ౧౪ ॥

యత్పాదసంశ్రయాః సూత మునయః ప్రశమాయనాః ।
సద్యః పునన్త్యుపస్పృష్టాః స్వర్ధున్యాపోఽనుసేవయా ॥ ౧౫ ॥

కో వా భగవతస్తస్య పుణ్యశ్లోకేడ్యకర్మణః ।
శుద్ధికామో న శృణుయాద్యశః కలిమలాపహమ్ ॥ ౧౬ ॥

తస్య కర్మాణ్యుదారాణి పరిగీతాని సూరిభిః ।
బ్రూహి నః శ్రద్దధానానాం లీలయా దధతః కలాః ॥ ౧౭ ॥

అథాఖ్యాహిహరేర్ధీమన్నవతారకథాః శుభాః ।
లీలా విదధతః స్వైరమీశ్వరస్యాత్మమాయయా ॥ ౧౮ ॥

వయం తు న వితృప్యామ ఉత్తమశ్లోకవిక్రమే ।
యచ్ఛృణ్వతాం రసజ్ఞానాం స్వాదు స్వాదు పదే పదే ॥ ౧౯ ॥

కృతవాన్ కిల కర్మాణి సహ రామేణ కేశవః ।
అతిమర్త్యాని భగవాన్ గూఢః కపటమానుషః ॥ ౨౦ ॥

కలిమాగతమాజ్ఞాయ క్షేత్రేఽస్మిన్ వైష్ణవే వయమ్ ।
ఆసీనా దీర్ఘసత్రేణ కథాయాం సక్షణా హరేః ॥ ౨౧ ॥

త్వం నః సన్దర్శితో ధాత్రా దుస్తరం నిస్తితీర్షతామ్ ।
కలిం సత్త్వహరం పుంసాం కర్ణధార ఇవార్ణవమ్ ॥ ౨౨ ॥

బ్రూహి యోగేశ్వరే కృష్ణే బ్రహ్మణ్యే ధర్మవర్మణి ।
స్వాం కాష్ఠామధునోపేతే ధర్మః కం శరణం గతః ॥ ౨౩ ॥