শ্রীমদ্ভাগবতম্ ১.১

ওঁ নমো ভগবতে বাসুদেবায
জন্মাদ্যস্য যতোঽন্বযাদিতরতশ্চার্থেষ্বভিজ্ঞঃ স্বরাট্
তেনে ব্রহ্ম হৃদা য আদিকবযে মুহ্যন্তি যত্সূরযঃ ।
তেজোবারিমৃদাং যথা বিনিমযো যত্র ত্রিসর্গোঽমৃষা
ধাম্না স্বেন সদা নিরস্তকুহকং সত্যং পরং ধীমহি ॥ ১ ॥

ধর্মঃ প্রোজ্ঝিতকৈতবোঽত্র পরমো নির্মত্সরাণাং সতাং
বেদ্যং বাস্তবমত্র বস্তু শিবদং তাপত্রযোন্মূলনম্ ।
শ্রীমদ্ভাগবতে মহামুনিকৃতে কিং বা পরৈরীশ্বরঃ
সদ্যো হৃদ্যবরুধ্যতেঽত্র কৃতিভিঃ শুশ্রূষুভিস্তত্ক্ষণাত্ ॥ ২ ॥

নিগমকল্পতরোর্গলিতং ফলং
শুকমুখাদমৃতদ্রবসংযুতম্ ।
পিবত ভাগবতং রসমালযং
মুহুরহো রসিকা ভুবি ভাবুকাঃ ॥ ৩ ॥

নৈমিষেঽনিমিষক্ষেত্রে ঋষযঃ শৌনকাদযঃ ।
সত্রং স্বর্গাযলোকায সহস্রসমমাসত ॥ ৪ ॥

ত একদা তু মুনযঃ প্রাতর্হুতহুতাগ্নযঃ ।
সত্কৃতং সূতমাসীনং পপ্রচ্ছুরিদমাদরাত্ ॥ ৫ ॥

ত্বযা খলু পুরাণানি সেতিহাসানি চানঘ ।
আখ্যাতান্যপ্যধীতানি ধর্মশাস্ত্রাণি যান্যুত ॥ ৬ ॥

যানি বেদবিদাং শ্রেষ্ঠো ভগবান্ বাদরাযণঃ ।
অন্যে চ মুনযঃ সূত পরাবরবিদো বিদুঃ ॥ ৭ ॥

বেত্থ ত্বং সৌম্য তত্সর্বং তত্ত্বতস্তদনুগ্রহাত্ ।
ব্রূযুঃ স্নিগ্ধস্য শিষ্যস্য গুরবো গুহ্যমপ্যুত ॥ ৮ ॥

তত্র তত্রাঞ্জসাযুষ্মন্ ভবতা যদ্বিনিশ্চিতম্ ।
পুংসামেকান্ততঃ শ্রেযস্তন্নঃ শংসিতুমর্হসি ॥ ৯ ॥

প্রাযেণাল্পাযুষঃ সভ্য কলাবস্মিন্ যুগে জনাঃ ।
মন্দাঃ সুমন্দমতযো মন্দভাগ্যা হ্যুপদ্রুতাঃ ॥ ১০ ॥

ভূরীণি ভূরিকর্মাণি শ্রোতব্যানি বিভাগশঃ ।
অতঃ সাধোঽত্র যত্সারং সমুদ্ধৃত্য মনীষযা ।
ব্রূহি ভদ্রাযভূতানাং যেনাত্মা সুপ্রসীদতি ॥ ১১ ॥

সূত জানাসি ভদ্রং তে ভগবান্ সাত্বতাং পতিঃ ।
দেবক্যাং বসুদেবস্য জাতো যস্য চিকীর্ষযা ॥ ১২ ॥

তন্নঃ শুশ্রূষমাণানামর্হস্যঙ্গানুবর্ণিতুম্ ।
যস্যাবতারো ভূতানাং ক্ষেমায চ ভবায চ ॥ ১৩ ॥

আপন্নঃ সংসৃতিং ঘোরাং যন্নাম বিবশো গৃণন্ ।
ততঃ সদ্যো বিমুচ্যেত যদ্বিভেতি স্বযং ভযম্ ॥ ১৪ ॥

যত্পাদসংশ্রযাঃ সূত মুনযঃ প্রশমাযনাঃ ।
সদ্যঃ পুনন্ত্যুপস্পৃষ্টাঃ স্বর্ধুন্যাপোঽনুসেবযা ॥ ১৫ ॥

কো বা ভগবতস্তস্য পুণ্যশ্লোকেড্যকর্মণঃ ।
শুদ্ধিকামো ন শৃণুযাদ্যশঃ কলিমলাপহম্ ॥ ১৬ ॥

তস্য কর্মাণ্যুদারাণি পরিগীতানি সূরিভিঃ ।
ব্রূহি নঃ শ্রদ্দধানানাং লীলযা দধতঃ কলাঃ ॥ ১৭ ॥

অথাখ্যাহিহরের্ধীমন্নবতারকথাঃ শুভাঃ ।
লীলা বিদধতঃ স্বৈরমীশ্বরস্যাত্মমাযযা ॥ ১৮ ॥

বযং তু ন বিতৃপ্যাম উত্তমশ্লোকবিক্রমে ।
যচ্ছৃণ্বতাং রসজ্ঞানাং স্বাদু স্বাদু পদে পদে ॥ ১৯ ॥

কৃতবান্ কিল কর্মাণি সহ রামেণ কেশবঃ ।
অতিমর্ত্যানি ভগবান্ গূঢঃ কপটমানুষঃ ॥ ২০ ॥

কলিমাগতমাজ্ঞায ক্ষেত্রেঽস্মিন্ বৈষ্ণবে বযম্ ।
আসীনা দীর্ঘসত্রেণ কথাযাং সক্ষণা হরেঃ ॥ ২১ ॥

ত্বং নঃ সন্দর্শিতো ধাত্রা দুস্তরং নিস্তিতীর্ষতাম্ ।
কলিং সত্ত্বহরং পুংসাং কর্ণধার ইবার্ণবম্ ॥ ২২ ॥

ব্রূহি যোগেশ্বরে কৃষ্ণে ব্রহ্মণ্যে ধর্মবর্মণি ।
স্বাং কাষ্ঠামধুনোপেতে ধর্মঃ কং শরণং গতঃ ॥ ২৩ ॥