ശ്രീമദ്ഭാഗവതമ് ൧.൧

ഓം നമോ ഭഗവതേ വാസുദേവായ
ജന്മാദ്യസ്യ യതോഽന്വയാദിതരതശ്ചാര്ഥേഷ്വഭിജ്ഞഃ സ്വരാട്
തേനേ ബ്രഹ്മ ഹൃദാ യ ആദികവയേ മുഹ്യന്തി യത്സൂരയഃ ।
തേജോവാരിമൃദാം യഥാ വിനിമയോ യത്ര ത്രിസര്ഗോഽമൃഷാ
ധാമ്നാ സ്വേന സദാ നിരസ്തകുഹകം സത്യം പരം ധീമഹി ॥ ൧ ॥

ധര്മഃ പ്രോജ്ഝിതകൈതവോഽത്ര പരമോ നിര്മത്സരാണാം സതാം
വേദ്യം വാസ്തവമത്ര വസ്തു ശിവദം താപത്രയോന്മൂലനമ് ।
ശ്രീമദ്ഭാഗവതേ മഹാമുനികൃതേ കിം വാ പരൈരീശ്വരഃ
സദ്യോ ഹൃദ്യവരുധ്യതേഽത്ര കൃതിഭിഃ ശുശ്രൂഷുഭിസ്തത്ക്ഷണാത് ॥ ൨ ॥

നിഗമകല്പതരോര്ഗലിതം ഫലം
ശുകമുഖാദമൃതദ്രവസംയുതമ് ।
പിബത ഭാഗവതം രസമാലയം
മുഹുരഹോ രസികാ ഭുവി ഭാവുകാഃ ॥ ൩ ॥

നൈമിഷേഽനിമിഷക്ഷേത്രേ ഋഷയഃ ശൌനകാദയഃ ।
സത്രം സ്വര്ഗായലോകായ സഹസ്രസമമാസത ॥ ൪ ॥

ത ഏകദാ തു മുനയഃ പ്രാതര്ഹുതഹുതാഗ്നയഃ ।
സത്കൃതം സൂതമാസീനം പപ്രച്ഛുരിദമാദരാത് ॥ ൫ ॥

ത്വയാ ഖലു പുരാണാനി സേതിഹാസാനി ചാനഘ ।
ആഖ്യാതാന്യപ്യധീതാനി ധര്മശാസ്ത്രാണി യാന്യുത ॥ ൬ ॥

യാനി വേദവിദാം ശ്രേഷ്ഠോ ഭഗവാന് ബാദരായണഃ ।
അന്യേ ച മുനയഃ സൂത പരാവരവിദോ വിദുഃ ॥ ൭ ॥

വേത്ഥ ത്വം സൌമ്യ തത്സര്വം തത്ത്വതസ്തദനുഗ്രഹാത് ।
ബ്രൂയുഃ സ്നിഗ്ധസ്യ ശിഷ്യസ്യ ഗുരവോ ഗുഹ്യമപ്യുത ॥ ൮ ॥

തത്ര തത്രാഞ്ജസായുഷ്മന് ഭവതാ യദ്വിനിശ്ചിതമ് ।
പുംസാമേകാന്തതഃ ശ്രേയസ്തന്നഃ ശംസിതുമര്ഹസി ॥ ൯ ॥

പ്രായേണാല്പായുഷഃ സഭ്യ കലാവസ്മിന് യുഗേ ജനാഃ ।
മന്ദാഃ സുമന്ദമതയോ മന്ദഭാഗ്യാ ഹ്യുപദ്രുതാഃ ॥ ൧൦ ॥

ഭൂരീണി ഭൂരികര്മാണി ശ്രോതവ്യാനി വിഭാഗശഃ ।
അതഃ സാധോഽത്ര യത്സാരം സമുദ്ധൃത്യ മനീഷയാ ।
ബ്രൂഹി ഭദ്രായഭൂതാനാം യേനാത്മാ സുപ്രസീദതി ॥ ൧൧ ॥

സൂത ജാനാസി ഭദ്രം തേ ഭഗവാന് സാത്വതാം പതിഃ ।
ദേവക്യാം വസുദേവസ്യ ജാതോ യസ്യ ചികീര്ഷയാ ॥ ൧൨ ॥

തന്നഃ ശുശ്രൂഷമാണാനാമര്ഹസ്യങ്ഗാനുവര്ണിതുമ് ।
യസ്യാവതാരോ ഭൂതാനാം ക്ഷേമായ ച ഭവായ ച ॥ ൧൩ ॥

ആപന്നഃ സംസൃതിം ഘോരാം യന്നാമ വിവശോ ഗൃണന് ।
തതഃ സദ്യോ വിമുച്യേത യദ്ബിഭേതി സ്വയം ഭയമ് ॥ ൧൪ ॥

യത്പാദസംശ്രയാഃ സൂത മുനയഃ പ്രശമായനാഃ ।
സദ്യഃ പുനന്ത്യുപസ്പൃഷ്ടാഃ സ്വര്ധുന്യാപോഽനുസേവയാ ॥ ൧൫ ॥

കോ വാ ഭഗവതസ്തസ്യ പുണ്യശ്ലോകേഡ്യകര്മണഃ ।
ശുദ്ധികാമോ ന ശൃണുയാദ്യശഃ കലിമലാപഹമ് ॥ ൧൬ ॥

തസ്യ കര്മാണ്യുദാരാണി പരിഗീതാനി സൂരിഭിഃ ।
ബ്രൂഹി നഃ ശ്രദ്ദധാനാനാം ലീലയാ ദധതഃ കലാഃ ॥ ൧൭ ॥

അഥാഖ്യാഹിഹരേര്ധീമന്നവതാരകഥാഃ ശുഭാഃ ।
ലീലാ വിദധതഃ സ്വൈരമീശ്വരസ്യാത്മമായയാ ॥ ൧൮ ॥

വയം തു ന വിതൃപ്യാമ ഉത്തമശ്ലോകവിക്രമേ ।
യച്ഛൃണ്വതാം രസജ്ഞാനാം സ്വാദു സ്വാദു പദേ പദേ ॥ ൧൯ ॥

കൃതവാന് കില കര്മാണി സഹ രാമേണ കേശവഃ ।
അതിമര്ത്യാനി ഭഗവാന് ഗൂഢഃ കപടമാനുഷഃ ॥ ൨൦ ॥

കലിമാഗതമാജ്ഞായ ക്ഷേത്രേഽസ്മിന് വൈഷ്ണവേ വയമ് ।
ആസീനാ ദീര്ഘസത്രേണ കഥായാം സക്ഷണാ ഹരേഃ ॥ ൨൧ ॥

ത്വം നഃ സന്ദര്ശിതോ ധാത്രാ ദുസ്തരം നിസ്തിതീര്ഷതാമ് ।
കലിം സത്ത്വഹരം പുംസാം കര്ണധാര ഇവാര്ണവമ് ॥ ൨൨ ॥

ബ്രൂഹി യോഗേശ്വരേ കൃഷ്ണേ ബ്രഹ്മണ്യേ ധര്മവര്മണി ।
സ്വാം കാഷ്ഠാമധുനോപേതേ ധര്മഃ കം ശരണം ഗതഃ ॥ ൨൩ ॥