শ্ৰীমদ্ভাগৱতম্ ১০.৪০

শ্ৰীঅক্ৰূৰ উৱাচ
নতোঽস্ম্যহং ত্ৱাখিলহেতুহেতুং
নাৰাযণং পূৰুষমাদ্যমৱ্যযম্ ।
যন্নাভিজাতাদৰৱিন্দকোষাদ্
ব্ৰহ্মাৱিৰাসীদ্ যত এষ লোকঃ ॥ ১ ॥

ভূস্তোযমগ্নিঃ পৱনং খমাদি-
ৰ্মহানজাদিৰ্মন ইন্দ্ৰিযাণি ।
সৰ্ৱেন্দ্ৰিযাৰ্থা ৱিবুধাশ্চ সৰ্ৱে
যে হেতৱস্তে জগতোঽঙ্গভূতাঃ ॥ ২ ॥

নৈতে স্ৱৰূপং ৱিদুৰাত্মনস্তে
হ্যজাদযোঽনাত্মতযা গৃহীতাঃ ।
অজোঽনুবদ্ধঃ স গুণৈৰজাযা
গুণাত্ পৰং ৱেদ ন তে স্ৱৰূপম্ ॥ ৩ ॥

ত্ৱাং যোগিনো যজন্ত্যদ্ধা মহাপুৰুষমীশ্ৱৰম্ ।
সাধ্যাত্মং সাধিভূতং চ সাধিদৈৱং চ সাধৱঃ ॥ ৪ ॥

ত্ৰয্যা চ ৱিদ্যযা কেচিত্ত্ৱাং ৱৈ ৱৈতানিকা দ্ৱিজাঃ ।
যজন্তে ৱিততৈৰ্যজ্ঞৈৰ্নানা ৰূপামৰাখ্যযা ॥ ৫ ॥

একে ত্ৱাখিলকৰ্মাণি সন্ন্যস্যোপশমং গতাঃ ।
জ্ঞানিনো জ্ঞানযজ্ঞেন যজন্তি জ্ঞানৱিগ্ৰহম্ ॥ ৬ ॥

অন্যে চ সংস্কৃতাত্মানো ৱিধিনাভিহিতেন তে ।
যজন্তি ত্ৱন্মযাস্ত্ৱাং ৱৈ বহুমূৰ্ত্যেকমূৰ্তিকম্ ॥ ৭ ॥

ত্ৱামেৱান্যে শিৱোক্তেন মাৰ্গেণ শিৱৰূপিণম্ ।
বহ্ৱাচাৰ্যৱিভেদেন ভগৱন্তম্ উপাসতে ॥ ৮ ॥

সৰ্ৱ এৱ যজন্তি ত্ৱাং সৰ্ৱদেৱমযেশ্ৱৰম্ ।
যেঽপ্যন্যদেৱতাভক্তা যদ্যপ্যন্যধিযঃ প্ৰভো ॥ ৯ ॥

যথাদ্ৰিপ্ৰভৱা নদ্যঃ পৰ্জন্যাপূৰিতাঃ প্ৰভো ।
ৱিশন্তি সৰ্ৱতঃ সিন্ধুং তদ্ৱত্ত্ৱাং গতযোঽন্ততঃ ॥ ১০ ॥

সত্ত্ৱং ৰজস্তম ইতি ভৱতঃ প্ৰকৃতেৰ্গুণাঃ ।
তেষু হি প্ৰাকৃতাঃ প্ৰোতা আব্ৰহ্মস্থাৱৰাদযঃ ॥ ১১ ॥

তুভ্যং নমস্তে ত্ৱৱিষক্তদৃষ্টযে
সৰ্ৱাত্মনে সৰ্ৱধিযাং চ সাক্ষিণে ।
গুণপ্ৰৱাহোঽযমৱিদ্যযা কৃতঃ
প্ৰৱৰ্ততে দেৱনৃতিৰ্যগাত্মসু ॥ ১২ ॥

অগ্নিৰ্মুখং তেঽৱনিৰঙ্ঘ্ৰিৰীক্ষণং
সূৰ্যো নভো নাভিৰথো দিশঃ শ্ৰুতিঃ ।
দ্যৌঃ কং সুৰেন্দ্ৰাস্তৱ বাহৱোঽৰ্ণৱাঃ
কুক্ষিৰ্মৰুত্ প্ৰাণবলং প্ৰকল্পিতম্ ॥ ১৩ ॥

ৰোমাণি ৱৃক্ষৌষধযঃ শিৰোৰুহা
মেঘাঃ পৰস্যাস্থিনখানি তেঽদ্ৰযঃ ।
নিমেষণং ৰাত্ৰ্যহনী প্ৰজাপতি-
ৰ্মেঢ্ৰস্তু ৱৃষ্টিস্তৱ ৱীৰ্যমিষ্যতে ॥ ১৪ ॥

ত্ৱয্যৱ্যযাত্মন্ পুৰুষে প্ৰকল্পিতা
লোকাঃ সপালা বহুজীৱসঙ্কুলাঃ ।
যথা জলে সঞ্জিহতে জলৌকসো-
ঽপ্যুদুম্বৰে ৱা মশকা মনোমযে ॥ ১৫ ॥

যানি যানীহ ৰূপাণি ক্ৰীডনাৰ্থং বিভৰ্ষি হি ।
তৈৰামৃষ্টশুচো লোকা মুদা গাযন্তি তে যশঃ ॥ ১৬ ॥

নমঃ কাৰণমত্স্যায প্ৰলযাব্ধিচৰায চ ।
হযশীৰ্ষ্ণে নমস্তুভ্যং মধুকৈটভমৃত্যৱে ॥ ১৭ ॥

অকূপাৰায বৃহতে নমো মন্দৰধাৰিণে ।
ক্ষিত্যুদ্ধাৰৱিহাৰায নমঃ শূকৰমূৰ্তযে ॥ ১৮ ॥

নমস্তেঽদ্ভুতসিংহায সাধুলোকভযাপহ ।
ৱামনায নমস্তুভ্যং ক্ৰান্তত্ৰিভুৱনায চ ॥ ১৯ ॥

নমো ভৃগুণাং পতযে দৃপ্তক্ষত্ৰৱনচ্ছিদে ।
নমস্তে ৰঘুৱৰ্যায ৰাৱণান্তকৰায চ ॥ ২০ ॥

নমস্তে ৱাসুদেৱায নমঃ সঙ্কৰ্ষণায চ ।
প্ৰদ্যুম্নাযনিৰুদ্ধায সাত্ৱতাং পতযে নমঃ ॥ ২১ ॥

নমো বুদ্ধায শুদ্ধায দৈত্যদানৱমোহিনে ।
ম্লেচ্ছপ্ৰাযক্ষত্ৰহন্ত্ৰে নমস্তে কল্কিৰূপিণে ॥ ২২ ॥

ভগৱন্ জীৱলোকোঽযং মোহিতস্তৱ মাযযা ।
অহং মমেত্যসদ্গ্ৰাহো ভ্ৰাম্যতে কৰ্মৱৰ্ত্মসু ॥ ২৩ ॥

অহং চাত্মাত্মজাগাৰদাৰাৰ্থস্ৱজনাদিষু ।
ভ্ৰমামি স্ৱপ্নকল্পেষু মূঢঃ সত্যধিযা ৱিভো ॥ ২৪ ॥

অনিত্যানাত্মদুঃখেষু ৱিপৰ্যযমতিৰ্হ্যহম্ ।
দ্ৱন্দ্ৱাৰামস্তমোৱিষ্টো ন জানে ত্ৱাত্মনঃ প্ৰিযম্ ॥ ২৫ ॥

যথাবুধো জলং হিত্ৱা প্ৰতিচ্ছন্নং তদুদ্ভৱৈঃ ।
অভ্যেতি মৃগতৃষ্ণাং ৱৈ তদ্ৱত্ত্ৱাহং পৰাঙ্মুখঃ ॥ ২৬ ॥

নোত্সহেঽহং কৃপণধীঃ কামকৰ্মহতং মনঃ ।
ৰোদ্ধুং প্ৰমাথিভিশ্চাক্ষৈৰ্হ্ৰিযমাণমিতস্ততঃ ॥ ২৭ ॥

সোঽহং তৱাঙ্ঘ্ৰ্যুপগতোঽস্ম্যসতাং দুৰাপং
তচ্চাপ্যহং ভৱদনুগ্ৰহ ঈশ মন্যে ।
পুংসো ভৱেদ্ যৰ্হি সংসৰণাপৱৰ্গ-
স্ত্ৱয্যব্জনাভ সদুপাসনযা মতিঃ স্যাত্ ॥ ২৮ ॥

নমো ৱিজ্ঞানমাত্ৰায সৰ্ৱপ্ৰত্যযহেতৱে ।
পুৰুষেশপ্ৰধানায ব্ৰহ্মণেঽনন্তশক্তযে ॥ ২৯ ॥

নমস্তে ৱাসুদেৱায সৰ্ৱভূতক্ষযায চ ।
হৃষীকেশ নমস্তুভ্যং প্ৰপন্নং পাহি মাং প্ৰভো ॥ ৩০ ॥