শ্রীমদ্ভাগবতম্ ১০.৪০

শ্রীঅক্রূর উবাচ
নতোঽস্ম্যহং ত্বাখিলহেতুহেতুং
নারাযণং পূরুষমাদ্যমব্যযম্ ।
যন্নাভিজাতাদরবিন্দকোষাদ্
ব্রহ্মাবিরাসীদ্ যত এষ লোকঃ ॥ ১ ॥

ভূস্তোযমগ্নিঃ পবনং খমাদি-
র্মহানজাদির্মন ইন্দ্রিযাণি ।
সর্বেন্দ্রিযার্থা বিবুধাশ্চ সর্বে
যে হেতবস্তে জগতোঽঙ্গভূতাঃ ॥ ২ ॥

নৈতে স্বরূপং বিদুরাত্মনস্তে
হ্যজাদযোঽনাত্মতযা গৃহীতাঃ ।
অজোঽনুবদ্ধঃ স গুণৈরজাযা
গুণাত্ পরং বেদ ন তে স্বরূপম্ ॥ ৩ ॥

ত্বাং যোগিনো যজন্ত্যদ্ধা মহাপুরুষমীশ্বরম্ ।
সাধ্যাত্মং সাধিভূতং চ সাধিদৈবং চ সাধবঃ ॥ ৪ ॥

ত্রয্যা চ বিদ্যযা কেচিত্ত্বাং বৈ বৈতানিকা দ্বিজাঃ ।
যজন্তে বিততৈর্যজ্ঞৈর্নানা রূপামরাখ্যযা ॥ ৫ ॥

একে ত্বাখিলকর্মাণি সন্ন্যস্যোপশমং গতাঃ ।
জ্ঞানিনো জ্ঞানযজ্ঞেন যজন্তি জ্ঞানবিগ্রহম্ ॥ ৬ ॥

অন্যে চ সংস্কৃতাত্মানো বিধিনাভিহিতেন তে ।
যজন্তি ত্বন্মযাস্ত্বাং বৈ বহুমূর্ত্যেকমূর্তিকম্ ॥ ৭ ॥

ত্বামেবান্যে শিবোক্তেন মার্গেণ শিবরূপিণম্ ।
বহ্বাচার্যবিভেদেন ভগবন্তম্ উপাসতে ॥ ৮ ॥

সর্ব এব যজন্তি ত্বাং সর্বদেবমযেশ্বরম্ ।
যেঽপ্যন্যদেবতাভক্তা যদ্যপ্যন্যধিযঃ প্রভো ॥ ৯ ॥

যথাদ্রিপ্রভবা নদ্যঃ পর্জন্যাপূরিতাঃ প্রভো ।
বিশন্তি সর্বতঃ সিন্ধুং তদ্বত্ত্বাং গতযোঽন্ততঃ ॥ ১০ ॥

সত্ত্বং রজস্তম ইতি ভবতঃ প্রকৃতের্গুণাঃ ।
তেষু হি প্রাকৃতাঃ প্রোতা আব্রহ্মস্থাবরাদযঃ ॥ ১১ ॥

তুভ্যং নমস্তে ত্ববিষক্তদৃষ্টযে
সর্বাত্মনে সর্বধিযাং চ সাক্ষিণে ।
গুণপ্রবাহোঽযমবিদ্যযা কৃতঃ
প্রবর্ততে দেবনৃতির্যগাত্মসু ॥ ১২ ॥

অগ্নির্মুখং তেঽবনিরঙ্ঘ্রিরীক্ষণং
সূর্যো নভো নাভিরথো দিশঃ শ্রুতিঃ ।
দ্যৌঃ কং সুরেন্দ্রাস্তব বাহবোঽর্ণবাঃ
কুক্ষির্মরুত্ প্রাণবলং প্রকল্পিতম্ ॥ ১৩ ॥

রোমাণি বৃক্ষৌষধযঃ শিরোরুহা
মেঘাঃ পরস্যাস্থিনখানি তেঽদ্রযঃ ।
নিমেষণং রাত্র্যহনী প্রজাপতি-
র্মেঢ্রস্তু বৃষ্টিস্তব বীর্যমিষ্যতে ॥ ১৪ ॥

ত্বয্যব্যযাত্মন্ পুরুষে প্রকল্পিতা
লোকাঃ সপালা বহুজীবসঙ্কুলাঃ ।
যথা জলে সঞ্জিহতে জলৌকসো-
ঽপ্যুদুম্বরে বা মশকা মনোমযে ॥ ১৫ ॥

যানি যানীহ রূপাণি ক্রীডনার্থং বিভর্ষি হি ।
তৈরামৃষ্টশুচো লোকা মুদা গাযন্তি তে যশঃ ॥ ১৬ ॥

নমঃ কারণমত্স্যায প্রলযাব্ধিচরায চ ।
হযশীর্ষ্ণে নমস্তুভ্যং মধুকৈটভমৃত্যবে ॥ ১৭ ॥

অকূপারায বৃহতে নমো মন্দরধারিণে ।
ক্ষিত্যুদ্ধারবিহারায নমঃ শূকরমূর্তযে ॥ ১৮ ॥

নমস্তেঽদ্ভুতসিংহায সাধুলোকভযাপহ ।
বামনায নমস্তুভ্যং ক্রান্তত্রিভুবনায চ ॥ ১৯ ॥

নমো ভৃগুণাং পতযে দৃপ্তক্ষত্রবনচ্ছিদে ।
নমস্তে রঘুবর্যায রাবণান্তকরায চ ॥ ২০ ॥

নমস্তে বাসুদেবায নমঃ সঙ্কর্ষণায চ ।
প্রদ্যুম্নাযনিরুদ্ধায সাত্বতাং পতযে নমঃ ॥ ২১ ॥

নমো বুদ্ধায শুদ্ধায দৈত্যদানবমোহিনে ।
ম্লেচ্ছপ্রাযক্ষত্রহন্ত্রে নমস্তে কল্কিরূপিণে ॥ ২২ ॥

ভগবন্ জীবলোকোঽযং মোহিতস্তব মাযযা ।
অহং মমেত্যসদ্গ্রাহো ভ্রাম্যতে কর্মবর্ত্মসু ॥ ২৩ ॥

অহং চাত্মাত্মজাগারদারার্থস্বজনাদিষু ।
ভ্রমামি স্বপ্নকল্পেষু মূঢঃ সত্যধিযা বিভো ॥ ২৪ ॥

অনিত্যানাত্মদুঃখেষু বিপর্যযমতির্হ্যহম্ ।
দ্বন্দ্বারামস্তমোবিষ্টো ন জানে ত্বাত্মনঃ প্রিযম্ ॥ ২৫ ॥

যথাবুধো জলং হিত্বা প্রতিচ্ছন্নং তদুদ্ভবৈঃ ।
অভ্যেতি মৃগতৃষ্ণাং বৈ তদ্বত্ত্বাহং পরাঙ্মুখঃ ॥ ২৬ ॥

নোত্সহেঽহং কৃপণধীঃ কামকর্মহতং মনঃ ।
রোদ্ধুং প্রমাথিভিশ্চাক্ষৈর্হ্রিযমাণমিতস্ততঃ ॥ ২৭ ॥

সোঽহং তবাঙ্ঘ্র্যুপগতোঽস্ম্যসতাং দুরাপং
তচ্চাপ্যহং ভবদনুগ্রহ ঈশ মন্যে ।
পুংসো ভবেদ্ যর্হি সংসরণাপবর্গ-
স্ত্বয্যব্জনাভ সদুপাসনযা মতিঃ স্যাত্ ॥ ২৮ ॥

নমো বিজ্ঞানমাত্রায সর্বপ্রত্যযহেতবে ।
পুরুষেশপ্রধানায ব্রহ্মণেঽনন্তশক্তযে ॥ ২৯ ॥

নমস্তে বাসুদেবায সর্বভূতক্ষযায চ ।
হৃষীকেশ নমস্তুভ্যং প্রপন্নং পাহি মাং প্রভো ॥ ৩০ ॥