ശ്രീമദ്ഭാഗവതമ് ൧൦.൪൦

ശ്രീഅക്രൂര ഉവാച
നതോഽസ്മ്യഹം ത്വാഖിലഹേതുഹേതും
നാരായണം പൂരുഷമാദ്യമവ്യയമ് ।
യന്നാഭിജാതാദരവിന്ദകോഷാദ്
ബ്രഹ്മാവിരാസീദ് യത ഏഷ ലോകഃ ॥ ൧ ॥

ഭൂസ്തോയമഗ്നിഃ പവനം ഖമാദി-
ര്മഹാനജാദിര്മന ഇന്ദ്രിയാണി ।
സര്വേന്ദ്രിയാര്ഥാ വിബുധാശ്ച സര്വേ
യേ ഹേതവസ്തേ ജഗതോഽങ്ഗഭൂതാഃ ॥ ൨ ॥

നൈതേ സ്വരൂപം വിദുരാത്മനസ്തേ
ഹ്യജാദയോഽനാത്മതയാ ഗൃഹീതാഃ ।
അജോഽനുബദ്ധഃ സ ഗുണൈരജായാ
ഗുണാത് പരം വേദ ന തേ സ്വരൂപമ് ॥ ൩ ॥

ത്വാം യോഗിനോ യജന്ത്യദ്ധാ മഹാപുരുഷമീശ്വരമ് ।
സാധ്യാത്മം സാധിഭൂതം ച സാധിദൈവം ച സാധവഃ ॥ ൪ ॥

ത്രയ്യാ ച വിദ്യയാ കേചിത്ത്വാം വൈ വൈതാനികാ ദ്വിജാഃ ।
യജന്തേ വിതതൈര്യജ്ഞൈര്നാനാ രൂപാമരാഖ്യയാ ॥ ൫ ॥

ഏകേ ത്വാഖിലകര്മാണി സന്ന്യസ്യോപശമം ഗതാഃ ।
ജ്ഞാനിനോ ജ്ഞാനയജ്ഞേന യജന്തി ജ്ഞാനവിഗ്രഹമ് ॥ ൬ ॥

അന്യേ ച സംസ്കൃതാത്മാനോ വിധിനാഭിഹിതേന തേ ।
യജന്തി ത്വന്മയാസ്ത്വാം വൈ ബഹുമൂര്ത്യേകമൂര്തികമ് ॥ ൭ ॥

ത്വാമേവാന്യേ ശിവോക്തേന മാര്ഗേണ ശിവരൂപിണമ് ।
ബഹ്വാചാര്യവിഭേദേന ഭഗവന്തമ് ഉപാസതേ ॥ ൮ ॥

സര്വ ഏവ യജന്തി ത്വാം സര്വദേവമയേശ്വരമ് ।
യേഽപ്യന്യദേവതാഭക്താ യദ്യപ്യന്യധിയഃ പ്രഭോ ॥ ൯ ॥

യഥാദ്രിപ്രഭവാ നദ്യഃ പര്ജന്യാപൂരിതാഃ പ്രഭോ ।
വിശന്തി സര്വതഃ സിന്ധും തദ്വത്ത്വാം ഗതയോഽന്തതഃ ॥ ൧൦ ॥

സത്ത്വം രജസ്തമ ഇതി ഭവതഃ പ്രകൃതേര്ഗുണാഃ ।
തേഷു ഹി പ്രാകൃതാഃ പ്രോതാ ആബ്രഹ്മസ്ഥാവരാദയഃ ॥ ൧൧ ॥

തുഭ്യം നമസ്തേ ത്വവിഷക്തദൃഷ്ടയേ
സര്വാത്മനേ സര്വധിയാം ച സാക്ഷിണേ ।
ഗുണപ്രവാഹോഽയമവിദ്യയാ കൃതഃ
പ്രവര്തതേ ദേവനൃതിര്യഗാത്മസു ॥ ൧൨ ॥

അഗ്നിര്മുഖം തേഽവനിരങ്ഘ്രിരീക്ഷണം
സൂര്യോ നഭോ നാഭിരഥോ ദിശഃ ശ്രുതിഃ ।
ദ്യൌഃ കം സുരേന്ദ്രാസ്തവ ബാഹവോഽര്ണവാഃ
കുക്ഷിര്മരുത് പ്രാണബലം പ്രകല്പിതമ് ॥ ൧൩ ॥

രോമാണി വൃക്ഷൌഷധയഃ ശിരോരുഹാ
മേഘാഃ പരസ്യാസ്ഥിനഖാനി തേഽദ്രയഃ ।
നിമേഷണം രാത്ര്യഹനീ പ്രജാപതി-
ര്മേഢ്രസ്തു വൃഷ്ടിസ്തവ വീര്യമിഷ്യതേ ॥ ൧൪ ॥

ത്വയ്യവ്യയാത്മന് പുരുഷേ പ്രകല്പിതാ
ലോകാഃ സപാലാ ബഹുജീവസങ്കുലാഃ ।
യഥാ ജലേ സഞ്ജിഹതേ ജലൌകസോ-
ഽപ്യുദുമ്ബരേ വാ മശകാ മനോമയേ ॥ ൧൫ ॥

യാനി യാനീഹ രൂപാണി ക്രീഡനാര്ഥം ബിഭര്ഷി ഹി ।
തൈരാമൃഷ്ടശുചോ ലോകാ മുദാ ഗായന്തി തേ യശഃ ॥ ൧൬ ॥

നമഃ കാരണമത്സ്യായ പ്രലയാബ്ധിചരായ ച ।
ഹയശീര്ഷ്ണേ നമസ്തുഭ്യം മധുകൈടഭമൃത്യവേ ॥ ൧൭ ॥

അകൂപാരായ ബൃഹതേ നമോ മന്ദരധാരിണേ ।
ക്ഷിത്യുദ്ധാരവിഹാരായ നമഃ ശൂകരമൂര്തയേ ॥ ൧൮ ॥

നമസ്തേഽദ്ഭുതസിംഹായ സാധുലോകഭയാപഹ ।
വാമനായ നമസ്തുഭ്യം ക്രാന്തത്രിഭുവനായ ച ॥ ൧൯ ॥

നമോ ഭൃഗുണാം പതയേ ദൃപ്തക്ഷത്രവനച്ഛിദേ ।
നമസ്തേ രഘുവര്യായ രാവണാന്തകരായ ച ॥ ൨൦ ॥

നമസ്തേ വാസുദേവായ നമഃ സങ്കര്ഷണായ ച ।
പ്രദ്യുമ്നായനിരുദ്ധായ സാത്വതാം പതയേ നമഃ ॥ ൨൧ ॥

നമോ ബുദ്ധായ ശുദ്ധായ ദൈത്യദാനവമോഹിനേ ।
മ്ലേച്ഛപ്രായക്ഷത്രഹന്ത്രേ നമസ്തേ കല്കിരൂപിണേ ॥ ൨൨ ॥

ഭഗവന് ജീവലോകോഽയം മോഹിതസ്തവ മായയാ ।
അഹം മമേത്യസദ്ഗ്രാഹോ ഭ്രാമ്യതേ കര്മവര്ത്മസു ॥ ൨൩ ॥

അഹം ചാത്മാത്മജാഗാരദാരാര്ഥസ്വജനാദിഷു ।
ഭ്രമാമി സ്വപ്നകല്പേഷു മൂഢഃ സത്യധിയാ വിഭോ ॥ ൨൪ ॥

അനിത്യാനാത്മദുഃഖേഷു വിപര്യയമതിര്ഹ്യഹമ് ।
ദ്വന്ദ്വാരാമസ്തമോവിഷ്ടോ ന ജാനേ ത്വാത്മനഃ പ്രിയമ് ॥ ൨൫ ॥

യഥാബുധോ ജലം ഹിത്വാ പ്രതിച്ഛന്നം തദുദ്ഭവൈഃ ।
അഭ്യേതി മൃഗതൃഷ്ണാം വൈ തദ്വത്ത്വാഹം പരാങ്മുഖഃ ॥ ൨൬ ॥

നോത്സഹേഽഹം കൃപണധീഃ കാമകര്മഹതം മനഃ ।
രോദ്ധും പ്രമാഥിഭിശ്ചാക്ഷൈര്ഹ്രിയമാണമിതസ്തതഃ ॥ ൨൭ ॥

സോഽഹം തവാങ്ഘ്ര്യുപഗതോഽസ്മ്യസതാം ദുരാപം
തച്ചാപ്യഹം ഭവദനുഗ്രഹ ഈശ മന്യേ ।
പുംസോ ഭവേദ് യര്ഹി സംസരണാപവര്ഗ-
സ്ത്വയ്യബ്ജനാഭ സദുപാസനയാ മതിഃ സ്യാത് ॥ ൨൮ ॥

നമോ വിജ്ഞാനമാത്രായ സര്വപ്രത്യയഹേതവേ ।
പുരുഷേശപ്രധാനായ ബ്രഹ്മണേഽനന്തശക്തയേ ॥ ൨൯ ॥

നമസ്തേ വാസുദേവായ സര്വഭൂതക്ഷയായ ച ।
ഹൃഷീകേശ നമസ്തുഭ്യം പ്രപന്നം പാഹി മാം പ്രഭോ ॥ ൩൦ ॥