ৰাজোৱাচ
যদেতদ্ভগৱত আদিত্যস্য মেৰুং ধ্ৰুৱং চ প্ৰদক্ষিণেন পৰিক্ৰামতো ৰাশীনামভিমুখং প্ৰচলিতং চাপ্ৰদক্ষিণং ভগৱতোপৱৰ্ণিতমমুষ্য ৱযং কথমনুমিমীমহীতি ॥ ১ ॥
যদেতদ্ভগৱত আদিত্যস্য মেৰুং ধ্ৰুৱং চ প্ৰদক্ষিণেন পৰিক্ৰামতো ৰাশীনামভিমুখং প্ৰচলিতং চাপ্ৰদক্ষিণং ভগৱতোপৱৰ্ণিতমমুষ্য ৱযং কথমনুমিমীমহীতি ॥ ১ ॥
স হোৱাচ
যথা কুলালচক্ৰেণ ভ্ৰমতা সহ ভ্ৰমতাং তদাশ্ৰযাণাং পিপীলিকাদীনাং গতিৰন্যৈৱ প্ৰদেশান্তৰেষ্ৱপ্যুপলভ্যমানত্ৱাদেৱং নক্ষত্ৰৰাশিভিৰুপলক্ষিতেন কালচক্ৰেণ ধ্ৰুৱং মেৰুং চ প্ৰদক্ষিণেন পৰিধাৱতা সহ পৰিধাৱমানানাং তদাশ্ৰযাণাং সূৰ্যাদীনাং গ্ৰহাণাং গতিৰন্যৈৱ নক্ষত্ৰান্তৰে ৰাশ্যন্তৰে চোপলভ্যমানত্ৱাত্ ॥ ২ ॥
যথা কুলালচক্ৰেণ ভ্ৰমতা সহ ভ্ৰমতাং তদাশ্ৰযাণাং পিপীলিকাদীনাং গতিৰন্যৈৱ প্ৰদেশান্তৰেষ্ৱপ্যুপলভ্যমানত্ৱাদেৱং নক্ষত্ৰৰাশিভিৰুপলক্ষিতেন কালচক্ৰেণ ধ্ৰুৱং মেৰুং চ প্ৰদক্ষিণেন পৰিধাৱতা সহ পৰিধাৱমানানাং তদাশ্ৰযাণাং সূৰ্যাদীনাং গ্ৰহাণাং গতিৰন্যৈৱ নক্ষত্ৰান্তৰে ৰাশ্যন্তৰে চোপলভ্যমানত্ৱাত্ ॥ ২ ॥
স এষ ভগৱানাদিপুৰুষ এৱ সাক্ষান্নাৰাযণো লোকানাং স্ৱস্তয আত্মানং ত্ৰযীমযং কৰ্মৱিশুদ্ধিনিমিত্তং কৱিভিৰপি চ ৱেদেন ৱিজিজ্ঞাস্যমানো দ্ৱাদশধা ৱিভজ্য ষট্সু ৱসন্তাদিষ্ৱৃতুষু যথোপজোষমৃতুগুণান্ ৱিদধাতি ॥ ৩ ॥
তমেতমিহ পুৰুষাস্ত্ৰয্যা ৱিদ্যযা ৱৰ্ণাশ্ৰমাচাৰানুপথা উচ্চাৱচৈঃ কৰ্মভিৰাম্নাতৈৰ্যোগৱিতানৈশ্চ শ্ৰদ্ধযা যজন্তোঽঞ্জসা শ্ৰেযঃ সমধিগচ্ছন্তি ॥ ৪ ॥
অথ স এষ আত্মা লোকানাং দ্যাৱাপৃথিৱ্যোৰন্তৰেণ নভোৱলযস্য কালচক্ৰগতো দ্ৱাদশ মাসান্ ভুঙ্ক্তে ৰাশিসংজ্ঞান্ সংৱত্সৰাৱযৱান্মাসঃ পক্ষদ্ৱযং দিৱা নক্তং চেতি সপাদৰ্ক্ষদ্ৱযমুপদিশন্তি যাৱতা ষষ্ঠমংশং ভুঞ্জীত স ৱৈ ঋতুৰিত্যুপদিশ্যতে সংৱত্সৰাৱযৱঃ ॥ ৫ ॥
অথ চ যাৱতাৰ্ধেন নভোৱীথ্যাং প্ৰচৰতি তং কালমযনমাচক্ষতে ॥ ৬ ॥
অথ চ যাৱন্নভোমণ্ডলং সহ দ্যাৱাপৃথিৱ্যোৰ্মণ্ডলাভ্যাং কাৰ্ত্স্ন্যেন স হ ভুঞ্জীত তং কালং সংৱত্সৰং পৰিৱত্সৰমিডাৱত্সৰমনুৱত্সৰং ৱত্সৰমিতি ভানোৰ্মান্দ্যশৈঘ্ৰ্যসমগতিভিঃ সমামনন্তি ॥ ৭ ॥
এৱং চন্দ্ৰমা অৰ্কগভস্তিভ্য উপৰিষ্টাল্লক্ষযোজনত উপলভ্যমানোঽৰ্কস্য সংৱত্সৰভুক্তিং পক্ষাভ্যাং মাসভুক্তিং সপাদৰ্ক্ষাভ্যাং দিনেনৈৱ পক্ষভুক্তিমগ্ৰচাৰী দ্ৰুততৰগমনো ভুঙ্ক্তে ॥ ৮ ॥
অথ চাপূৰ্যমাণাভিশ্চ কলাভিৰমৰাণাং ক্ষীযমাণাভিশ্চ কলাভিঃ পিতৃণামহোৰাত্ৰাণি পূৰ্ৱপক্ষাপৰপক্ষাভ্যাং ৱিতন্ৱানঃ সৰ্ৱজীৱনিৱহপ্ৰাণো জীৱশ্চৈকমেকং নক্ষত্ৰং ত্ৰিংশতা মুহূৰ্তৈৰ্ভুঙ্ক্তে ॥ ৯ ॥
য এষ ষোডশকলঃ পুৰুষো ভগৱান্মনোমযোঽন্নমযোঽমৃতমযো দেৱপিতৃমনুষ্যভূতপশুপক্ষিসৰীসৃপৱীৰুধাং প্ৰাণাপ্যাযনশীলত্ৱাত্সৰ্ৱময ইতি ৱৰ্ণযন্তি ॥ ১০ ॥
তত উপৰিষ্টাত্দ্ৱি্লক্ষযোজনতো নক্ষত্ৰাণি মেৰুং দক্ষিণেনৈৱ কালাযন ঈশ্ৱৰযোজিতানি সহাভিজিতাষ্টাৱিংশতিঃ ॥ ১১ ॥
তত উপৰিষ্টাদুশনা দ্ৱিলক্ষযোজনত উপলভ্যতে পুৰতঃ পশ্চাত্সহৈৱ ৱাৰ্কস্য শৈঘ্ৰ্যমান্দ্যসাম্যাভিৰ্গতিভিৰৰ্কৱচ্চৰতি লোকানাং নিত্যদানুকূল এৱ প্ৰাযেণ ৱৰ্ষযংশ্চাৰেণানুমীযতে স ৱৃষ্টিৱিষ্টম্ভগ্ৰহোপশমনঃ ॥ ১২ ॥
উশনসা বুধো ৱ্যাখ্যাতস্তত উপৰিষ্টাদ্ৱিলক্ষযোজনতো বুধঃ সোমসুত উপলভ্যমানঃ প্ৰাযেণ শুভকৃদ্যদাৰ্কাদ্ ৱ্যতিৰিচ্যেত তদাতিৱাতাভ্ৰপ্ৰাযানাৱৃষ্ট্যাদিভযমাশংসতে ॥ ১৩ ॥
অত ঊৰ্ধ্ৱমঙ্গাৰকোঽপি যোজনলক্ষদ্ৱিতয উপলভ্যমানস্ত্ৰিভিস্ত্ৰিভিঃ পক্ষৈৰেকৈকশো ৰাশীন্দ্ৱাদশানুভুঙ্ক্তে যদি ন ৱক্ৰেণাভিৱৰ্ততে প্ৰাযেণাশুভগ্ৰহোঽঘশংসঃ ॥ ১৪ ॥
তত উপৰিষ্টাদ্ৱিলক্ষযোজনান্তৰগতা ভগৱান্ বৃহস্পতিৰেকৈকস্মিন্ ৰাশৌ পৰিৱত্সৰং পৰিৱত্সৰং চৰতি যদি ন ৱক্ৰঃ স্যাত্প্ৰাযেণানুকূলো ব্ৰাহ্মণকুলস্য ॥ ১৫ ॥
তত উপৰিষ্টাদ্যোজনলক্ষদ্ৱযাত্প্ৰতীযমানঃ শনৈশ্চৰ একৈকস্মিন্ ৰাশৌ ত্ৰিংশন্মাসান্ ৱিলম্বমানঃ সৰ্ৱানেৱানুপৰ্যেতি তাৱদ্ভিৰনুৱত্সৰৈঃ প্ৰাযেণ হি সৰ্ৱেষামশান্তিকৰঃ ॥ ১৬ ॥
তত উত্তৰস্মাদৃষয একাদশলক্ষযোজনান্তৰ উপলভ্যন্তে য এৱ লোকানাং শমনুভাৱযন্তো ভগৱতো ৱিষ্ণোৰ্যত্পৰমং পদং প্ৰদক্ষিণং প্ৰক্ৰমন্তি ॥ ১৭ ॥