ശ്രീശുക ഉവാച
അഥ തസ്മാത്പരതസ്ത്രയോദശലക്ഷയോജനാന്തരതോ യത്തദ്വിഷ്ണോഃ പരമം പദമഭിവദന്തി യത്ര ഹ മഹാഭാഗവതോ ധ്രുവ ഔത്താനപാദിരഗ്നിനേന്ദ്രേണ പ്രജാപതിനാ കശ്യപേന ധര്മേണ ച സമകാലയുഗ്ഭിഃ സബഹുമാനം ദക്ഷിണതഃ ക്രിയമാണ ഇദാനീമപി കല്പജീവിനാമാജീവ്യ ഉപാസ്തേ തസ്യേഹാനുഭാവ ഉപവര്ണിതഃ ॥ ൧ ॥
അഥ തസ്മാത്പരതസ്ത്രയോദശലക്ഷയോജനാന്തരതോ യത്തദ്വിഷ്ണോഃ പരമം പദമഭിവദന്തി യത്ര ഹ മഹാഭാഗവതോ ധ്രുവ ഔത്താനപാദിരഗ്നിനേന്ദ്രേണ പ്രജാപതിനാ കശ്യപേന ധര്മേണ ച സമകാലയുഗ്ഭിഃ സബഹുമാനം ദക്ഷിണതഃ ക്രിയമാണ ഇദാനീമപി കല്പജീവിനാമാജീവ്യ ഉപാസ്തേ തസ്യേഹാനുഭാവ ഉപവര്ണിതഃ ॥ ൧ ॥
സ ഹി സര്വേഷാം ജ്യോതിര്ഗണാനാം ഗ്രഹനക്ഷത്രാദീനാമനിമിഷേണാവ്യക്തരംഹസാ ഭഗവതാ കാലേന ഭ്രാമ്യമാണാനാം സ്ഥാണുരിവാവഷ്ടമ്ഭ ഈശ്വരേണ വിഹിതഃ ശശ്വദവഭാസതേ ॥ ൨ ॥
യഥാ മേഢീസ്തമ്ഭ ആക്രമണപശവഃ സംയോജിതാസ്ത്രിഭിസ്ത്രിഭിഃ സവനൈര്യഥാസ്ഥാനം മണ്ഡലാനി ചരന്ത്യേവം ഭഗണാ ഗ്രഹാദയ ഏതസ്മിന്നന്തര്ബഹിര്യോഗേന കാലചക്ര ആയോജിതാ ധ്രുവമേവാവലമ്ബ്യ വായുനോദീര്യമാണാ ആകല്പാന്തം പരിചങ്ക്രമന്തി നഭസി യഥാ മേഘാഃ ശ്യേനാദയോ വായുവശാഃ കര്മസാരഥയഃ പരിവര്തന്തേ ഏവം ജ്യോതിര്ഗണാഃ പ്രകൃതിപുരുഷസംയോഗാനുഗൃഹീതാഃ കര്മനിര്മിതഗതയോ ഭുവി ന പതന്തി ॥ ൩ ॥
കേചനൈതജ്ജ്യോതിരനീകം ശിശുമാരസംസ്ഥാനേന ഭഗവതോ വാസുദേവസ്യ യോഗധാരണായാമനുവര്ണയന്തി ॥ ൪ ॥
യസ്യ പുച്ഛാഗ്രേഽവാക്ശിരസഃ കുണ്ഡലീഭൂതദേഹസ്യ ധ്രുവ ഉപകല്പിതസ്തസ്യ ലാങ്ഗൂലേ പ്രജാപതിരഗ്നിരിന്ദ്രോ ധര്മ ഇതി പുച്ഛമൂലേ ധാതാ വിധാതാ ച കട്യാം സപ്തര്ഷയഃ । തസ്യ ദക്ഷിണാവര്തകുണ്ഡലീഭൂതശരീരസ്യ യാന്യുദഗയനാനി ദക്ഷിണപാര്ശ്വേ തു നക്ഷത്രാണ്യുപകല്പയന്തി ദക്ഷിണായനാനി തു സവ്യേ । യഥാ ശിശുമാരസ്യ കുണ്ഡലാഭോഗസന്നിവേശസ്യ പാര്ശ്വയോരുഭയോരപ്യവയവാഃ സമസംഖ്യാ ഭവന്തി । പൃഷ്ഠേ ത്വജവീഥീ ആകാശഗങ്ഗാ ചോദരതഃ ॥ ൫ ॥
പുനര്വസുപുഷ്യൌ ദക്ഷിണവാമയോഃ ശ്രോണ്യോരാര്ദ്രാശ്ലേഷേ ച ദക്ഷിണവാമയോഃ പശ്ചിമയോഃ പാദയോരഭിജിദുത്തരാഷാഢേ ദക്ഷിണവാമയോര്നാസികയോര്യഥാസങ്ഖ്യം ശ്രവണപൂര്വാഷാഢേ ദക്ഷിണവാമയോര്ലോചനയോര്ധനിഷ്ഠാ മൂലം ച ദക്ഷിണവാമയോഃ കര്ണയോര്മഘാദീന്യഷ്ട നക്ഷത്രാണി ദക്ഷിണായനാനി വാമപാര്ശ്വവങ്ക്രിഷു യുഞ്ജീത തഥൈവ മൃഗശീര്ഷാദീന്യുദഗയനാനി ദക്ഷിണപാര്ശ്വവങ്ക്രിഷു പ്രാതിലോമ്യേന പ്രയുഞ്ജീത ശതഭിഷാജ്യേഷ്ഠേ സ്കന്ധയോര്ദക്ഷിണവാമയോര്ന്യസേത് ॥ ൬ ॥
ഉത്തരാഹനാവഗസ്തിരധരാഹനൌ യമോ മുഖേഷു ചാങ്ഗാരകഃ ശനൈശ്ചര ഉപസ്ഥേ ബൃഹസ്പതിഃ കകുദി വക്ഷസ്യാദിത്യോ ഹൃദയേ നാരായണോ മനസി ചന്ദ്രോ നാഭ്യാമുശനാ സ്തനയോരശ്വിനൌ ബുധഃ പ്രാണാപാനയോ രാഹുര്ഗലേ കേതവഃ സര്വാങ്ഗേഷു രോമസു സര്വേ താരാഗണാഃ ॥ ൭ ॥
ഏതദു ഹൈവ ഭഗവതോ വിഷ്ണോഃ സര്വദേവതാമയം രൂപമഹരഹഃ സന്ധ്യായാം പ്രയതോ വാഗ്യതോ നിരീക്ഷമാണ ഉപതിഷ്ഠേത നമോ ജ്യോതിര്ലോകായ കാലായനായാനിമിഷാം പതയേ മഹാപുരുഷായാഭിധീമഹീതി ॥ ൮ ॥
ഗ്രഹര്ക്ഷതാരാമയമാധിദൈവികം
പാപാപഹം മന്ത്രകൃതാം ത്രികാലമ് ।
നമസ്യതഃ സ്മരതോ വാ ത്രികാലം
നശ്യേത തത്കാലജമാശു പാപമ് ॥ ൯ ॥
പാപാപഹം മന്ത്രകൃതാം ത്രികാലമ് ।
നമസ്യതഃ സ്മരതോ വാ ത്രികാലം
നശ്യേത തത്കാലജമാശു പാപമ് ॥ ൯ ॥