শ্ৰীমদ্ভাগৱতম্ ৫.৭

শ্ৰীশুক উৱাচ
ভৰতস্তু মহাভাগৱতো যদা ভগৱতাৱনিতলপৰিপালনায সঞ্চিন্তিতস্তদনুশাসনপৰঃ পঞ্চজনীং ৱিশ্ৱৰূপদুহিতৰমুপযেমে ॥ ১ ॥

তস্যামু হ ৱা আত্মজান্ কাৰ্ত্স্ন্যেনানুৰূপানাত্মনঃ পঞ্চ জনযামাস ভূতাদিৰিৱ ভূতসূক্ষ্মাণি সুমতিং ৰাষ্ট্ৰভৃতং সুদৰ্শনমাৱৰণং ধূম্ৰকেতুমিতি ॥ ২ ॥

অজনাভং নামৈতদ্ৱৰ্ষং ভাৰতমিতি যত আৰভ্য ৱ্যপদিশন্তি ॥ ৩ ॥

স বহুৱিন্মহীপতিঃ পিতৃপিতামহৱদুৰুৱত্সলতযা স্ৱে স্ৱে কৰ্মণি ৱৰ্তমানাঃ প্ৰজাঃ স্ৱধৰ্মমনুৱৰ্তমানঃ পৰ্যপালযত্ ॥ ৪ ॥

ঈজে চ ভগৱন্তং যজ্ঞক্ৰতুৰূপং ক্ৰতুভিৰুচ্চাৱচৈঃ শ্ৰদ্ধযাঽঽহৃতাগ্নিহোত্ৰদৰ্শপূৰ্ণমাসচাতুৰ্মাস্যপশুসোমানাং প্ৰকৃতিৱিকৃতিভিৰনুসৱনং চাতুৰ্হোত্ৰৱিধিনা ॥ ৫ ॥

সম্প্ৰচৰত্সু নানাযাগেষু ৱিৰচিতাঙ্গক্ৰিযেষ্ৱপূৰ্ৱং যত্তত্ক্ৰিযাফলং ধৰ্মাখ্যং পৰে ব্ৰহ্মণি যজ্ঞপুৰুষে সৰ্ৱদেৱতালিঙ্গানাং মন্ত্ৰাণামৰ্থনিযামকতযা সাক্ষাত্কৰ্তৰি পৰদেৱতাযাং ভগৱতি ৱাসুদেৱ এৱ ভাৱযমান আত্মনৈপুণ্যমৃদিতকষাযো হৱিঃষ্ৱধ্ৱৰ্যুভিৰ্গৃহ্যমাণেষু স যজমানো যজ্ঞভাজো দেৱাংস্তান্ পুৰুষাৱযৱেষ্ৱভ্যধ্যাযত্ ॥ ৬ ॥

এৱং কৰ্মৱিশুদ্ধ্যা ৱিশুদ্ধসত্ত্ৱস্যান্তৰ্হৃদযাকাশশৰীৰে ব্ৰহ্মণি ভগৱতি ৱাসুদেৱে মহাপুৰুষৰূপোপলক্ষণে শ্ৰীৱত্সকৌস্তুভৱনমালাৰিদৰগদাদিভিৰুপলক্ষিতে নিজপুৰুষহৃল্লিখিতেনাত্মনি পুৰুষৰূপেণ ৱিৰোচমান উচ্চৈস্তৰাং ভক্তিৰনুদিনমেধমানৰযাজাযত ॥ ৭ ॥

এৱং ৱৰ্ষাযুতসহস্ৰপৰ্যন্তাৱসিতকৰ্মনিৰ্ৱাণাৱসৰোঽধিভুজ্যমানং স্ৱতনযেভ্যো ৰিক্থং পিতৃপৈতামহং যথাদাযং ৱিভজ্য স্ৱযং সকলসম্পন্নিকেতাত্স্ৱনিকেতাত্ পুলহাশ্ৰমং প্ৰৱৱ্ৰাজ ॥ ৮ ॥

যত্ৰ হ ৱাৱ ভগৱান্ হৰিৰদ্যাপি তত্ৰত্যানাং নিজজনানাং ৱাত্সল্যেন সন্নিধাপ্যত ইচ্ছাৰূপেণ ॥ ৯ ॥

যত্ৰাশ্ৰমপদান্যুভযতোনাভিভিৰ্দৃষচ্চক্ৰৈশ্চক্ৰনদী নাম সৰিত্প্ৰৱৰা সৰ্ৱতঃ পৱিত্ৰীকৰোতি ॥ ১০ ॥

তস্মিন্ ৱাৱ কিল স একলঃ পুলহাশ্ৰমোপৱনে ৱিৱিধকুসুমকিসলযতুলসিকাম্বুভিঃ কন্দমূলফলোপহাৰৈশ্চ সমীহমানো ভগৱত আৰাধনং ৱিৱিক্ত উপৰতৱিষযাভিলাষ উপভৃতোপশমঃ পৰাং নিৰ্ৱৃতিমৱাপ ॥ ১১ ॥

তযেত্থমৱিৰতপুৰুষপৰিচৰ্যযা ভগৱতি প্ৰৱৰ্ধমানানুৰাগভৰদ্ৰুতহৃদযশৈথিল্যঃ প্ৰহৰ্ষৱেগেনাত্মন্যুদ্ভিদ্যমানৰোমপুলককুলক ঔত্কণ্ঠ্যপ্ৰৱৃত্তপ্ৰণযবাষ্পনিৰুদ্ধাৱলোকনযন এৱং নিজৰমণাৰুণচৰণাৰৱিন্দানুধ্যানপৰিচিতভক্তিযোগেন পৰিপ্লুতপৰমাহ্লাদগম্ভীৰহৃদযহ্ৰদাৱগাঢধিষণস্তামপি ক্ৰিযমাণাং ভগৱত্সপৰ্যাং ন সস্মাৰ ॥ ১২ ॥

ইত্থং ধৃতভগৱদ্ৱ্ৰত ঐণেযাজিনৱাসসানুসৱনাভিষেকাৰ্দ্ৰকপিশকুটিলজটাকলাপেন চ ৱিৰোচমানঃ সূৰ্যৰ্চা ভগৱন্তং হিৰণ্মযং পুৰুষমুজ্জিহানে সূৰ্যমণ্ডলেঽভ্যুপতিষ্ঠন্নেতদু হোৱাচ ॥ ১৩ ॥

পৰোৰজঃ সৱিতুৰ্জাতৱেদো
দেৱস্য ভৰ্গো মনসেদং জজান ।
সুৰেতসাদঃ পুনৰাৱিশ্য চষ্টে
হংসং গৃধ্ৰাণং নৃষদ্ৰিঙ্গিৰামিমঃ ॥ ১৪ ॥