শ্রীমদ্ভাগবতম্ ৫.৭

শ্রীশুক উবাচ
ভরতস্তু মহাভাগবতো যদা ভগবতাবনিতলপরিপালনায সঞ্চিন্তিতস্তদনুশাসনপরঃ পঞ্চজনীং বিশ্বরূপদুহিতরমুপযেমে ॥ ১ ॥

তস্যামু হ বা আত্মজান্ কার্ত্স্ন্যেনানুরূপানাত্মনঃ পঞ্চ জনযামাস ভূতাদিরিব ভূতসূক্ষ্মাণি সুমতিং রাষ্ট্রভৃতং সুদর্শনমাবরণং ধূম্রকেতুমিতি ॥ ২ ॥

অজনাভং নামৈতদ্বর্ষং ভারতমিতি যত আরভ্য ব্যপদিশন্তি ॥ ৩ ॥

স বহুবিন্মহীপতিঃ পিতৃপিতামহবদুরুবত্সলতযা স্বে স্বে কর্মণি বর্তমানাঃ প্রজাঃ স্বধর্মমনুবর্তমানঃ পর্যপালযত্ ॥ ৪ ॥

ঈজে চ ভগবন্তং যজ্ঞক্রতুরূপং ক্রতুভিরুচ্চাবচৈঃ শ্রদ্ধযাঽঽহৃতাগ্নিহোত্রদর্শপূর্ণমাসচাতুর্মাস্যপশুসোমানাং প্রকৃতিবিকৃতিভিরনুসবনং চাতুর্হোত্রবিধিনা ॥ ৫ ॥

সম্প্রচরত্সু নানাযাগেষু বিরচিতাঙ্গক্রিযেষ্বপূর্বং যত্তত্ক্রিযাফলং ধর্মাখ্যং পরে ব্রহ্মণি যজ্ঞপুরুষে সর্বদেবতালিঙ্গানাং মন্ত্রাণামর্থনিযামকতযা সাক্ষাত্কর্তরি পরদেবতাযাং ভগবতি বাসুদেব এব ভাবযমান আত্মনৈপুণ্যমৃদিতকষাযো হবিঃষ্বধ্বর্যুভির্গৃহ্যমাণেষু স যজমানো যজ্ঞভাজো দেবাংস্তান্ পুরুষাবযবেষ্বভ্যধ্যাযত্ ॥ ৬ ॥

এবং কর্মবিশুদ্ধ্যা বিশুদ্ধসত্ত্বস্যান্তর্হৃদযাকাশশরীরে ব্রহ্মণি ভগবতি বাসুদেবে মহাপুরুষরূপোপলক্ষণে শ্রীবত্সকৌস্তুভবনমালারিদরগদাদিভিরুপলক্ষিতে নিজপুরুষহৃল্লিখিতেনাত্মনি পুরুষরূপেণ বিরোচমান উচ্চৈস্তরাং ভক্তিরনুদিনমেধমানরযাজাযত ॥ ৭ ॥

এবং বর্ষাযুতসহস্রপর্যন্তাবসিতকর্মনির্বাণাবসরোঽধিভুজ্যমানং স্বতনযেভ্যো রিক্থং পিতৃপৈতামহং যথাদাযং বিভজ্য স্বযং সকলসম্পন্নিকেতাত্স্বনিকেতাত্ পুলহাশ্রমং প্রবব্রাজ ॥ ৮ ॥

যত্র হ বাব ভগবান্ হরিরদ্যাপি তত্রত্যানাং নিজজনানাং বাত্সল্যেন সন্নিধাপ্যত ইচ্ছারূপেণ ॥ ৯ ॥

যত্রাশ্রমপদান্যুভযতোনাভিভির্দৃষচ্চক্রৈশ্চক্রনদী নাম সরিত্প্রবরা সর্বতঃ পবিত্রীকরোতি ॥ ১০ ॥

তস্মিন্ বাব কিল স একলঃ পুলহাশ্রমোপবনে বিবিধকুসুমকিসলযতুলসিকাম্বুভিঃ কন্দমূলফলোপহারৈশ্চ সমীহমানো ভগবত আরাধনং বিবিক্ত উপরতবিষযাভিলাষ উপভৃতোপশমঃ পরাং নির্বৃতিমবাপ ॥ ১১ ॥

তযেত্থমবিরতপুরুষপরিচর্যযা ভগবতি প্রবর্ধমানানুরাগভরদ্রুতহৃদযশৈথিল্যঃ প্রহর্ষবেগেনাত্মন্যুদ্ভিদ্যমানরোমপুলককুলক ঔত্কণ্ঠ্যপ্রবৃত্তপ্রণযবাষ্পনিরুদ্ধাবলোকনযন এবং নিজরমণারুণচরণারবিন্দানুধ্যানপরিচিতভক্তিযোগেন পরিপ্লুতপরমাহ্লাদগম্ভীরহৃদযহ্রদাবগাঢধিষণস্তামপি ক্রিযমাণাং ভগবত্সপর্যাং ন সস্মার ॥ ১২ ॥

ইত্থং ধৃতভগবদ্ব্রত ঐণেযাজিনবাসসানুসবনাভিষেকার্দ্রকপিশকুটিলজটাকলাপেন চ বিরোচমানঃ সূর্যর্চা ভগবন্তং হিরণ্মযং পুরুষমুজ্জিহানে সূর্যমণ্ডলেঽভ্যুপতিষ্ঠন্নেতদু হোবাচ ॥ ১৩ ॥

পরোরজঃ সবিতুর্জাতবেদো
দেবস্য ভর্গো মনসেদং জজান ।
সুরেতসাদঃ পুনরাবিশ্য চষ্টে
হংসং গৃধ্রাণং নৃষদ্রিঙ্গিরামিমঃ ॥ ১৪ ॥