শ্রীমদ্ভাগবতম্ ৫.৯

শ্রীশুক উবাচ
অথ কস্যচিদ্ দ্বিজবরস্যাঙ্গিরঃপ্রবরস্য শমদমতপঃস্বাধ্যাযাধ্যযনত্যাগসন্তোষতিতিক্ষাপ্রশ্রযবিদ্যানসূযাত্মজ্ঞানানন্দযুক্তস্যাত্মসদৃশশ্রুতশীলাচাররূপৌদার্যগুণা নব সোদর্যা অঙ্গজা বভূবুর্মিথুনং চ যবীযস্যাং ভার্যাযাম্ ॥ ১ ॥

যস্তু তত্র পুমাংস্তং পরমভাগবতং রাজর্ষিপ্রবরং ভরতমুত্সৃষ্টমৃগশরীরং চরমশরীরেণ বিপ্রত্বং গতমাহুঃ ॥ ২ ॥

তত্রাপি স্বজনসঙ্গাচ্চ ভৃশমুদ্বিজমানো ভগবতঃ কর্মবন্ধবিধ্বংসনশ্রবণস্মরণগুণবিবরণচরণারবিন্দযুগলং মনসা বিদধদাত্মনঃ প্রতিঘাতমাশঙ্কমানো ভগবদনুগ্রহেণানুস্মৃতস্বপূর্বজন্মাবলিরাত্মানমুন্মত্তজডান্ধবধিরস্বরূপেণ দর্শযামাস লোকস্য ॥ ৩ ॥

তস্যাপি হ বা আত্মজস্য বিপ্রঃ পুত্রস্নেহানুবদ্ধমনা আসমাবর্তনাত্সংস্কারান্ যথোপদেশং বিদধান উপনীতস্য চ পুনঃ শৌচাচমনাদীন্ কর্মনিযমাননভিপ্রেতানপি সমশিক্ষযদনুশিষ্টেন হি ভাব্যং পিতুঃ পুত্রেণেতি ॥ ৪ ॥

স চাপি তদু হ পিতৃসন্নিধাবেবাসধ্রীচীনমিব স্ম করোতি ছন্দাংস্যধ্যাপযিষ্যন্সহ ব্যাহৃতিভিঃ সপ্রণবশিরস্ত্রিপদীং সাবিত্রীং গ্রৈষ্মবাসন্তিকান্মাসানধীযানমপ্যসমবেতরূপং গ্রাহযামাস ॥ ৫ ॥

এবং স্বতনুজ আত্মন্যনুরাগাবেশিতচিত্তঃ শৌচাধ্যযনব্রতনিযমগুর্বনলশুশ্রূষণাদ্যৌপকুর্বাণককর্মাণ্যনভিযুক্তান্যপি সমনুশিষ্টেন ভাব্যমিত্যসদাগ্রহঃ পুত্রমনুশাস্য স্বযং তাবদ্ অনধিগতমনোরথঃ কালেনাপ্রমত্তেন স্বযং গৃহ এব প্রমত্ত উপসংহৃতঃ ॥ ৬ ॥

অথ যবীযসী দ্বিজসতী স্বগর্ভজাতং মিথুনং সপত্ন্যা উপন্যস্য স্বযমনুসংস্থযা পতিলোকমগাত্ ॥ ৭ ॥

পিতর্যুপরতে ভ্রাতর এনমতত্প্রভাববিদস্ত্রয্যাং বিদ্যাযামেব পর্যবসিতমতযো ন পরবিদ্যাযাং জডমতিরিতি ভ্রাতুরনুশাসননির্বন্ধান্ন্যবৃত্সন্ত ॥ ৮ ॥

স চ প্রাকৃতৈর্দ্বিপদপশুভিরুন্মত্তজডবধিরমূকেত্যভিভাষ্যমাণো যদা তদনুরূপাণি প্রভাষতে কর্মাণি চ কার্যমাণঃ
পরেচ্ছযা করোতি বিষ্টিতো বেতনতো বা যাচ্ঞযা যদৃচ্ছযা বোপসাদিতমল্পং বহু মৃষ্টং কদন্নং বাভ্যবহরতি পরং নেন্দ্রিযপ্রীতিনিমিত্তম্ ।
নিত্যনিবৃত্তনিমিত্তস্বসিদ্ধবিশুদ্ধানুভবানন্দস্বাত্মলাভাধিগমঃ সুখদুঃখযোর্দ্বন্দ্বনিমিত্তযোরসম্ভাবিতদেহাভিমানঃ ॥ ৯ ॥

শীতোষ্ণবাতবর্ষেষু বৃষ ইবানাবৃতাঙ্গঃ পীনঃ সংহননাঙ্গঃ স্থণ্ডিলসংবেশনানুন্মর্দনামজ্জনরজসা মহামণিরিবানভিব্যক্তব্রহ্মবর্চসঃ কুপটাবৃতকটিরুপবীতেনোরুমষিণা দ্বিজাতিরিতি ব্রহ্মবন্ধুরিতি সংজ্ঞযাতজ্জ্ঞজনাবমতো বিচচার ॥ ১০ ॥

যদা তু পরত আহারং কর্মবেতনত ঈহমানঃ স্বভ্রাতৃভিরপি কেদারকর্মণি নিরূপিতস্তদপি করোতি কিন্তু ন সমং বিষমং ন্যূনমধিকমিতি বেদ কণপিণ্যাকফলীকরণকুল্মাষস্থালীপুরীষাদীন্যপ্যমৃতবদভ্যবহরতি ॥ ১১ ॥

অথ কদাচিত্কশ্চিদ্ বৃষলপতির্ভদ্রকাল্যৈ পুরুষপশুমালভতাপত্যকামঃ ॥ ১২ ॥

তস্য হ দৈবমুক্তস্য পশোঃ পদবীং তদনুচরাঃ পরিধাবন্তো নিশি নিশীথসমযে তমসাঽঽবৃতাযামনধিগতপশব আকস্মিকেন বিধিনা কেদারান্ বীরাসনেন মৃগবরাহাদিভ্যঃ সংরক্ষমাণমঙ্গিরঃপ্রবরসুতমপশ্যন্ ॥ ১৩ ॥

অথ ত এনমনবদ্যলক্ষণমবমৃশ্য ভর্তৃকর্মনিষ্পত্তিং মন্যমানা বদ্ধ্বা রশনযা চণ্ডিকাগৃহমুপনিন্যুর্মুদা বিকসিতবদনাঃ ॥ ১৪ ॥

অথ পণযস্তং স্ববিধিনাভিষিচ্যাহতেন বাসসাঽঽচ্ছাদ্য ভূষণালেপস্রক্তিলকাদিভিরুপস্কৃতং ভুক্তবন্তং ধূপদীপমাল্যলাজকিসলযাঙ্কুরফলোপহারোপেতযা বৈশসসংস্থযামহতা গীতস্তুতিমৃদঙ্গপণবঘোষেণ চ পুরুষপশুং ভদ্রকাল্যাঃ পুরত উপবেশযামাসুঃ ॥ ১৫ ॥

অথ বৃষলরাজপণিঃ পুরুষপশোরসৃগাসবেন দেবীং ভদ্রকালীং যক্ষ্যমাণস্তদভিমন্ত্রিতমসিমতিকরালনিশিতমুপাদদে ॥ ১৬ ॥

ইতি তেষাং বৃষলানাং রজস্তমঃপ্রকৃতীনাং ধনমদরজউত্সিক্তমনসাং ভগবত্কলাবীরকুলং কদর্থীকৃত্যোত্পথেন স্বৈরং বিহরতাং হিংসাবিহারাণাং কর্মাতিদারুণং যদ্ব্রহ্মভূতস্য সাক্ষাদ্ব্রহ্মর্ষিসুতস্য নির্বৈরস্য সর্বভূতসুহৃদঃ সূনাযামপ্যননুমতমালম্ভনং তদুপলভ্য ব্রহ্মতেজসাতিদুর্বিষহেণ দন্দহ্যমানেন বপুষা সহসোচ্চচাট সৈব দেবী ভদ্রকালী ॥ ১৭ ॥

ভৃশমমর্ষরোষাবেশরভসবিলসিতভ্রুকুটিবিটপকুটিলদংষ্ট্রারুণেক্ষণাটোপাতিভযানকবদনা হন্তুকামেবেদং মহাট্টহাসমতিসংরম্ভেণ বিমুঞ্চন্তী তত উত্পত্য পাপীযসাং দুষ্টানাং তেনৈবাসিনা বিবৃক্ণশীর্ষ্ণাং গলাত্স্রবন্তমসৃগাসবমত্যুষ্ণং সহ গণেন নিপীযাতিপানমদবিহ্বলোচ্চৈস্তরাং স্বপার্ষদৈঃ সহ জগৌ ননর্ত চ বিজহার চ শিরঃকন্দুকলীলযা ॥ ১৮ ॥

এবমেব খলু মহদভিচারাতিক্রমঃ কার্ত্স্ন্যেনাত্মনে ফলতি ॥ ১৯ ॥

ন বা এতদ্বিষ্ণুদত্ত মহদদ্ভুতং যদসম্ভ্রমঃ স্বশিরশ্ছেদন আপতিতেঽপি বিমুক্তদেহাদ্যাত্মভাবসুদৃঢহৃদযগ্রন্থীনাং সর্বসত্ত্বসুহৃদাত্মনাং নির্বৈরাণাং সাক্ষাদ্ভগবতানিমিষারিবরাযুধেনাপ্রমত্তেন তৈস্তৈর্ভাবৈঃ পরিরক্ষ্যমাণানাং তত্পাদমূলমকুতশ্চিদ্ভযমুপসৃতানাং ভাগবতপরমহংসানাম্ ॥ ২০ ॥