ত্ৰিসুপৰ্ণম্

(তৈ-আ-10-38ঃ40)
ও-ম্ব্ৰহ্মমেতু মাম্ । মধুমেতু মাম্ ।
ব্ৰহ্মমেৱ মধুমেতু মাম্ ।
যাস্তে সোম প্ৰজা ৱথ্সো-ঽভি সো অহম্ ।
দুষ্ষ্ৱপ্নহন্দুৰুষ্ৱহ ।
যাস্তে সোম প্ৰাণাগ্ংস্তাঞ্জুহোমি ।
ত্ৰিসুপৰ্ণমযাচিত-ম্ব্ৰাহ্মণায দদ্যাত্ ।
ব্ৰহ্মহত্যাং-ৱাঁ এতে ঘ্নন্তি ।
যে ব্ৰাহ্মণাস্ত্ৰিসুপৰ্ণ-ম্পঠন্তি ।
তে সোম-ম্প্ৰাপ্নুৱন্তি ।
আসহস্ৰাত্পঙ্ক্তি-ম্পুনন্তি ।
ওম্ ॥ 1

ব্ৰহ্ম মেধযা ।
মধু মেধযা ।
ব্ৰহ্মমেৱ মধু মেধযা ।
অদ্যা নো দেৱ সৱিতঃ প্ৰজাৱত্সাৱীস্সৌভগম্ ।
পৰা দুষ্ৱপ্নিযগ্ং সুৱ ।
ৱিশ্ৱানি দেৱ সৱিতৰ্দুৰিতানি পৰাসুৱ ।
যদ্ভদ্ৰ-ন্তন্ম আসুৱ ।
মধু ৱাতা ঋতাযতে মধু ক্ষৰন্তি সিন্ধৱঃ ।
মাধ্ৱীৰ্নস্সন্ত্ৱোষধীঃ ।
মধু নক্তমুতোষসি মধুমত্পাৰ্থিৱগ্ং ৰজঃ ।
মধু দ্যৌৰস্তু নঃ পিতা ।
মধু মান্নো ৱনস্পতিৰ্মধুমাগ্ং অস্তু সূৰ্যঃ ।
মাধ্ৱীৰ্গাৱো ভৱন্তু নঃ ।
য ইম-ন্ত্ৰিসুপৰ্ণমযাচিত-ম্ব্ৰাহ্মণায দদ্যাত্ ।
ভ্ৰূণহত্যাং-ৱাঁ এতে ঘ্নন্তি ।
যে ব্ৰাহ্মণাস্ত্ৰিসুপৰ্ণ-ম্পঠন্তি ।
তে সোম-ম্প্ৰাপ্নুৱন্তি ।
আসহস্ৰাত্পঙ্ক্তি-ম্পুনন্তি ।
ওম্ ॥ 2

ব্ৰহ্ম মেধৱা ।
মধু মেধৱা ।
ব্ৰহ্মমেৱ মধু মেধৱা ।
ব্ৰহ্মা দেৱানা-ম্পদৱীঃ কৱীনামৃষিৰ্ৱিপ্ৰাণা-ম্মহিষো মৃগাণাম্ ।
শ্যেনো গৃদ্ধ্ৰাণাগ্ং স্ৱধিতিৰ্ৱনানাগ্ং সোমঃ পৱিত্ৰমত্যেতি ৰেভন্ন্ ।
হগ্ংসশ্শুচিষদ্ৱসুৰন্তৰিক্ষসদ্ধোতা ৱেদিষদতিথিৰ্দুৰোণসত্ ।
নৃষদ্ৱৰসদৃতসদ্ৱ্যোমসদব্জা গোজা ঋতজা অদ্ৰিজা ঋত-ম্বৃহত্ ।
ঋচে ত্ৱা ৰুচে ত্ৱা সমিত্স্ৰৱন্তি সৰিতো ন ধেনাঃ ।
অন্তৰ্হৃদা মনসা পূযমানাঃ ।
ঘৃতস্য ধাৰা অভিচাকশীমি ।
হিৰণ্যযো ৱেতসো মদ্ধ্য আসাম্ ।
তস্মিন্থ্সুপৰ্ণো মধুকৃ-ত্কুলাযী ভজন্নাস্তে মধু দেৱতাভ্যঃ ।
তস্যাসতে হৰযস্সপ্ত তীৰে স্ৱধা-ন্দুহানা অমৃতস্য ধাৰাম্ ।
য ইদ-ন্ত্ৰিসুপৰ্ণমযাচিত-ম্ব্ৰাহ্মণায দদ্যাত্ ।
ৱীৰহত্যাং-ৱাঁ এতে ঘ্নন্তি ।
যে ব্ৰাহ্মণাস্ত্ৰিসুপৰ্ণ-ম্পঠন্তি ।
তে সোম-ম্প্ৰাপ্নুৱন্তি ।
আসহস্ৰাত্পঙ্ক্তি-ম্পুনন্তি ।
ওম্ ॥ 3
ওঁ শান্তি-শ্শান্তি-শ্শান্তিঃ ॥