1.7 - rājasūyānubrāhmaṇaṃ - kṛṣṇa yajurveda taittirīya brāhmaṇa pāṭhaḥ - etad brāhmaṇānyeva

kṛṣṇa yajurvedīya taittirīya brāhmaṇe prathamāṣṭake saptamaḥ prapāṭhakaḥ - rājasūyānubrāhmaṇaṃ
o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | hariḥ om ||
anuvākaṃ 1 - śunāsīrīyendraturīyapañcāvattīyāpāmārgahomāḥ
eta-dbrāhmaṇānyeva pañca̭ havīgṃṣi̭ | athendrā̭ya śunāsīrā̭ya puroḍāśa-ndvāda̭śakapāla-nnirva̭pati | saṃva~thsaro vā indrā śunāsīraḥ̭ | saṃva~thsareṇaivāsmā annamava̭ rundhe | vāyavya̭-mpayo̭ bhavati | vāyurvai vṛṣṭyai pradāpayitā | sa evāsmai vṛṣṭi-mpradā̭payati | saurya̭ eka̭kapālo bhavati | sūryḙṇa vā amuṣmi̭~lloke vṛṣṭi̭rdhṛtā | sa evāsmai vṛṣṭi-nni ya̭cchati || 1 ||
dvādaśagavagṃ sīra-ndakṣi̭ṇā samṛ̭ddhyai | devāsurā-ssaṃya~̭ttā āsann | te devā agnima̭bruvann | tvayā̭ vīreṇāsṷrāna-bhibha̭vāmeti̭ | so-'bravīt | tredhā-'hamātmānaṃ-vi~ka̭riṣya iti̭ | sa tredhā ''tmānaṃ-vya~̭kuruta | agni-ntṛtī̭yam | rudra-ntṛtī̭yam | varṷṇa-ntṛtī̭yam || 2 ||
so-'bravīt | ka ida-nturīyamiti̭ | ahamitīndro-'bravīt |

sa-ntu sṛ̭jāvahā iti̭ | tau sama̭sṛjetām | sa indra̭sturīya̭-mabhavat | yadindra̭-sturīya-mabha̭vat | tadi̭ndra-turīyasyendra-turīyatvam | tato vai devā vya̭jayanta | yadi̭ndraturīya-nni̭rupyate viji̭tyai || 3 ||
vahinī̭ dhenu-rdakṣi̭ṇā | ya-dvahinī | tenāgneyī |

ya-dgauḥ | tena̭ raudrī | ya-ddhenuḥ | tenaindrī | yathstrī satī dāntā | tena̭ vāruṇī samṛ̭ddhyai | prajāpa̭ti-ryajñama̭sṛjata || 4 ||
tagṃ sṛṣṭagṃ rakṣāg̭syajighāgṃsann | sa etāḥ prajāpa̭ti-rātmano̭ devatā nira̭mimīta | tābhirvai sa digbhyo rakṣāgṃ̭si prāṇṷdata | ya-tpa̭ñcāvattīya̭-ñjuhoti̭ | digbhya eva ta-dyaja̭māno rakṣāgṃ̭si praṇṷdate | samṷ̄ḍhagṃ rakṣa-ssanda̭gdhagṃ rakṣa ityā̭ha | rakṣāg̭syeva sanda̭hati | agnayḙ rakṣoghne svāhetyā̭ha | devatābhya eva vi̭jigyānābhyo̭ bhāgadheya̭-ṅkaroti | praṣṭivāhī ratho dakṣi̭ṇā samṛ̭ddhyai || 5 ||
indro̭ vṛtragṃ hatvā | asṷrā-nparābhāvya̭ | namṷcimāsura-nnāla̭bhata | tagṃ śacyā̭-'gṛhṇāt | tau sama̭labhetām | so-'smā-dabhiśṷnataro-'bhavat | so-'bravīt | sadhāṃgṃ sanda̭dhāvahai | atha tvā-'va̭ srakṣyāmi | na mā śuṣkḙṇa nārdreṇa̭ hanaḥ || 6 ||
na divā na naktamiti̭ | sa etamapā-mphena̭masiñcat | na vā eṣa śuṣko nārdro vyṷṣṭā ''sīt | anṷdita-ssūryaḥ̭ | na vā eta-ddivā na naktam | tasyaitasmi̭n ~loke | apā-mphenḙna śira uda̭vartayat | tadḙnamanva̭vartata | mitra̭drugiti̭ || 7 ||
sa etāna̭pāmārgāna̭janayat | tāna̭juhot | tairvai sa rakṣāgsyapā̭hata | yada̭pāmārga homo bhava̭ti | rakṣa̭sā-mapa̭hatyai | ekol mukena̭ yanti | taddhi rakṣa̭sā-mbhāgadheyam | imā-ndiśaṃ̭-ya~nti | eṣā vai rakṣa̭sā-ndik | svāyā̭meva diśi rakṣāgṃ̭si hanti || 8 ||
svakṛ̭ta iri̭ṇe juhoti pradare vā | eta-dvai rakṣa̭sāmāyata̭nam | sva evāyata̭ne rakṣāgṃ̭si hanti | parṇamayḙna sruveṇa̭ juhoti | brahma vai parṇaḥ | brahma̭ṇaiva rakṣāgṃ̭si hanti | devasya̭ tvā savituḥ pra̭sava ityā̭ha | savitṛpra̭sūta eva rakṣāgṃ̭si hanti | hatagṃ rakṣo 'va̭dhiṣma rakṣa ityā̭ha | rakṣa̭sāg stṛtyai | yadvaste ta-ddakṣi̭ṇā nirava̭ttyai | apra̭tīkṣamā ya̭nti | rakṣa̭sā-mantarhi̭tyai || 9 ||

(yacchati - varṷṇa-ntṛtī̭yaṃ - ~viji̭tyā - asṛjata - samṛ̭ddhyai - hano - mitra̭drugiti̭ - hanti - stṛtyai trīṇi̭ ca) (a. 1)
anuvākaṃ 2 - devikāvahavīṃṣi

dhātre pṷroḍāśa-ndvāda̭śakapāla-nnirva̭pati | saṃva~thsaro vai dhātā | saṃva~thsareṇaivāsmai prajāḥ praja̭nayati | anvevāsmā anṷmatirmanyate | rāte rākā | pra si̭nīvālī ja̭nayati | prajāsveva prajā̭tāsu kuhvā̭ vāca̭-ndadhāti | mithunau gāvau dakṣi̭ṇā samṛ̭ddhyai | āgnāvaiṣṇava-mekā̭daśakapāla-nnirva̭pati | aindrāvaiṣṇava-mekā̭daśakapālam || 10 ||
vaiṣṇava-ntri̭kapālam | vīryaṃ̭-vā~ agniḥ | vīrya̭mindraḥ̭ | vīryaṃ̭-vi~ṣṇuḥ̭ | prajā eva prajā̭tā vīrye prati̭ṣṭhāpayati | tasmā-tprajā vīryā̭vatīḥ | vāmana ṛ̭ṣabho vahī dakṣi̭ṇā | yadvahī | tenāgneyaḥ | yadṛ̭ṣabhaḥ || 11 ||
tenaindraḥ | yadvā̭manaḥ | tena̭ vaiṣṇava-ssamṛ̭ddhyai | agnīṣomīya-mekā̭daśakapāla-nnirva̭pati | indrāsomīya-mekā̭daśakapālam | saumya-ñcarum | somo vai rḙtodhāḥ | agniḥ prajānā-mprajanayitā | vṛddhānāmindraḥ̭ pradāpayitā | soma̭ evāsmai reto dadhā̭ti || 12 ||
agniḥ prajā-mpraja̭nayati | vṛddhāmindraḥ praya̭cchati | babhru-rdakṣi̭ṇā samṛ̭ddhyai | somāpauṣṇa-ñcaru-nnirva̭pati | aindrāpauṣṇa-ñcarum | somo vai rḙtodhāḥ | pūṣā pa̭śūnā-mpra̭janayitā | vṛddhānāmindraḥ̭ pradāpayitā | soma̭ evāsmai reto dadhā̭ti | pūṣā paśū-npraja̭nayati || 13 ||
vṛddhānindraḥ praya̭cchati | pauṣṇaścaru-rbha̭vati | iyaṃ-vai~ pūṣā | asyāmeva prati̭ tiṣṭhati | śyāmo dakṣi̭ṇā samṛ̭ddhyai | bahu vai purṷṣo-'meddhya-mupa̭gacchati | vaiśvānara-ndvāda̭śakapāla-nnirva̭pati | saṃva~thsaro vā agni-rvaiśvānaraḥ | saṃva~thsareṇaivainagg̭ svadayati | hira̭ṇya-ndakṣi̭ṇā || 14 ||
pavitraṃ-vai~ hira̭ṇyam | punātyevainam | bahu vai rā̭janyo 'nṛ̭ta-ṅkaroti | upa̭ jāmyai hara̭te | jināti̭ brāhmaṇam | vadatyanṛ̭tam | anṛ̭te khalu vai kriyamā̭ṇe varṷṇo gṛhṇāti | vāruṇaṃ-ya~̭vamaya̭-ñcaru-nnirva̭pati | varuṇapāśādevaina̭-mmuñcati | aśvo dakṣi̭ṇā | vāruṇo hi devatayā-'śva-ssamṛ̭ddhyai || 15 ||

(aindrāvaiṣṇāvamekā̭daśakapālaṃ-~yadṛ̭ṣabho- dadhā̭ti-pūṣā paśū-npraja̭nayati-hira̭ṇyaṃ dakṣi̭ṇā-dakṣiṇaikaṃ̭ ca) (a. 2)
anuvākaṃ 3 - ratnināṃ havīṃṣi

ratninā̭metāni̭ havīgṃṣi̭ bhavanti | ete vai rāṣṭrasya̭ pradātāraḥ̭ | etḙ-'pādātāraḥ̭ | ya eva rāṣṭrasya̭ pradātāraḥ̭ | yḙ-'pādātāraḥ̭ | ta evāsmai̭ rāṣṭra-mpraya̭cchanti | rāṣṭrameva bha̭vati | ya-thsa̭māhṛtya̭ nirvapet | ara̭tnina-ssyuḥ | yathāyatha-nnirva̭pati ratnitvāya̭ || 16 ||
ya-thsadyo nirvapet | yāva̭tīmekḙna haviṣā-''śiṣa̭mava rundhe | tāva̭tīmava̭ rundhīta | anvaha-nnirva̭pati | bhūya̭sīmevāśiṣamava̭ rundhe | bhūya̭so yajñakratūnupai̭ti | bārhaspatya-ñcaru-nnirva̭pati brahmaṇo̭ gṛhe | mukhata evāsmai brahma saggśya̭ti | atho brahma̭nneva kṣatra-manvāra̭mbhayati | śitipṛṣṭho dakṣi̭ṇā samṛ̭ddhyai || 17 ||
aindra-mekā̭daśakapālagṃ rājanya̭sya gṛhe | indriyamevāva̭ rundhe | ṛṣabho dakṣi̭ṇā samṛ̭ddhyai | āditya-ñcaru-mmahi̭ṣyai gṛhe | iyaṃ-vā~ adi̭tiḥ | asyāmeva prati̭tiṣṭhati | dhenu-rdakṣi̭ṇā samṛ̭ddhyai | bhagā̭ya caruṃ-vā~vātā̭yai gṛhe | bhaga̭mevāsmi̭-ndadhāti | vici̭ttagarbhā paṣṭhauhī dakṣi̭ṇā samṛ̭ddhyai || 18 ||
nairṛta-ñcaru-mpa̭rivṛktyai̭ gṛhe kṛṣṇānāṃ-vrī~hīṇā-nnakhani̭rbhinnam | pāpmāna̭meva nir-ṛ̭ti-nnirava̭dayate | kṛṣṇā kūṭā dakṣi̭ṇā samṛ̭ddhyai | āgneya-maṣṭāka̭pālagṃ senānyo̭ gṛhe | senā̭mevāsya saggśya̭ti | hira̭ṇya-ndakṣi̭ṇā samṛ̭ddhyai | vāruṇa-ndaśa̭kapālagṃ sūtasya̭ gṛhe | varuṇasavamevāva̭-rundhe | mahāni̭raṣṭo dakṣi̭ṇā samṛ̭ddhyai | mārutagṃ saptaka̭pāla-ṅgrāmaṇyo̭ gṛhe || 19 ||
annaṃ-vai~ marutaḥ̭ | anna̭mevāva̭-rundhe | pṛśñi-rdakṣi̭ṇā samṛ̭ddhyai | sāvitra-ndvāda̭śakapāla-ṅkṣatturgṛhe prasūtyai | upaddhvasto dakṣi̭ṇā samṛ̭ddhyai | āśvina-ndvi̭kapālagṃ sa̭graṃhīturgṛhe | aśvinau vai devānā-mbhiṣajau | tābhyā̭mevāsmai̭ bheṣaja-ṅka̭roti | savātyaṷ dakṣi̭ṇā samṛ̭ddhyai | pauṣṇa-ñcaru-mbhā̭gadughasya̭ gṛhe || 20 ||
annaṃ-vai~ pūṣā | anna̭mevāva̭ rundhe | śyāmo dakṣi̭ṇā samṛ̭ddhyai | raudra-ṅgā̭vīdhuka-ñcaruma̭kṣāvāpasya̭ gṛhe | antata eva rudra-nnirava̭dayate | śabala udvā̭ro dakṣi̭ṇā samṛ̭ddhyai | dvāda̭śaitāni̭ havīgṃṣi̭ bhavanti | dvāda̭śa māsā-ssaṃva~thsaraḥ | saṃva~thsareṇaivāsmai̭ rāṣṭramava̭-rundhe | rāṣṭrameva bha̭vati || 21 ||
yanna pra̭ti nirvapet | ratnina̭ āśiṣo-'va̭rundhīrann | prati nirva̭pati | indrā̭ya sutrāmṇḙ puroḍāśa-mekā̭daśakapālam | indrā̭yāgṃhomuce | āśiṣa̭ evāva̭rundhe | aya-nno rājā̭ vṛtrahā rājā̭ bhūtvā vṛtraṃ-va~̭ddhyādityā̭ha | āśiṣa̭mevaitāmāśāste | maitrā-bārhaspatya-mbha̭vati | śvetāyai śvetava̭thsāyai dugdhe || 22 ||
bārhaspatye maitramapi̭ dadhāti | brahma̭ caivāsmai kṣatra-ñca̭ samīcī̭ dadhāti | atho brahma̭nneva kṣatra-mprati̭ṣṭhāpayati | bārhaspatyena pūrvḙṇa praca̭rati | mukhata evāsmai brahma saggśya̭ti | atho brahma̭nneva kṣatra-manvāra̭mbhayati | svaya-ṅkṛtā vedi̭rbhavati | svayadinna-mbarhiḥ | svayakṛnta iddhmaḥ | ana̭bhijitasyā-bhiji̭tyai | tasmā-drājñāmara̭ṇya-mabhiji̭tam | saiva śvetā śvetava̭thsā dakṣi̭ṇā samṛ̭ddhyai || 23 ||

(ratnitvāya - samṛ̭ddhyai - paṣṭhauhi dakṣi̭ṇā samṛ̭ddhyai - grāmaṇyo̭ gṛhe - bhā̭gadughasya̭ gṛhe-bha̭vati - dugdhḙ - 'bhiji̭tyai dve ca̭) (a. 3)
anuvākaṃ 4 - devasuvāṃ havīṃṣi

devasuvāmetāni̭ havīgṃṣi̭ bhavanti | etāva̭nto vai devānāgṃ̭ savāḥ | ta evāsmai̭ savā-npraya̭cchanti | ta ḙnagṃ suvante | agnirevaina̭-ṅgṛhapa̭tīnāgṃ suvate | somo vanaspatī̭nām | rudraḥ pa̭śūnām | bṛhaspati̭-rvācām | indro jyeṣṭhānām | mitra-ssatyānām || 24 ||
varṷṇo dharma̭patīnām | etadeva sarva̭-mbhavati | savitā tvā prasavānāgṃ̭ suvatāmiti hasta̭-ṅgṛhṇāti prasūtyai | ye dḙvā devasuva-ssthetyā̭ha | yathā yajurevai tat | mahate kṣatrāya̭ mahata ādhi̭patyāya mahate jāna̭rājyāyetyā̭ha | āśiṣa̭mevaitāmāśāste | eṣa vo̭ bharatā rājā somo-'smāka̭-mbrāhmaṇānāgṃ rājetyā̭ha | tasmā-thsoma̭rājāno brāhmaṇāḥ | prati tyannāma̭ rājyama̭dhāyītyā̭ha || 25 ||
rājyamevāsmi-nprati̭ dadhāti | svā-ntanuvaṃ-va~rṷṇo aśiśredityā̭ha | varuṇasavamevā-va̭rundhe | śucermitrasya vratyā̭ abhūmetyā̭ha | śuci̭mevainaṃ-vra~tya̭-ṅkaroti | ama̭nmahi mahata ṛtasya nāmetyā̭ha | manuta evainam | sarve vrātā varṷṇasyā bhūvannityā̭ha | sarva̭vrātamevaina̭-ṅkaroti | vi mitra evairarā̭ti-matārīdityā̭ha || 26 ||
arā̭timevaina̭-ntārayati | asṷ̄ṣudanta yajñiyā̭ ṛtenetyā̭ha | svadaya̭tyevainam | vyṷ trito ja̭rimāṇa̭-nna ānaḍityā̭ha | āyṷrevāsmi̭-ndadhāti | dvābhyāṃ-vi~mṛ̭ṣṭe | dvipā-dyaja̭mānaḥ prati̭ṣṭhityai | agnīṣomīya̭sya caikā̭daśakapālasya devasuvā-ñca̭ haviṣā̭magnaye sviṣṭakṛtḙ samava̭dyati | devatā̭bhirevaina̭-mubhayataḥ pari̭gṛhṇāti | viṣṇukramān kra̭mate( ) | viṣṇṷreva bhūtvemā~llokā-nabhija̭yati || 27 ||

(satyānā̭-madhāyītyā̭-hātārīdityā̭ha-kramata eka̭-ñca) (a. 4)
anuvākaṃ 5 - abhiṣekārthamapāṅgrahagrahaṇam

artheta-sstheti̭ juhoti | āhṷtyaivainā̭ niṣkrīya̭ gṛhṇāti | atho̭ haviṣkṛ̭tānāmevābhighṛ̭tānā-ṅgṛhṇāti | vaha̭ntīnā-ṅgṛhṇāti | etā vā apāgṃ rāṣṭram | rāṣṭramevāsmai̭ gṛhṇāti | atho śriya̭mevaina̭mabhi va̭hanti | apā-mpati̭rasītyā̭ha | mithunamevākaḥ̭ | vṛṣā-'syūrmirityā̭ha || 28 ||
ūrmimanta̭mevaina̭-ṅkaroti | vṛṣaseno̭-'sītyā̭ha | senā̭mevāsya saggśya̭ti | vrajakṣita-ssthetyā̭ha | etā vā apāṃ-vi~śaḥ̭ | viśa̭mevāsmai paryṷ̄hati | marutāmoja-ssthetyā̭ha | annaṃ-vai~ marutaḥ̭ | anna̭mevā va̭rundhe | sūrya̭varcasa-ssthetyā̭ha || 29 ||
rāṣṭrameva va̭rcasvya̭kaḥ | sūrya̭tvacasa-ssthetyā̭ha | satyaṃ-vā~ etat | ya-dvarṣa̭ti | anṛ̭taṃ-ya~dātapa̭ti varṣa̭ti | satyānṛte evāva̭rundhe | nainagṃ̭ satyānṛte ṷdite higg̭staḥ | ya evaṃ-ve~da̭ | māndā-ssthetyā̭ha | rāṣṭrameva bra̭hmavarcasya̭kaḥ || 30 ||
vāśā-ssthetyā̭ha | rāṣṭrameva vaśya̭kaḥ | śakva̭rī-ssthetyā̭ha | paśavo vai śakva̭rīḥ | paśūnevāva̭ rundhe | viśvabhṛta-ssthetyā̭ha | rāṣṭrameva pa̭yasvya̭kaḥ | janabhṛta-ssthetyā̭ha | rāṣṭramevendri̭yāvya̭kaḥ | agnestḙjasyā-ssthetyā̭ha || 31 ||
rāṣṭrameva tḙjasvya̭kaḥ | apāmoṣa̭dhīnāgṃ rasa-ssthetyā̭ha | rāṣṭrameva ma̭dhavya̭makaḥ | sārasvata-ṅgraha̭-ṅgṛhṇāti | eṣā vā apā-mpṛṣṭham | yathsara̭svatī | pṛṣṭhamevainagṃ̭ samānānā-ṅkaroti | ṣoḍaśabhi̭-rgṛhṇāti | ṣoḍa̭śakalo vai purṷṣaḥ | yāvā̭neva purṷṣaḥ | tasmi̭n vīrya̭-ndadhāti | ṣoḍaśabhi̭-rjuhoti̭ ṣoḍaśabhi̭-rgṛhṇāti | dvātrigṃ̭śa-thsampa̭dyante | dvātrigṃ̭śadakṣarā 'nuṣṭuk | vāga̭nuṣṭu-phsarvā̭ṇi chandāgṃ̭si | vācaivainagṃ sarvḙbhi-śchando̭bhi-rabhiṣi̭ñcati || 32 ||

(ūrmirityā̭ha - sūrya̭varcasa-ssthetyā̭ha - brahmavarcasya̭ka - stejasyā-ssthetyā̭haiva - purṷṣa-ṣṣaṭca̭) (a. 5)
anuvākaṃ 6 - abhiṣekārthajalasaṃskāraḥ

devī̭rāpa-ssa-mmadhṷmatī-rmadhṷmatībhi-ssṛjyaddhvamityā̭ha | brahma̭ṇaivainā-ssagṃ sṛ̭jati | anā̭dhṛṣṭā-ssīdatetyā̭ha | brahma̭ṇaivainā-ssādayati | antarā hotṷśca dhiṣṇi̭ya-mbrāhmaṇācchagṃ sina̭śca sādayati | āgneyo vai hotā | aindro brāhmaṇācchagṃsī | teja̭sā caivendriyeṇa̭ cobhayato̭ rāṣṭra-mpari̭gṛhṇāti | hira̭ṇyeno-tpṷnāti | āhṷtyai hi pavitrābhyāmutpunanti vyāvṛ̭ttyai || 33 ||
śatamā̭na-mbhavati | śatāyuḥ purṷṣa-śśatendri̭yaḥ | āyṷṣyevendriye prati̭tiṣṭhati | ani̭bhṛṣṭamasītyā̭ha | ani̭bhṛṣṭagg hyḙtat | vāco bandhurityā̭ha | vāco hyḙṣa bandhuḥ̭ | tapojā ityā̭ha | tapojā hyḙtat | soma̭sya dātramasītyā̭ha || 34 ||
soma̭sya hyḙtaddātram | śukrā vaḥ̭ śukreṇotpṷnāmītyā̭ha | śukrā hyāpaḥ̭ | śukragṃ hira̭ṇyam | candrāścandreṇetyā̭ha | candrā hyāpaḥ̭ | candragṃ hira̭ṇyam | amṛtā̭ amṛtenetyā̭ha | amṛtā hyāpaḥ̭ | amṛtagṃ hira̭ṇyam || 35 ||
svāhā̭ rājasūyāyetyā̭ha | rājasūyā̭ya hyḙnā utpunāti̭ | sadhamādo dyumninīrūrja̭ etā iti̭ vāruṇyarcā gṛ̭hṇāti | varuṇasavamevā va̭rundhe | eka̭yā gṛhṇāti | ekadhaiva yaja̭māne vīrya̭-ndadhāti | kṣatrasyolba̭masi kṣatrasya yoni̭rasīti̭ tārpya-ñcoṣṇīṣa̭-ñca praya̭cchati sayonitvāya̭ | eka̭śatena darbhapuñjīlaiḥ pa̭vayati | śatāyurvai purṷṣa-śśatavīryaḥ | ātmaika̭śataḥ || 36 ||
yāvā̭neva purṷṣaḥ | tasmi̭n vīrya̭-ndadhāti | daddhyā̭śayati | indriyamevā-va̭rundhe | udumbara̭-māśayati | annādyasyāva̭ ruddhyai | śaṣpāṇyāśayati | surā̭bali-mevaina̭-ṅkaroti | āvida̭ etā bha̭vanti | āvida̭mevaina̭-ṅgamayanti || 37 ||
agnirevaina-ṅgārha̭patyenāvati | indra̭ indriyeṇa̭ | pūṣā paśubhiḥ̭ | mitrāvarṷṇau prāṇāpānābhyām | indro̭ vṛtrāya vajramuda̭yacchat | sa diva̭malikhat | so-'ryamṇaḥ panthā̭ abhavat | sa āvi̭nne dyāvā̭pṛthivī dhṛtavra̭te iti dyāvā̭pṛthivī upā̭dhāvat | sa ābhyāmeva prasṷ̄ta indro̭ vṛtrāya vajra-mprāha̭rat | āvi̭nne dyāvā̭pṛthivī dhṛtavra̭te iti yadāha̭ || 38 ||
ābhyāmeva prasṷ̄to yaja̭māno vajra-mbhrātṛ̭vyāya praha̭rati | āvi̭nnā devyadi̭ti-rviśvarūpītyā̭ha | iyaṃ-vai~ devyadi̭ti-rviśvarūpī | asyāmeva prati̭ tiṣṭhati | āvi̭nno-'yamasāvā̭muṣyāyaṇo-'syāṃ-vi~śya̭smi-nrāṣṭra ityā̭ha | viśaivainagṃ̭ rāṣṭreṇa sama̭rdhayati | mahate kṣatrāya̭ mahata ādhi̭patyāya mahate jāna̭rājyāyetyā̭ha | āśiṣa̭mevaitāmāśāste | eṣa vo̭ bharatā rājā somo-'smāka̭-mbrāhmaṇānāgṃ rājetyā̭ha | tasmā-thsoma̭rājāno brāhmaṇāḥ || 39 ||
indra̭sya vajro̭-'si vārtra̭ghna iti dhanuḥ praya̭cchati viji̭tyai | śatrubādha̭nā-ssthetīṣūṋ | śatrṷ̄nevāsya̭ bādhante | pāta mā pratyañca̭-mpāta mā̭ tiryañca̭manvañca̭-mmā pātetyā̭ha | tisro vai śa̭ravyāḥ | pratīcī̭ tiraścyanūcī | tābhya̭ evaina̭-mpānti | digbhyo mā̭ pātetyā̭ha | digbhya evaina̭-mpānti | viśvābhyo mā nāṣṭrābhyaḥ̭ pātetyā̭ha | apa̭rimitādevaina̭-mpānti | hira̭ṇyavarṇāvuṣasāṃ-vi~roka iti̭ triṣṭubhā̭ bāhū u-dgṛ̭hṇāti | indriyaṃ-vai~ vīrya̭-ntriṣṭuk | indriyameva vīrya̭-mupari̭ṣṭādātman-dha̭tte || 40 ||

(vyāvṛ̭ttyai-dātramasītyā̭hā-mṛtagṃ hira̭ṇya-mekaśato-ga̭mayan-tyāha̭-brāhmāṇā-nāṣṭrābhyaḥ̭ pātetyā̭ha catvāri̭ ca) (a. 6)
anuvākaṃ 7 - digvyāsthāpanam

diśo vyāsthā̭payati | diśāmabhiji̭tyai | yada̭nu prakrāmet | abhi diśo̭ jayet | uttu mādyet | manasā-'nu prakrā̭mati | abhi diśo̭ jayati | nonmādyati | samidhamā tiṣṭhetyā̭ha | teja̭ evāva̭rundhe || 41 ||
ugrāmā tiṣṭhetyā̭ha | indriyamevāva̭ rundhe | virājamā tiṣṭhetyā̭ha | annādya̭mevāva̭ rundhe | udī̭cīmā tiṣṭhetyā̭ha | paśūnevāva̭ rundhe | ūrdhvāmā tiṣṭhetyā̭ha | suvargameva loka-mabhija̭yati | anūjji̭hīte | suvargasya̭ lokasya sama̭ṣṭyai || 42 ||
māruta eṣa bha̭vati | annaṃ-vai~ marutaḥ̭ | anna̭mevāva̭ rundhe | eka̭vigṃśatikapālo bhavati prati̭ṣṭhityai | yo̭-'raṇye 'nuvākyo̭ gaṇaḥ | ta-mma̭ddhyata upa̭dadhāti | grāmyaireva paśubhi̭-rāraṇyā-npaśū-npari̭gṛhṇāti | tasmā-dgrāmyaiḥ paśubhi̭rāraṇyāḥ paśavaḥ pari̭gṛhītāḥ | pṛthi̭rvainyaḥ | abhya̭ṣicyata || 43 ||
sa rāṣṭra-nnābha̭vat | sa etāni̭ pārthānya̭paśyat | tānya̭juhot | tairvai sa rāṣṭra-ma̭bhavat | yatpārthāni̭ juhoti̭ | rāṣṭrameva bha̭vati | bārhaspatya-mpūrvḙṣāmuttama-mbha̭vati | aindramutta̭reṣā-mprathamam | brahma̭ caivāsmai kṣatra-ñca̭ samīcī̭ dadhāti | atho brahma̭nneva kṣatra-mprati̭ṣṭhāpayati || 44 ||
ṣaṭpurastā̭-dabhiṣekasya̭ juhoti | ṣaḍupari̭ṣṭāt | dvāda̭śa sa-mpa̭dyante | dvāda̭śa māsā-ssaṃva~thsaraḥ | saṃva~thsaraḥ khalu vai devānā-mpūḥ | devānā̭meva pura̭-mmaddhyato vyava̭sarpati | tasya na kuta̭śca nopāvyādho bha̭vati | bhūtānā-maveṣṭī-rjuhoti | atrātra vai mṛtyu-rjā̭yate | yatra̭ yatraiva mṛtyu-rjāya̭te | tata̭ evainamava̭yajate | tasmā-drājasūyḙnejāna-ssarvamāyṷreti | sarve hya̭sya mṛtyavo-'veṣṭāḥ | tasmā-drājasūyḙnejāno nābhica̭ritavai | pratyagḙna-mabhicāra-sstṛ̭ṇute || 45 ||

(rundhe-sama̭ṣṭyā-asicyata-sthāpayati-jāya̭te pañca̭ ca) (a. 7)
anuvākaṃ 8 - abhiṣekaḥ

soma̭sya tviṣi̭rasi tavḙva me tviṣi̭rbhūyāditi̭ śārdūlacarmopa̭stṛṇāti | yaiva some tviṣiḥ̭ | yā śārdūle | tāmevāva̭ rundhe | mṛtyorvā eṣa varṇaḥ̭ | yacchārdūlaḥ | amṛtagṃ hira̭ṇyam | amṛta̭masi mṛtyormā̭ pāhīti hira̭ṇya-mupāsyati | amṛta̭meva mṛtyoranta-rdha̭tte | śatamā̭na-mbhavati || 46 ||
śatāyuḥ purṷṣa-śśatendri̭yaḥ | āyṷṣyevendriye prati̭ tiṣṭhati | didyonmā̭ pāhītyupari̭ṣṭādadhi nida̭dhāti | ubhayata̭ evāsmai śarma̭ dadhāti | aveṣṭā dandaśūkā iti̭ klībagṃ sīsḙna viddhyati | dandaśūkā̭-nevāva̭ yajate | tasmā-tklība-nda̭ndaśūkā dagṃśṷkāḥ | nira̭sta-nnamṷce-śśira iti̭ lohitāyasa-nnira̭syati | pāpmāna̭meva namṷci-nnirava̭dayate | prāṇā ātmanaḥ pūrvḙ-'bhiṣicyā ityā̭huḥ || 47 ||
somo rājā varṷṇaḥ | devā dha̭rmasuva̭śca ye | te te vācagṃ̭ suvantā-nte te prāṇagṃ sṷvantāmityā̭ha | prāṇānevātmanaḥ pūrvā̭-nabhiṣi̭ñcati | ya-dbrūyāt | agnestvā teja̭sā 'bhiṣi̭ñcāmīti̭ | tejasvyḙva syāt | duścarmā tu bha̭vet | soma̭sya tvā dyumnenā-bhiṣi̭ñcāmītyā̭ha | saumyo vai devata̭yā purṷṣaḥ || 48 ||
svayaivaina̭-ndevata̭yā-'bhiṣi̭ñcati | agne-stejasetyā̭ha | teja̭ evāsmi̭-ndadhāti | sūrya̭sya varcasetyā̭ha | varca̭ evāsmi̭-ndadhāti | indra̭sye-ndriyeṇetyā̭ha | indriyamevāsmi̭-ndadhāti | mitrāvarṷṇayo-rvīryḙṇetyā̭ha | vīrya̭mevāsmi̭-ndadhāti | marutāmojasetyā̭ha || 49 ||
oja̭ evāsmi̭-ndadhāti | kṣatrāṇā-ṅkṣatrapa̭tirasītyā̭ha | kṣatrāṇā̭mevaina̭-ṅkṣatrapa̭ti-ṅkaroti | ati̭ divaspāhītyā̭ha | atyanyā-npāhīti vāvaitadā̭ha | samāva̭vṛtranna-dharāgudī̭cī-rityā̭ha | rāṣṭramevāsmi̭-ndhruvama̭kaḥ | uccheṣa̭ṇena juhoti | uccheṣa̭ṇabhāgo vai rudraḥ | bhāgadheyḙnaiva rudra-nnirava̭dayate || 50 ||
uda̭mparetyāgnīddhre juhoti | eṣā vai rudrasya dik | svāyā̭meva diśi rudra-nnirava̭dayate | rudra yatte krayī para-nnāmetyā̭ha | yadvā a̭sya krayī para-nnāma̭ | tena vā eṣa hi̭nasti | yagṃ hinasti̭ | tenaivainagṃ̭ saha śa̭mayati | tasmai̭ hutama̭si yameṣṭa̭masītyā̭ha | yamādevāsya̭ mṛtyumava̭yajate || 51 ||
prajā̭pate na tvadetānyanya iti tasyai̭ gṛhe jṷhuyāt | yā-ṅkāmayḙta rāṣṭrama̭syai prajā syāditi̭ | rāṣṭramevāsyai prajā bha̭vati | parṇa-mayḙnā-ddhvaryu-rabhiṣi̭ñcati | brahmavarcasamevāsmin-tviṣi̭-ndadhāti | audṷmbareṇa rājanyaḥ̭ | ūrja̭mevāsmi̭-nnannādya̭-ndadhāti | āśva̭tthena vaiśyaḥ̭ | viśa̭mevāsmi-npuṣṭi̭-ndadhāti | naiya̭grodhena janyaḥ̭( ) | mitrāṇyevāsmai̭ kalpayati | atho prati̭ṣṭhityai || 52 ||

(bhava - tyāhuḥ - purṷṣa - ojasetyā̭ha - nirava̭dayate - yajate - janyo dve ca̭) (a. 8)
anuvākaṃ 9 - sthārohaṇam. vijayaḥ

indra̭sya vajro̭-'si vārtra̭ghna iti ratha̭mupāva̭harati viji̭tyai | mitrāvarṷṇayostvā praśāstroḥ praśiṣā̭ yunajmītyā̭ha | brahma̭ṇaivaina̭-ndevatābhyāṃ-yu~nakti | praṣṭivāhinaṃ̭-yu~nakti | praṣṭivāhī vai dḙvarathaḥ | devaratha-mevāsmai̭ yunakti | trayo-'śvā̭ bhavanti | ratha̭ścaturthaḥ | dvau sa̭vyeṣṭhasārathī | ṣaṭ-thsampa̭dyante || 53 ||
ṣaḍvā ṛtavaḥ̭ | ṛtubhi̭revainaṃ̭-yu~nakti | viṣṇukramān-kra̭mate | viṣṇṷreva bhūtvemān ~lokānabhija̭yati | yaḥ, kṣatriyaḥ prati̭hitaḥ | so-'nvāra̭bhate | rāṣṭrameva bha̭vati | triṣṭubhā 'nvāra̭bhate | indriyaṃ-vai~ triṣṭuk | indriyameva yaja̭māne dadhāti || 54 ||
marutā-mprasave jḙṣamityā̭ha | marudbhi̭reva prasṷ̄ta ujja̭yati | āpta-mmana ityā̭ha | yadeva manasaiphsīt | tadā̭pat | rājanya̭-ñjināti | anākrānta evākra̭mate | vi vā eṣa i̭ndriyeṇa̭ vīryḙṇardhyate | yo rā̭janya̭-ñjināti̭ | samahami̭ndriyeṇa̭ vīryḙṇetyā̭ha || 55 ||
indriyameva vīrya̭mātman-dha̭tte | paśūnā-mmanyura̭si tavḙva me manyurbhṷ̄yāditi vārā̭hī upānahāvupa̭ muñcate | paśūnāṃ-vā~ eṣa manyuḥ | ya-dva̭rāhaḥ | tenaiva pa̭śūnā-mmanyumātma-ndha̭tte | abhi vā iyagṃ sṷṣuvāṇa-ṅkā̭mayate | tasyeśvarendriyaṃ-vī~rya̭mādā̭toḥ | vārā̭hī upānahāvupa̭muñcate | asyā evāntardha̭tte | indriyasya̭ vīrya̭syānāttyai || 56 ||
namo̭ mātre pṛ̭thivyā ityāhāhigṃ̭ sāyai | iya̭dasyā-yṷrasyāyṷrme dhehītyā̭ha | āyṷrevātman-dha̭tte | ūrgasyūrja̭-mme dhehītyā̭ha | ūrja̭mavātma-ndha̭tte | yuṅṅa̭si varco̭-'si varco mayi̭ dhehītyā̭ha | varca̭ evātma-ndha̭tte | ekadhā brahmaṇa upa̭ harati | ekadhaiva yaja̭māna āyurūrjaṃ-va~rco̭ dadhāti | rathavimocanīyā̭ juhoti prati̭ṣṭhityai || 57 ||
trayo-'śvā̭ bhavanti | ratha̭ścaturthaḥ | tasmā-ccaturjṷhoti | yadubhau sahāvatiṣṭhḙtām | samānaṃ-lo~kami̭yātām | saha sa̭graṃhītrā ra̭thavāha̭ne rathamāda̭dhāti | suvargādevainaṃ̭-lo~kādantarda̭dhāti | hagṃsa-śśṷciṣadityā da̭dhāti | brahma̭ṇaivaina̭-mupāvahara̭ti | brahmaṇā ''da̭dhāti | ati̭cchandasā ''da̭dhāti | ati̭cchandā vai sarvā̭ṇi chandāgṃ̭si | sarvḙbhirevaina-ñchando̭bhi-rāda̭dhāti | varṣma vā eṣā chanda̭sām | yadati̭cchandāḥ | yadati̭cchandasā dadhā̭ti | varṣmaivainagṃ̭ samānānā-ṅkaroti || 58 ||

(padyante - dadhāti - vīryḙṇetyāhā - nātyai - prati̭ṣṭhityai - brahmaṇā-''da̭dhāti sapta ca̭) (a. 9)
anuvākaṃ 10 - āsane samupaveśa-ssarvaissevyatva-ñca

mitro̭-'si varṷṇo-'sītyā̭ha | maitraṃ-vā~ ahaḥ̭ | vāruṇī rātriḥ̭ | ahorātrābhyā̭-mevaina̭-mupāva̭harati | mitro̭-'si varṷṇosītyā̭ha | maitro vai dakṣi̭ṇaḥ | vāruṇa-ssavyaḥ | vaiśvadevyā̭mikṣā | svamevainaṷ bhāgadheya̭-mupāva̭harati | samahaṃ-vi~śvairdevai-rityā̭ha || 59 ||
vaiśvadevyo̭ vai prajāḥ | tā evādyāḥ kurute | kṣatrasya nābhi̭rasi kṣatrasya yoni̭-rasītya̭dhīvāsamā-stṛ̭ṇāti sayonitvāya̭ | syonāmāsī̭da suṣadāmāsīdetyā̭ha | yathā yajurevai tat | mā tvā̭ higṃsī-nmā mā̭ higṃsīdityāhā-higṃ̭sāyai | niṣa̭sāda dhṛtavra̭to varṷṇaḥ pastyāsvā sāmrājyāya sukraturityā̭ha | sāmrājyamevainagṃ̭ sukratṷ-ṅkaroti | brahmā(3)ntvagṃ rā̭jan-brahmā-'si̭ savitā-'si̭ satyasa̭va ityā̭ha | savitāra̭-mevainagṃ̭ satyasa̭va-ṅkaroti || 60 ||
brahmā(3)ntvagṃ rā̭jan-brahmā-'sīndro̭-'si satyaujā ityā̭ha | indra̭mevainagṃ̭ satyauja̭sa-ṅkaroti | brahmā(3)ntvagṃ rā̭jan-brahmā-'si̭ mitro̭-'si suśeva ityā̭ha | mitramevainagṃ̭ suśeva̭-ṅkaroti | brahmā(3)ntvagṃ rā̭jan-brahmā-'si varṷṇo-'si satyadharmetyā̭ha | varṷṇamevainagṃ̭ satyadha̭rmāṇa-ṅkaroti | savitā-'si̭ satyasa̭va ityā̭ha | gāyatrī-mevaitenā̭bhivyāha̭rati | indro̭-'si satyaujā ityā̭ha | triṣṭubha̭-mevaitenā̭bhi-vyāha̭rati || 61 ||
mitro̭-'si suśeva ityā̭ha | jaga̭tī-mevaitenā̭bhivyāha̭rati | satyametā devatāḥ | satyametāni chandāgṃ̭si | satyamevāva̭ rundhe | varṷṇo-'si satyadharmetyā̭ha | anuṣṭubha̭-mevaitenā̭bhivyāha̭rati | satyānṛte vā a̭nuṣṭup | satyānṛte varṷṇaḥ | satyānṛte evāva̭rundhe || 62 ||
nainagṃ̭ satyānṛte ṷdite higg̭staḥ | ya evaṃ-ve~da̭ | indra̭sya vajro̭-'si vārtra̭ghna iti sphya-mpraya̭cchati | vajro vai sphyaḥ | vajrḙṇaivāsmā̭ avaraparagṃ ra̭ndhayati | evagṃ hi tacchreyaḥ̭ | yada̭smā ete raddhyḙyuḥ | diśo-'bhya̭yagṃ rājā̭ 'bhūditi pañcākṣān-praya̭cchati | ete vai sarve-'yāḥ | apa̭rājāyina-mevaina̭-ṅkaroti || 63 ||
odanamudbrṷvate | parameṣṭhī vā eṣaḥ | yado̭danaḥ | paramāmevainagg śriya̭-ṅgamayati | suślokā~(4) suma̭ṅgalā~(4) satya̭rājā(3)nityā̭ha | āśiṣa̭mevaitāmā śāste | śauna-śśepamākhyā̭payate | varuṇapāśā-devaina̭-mmuñcati | para-śśata-mbha̭vati | śatāyuḥ purṷṣa-śśatendri̭yaḥ( ) | āyṷṣyevendriye prati̭tiṣṭhati | mārutasya caika̭vigṃśatikapālasya vaiśvadevyai cāmikṣā̭yā agnaye sviṣṭakṛtḙ samava̭dyati | devatā̭bhirevaina̭-mubhayataḥ pari̭gṛhṇāti | apā-nnaptre svāhorjo naptre svāhā-'gnayḙ gṛhapa̭taye svāheti̭ tisra āhṷtī-rjuhoti | traya̭ ime lokāḥ | eṣvḙva lokeṣu prati̭ tiṣṭhati || 64 ||