লক্ষ্মী নারাযণ কবচম্

॥ শ্রীগণেশায নমঃ ॥

শ্রীভৈরব উবাচ।
অধুনা দেবি বক্ষ্যামি লক্ষ্মীনারাযণস্য তে ।
কবচং মন্ত্রগর্ভং চ বজ্রপঞ্জরকাখ্যযা ॥ ১॥

শ্রীবজ্রপঞ্জরং নাম কবচং পরমাদ্ভুতম্ ।
রহস্যং সর্বদেবানাং সাধকানাং বিশেষতঃ ॥ ২॥

যং ধৃত্বা ভগবান্ দেবঃ প্রসীদতি পরঃ পুমান্ ।
যস্য ধারণমাত্রেণ ব্রহ্মা লোকপিতামহঃ ॥ ৩॥

ঈশ্বরোঽহং শিবো ভীমো বাসবোঽপি দিবস্পতিঃ ।
সূর্যস্তেজোনিধির্দেবি চন্দ্রর্মাস্তারকেশ্বরঃ ॥ ৪॥

বাযুশ্চ বলবাংল্লোকে বরুণো যাদসাম্পতিঃ ।
কুবেরোঽপি ধনাধ্যক্ষো ধর্মরাজো যমঃ স্মৃতঃ ॥ ৫॥

যং ধৃত্বা সহসা বিষ্ণুঃ সংহরিষ্যতি দানবান্ ।
জঘান রাবণাদীংশ্চ কিং বক্ষ্যেঽহমতঃ পরম্ ॥ ৬॥

কবচস্যাস্য সুভগে কথিতোঽযং মুনিঃ শিবঃ ।
ত্রিষ্টুপ্ ছন্দো দেবতা চ লক্ষ্মীনারাযণো মতঃ ॥ ৭॥

রমা বীজং পরা শক্তিস্তারং কীলকমীশ্বরি ।
ভোগাপবর্গসিদ্ধ্যর্থং বিনিযোগ ইতি স্মৃতঃ ॥ ৮॥

ওঁ অস্য শ্রীলক্ষ্মীনারাযণকবচস্য শিবঃ ঋষিঃ ।
ত্রিষ্টুপ্ ছন্দঃ । শ্রীলক্ষ্মীনারাযণ দেবতা ।
শ্রীং বীজং । হ্রীং শক্তিঃ । ওঁ কীলকং ।
ভোগাপবর্গসিদ্ধ্যর্থে পাঠে বিনিযোগঃ ।
অথ ধ্যানম্ ।
পূর্ণেন্দুবদনং পীতবসনং কমলাসনম্ ।
লক্ষ্ম্যা শ্রিতং চতুর্বাহুং লক্ষ্মীনারাযণং ভজে ॥ ৯॥

অথ কবচম্ ।
ওঁ বাসুদেবোঽবতু মে মস্তকং সশিরোরুহম্ ।
হ্রীং ললাটং সদা পাতু লক্ষ্মীবিষ্ণুঃ সমন্ততঃ ॥ ১০॥

হ্সৌঃ নেত্রেঽবতাল্লক্ষ্মীগোবিন্দো জগতাং পতিঃ ।
হ্রীং নাসাং সর্বদা পাতু লক্ষ্মীদামোদরঃ প্রভুঃ ॥ ১১॥

শ্রীং মুখং সততং পাতু দেবো লক্ষ্মীত্রিবিক্রমঃ ।
লক্ষ্মী কণ্ঠং সদা পাতু দেবো লক্ষ্মীজনার্দনঃ ॥ ১২॥

নারাযণায বাহূ মে পাতু লক্ষ্মীগদাগ্রজঃ ।
নমঃ পার্শ্বৌ সদা পাতু লক্ষ্মীনন্দৈকনন্দনঃ ॥ ১৩॥

অং আং ইং ঈং পাতু বক্ষো ওঁ লক্ষ্মীত্রিপুরেশ্বরঃ ।
উং ঊং ঋং ৠং পাতু কুক্ষিং হ্রীং লক্ষ্মীগরুডধ্বজঃ ॥ ১৪॥

লৃং লৄং এং ঐং পাতু পৃষ্ঠং হ্সৌঃ লক্ষ্মীনৃসিংহকঃ ।
ওং ঔং অং অঃ পাতু নাভিং হ্রীং লক্ষ্মীবিষ্টরশ্রবঃ ॥ ১৫॥

কং খং গং ঘং গুদং পাতু শ্রীং লক্ষ্মীকৈটভান্তকঃ ।
চং ছং জং ঝং পাতু শিশ্র্নং লক্ষ্মী লক্ষ্মীশ্বরঃ প্রভুঃ ॥ ১৬॥

টং ঠং ডং ঢং কটিং পাতু নারাযণায নাযকঃ ।
তং থং দং ধং পাতু চোরূ নমো লক্ষ্মীজগত্পতিঃ ॥ ১৭॥

পং ফং বং ভং পাতু জানূ ওঁ হ্রীং লক্ষ্মীচতুর্ভুজঃ ।
যং রং লং বং পাতু জঙ্ঘে হ্সৌঃ লক্ষ্মীগদাধরঃ ॥ ১৮॥

শং ষং সং হং পাতু গুল্ফৌ হ্রীং শ্রীং লক্ষ্মীরথাঙ্গভৃত্ ।
ল়ং ক্ষঃ পাদৌ সদা পাতু মূলং লক্ষ্মীসহস্রপাত্ ॥ ১৯॥

ঙং ঞং ণং নং মং মে পাতু লক্ষ্মীশঃ সকলং বপুঃ ।
ইন্দ্রো মাং পূর্বতঃ পাতু বহ্নির্বহ্নৌ সদাবতু ॥ ২০॥

যমো মাং দক্ষিণে পাতু নৈরৃত্যাং নিরৃতিশ্চ মাম্ ।
বরুণঃ পশ্চিমেঽব্যান্মাং বাযব্যেঽবতু মাং মরুত্ ॥ ২১॥

উত্তরে ধনদঃ পাযাদৈশান্যামীশ্বরোঽবতু ।
বজ্রশক্তিদণ্ডখড্গ পাশযষ্টিধ্বজাঙ্কিতাঃ ॥ ২২॥

সশূলাঃ সর্বদা পান্তু দিগীশাঃ পরমার্থদাঃ ।
অনন্তঃ পাত্বধো নিত্যমূর্ধ্বে ব্রহ্মাবতাচ্চ মাম্ ॥ ২৩॥

দশদিক্ষু সদা পাতু লক্ষ্মীনারাযণঃ প্রভুঃ ।
প্রভাতে পাতু মাং বিষ্ণুর্মধ্যাহ্নে বাসুদেবকঃ ॥ ২৪॥

দামোদরোঽবতাত্ সাযং নিশাদৌ নরসিংহকঃ ।
সঙ্কর্ষণোঽর্ধরাত্রেঽব্যাত্ প্রভাতেঽব্যাত্ ত্রিবিক্রমঃ ॥ ২৫॥

অনিরুদ্ধঃ সর্বকালং বিশ্বক্সেনশ্চ সর্বতঃ ।
রণে রাজকুলে দ্যুতে বিবাদে শত্রুসঙ্কটে
ওঁ হ্রীং হ্সৌঃ হ্রীং শ্রীং মূলং লক্ষ্মীনারাযণোঽবতু ॥ ২৬॥

ওঁওঁওঁরণরাজচৌররিপুতঃ পাযাচ্চ মাং কেশবঃ
হ্রীংহ্রীংহ্রীংহহ্হাহ্সৌঃ হ্সহ্সৌঃ বহ্নের্বতান্মাধবঃ ।
হ্রীংহ্রীংহ্রীংজলপর্বতাগ্নিভযতঃ পাযাদনন্তো বিভুঃ
শ্রীংশ্রীংশ্রীংশশশাললং প্রতিদিনং লক্ষ্মীধবঃ পাতু মাম্ ॥ ২৭॥

ইতীদং কবচং দিব্যং বজ্রপঞ্জরকাভিধম্ ।
লক্ষ্মীনারাযণস্যেষ্টং চতুর্বর্গফলপ্রদম্ ॥ ২৮॥

সর্বসৌভাগ্যনিলযং সর্বসারস্বতপ্রদম্ ।
লক্ষ্মীসংবননং তত্বং পরমার্থরসাযনম্ ॥ ২৯॥

মন্ত্রগর্ভং জগত্সারং রহস্যং ত্রিদিবৌকসাম্ ।
দশবারং পঠেদ্রাত্রৌ রতান্তে বৈষ্ণবোত্তমঃ ॥ ৩০॥

স্বপ্নে বরপ্রদং পশ্যেল্লক্ষ্মীনারাযণং সুধীঃ ।
ত্রিসন্ধ্যং যঃ পঠেন্নিত্যং কবচং মন্মুখোদিতম্ ॥ ৩১॥

স যাতি পরমং ধাম বৈষ্ণবং বৈষ্ণবেশ্বরঃ ।
মহাচীনপদস্থোঽপি যঃ পঠেদাত্মচিন্তকঃ ॥ ৩২॥

আনন্দপূরিতস্তূর্ণং লভেদ্ মোক্ষং স সাধকঃ ।
গন্ধাষ্টকেন বিলিখেদ্রবৌ ভূর্জে জপন্মনুম্ ॥ ৩৩॥

পীতসূত্রেণ সংবেষ্ট্য সৌবর্ণেনাথ বেষ্টযেত্ ।
ধারযেদ্গুটিকাং মূর্ধ্নি লক্ষ্মীনারাযণং স্মরন্ ॥ ৩৪॥

রণে রিপুন্ বিজিত্যাশু কল্যাণী গৃহমাবিশেত্ ।
বন্ধ্যা বা কাকবন্ধ্যা বা মৃতবত্সা চ যাঙ্গনা ॥ ৩৫॥

সা বধ্নীযান্ কণ্ঠদেশে লভেত্ পুত্রাংশ্চিরাযুষঃ ।
গুরুপদেশতো ধৃত্বা গুরুং ধ্যাত্বা মনুং জপন্ ॥ ৩৬॥

বর্ণলক্ষপুরশ্চর্যা ফলমাপ্নোতি সাধকঃ ।
বহুনোক্তেন কিং দেবি কবচস্যাস্য পার্বতি ॥ ৩৭॥

বিনানেন ন সিদ্ধিঃ স্যান্মন্ত্রস্যাস্য মহেশ্বরি ।
সর্বাগমরহস্যাঢ্যং তত্বাত্ তত্বং পরাত্ পরম্ ॥ ৩৮॥

অভক্তায ন দাতব্যং কুচৈলায দুরাত্মনে ।
দীক্ষিতায কুলীনায স্বশিষ্যায মহাত্মনে ॥ ৩৯॥

মহাচীনপদস্থায দাতব্যং কবচোত্তমম্ ।
গুহ্যং গোপ্যং মহাদেবি লক্ষ্মীনারাযণপ্রিযম্ ।
বজ্রপঞ্জরকং বর্ম গোপনীযং স্বযোনিবত্ ॥ ৪০॥

॥ ইতি শ্রীরুদ্রযামলে তন্ত্রে শ্রীদেবীরহস্যে
লক্ষ্মীনারাযণকবচং সম্পূর্ণম্ ॥