ലക്ഷ്മീ നാരായണ കവചമ്

॥ ശ്രീഗണേശായ നമഃ ॥

ശ്രീഭൈരവ ഉവാച।
അധുനാ ദേവി വക്ഷ്യാമി ലക്ഷ്മീനാരായണസ്യ തേ ।
കവചം മന്ത്രഗര്ഭം ച വജ്രപഞ്ജരകാഖ്യയാ ॥ ൧॥

ശ്രീവജ്രപഞ്ജരം നാമ കവചം പരമാദ്ഭുതമ് ।
രഹസ്യം സര്വദേവാനാം സാധകാനാം വിശേഷതഃ ॥ ൨॥

യം ധൃത്വാ ഭഗവാന് ദേവഃ പ്രസീദതി പരഃ പുമാന് ।
യസ്യ ധാരണമാത്രേണ ബ്രഹ്മാ ലോകപിതാമഹഃ ॥ ൩॥

ഈശ്വരോഽഹം ശിവോ ഭീമോ വാസവോഽപി ദിവസ്പതിഃ ।
സൂര്യസ്തേജോനിധിര്ദേവി ചന്ദ്രര്മാസ്താരകേശ്വരഃ ॥ ൪॥

വായുശ്ച ബലവാംല്ലോകേ വരുണോ യാദസാമ്പതിഃ ।
കുബേരോഽപി ധനാധ്യക്ഷോ ധര്മരാജോ യമഃ സ്മൃതഃ ॥ ൫॥

യം ധൃത്വാ സഹസാ വിഷ്ണുഃ സംഹരിഷ്യതി ദാനവാന് ।
ജഘാന രാവണാദീംശ്ച കിം വക്ഷ്യേഽഹമതഃ പരമ് ॥ ൬॥

കവചസ്യാസ്യ സുഭഗേ കഥിതോഽയം മുനിഃ ശിവഃ ।
ത്രിഷ്ടുപ് ഛന്ദോ ദേവതാ ച ലക്ഷ്മീനാരായണോ മതഃ ॥ ൭॥

രമാ ബീജം പരാ ശക്തിസ്താരം കീലകമീശ്വരി ।
ഭോഗാപവര്ഗസിദ്ധ്യര്ഥം വിനിയോഗ ഇതി സ്മൃതഃ ॥ ൮॥

ഓം അസ്യ ശ്രീലക്ഷ്മീനാരായണകവചസ്യ ശിവഃ ഋഷിഃ ।
ത്രിഷ്ടുപ് ഛന്ദഃ । ശ്രീലക്ഷ്മീനാരായണ ദേവതാ ।
ശ്രീം ബീജം । ഹ്രീം ശക്തിഃ । ഓം കീലകം ।
ഭോഗാപവര്ഗസിദ്ധ്യര്ഥേ പാഠേ വിനിയോഗഃ ।
അഥ ധ്യാനമ് ।
പൂര്ണേന്ദുവദനം പീതവസനം കമലാസനമ് ।
ലക്ഷ്മ്യാ ശ്രിതം ചതുര്ബാഹും ലക്ഷ്മീനാരായണം ഭജേ ॥ ൯॥

അഥ കവചമ് ।
ഓം വാസുദേവോഽവതു മേ മസ്തകം സശിരോരുഹമ് ।
ഹ്രീം ലലാടം സദാ പാതു ലക്ഷ്മീവിഷ്ണുഃ സമന്തതഃ ॥ ൧൦॥

ഹ്സൌഃ നേത്രേഽവതാല്ലക്ഷ്മീഗോവിന്ദോ ജഗതാം പതിഃ ।
ഹ്രീം നാസാം സര്വദാ പാതു ലക്ഷ്മീദാമോദരഃ പ്രഭുഃ ॥ ൧൧॥

ശ്രീം മുഖം സതതം പാതു ദേവോ ലക്ഷ്മീത്രിവിക്രമഃ ।
ലക്ഷ്മീ കണ്ഠം സദാ പാതു ദേവോ ലക്ഷ്മീജനാര്ദനഃ ॥ ൧൨॥

നാരായണായ ബാഹൂ മേ പാതു ലക്ഷ്മീഗദാഗ്രജഃ ।
നമഃ പാര്ശ്വൌ സദാ പാതു ലക്ഷ്മീനന്ദൈകനന്ദനഃ ॥ ൧൩॥

അം ആം ഇം ഈം പാതു വക്ഷോ ഓം ലക്ഷ്മീത്രിപുരേശ്വരഃ ।
ഉം ഊം ഋം ൠം പാതു കുക്ഷിം ഹ്രീം ലക്ഷ്മീഗരുഡധ്വജഃ ॥ ൧൪॥

ലൃം ലൄം ഏം ഐം പാതു പൃഷ്ഠം ഹ്സൌഃ ലക്ഷ്മീനൃസിംഹകഃ ।
ഓം ഔം അം അഃ പാതു നാഭിം ഹ്രീം ലക്ഷ്മീവിഷ്ടരശ്രവഃ ॥ ൧൫॥

കം ഖം ഗം ഘം ഗുദം പാതു ശ്രീം ലക്ഷ്മീകൈടഭാന്തകഃ ।
ചം ഛം ജം ഝം പാതു ശിശ്ര്നം ലക്ഷ്മീ ലക്ഷ്മീശ്വരഃ പ്രഭുഃ ॥ ൧൬॥

ടം ഠം ഡം ഢം കടിം പാതു നാരായണായ നായകഃ ।
തം ഥം ദം ധം പാതു ചോരൂ നമോ ലക്ഷ്മീജഗത്പതിഃ ॥ ൧൭॥

പം ഫം ബം ഭം പാതു ജാനൂ ഓം ഹ്രീം ലക്ഷ്മീചതുര്ഭുജഃ ।
യം രം ലം വം പാതു ജങ്ഘേ ഹ്സൌഃ ലക്ഷ്മീഗദാധരഃ ॥ ൧൮॥

ശം ഷം സം ഹം പാതു ഗുല്ഫൌ ഹ്രീം ശ്രീം ലക്ഷ്മീരഥാങ്ഗഭൃത് ।
ളം ക്ഷഃ പാദൌ സദാ പാതു മൂലം ലക്ഷ്മീസഹസ്രപാത് ॥ ൧൯॥

ങം ഞം ണം നം മം മേ പാതു ലക്ഷ്മീശഃ സകലം വപുഃ ।
ഇന്ദ്രോ മാം പൂര്വതഃ പാതു വഹ്നിര്വഹ്നൌ സദാവതു ॥ ൨൦॥

യമോ മാം ദക്ഷിണേ പാതു നൈരൃത്യാം നിരൃതിശ്ച മാമ് ।
വരുണഃ പശ്ചിമേഽവ്യാന്മാം വായവ്യേഽവതു മാം മരുത് ॥ ൨൧॥

ഉത്തരേ ധനദഃ പായാദൈശാന്യാമീശ്വരോഽവതു ।
വജ്രശക്തിദണ്ഡഖഡ്ഗ പാശയഷ്ടിധ്വജാങ്കിതാഃ ॥ ൨൨॥

സശൂലാഃ സര്വദാ പാന്തു ദിഗീശാഃ പരമാര്ഥദാഃ ।
അനന്തഃ പാത്വധോ നിത്യമൂര്ധ്വേ ബ്രഹ്മാവതാച്ച മാമ് ॥ ൨൩॥

ദശദിക്ഷു സദാ പാതു ലക്ഷ്മീനാരായണഃ പ്രഭുഃ ।
പ്രഭാതേ പാതു മാം വിഷ്ണുര്മധ്യാഹ്നേ വാസുദേവകഃ ॥ ൨൪॥

ദാമോദരോഽവതാത് സായം നിശാദൌ നരസിംഹകഃ ।
സങ്കര്ഷണോഽര്ധരാത്രേഽവ്യാത് പ്രഭാതേഽവ്യാത് ത്രിവിക്രമഃ ॥ ൨൫॥

അനിരുദ്ധഃ സര്വകാലം വിശ്വക്സേനശ്ച സര്വതഃ ।
രണേ രാജകുലേ ദ്യുതേ വിവാദേ ശത്രുസങ്കടേ
ഓം ഹ്രീം ഹ്സൌഃ ഹ്രീം ശ്രീം മൂലം ലക്ഷ്മീനാരായണോഽവതു ॥ ൨൬॥

ഓംഓംഓംരണരാജചൌരരിപുതഃ പായാച്ച മാം കേശവഃ
ഹ്രീംഹ്രീംഹ്രീംഹഹ്ഹാഹ്സൌഃ ഹ്സഹ്സൌഃ വഹ്നേര്വതാന്മാധവഃ ।
ഹ്രീംഹ്രീംഹ്രീംജലപര്വതാഗ്നിഭയതഃ പായാദനന്തോ വിഭുഃ
ശ്രീംശ്രീംശ്രീംശശശാലലം പ്രതിദിനം ലക്ഷ്മീധവഃ പാതു മാമ് ॥ ൨൭॥

ഇതീദം കവചം ദിവ്യം വജ്രപഞ്ജരകാഭിധമ് ।
ലക്ഷ്മീനാരായണസ്യേഷ്ടം ചതുര്വര്ഗഫലപ്രദമ് ॥ ൨൮॥

സര്വസൌഭാഗ്യനിലയം സര്വസാരസ്വതപ്രദമ് ।
ലക്ഷ്മീസംവനനം തത്വം പരമാര്ഥരസായനമ് ॥ ൨൯॥

മന്ത്രഗര്ഭം ജഗത്സാരം രഹസ്യം ത്രിദിവൌകസാമ് ।
ദശവാരം പഠേദ്രാത്രൌ രതാന്തേ വൈഷ്ണവോത്തമഃ ॥ ൩൦॥

സ്വപ്നേ വരപ്രദം പശ്യേല്ലക്ഷ്മീനാരായണം സുധീഃ ।
ത്രിസന്ധ്യം യഃ പഠേന്നിത്യം കവചം മന്മുഖോദിതമ് ॥ ൩൧॥

സ യാതി പരമം ധാമ വൈഷ്ണവം വൈഷ്ണവേശ്വരഃ ।
മഹാചീനപദസ്ഥോഽപി യഃ പഠേദാത്മചിന്തകഃ ॥ ൩൨॥

ആനന്ദപൂരിതസ്തൂര്ണം ലഭേദ് മോക്ഷം സ സാധകഃ ।
ഗന്ധാഷ്ടകേന വിലിഖേദ്രവൌ ഭൂര്ജേ ജപന്മനുമ് ॥ ൩൩॥

പീതസൂത്രേണ സംവേഷ്ട്യ സൌവര്ണേനാഥ വേഷ്ടയേത് ।
ധാരയേദ്ഗുടികാം മൂര്ധ്നി ലക്ഷ്മീനാരായണം സ്മരന് ॥ ൩൪॥

രണേ രിപുന് വിജിത്യാശു കല്യാണീ ഗൃഹമാവിശേത് ।
വന്ധ്യാ വാ കാകവന്ധ്യാ വാ മൃതവത്സാ ച യാങ്ഗനാ ॥ ൩൫॥

സാ ബധ്നീയാന് കണ്ഠദേശേ ലഭേത് പുത്രാംശ്ചിരായുഷഃ ।
ഗുരുപദേശതോ ധൃത്വാ ഗുരും ധ്യാത്വാ മനും ജപന് ॥ ൩൬॥

വര്ണലക്ഷപുരശ്ചര്യാ ഫലമാപ്നോതി സാധകഃ ।
ബഹുനോക്തേന കിം ദേവി കവചസ്യാസ്യ പാര്വതി ॥ ൩൭॥

വിനാനേന ന സിദ്ധിഃ സ്യാന്മന്ത്രസ്യാസ്യ മഹേശ്വരി ।
സര്വാഗമരഹസ്യാഢ്യം തത്വാത് തത്വം പരാത് പരമ് ॥ ൩൮॥

അഭക്തായ ന ദാതവ്യം കുചൈലായ ദുരാത്മനേ ।
ദീക്ഷിതായ കുലീനായ സ്വശിഷ്യായ മഹാത്മനേ ॥ ൩൯॥

മഹാചീനപദസ്ഥായ ദാതവ്യം കവചോത്തമമ് ।
ഗുഹ്യം ഗോപ്യം മഹാദേവി ലക്ഷ്മീനാരായണപ്രിയമ് ।
വജ്രപഞ്ജരകം വര്മ ഗോപനീയം സ്വയോനിവത് ॥ ൪൦॥

॥ ഇതി ശ്രീരുദ്രയാമലേ തന്ത്രേ ശ്രീദേവീരഹസ്യേ
ലക്ഷ്മീനാരായണകവചം സമ്പൂര്ണമ് ॥