lakṣmī nārāyaṇa kavacam

|| śrīgaṇeśāya namaḥ ||

śrībhairava uvāca|
adhunā devi vakṣyāmi lakṣmīnārāyaṇasya te |
kavacaṃ mantragarbhaṃ ca vajrapañjarakākhyayā || 1||

śrīvajrapañjaraṃ nāma kavacaṃ paramādbhutam |
rahasyaṃ sarvadevānāṃ sādhakānāṃ viśeṣataḥ || 2||

yaṃ dhṛtvā bhagavān devaḥ prasīdati paraḥ pumān |
yasya dhāraṇamātreṇa brahmā lokapitāmahaḥ || 3||

īśvaro'haṃ śivo bhīmo vāsavo'pi divaspatiḥ |
sūryastejonidhirdevi candrarmāstārakeśvaraḥ || 4||

vāyuśca balavāṃlloke varuṇo yādasāmpatiḥ |
kubero'pi dhanādhyakṣo dharmarājo yamaḥ smṛtaḥ || 5||

yaṃ dhṛtvā sahasā viṣṇuḥ saṃhariṣyati dānavān |
jaghāna rāvaṇādīṃśca kiṃ vakṣye'hamataḥ param || 6||

kavacasyāsya subhage kathito'yaṃ muniḥ śivaḥ |
triṣṭup chando devatā ca lakṣmīnārāyaṇo mataḥ || 7||

ramā bījaṃ parā śaktistāraṃ kīlakamīśvari |
bhogāpavargasiddhyarthaṃ viniyoga iti smṛtaḥ || 8||

oṃ asya śrīlakṣmīnārāyaṇakavacasya śivaḥ ṛṣiḥ |
triṣṭup chandaḥ | śrīlakṣmīnārāyaṇa devatā |
śrīṃ bījaṃ | hrīṃ śaktiḥ | oṃ kīlakaṃ |
bhogāpavargasiddhyarthe pāṭhe viniyogaḥ |
atha dhyānam |
pūrṇenduvadanaṃ pītavasanaṃ kamalāsanam |
lakṣmyā śritaṃ caturbāhuṃ lakṣmīnārāyaṇaṃ bhaje || 9||

atha kavacam |
oṃ vāsudevo'vatu me mastakaṃ saśiroruham |
hrīṃ lalāṭaṃ sadā pātu lakṣmīviṣṇuḥ samantataḥ || 10||

hsauḥ netre'vatāllakṣmīgovindo jagatāṃ patiḥ |
hrīṃ nāsāṃ sarvadā pātu lakṣmīdāmodaraḥ prabhuḥ || 11||

śrīṃ mukhaṃ satataṃ pātu devo lakṣmītrivikramaḥ |
lakṣmī kaṇṭhaṃ sadā pātu devo lakṣmījanārdanaḥ || 12||

nārāyaṇāya bāhū me pātu lakṣmīgadāgrajaḥ |
namaḥ pārśvau sadā pātu lakṣmīnandaikanandanaḥ || 13||

aṃ āṃ iṃ īṃ pātu vakṣo oṃ lakṣmītripureśvaraḥ |
uṃ ūṃ ṛṃ ṝṃ pātu kukṣiṃ hrīṃ lakṣmīgaruḍadhvajaḥ || 14||

lṛṃ lṝṃ eṃ aiṃ pātu pṛṣṭhaṃ hsauḥ lakṣmīnṛsiṃhakaḥ |
oṃ auṃ aṃ aḥ pātu nābhiṃ hrīṃ lakṣmīviṣṭaraśravaḥ || 15||

kaṃ khaṃ gaṃ ghaṃ gudaṃ pātu śrīṃ lakṣmīkaiṭabhāntakaḥ |
caṃ chaṃ jaṃ jhaṃ pātu śiśrnaṃ lakṣmī lakṣmīśvaraḥ prabhuḥ || 16||

ṭaṃ ṭhaṃ ḍaṃ ḍhaṃ kaṭiṃ pātu nārāyaṇāya nāyakaḥ |
taṃ thaṃ daṃ dhaṃ pātu corū namo lakṣmījagatpatiḥ || 17||

paṃ phaṃ baṃ bhaṃ pātu jānū oṃ hrīṃ lakṣmīcaturbhujaḥ |
yaṃ raṃ laṃ vaṃ pātu jaṅghe hsauḥ lakṣmīgadādharaḥ || 18||

śaṃ ṣaṃ saṃ haṃ pātu gulphau hrīṃ śrīṃ lakṣmīrathāṅgabhṛt |
l̤aṃ kṣaḥ pādau sadā pātu mūlaṃ lakṣmīsahasrapāt || 19||

ṅaṃ ñaṃ ṇaṃ naṃ maṃ me pātu lakṣmīśaḥ sakalaṃ vapuḥ |
indro māṃ pūrvataḥ pātu vahnirvahnau sadāvatu || 20||

yamo māṃ dakṣiṇe pātu nairṛtyāṃ nirṛtiśca mām |
varuṇaḥ paścime'vyānmāṃ vāyavye'vatu māṃ marut || 21||

uttare dhanadaḥ pāyādaiśānyāmīśvaro'vatu |
vajraśaktidaṇḍakhaḍga pāśayaṣṭidhvajāṅkitāḥ || 22||

saśūlāḥ sarvadā pāntu digīśāḥ paramārthadāḥ |
anantaḥ pātvadho nityamūrdhve brahmāvatācca mām || 23||

daśadikṣu sadā pātu lakṣmīnārāyaṇaḥ prabhuḥ |
prabhāte pātu māṃ viṣṇurmadhyāhne vāsudevakaḥ || 24||

dāmodaro'vatāt sāyaṃ niśādau narasiṃhakaḥ |
saṅkarṣaṇo'rdharātre'vyāt prabhāte'vyāt trivikramaḥ || 25||

aniruddhaḥ sarvakālaṃ viśvaksenaśca sarvataḥ |
raṇe rājakule dyute vivāde śatrusaṅkaṭe
oṃ hrīṃ hsauḥ hrīṃ śrīṃ mūlaṃ lakṣmīnārāyaṇo'vatu || 26||

oṃoṃoṃraṇarājacaurariputaḥ pāyācca māṃ keśavaḥ
hrīṃhrīṃhrīṃhahhāhsauḥ hsahsauḥ vahnervatānmādhavaḥ |
hrīṃhrīṃhrīṃjalaparvatāgnibhayataḥ pāyādananto vibhuḥ
śrīṃśrīṃśrīṃśaśaśālalaṃ pratidinaṃ lakṣmīdhavaḥ pātu mām || 27||

itīdaṃ kavacaṃ divyaṃ vajrapañjarakābhidham |
lakṣmīnārāyaṇasyeṣṭaṃ caturvargaphalapradam || 28||

sarvasaubhāgyanilayaṃ sarvasārasvatapradam |
lakṣmīsaṃvananaṃ tatvaṃ paramārtharasāyanam || 29||

mantragarbhaṃ jagatsāraṃ rahasyaṃ tridivaukasām |
daśavāraṃ paṭhedrātrau ratānte vaiṣṇavottamaḥ || 30||

svapne varapradaṃ paśyellakṣmīnārāyaṇaṃ sudhīḥ |
trisandhyaṃ yaḥ paṭhennityaṃ kavacaṃ manmukhoditam || 31||

sa yāti paramaṃ dhāma vaiṣṇavaṃ vaiṣṇaveśvaraḥ |
mahācīnapadastho'pi yaḥ paṭhedātmacintakaḥ || 32||

ānandapūritastūrṇaṃ labhed mokṣaṃ sa sādhakaḥ |
gandhāṣṭakena vilikhedravau bhūrje japanmanum || 33||

pītasūtreṇa saṃveṣṭya sauvarṇenātha veṣṭayet |
dhārayedguṭikāṃ mūrdhni lakṣmīnārāyaṇaṃ smaran || 34||

raṇe ripun vijityāśu kalyāṇī gṛhamāviśet |
vandhyā vā kākavandhyā vā mṛtavatsā ca yāṅganā || 35||

sā badhnīyān kaṇṭhadeśe labhet putrāṃścirāyuṣaḥ |
gurupadeśato dhṛtvā guruṃ dhyātvā manuṃ japan || 36||

varṇalakṣapuraścaryā phalamāpnoti sādhakaḥ |
bahunoktena kiṃ devi kavacasyāsya pārvati || 37||

vinānena na siddhiḥ syānmantrasyāsya maheśvari |
sarvāgamarahasyāḍhyaṃ tatvāt tatvaṃ parāt param || 38||

abhaktāya na dātavyaṃ kucailāya durātmane |
dīkṣitāya kulīnāya svaśiṣyāya mahātmane || 39||

mahācīnapadasthāya dātavyaṃ kavacottamam |
guhyaṃ gopyaṃ mahādevi lakṣmīnārāyaṇapriyam |
vajrapañjarakaṃ varma gopanīyaṃ svayonivat || 40||

|| iti śrīrudrayāmale tantre śrīdevīrahasye
lakṣmīnārāyaṇakavacaṃ sampūrṇam ||