ଲକ୍ଷ୍ମୀ ନାରାଯଣ କଵଚମ୍

॥ ଶ୍ରୀଗଣେଶାଯ ନମଃ ॥

ଶ୍ରୀଭୈରଵ ଉଵାଚ।
ଅଧୁନା ଦେଵି ଵକ୍ଷ୍ଯାମି ଲକ୍ଷ୍ମୀନାରାଯଣସ୍ଯ ତେ ।
କଵଚଂ ମନ୍ତ୍ରଗର୍ଭଂ ଚ ଵଜ୍ରପଞ୍ଜରକାଖ୍ଯଯା ॥ ୧॥

ଶ୍ରୀଵଜ୍ରପଞ୍ଜରଂ ନାମ କଵଚଂ ପରମାଦ୍ଭୁତମ୍ ।
ରହସ୍ଯଂ ସର୍ଵଦେଵାନାଂ ସାଧକାନାଂ ଵିଶେଷତଃ ॥ ୨॥

ଯଂ ଧୃତ୍ଵା ଭଗଵାନ୍ ଦେଵଃ ପ୍ରସୀଦତି ପରଃ ପୁମାନ୍ ।
ଯସ୍ଯ ଧାରଣମାତ୍ରେଣ ବ୍ରହ୍ମା ଲୋକପିତାମହଃ ॥ ୩॥

ଈଶ୍ଵରୋଽହଂ ଶିଵୋ ଭୀମୋ ଵାସଵୋଽପି ଦିଵସ୍ପତିଃ ।
ସୂର୍ଯସ୍ତେଜୋନିଧିର୍ଦେଵି ଚନ୍ଦ୍ରର୍ମାସ୍ତାରକେଶ୍ଵରଃ ॥ ୪॥

ଵାଯୁଶ୍ଚ ବଲଵାଂଲ୍ଲୋକେ ଵରୁଣୋ ଯାଦସାମ୍ପତିଃ ।
କୁବେରୋଽପି ଧନାଧ୍ଯକ୍ଷୋ ଧର୍ମରାଜୋ ଯମଃ ସ୍ମୃତଃ ॥ ୫॥

ଯଂ ଧୃତ୍ଵା ସହସା ଵିଷ୍ଣୁଃ ସଂହରିଷ୍ଯତି ଦାନଵାନ୍ ।
ଜଘାନ ରାଵଣାଦୀଂଶ୍ଚ କିଂ ଵକ୍ଷ୍ଯେଽହମତଃ ପରମ୍ ॥ ୬॥

କଵଚସ୍ଯାସ୍ଯ ସୁଭଗେ କଥିତୋଽଯଂ ମୁନିଃ ଶିଵଃ ।
ତ୍ରିଷ୍ଟୁପ୍ ଛନ୍ଦୋ ଦେଵତା ଚ ଲକ୍ଷ୍ମୀନାରାଯଣୋ ମତଃ ॥ ୭॥

ରମା ବୀଜଂ ପରା ଶକ୍ତିସ୍ତାରଂ କୀଲକମୀଶ୍ଵରି ।
ଭୋଗାପଵର୍ଗସିଦ୍ଧ୍ଯର୍ଥଂ ଵିନିଯୋଗ ଇତି ସ୍ମୃତଃ ॥ ୮॥

ଓଁ ଅସ୍ଯ ଶ୍ରୀଲକ୍ଷ୍ମୀନାରାଯଣକଵଚସ୍ଯ ଶିଵଃ ଋଷିଃ ।
ତ୍ରିଷ୍ଟୁପ୍ ଛନ୍ଦଃ । ଶ୍ରୀଲକ୍ଷ୍ମୀନାରାଯଣ ଦେଵତା ।
ଶ୍ରୀଂ ବୀଜଂ । ହ୍ରୀଂ ଶକ୍ତିଃ । ଓଁ କୀଲକଂ ।
ଭୋଗାପଵର୍ଗସିଦ୍ଧ୍ଯର୍ଥେ ପାଠେ ଵିନିଯୋଗଃ ।
ଅଥ ଧ୍ଯାନମ୍ ।
ପୂର୍ଣେନ୍ଦୁଵଦନଂ ପୀତଵସନଂ କମଲାସନମ୍ ।
ଲକ୍ଷ୍ମ୍ଯା ଶ୍ରିତଂ ଚତୁର୍ବାହୁଂ ଲକ୍ଷ୍ମୀନାରାଯଣଂ ଭଜେ ॥ ୯॥

ଅଥ କଵଚମ୍ ।
ଓଁ ଵାସୁଦେଵୋଽଵତୁ ମେ ମସ୍ତକଂ ସଶିରୋରୁହମ୍ ।
ହ୍ରୀଂ ଲଲାଟଂ ସଦା ପାତୁ ଲକ୍ଷ୍ମୀଵିଷ୍ଣୁଃ ସମନ୍ତତଃ ॥ ୧୦॥

ହ୍ସୌଃ ନେତ୍ରେଽଵତାଲ୍ଲକ୍ଷ୍ମୀଗୋଵିନ୍ଦୋ ଜଗତାଂ ପତିଃ ।
ହ୍ରୀଂ ନାସାଂ ସର୍ଵଦା ପାତୁ ଲକ୍ଷ୍ମୀଦାମୋଦରଃ ପ୍ରଭୁଃ ॥ ୧୧॥

ଶ୍ରୀଂ ମୁଖଂ ସତତଂ ପାତୁ ଦେଵୋ ଲକ୍ଷ୍ମୀତ୍ରିଵିକ୍ରମଃ ।
ଲକ୍ଷ୍ମୀ କଣ୍ଠଂ ସଦା ପାତୁ ଦେଵୋ ଲକ୍ଷ୍ମୀଜନାର୍ଦନଃ ॥ ୧୨॥

ନାରାଯଣାଯ ବାହୂ ମେ ପାତୁ ଲକ୍ଷ୍ମୀଗଦାଗ୍ରଜଃ ।
ନମଃ ପାର୍ଶ୍ଵୌ ସଦା ପାତୁ ଲକ୍ଷ୍ମୀନନ୍ଦୈକନନ୍ଦନଃ ॥ ୧୩॥

ଅଂ ଆଂ ଇଂ ଈଂ ପାତୁ ଵକ୍ଷୋ ଓଁ ଲକ୍ଷ୍ମୀତ୍ରିପୁରେଶ୍ଵରଃ ।
ଉଂ ଊଂ ଋଂ ୠଂ ପାତୁ କୁକ୍ଷିଂ ହ୍ରୀଂ ଲକ୍ଷ୍ମୀଗରୁଡଧ୍ଵଜଃ ॥ ୧୪॥

ଲୃଂ ଲୄଂ ଏଂ ଐଂ ପାତୁ ପୃଷ୍ଠଂ ହ୍ସୌଃ ଲକ୍ଷ୍ମୀନୃସିଂହକଃ ।
ଓଂ ଔଂ ଅଂ ଅଃ ପାତୁ ନାଭିଂ ହ୍ରୀଂ ଲକ୍ଷ୍ମୀଵିଷ୍ଟରଶ୍ରଵଃ ॥ ୧୫॥

କଂ ଖଂ ଗଂ ଘଂ ଗୁଦଂ ପାତୁ ଶ୍ରୀଂ ଲକ୍ଷ୍ମୀକୈଟଭାନ୍ତକଃ ।
ଚଂ ଛଂ ଜଂ ଝଂ ପାତୁ ଶିଶ୍ର୍ନଂ ଲକ୍ଷ୍ମୀ ଲକ୍ଷ୍ମୀଶ୍ଵରଃ ପ୍ରଭୁଃ ॥ ୧୬॥

ଟଂ ଠଂ ଡଂ ଢଂ କଟିଂ ପାତୁ ନାରାଯଣାଯ ନାଯକଃ ।
ତଂ ଥଂ ଦଂ ଧଂ ପାତୁ ଚୋରୂ ନମୋ ଲକ୍ଷ୍ମୀଜଗତ୍ପତିଃ ॥ ୧୭॥

ପଂ ଫଂ ବଂ ଭଂ ପାତୁ ଜାନୂ ଓଁ ହ୍ରୀଂ ଲକ୍ଷ୍ମୀଚତୁର୍ଭୁଜଃ ।
ଯଂ ରଂ ଲଂ ଵଂ ପାତୁ ଜଙ୍ଘେ ହ୍ସୌଃ ଲକ୍ଷ୍ମୀଗଦାଧରଃ ॥ ୧୮॥

ଶଂ ଷଂ ସଂ ହଂ ପାତୁ ଗୁଲ୍ଫୌ ହ୍ରୀଂ ଶ୍ରୀଂ ଲକ୍ଷ୍ମୀରଥାଙ୍ଗଭୃତ୍ ।
ଳଂ କ୍ଷଃ ପାଦୌ ସଦା ପାତୁ ମୂଲଂ ଲକ୍ଷ୍ମୀସହସ୍ରପାତ୍ ॥ ୧୯॥

ଙଂ ଞଂ ଣଂ ନଂ ମଂ ମେ ପାତୁ ଲକ୍ଷ୍ମୀଶଃ ସକଲଂ ଵପୁଃ ।
ଇନ୍ଦ୍ରୋ ମାଂ ପୂର୍ଵତଃ ପାତୁ ଵହ୍ନିର୍ଵହ୍ନୌ ସଦାଵତୁ ॥ ୨୦॥

ଯମୋ ମାଂ ଦକ୍ଷିଣେ ପାତୁ ନୈରୃତ୍ଯାଂ ନିରୃତିଶ୍ଚ ମାମ୍ ।
ଵରୁଣଃ ପଶ୍ଚିମେଽଵ୍ଯାନ୍ମାଂ ଵାଯଵ୍ଯେଽଵତୁ ମାଂ ମରୁତ୍ ॥ ୨୧॥

ଉତ୍ତରେ ଧନଦଃ ପାଯାଦୈଶାନ୍ଯାମୀଶ୍ଵରୋଽଵତୁ ।
ଵଜ୍ରଶକ୍ତିଦଣ୍ଡଖଡ୍ଗ ପାଶଯଷ୍ଟିଧ୍ଵଜାଙ୍କିତାଃ ॥ ୨୨॥

ସଶୂଲାଃ ସର୍ଵଦା ପାନ୍ତୁ ଦିଗୀଶାଃ ପରମାର୍ଥଦାଃ ।
ଅନନ୍ତଃ ପାତ୍ଵଧୋ ନିତ୍ଯମୂର୍ଧ୍ଵେ ବ୍ରହ୍ମାଵତାଚ୍ଚ ମାମ୍ ॥ ୨୩॥

ଦଶଦିକ୍ଷୁ ସଦା ପାତୁ ଲକ୍ଷ୍ମୀନାରାଯଣଃ ପ୍ରଭୁଃ ।
ପ୍ରଭାତେ ପାତୁ ମାଂ ଵିଷ୍ଣୁର୍ମଧ୍ଯାହ୍ନେ ଵାସୁଦେଵକଃ ॥ ୨୪॥

ଦାମୋଦରୋଽଵତାତ୍ ସାଯଂ ନିଶାଦୌ ନରସିଂହକଃ ।
ସଙ୍କର୍ଷଣୋଽର୍ଧରାତ୍ରେଽଵ୍ଯାତ୍ ପ୍ରଭାତେଽଵ୍ଯାତ୍ ତ୍ରିଵିକ୍ରମଃ ॥ ୨୫॥

ଅନିରୁଦ୍ଧଃ ସର୍ଵକାଲଂ ଵିଶ୍ଵକ୍ସେନଶ୍ଚ ସର୍ଵତଃ ।
ରଣେ ରାଜକୁଲେ ଦ୍ଯୁତେ ଵିଵାଦେ ଶତ୍ରୁସଙ୍କଟେ
ଓଁ ହ୍ରୀଂ ହ୍ସୌଃ ହ୍ରୀଂ ଶ୍ରୀଂ ମୂଲଂ ଲକ୍ଷ୍ମୀନାରାଯଣୋଽଵତୁ ॥ ୨୬॥

ଓଁଓଁଓଁରଣରାଜଚୌରରିପୁତଃ ପାଯାଚ୍ଚ ମାଂ କେଶଵଃ
ହ୍ରୀଂହ୍ରୀଂହ୍ରୀଂହହ୍ହାହ୍ସୌଃ ହ୍ସହ୍ସୌଃ ଵହ୍ନେର୍ଵତାନ୍ମାଧଵଃ ।
ହ୍ରୀଂହ୍ରୀଂହ୍ରୀଂଜଲପର୍ଵତାଗ୍ନିଭଯତଃ ପାଯାଦନନ୍ତୋ ଵିଭୁଃ
ଶ୍ରୀଂଶ୍ରୀଂଶ୍ରୀଂଶଶଶାଲଲଂ ପ୍ରତିଦିନଂ ଲକ୍ଷ୍ମୀଧଵଃ ପାତୁ ମାମ୍ ॥ ୨୭॥

ଇତୀଦଂ କଵଚଂ ଦିଵ୍ଯଂ ଵଜ୍ରପଞ୍ଜରକାଭିଧମ୍ ।
ଲକ୍ଷ୍ମୀନାରାଯଣସ୍ଯେଷ୍ଟଂ ଚତୁର୍ଵର୍ଗଫଲପ୍ରଦମ୍ ॥ ୨୮॥

ସର୍ଵସୌଭାଗ୍ଯନିଲଯଂ ସର୍ଵସାରସ୍ଵତପ୍ରଦମ୍ ।
ଲକ୍ଷ୍ମୀସଂଵନନଂ ତତ୍ଵଂ ପରମାର୍ଥରସାଯନମ୍ ॥ ୨୯॥

ମନ୍ତ୍ରଗର୍ଭଂ ଜଗତ୍ସାରଂ ରହସ୍ଯଂ ତ୍ରିଦିଵୌକସାମ୍ ।
ଦଶଵାରଂ ପଠେଦ୍ରାତ୍ରୌ ରତାନ୍ତେ ଵୈଷ୍ଣଵୋତ୍ତମଃ ॥ ୩୦॥

ସ୍ଵପ୍ନେ ଵରପ୍ରଦଂ ପଶ୍ଯେଲ୍ଲକ୍ଷ୍ମୀନାରାଯଣଂ ସୁଧୀଃ ।
ତ୍ରିସନ୍ଧ୍ଯଂ ଯଃ ପଠେନ୍ନିତ୍ଯଂ କଵଚଂ ମନ୍ମୁଖୋଦିତମ୍ ॥ ୩୧॥

ସ ଯାତି ପରମଂ ଧାମ ଵୈଷ୍ଣଵଂ ଵୈଷ୍ଣଵେଶ୍ଵରଃ ।
ମହାଚୀନପଦସ୍ଥୋଽପି ଯଃ ପଠେଦାତ୍ମଚିନ୍ତକଃ ॥ ୩୨॥

ଆନନ୍ଦପୂରିତସ୍ତୂର୍ଣଂ ଲଭେଦ୍ ମୋକ୍ଷଂ ସ ସାଧକଃ ।
ଗନ୍ଧାଷ୍ଟକେନ ଵିଲିଖେଦ୍ରଵୌ ଭୂର୍ଜେ ଜପନ୍ମନୁମ୍ ॥ ୩୩॥

ପୀତସୂତ୍ରେଣ ସଂଵେଷ୍ଟ୍ଯ ସୌଵର୍ଣେନାଥ ଵେଷ୍ଟଯେତ୍ ।
ଧାରଯେଦ୍ଗୁଟିକାଂ ମୂର୍ଧ୍ନି ଲକ୍ଷ୍ମୀନାରାଯଣଂ ସ୍ମରନ୍ ॥ ୩୪॥

ରଣେ ରିପୁନ୍ ଵିଜିତ୍ଯାଶୁ କଲ୍ଯାଣୀ ଗୃହମାଵିଶେତ୍ ।
ଵନ୍ଧ୍ଯା ଵା କାକଵନ୍ଧ୍ଯା ଵା ମୃତଵତ୍ସା ଚ ଯାଙ୍ଗନା ॥ ୩୫॥

ସା ବଧ୍ନୀଯାନ୍ କଣ୍ଠଦେଶେ ଲଭେତ୍ ପୁତ୍ରାଂଶ୍ଚିରାଯୁଷଃ ।
ଗୁରୁପଦେଶତୋ ଧୃତ୍ଵା ଗୁରୁଂ ଧ୍ଯାତ୍ଵା ମନୁଂ ଜପନ୍ ॥ ୩୬॥

ଵର୍ଣଲକ୍ଷପୁରଶ୍ଚର୍ଯା ଫଲମାପ୍ନୋତି ସାଧକଃ ।
ବହୁନୋକ୍ତେନ କିଂ ଦେଵି କଵଚସ୍ଯାସ୍ଯ ପାର୍ଵତି ॥ ୩୭॥

ଵିନାନେନ ନ ସିଦ୍ଧିଃ ସ୍ଯାନ୍ମନ୍ତ୍ରସ୍ଯାସ୍ଯ ମହେଶ୍ଵରି ।
ସର୍ଵାଗମରହସ୍ଯାଢ୍ଯଂ ତତ୍ଵାତ୍ ତତ୍ଵଂ ପରାତ୍ ପରମ୍ ॥ ୩୮॥

ଅଭକ୍ତାଯ ନ ଦାତଵ୍ଯଂ କୁଚୈଲାଯ ଦୁରାତ୍ମନେ ।
ଦୀକ୍ଷିତାଯ କୁଲୀନାଯ ସ୍ଵଶିଷ୍ଯାଯ ମହାତ୍ମନେ ॥ ୩୯॥

ମହାଚୀନପଦସ୍ଥାଯ ଦାତଵ୍ଯଂ କଵଚୋତ୍ତମମ୍ ।
ଗୁହ୍ଯଂ ଗୋପ୍ଯଂ ମହାଦେଵି ଲକ୍ଷ୍ମୀନାରାଯଣପ୍ରିଯମ୍ ।
ଵଜ୍ରପଞ୍ଜରକଂ ଵର୍ମ ଗୋପନୀଯଂ ସ୍ଵଯୋନିଵତ୍ ॥ ୪୦॥

॥ ଇତି ଶ୍ରୀରୁଦ୍ରଯାମଲେ ତନ୍ତ୍ରେ ଶ୍ରୀଦେଵୀରହସ୍ଯେ
ଲକ୍ଷ୍ମୀନାରାଯଣକଵଚଂ ସମ୍ପୂର୍ଣମ୍ ॥