ಲಕ್ಷ್ಮೀ ನಾರಾಯಣ ಕವಚಮ್

॥ ಶ್ರೀಗಣೇಶಾಯ ನಮಃ ॥

ಶ್ರೀಭೈರವ ಉವಾಚ।
ಅಧುನಾ ದೇವಿ ವಕ್ಷ್ಯಾಮಿ ಲಕ್ಷ್ಮೀನಾರಾಯಣಸ್ಯ ತೇ ।
ಕವಚಂ ಮನ್ತ್ರಗರ್ಭಂ ಚ ವಜ್ರಪಞ್ಜರಕಾಖ್ಯಯಾ ॥ ೧॥

ಶ್ರೀವಜ್ರಪಞ್ಜರಂ ನಾಮ ಕವಚಂ ಪರಮಾದ್ಭುತಮ್ ।
ರಹಸ್ಯಂ ಸರ್ವದೇವಾನಾಂ ಸಾಧಕಾನಾಂ ವಿಶೇಷತಃ ॥ ೨॥

ಯಂ ಧೃತ್ವಾ ಭಗವಾನ್ ದೇವಃ ಪ್ರಸೀದತಿ ಪರಃ ಪುಮಾನ್ ।
ಯಸ್ಯ ಧಾರಣಮಾತ್ರೇಣ ಬ್ರಹ್ಮಾ ಲೋಕಪಿತಾಮಹಃ ॥ ೩॥

ಈಶ್ವರೋಽಹಂ ಶಿವೋ ಭೀಮೋ ವಾಸವೋಽಪಿ ದಿವಸ್ಪತಿಃ ।
ಸೂರ್ಯಸ್ತೇಜೋನಿಧಿರ್ದೇವಿ ಚನ್ದ್ರರ್ಮಾಸ್ತಾರಕೇಶ್ವರಃ ॥ ೪॥

ವಾಯುಶ್ಚ ಬಲವಾಂಲ್ಲೋಕೇ ವರುಣೋ ಯಾದಸಾಮ್ಪತಿಃ ।
ಕುಬೇರೋಽಪಿ ಧನಾಧ್ಯಕ್ಷೋ ಧರ್ಮರಾಜೋ ಯಮಃ ಸ್ಮೃತಃ ॥ ೫॥

ಯಂ ಧೃತ್ವಾ ಸಹಸಾ ವಿಷ್ಣುಃ ಸಂಹರಿಷ್ಯತಿ ದಾನವಾನ್ ।
ಜಘಾನ ರಾವಣಾದೀಂಶ್ಚ ಕಿಂ ವಕ್ಷ್ಯೇಽಹಮತಃ ಪರಮ್ ॥ ೬॥

ಕವಚಸ್ಯಾಸ್ಯ ಸುಭಗೇ ಕಥಿತೋಽಯಂ ಮುನಿಃ ಶಿವಃ ।
ತ್ರಿಷ್ಟುಪ್ ಛನ್ದೋ ದೇವತಾ ಚ ಲಕ್ಷ್ಮೀನಾರಾಯಣೋ ಮತಃ ॥ ೭॥

ರಮಾ ಬೀಜಂ ಪರಾ ಶಕ್ತಿಸ್ತಾರಂ ಕೀಲಕಮೀಶ್ವರಿ ।
ಭೋಗಾಪವರ್ಗಸಿದ್ಧ್ಯರ್ಥಂ ವಿನಿಯೋಗ ಇತಿ ಸ್ಮೃತಃ ॥ ೮॥

ಓಂ ಅಸ್ಯ ಶ್ರೀಲಕ್ಷ್ಮೀನಾರಾಯಣಕವಚಸ್ಯ ಶಿವಃ ಋಷಿಃ ।
ತ್ರಿಷ್ಟುಪ್ ಛನ್ದಃ । ಶ್ರೀಲಕ್ಷ್ಮೀನಾರಾಯಣ ದೇವತಾ ।
ಶ್ರೀಂ ಬೀಜಂ । ಹ್ರೀಂ ಶಕ್ತಿಃ । ಓಂ ಕೀಲಕಂ ।
ಭೋಗಾಪವರ್ಗಸಿದ್ಧ್ಯರ್ಥೇ ಪಾಠೇ ವಿನಿಯೋಗಃ ।
ಅಥ ಧ್ಯಾನಮ್ ।
ಪೂರ್ಣೇನ್ದುವದನಂ ಪೀತವಸನಂ ಕಮಲಾಸನಮ್ ।
ಲಕ್ಷ್ಮ್ಯಾ ಶ್ರಿತಂ ಚತುರ್ಬಾಹುಂ ಲಕ್ಷ್ಮೀನಾರಾಯಣಂ ಭಜೇ ॥ ೯॥

ಅಥ ಕವಚಮ್ ।
ಓಂ ವಾಸುದೇವೋಽವತು ಮೇ ಮಸ್ತಕಂ ಸಶಿರೋರುಹಮ್ ।
ಹ್ರೀಂ ಲಲಾಟಂ ಸದಾ ಪಾತು ಲಕ್ಷ್ಮೀವಿಷ್ಣುಃ ಸಮನ್ತತಃ ॥ ೧೦॥

ಹ್ಸೌಃ ನೇತ್ರೇಽವತಾಲ್ಲಕ್ಷ್ಮೀಗೋವಿನ್ದೋ ಜಗತಾಂ ಪತಿಃ ।
ಹ್ರೀಂ ನಾಸಾಂ ಸರ್ವದಾ ಪಾತು ಲಕ್ಷ್ಮೀದಾಮೋದರಃ ಪ್ರಭುಃ ॥ ೧೧॥

ಶ್ರೀಂ ಮುಖಂ ಸತತಂ ಪಾತು ದೇವೋ ಲಕ್ಷ್ಮೀತ್ರಿವಿಕ್ರಮಃ ।
ಲಕ್ಷ್ಮೀ ಕಣ್ಠಂ ಸದಾ ಪಾತು ದೇವೋ ಲಕ್ಷ್ಮೀಜನಾರ್ದನಃ ॥ ೧೨॥

ನಾರಾಯಣಾಯ ಬಾಹೂ ಮೇ ಪಾತು ಲಕ್ಷ್ಮೀಗದಾಗ್ರಜಃ ।
ನಮಃ ಪಾರ್ಶ್ವೌ ಸದಾ ಪಾತು ಲಕ್ಷ್ಮೀನನ್ದೈಕನನ್ದನಃ ॥ ೧೩॥

ಅಂ ಆಂ ಇಂ ಈಂ ಪಾತು ವಕ್ಷೋ ಓಂ ಲಕ್ಷ್ಮೀತ್ರಿಪುರೇಶ್ವರಃ ।
ಉಂ ಊಂ ಋಂ ೠಂ ಪಾತು ಕುಕ್ಷಿಂ ಹ್ರೀಂ ಲಕ್ಷ್ಮೀಗರುಡಧ್ವಜಃ ॥ ೧೪॥

ಲೃಂ ಲೄಂ ಏಂ ಐಂ ಪಾತು ಪೃಷ್ಠಂ ಹ್ಸೌಃ ಲಕ್ಷ್ಮೀನೃಸಿಂಹಕಃ ।
ಓಂ ಔಂ ಅಂ ಅಃ ಪಾತು ನಾಭಿಂ ಹ್ರೀಂ ಲಕ್ಷ್ಮೀವಿಷ್ಟರಶ್ರವಃ ॥ ೧೫॥

ಕಂ ಖಂ ಗಂ ಘಂ ಗುದಂ ಪಾತು ಶ್ರೀಂ ಲಕ್ಷ್ಮೀಕೈಟಭಾನ್ತಕಃ ।
ಚಂ ಛಂ ಜಂ ಝಂ ಪಾತು ಶಿಶ್ರ್ನಂ ಲಕ್ಷ್ಮೀ ಲಕ್ಷ್ಮೀಶ್ವರಃ ಪ್ರಭುಃ ॥ ೧೬॥

ಟಂ ಠಂ ಡಂ ಢಂ ಕಟಿಂ ಪಾತು ನಾರಾಯಣಾಯ ನಾಯಕಃ ।
ತಂ ಥಂ ದಂ ಧಂ ಪಾತು ಚೋರೂ ನಮೋ ಲಕ್ಷ್ಮೀಜಗತ್ಪತಿಃ ॥ ೧೭॥

ಪಂ ಫಂ ಬಂ ಭಂ ಪಾತು ಜಾನೂ ಓಂ ಹ್ರೀಂ ಲಕ್ಷ್ಮೀಚತುರ್ಭುಜಃ ।
ಯಂ ರಂ ಲಂ ವಂ ಪಾತು ಜಙ್ಘೇ ಹ್ಸೌಃ ಲಕ್ಷ್ಮೀಗದಾಧರಃ ॥ ೧೮॥

ಶಂ ಷಂ ಸಂ ಹಂ ಪಾತು ಗುಲ್ಫೌ ಹ್ರೀಂ ಶ್ರೀಂ ಲಕ್ಷ್ಮೀರಥಾಙ್ಗಭೃತ್ ।
ಳಂ ಕ್ಷಃ ಪಾದೌ ಸದಾ ಪಾತು ಮೂಲಂ ಲಕ್ಷ್ಮೀಸಹಸ್ರಪಾತ್ ॥ ೧೯॥

ಙಂ ಞಂ ಣಂ ನಂ ಮಂ ಮೇ ಪಾತು ಲಕ್ಷ್ಮೀಶಃ ಸಕಲಂ ವಪುಃ ।
ಇನ್ದ್ರೋ ಮಾಂ ಪೂರ್ವತಃ ಪಾತು ವಹ್ನಿರ್ವಹ್ನೌ ಸದಾವತು ॥ ೨೦॥

ಯಮೋ ಮಾಂ ದಕ್ಷಿಣೇ ಪಾತು ನೈರೃತ್ಯಾಂ ನಿರೃತಿಶ್ಚ ಮಾಮ್ ।
ವರುಣಃ ಪಶ್ಚಿಮೇಽವ್ಯಾನ್ಮಾಂ ವಾಯವ್ಯೇಽವತು ಮಾಂ ಮರುತ್ ॥ ೨೧॥

ಉತ್ತರೇ ಧನದಃ ಪಾಯಾದೈಶಾನ್ಯಾಮೀಶ್ವರೋಽವತು ।
ವಜ್ರಶಕ್ತಿದಣ್ಡಖಡ್ಗ ಪಾಶಯಷ್ಟಿಧ್ವಜಾಙ್ಕಿತಾಃ ॥ ೨೨॥

ಸಶೂಲಾಃ ಸರ್ವದಾ ಪಾನ್ತು ದಿಗೀಶಾಃ ಪರಮಾರ್ಥದಾಃ ।
ಅನನ್ತಃ ಪಾತ್ವಧೋ ನಿತ್ಯಮೂರ್ಧ್ವೇ ಬ್ರಹ್ಮಾವತಾಚ್ಚ ಮಾಮ್ ॥ ೨೩॥

ದಶದಿಕ್ಷು ಸದಾ ಪಾತು ಲಕ್ಷ್ಮೀನಾರಾಯಣಃ ಪ್ರಭುಃ ।
ಪ್ರಭಾತೇ ಪಾತು ಮಾಂ ವಿಷ್ಣುರ್ಮಧ್ಯಾಹ್ನೇ ವಾಸುದೇವಕಃ ॥ ೨೪॥

ದಾಮೋದರೋಽವತಾತ್ ಸಾಯಂ ನಿಶಾದೌ ನರಸಿಂಹಕಃ ।
ಸಙ್ಕರ್ಷಣೋಽರ್ಧರಾತ್ರೇಽವ್ಯಾತ್ ಪ್ರಭಾತೇಽವ್ಯಾತ್ ತ್ರಿವಿಕ್ರಮಃ ॥ ೨೫॥

ಅನಿರುದ್ಧಃ ಸರ್ವಕಾಲಂ ವಿಶ್ವಕ್ಸೇನಶ್ಚ ಸರ್ವತಃ ।
ರಣೇ ರಾಜಕುಲೇ ದ್ಯುತೇ ವಿವಾದೇ ಶತ್ರುಸಙ್ಕಟೇ
ಓಂ ಹ್ರೀಂ ಹ್ಸೌಃ ಹ್ರೀಂ ಶ್ರೀಂ ಮೂಲಂ ಲಕ್ಷ್ಮೀನಾರಾಯಣೋಽವತು ॥ ೨೬॥

ಓಂಓಂಓಂರಣರಾಜಚೌರರಿಪುತಃ ಪಾಯಾಚ್ಚ ಮಾಂ ಕೇಶವಃ
ಹ್ರೀಂಹ್ರೀಂಹ್ರೀಂಹಹ್ಹಾಹ್ಸೌಃ ಹ್ಸಹ್ಸೌಃ ವಹ್ನೇರ್ವತಾನ್ಮಾಧವಃ ।
ಹ್ರೀಂಹ್ರೀಂಹ್ರೀಂಜಲಪರ್ವತಾಗ್ನಿಭಯತಃ ಪಾಯಾದನನ್ತೋ ವಿಭುಃ
ಶ್ರೀಂಶ್ರೀಂಶ್ರೀಂಶಶಶಾಲಲಂ ಪ್ರತಿದಿನಂ ಲಕ್ಷ್ಮೀಧವಃ ಪಾತು ಮಾಮ್ ॥ ೨೭॥

ಇತೀದಂ ಕವಚಂ ದಿವ್ಯಂ ವಜ್ರಪಞ್ಜರಕಾಭಿಧಮ್ ।
ಲಕ್ಷ್ಮೀನಾರಾಯಣಸ್ಯೇಷ್ಟಂ ಚತುರ್ವರ್ಗಫಲಪ್ರದಮ್ ॥ ೨೮॥

ಸರ್ವಸೌಭಾಗ್ಯನಿಲಯಂ ಸರ್ವಸಾರಸ್ವತಪ್ರದಮ್ ।
ಲಕ್ಷ್ಮೀಸಂವನನಂ ತತ್ವಂ ಪರಮಾರ್ಥರಸಾಯನಮ್ ॥ ೨೯॥

ಮನ್ತ್ರಗರ್ಭಂ ಜಗತ್ಸಾರಂ ರಹಸ್ಯಂ ತ್ರಿದಿವೌಕಸಾಮ್ ।
ದಶವಾರಂ ಪಠೇದ್ರಾತ್ರೌ ರತಾನ್ತೇ ವೈಷ್ಣವೋತ್ತಮಃ ॥ ೩೦॥

ಸ್ವಪ್ನೇ ವರಪ್ರದಂ ಪಶ್ಯೇಲ್ಲಕ್ಷ್ಮೀನಾರಾಯಣಂ ಸುಧೀಃ ।
ತ್ರಿಸನ್ಧ್ಯಂ ಯಃ ಪಠೇನ್ನಿತ್ಯಂ ಕವಚಂ ಮನ್ಮುಖೋದಿತಮ್ ॥ ೩೧॥

ಸ ಯಾತಿ ಪರಮಂ ಧಾಮ ವೈಷ್ಣವಂ ವೈಷ್ಣವೇಶ್ವರಃ ।
ಮಹಾಚೀನಪದಸ್ಥೋಽಪಿ ಯಃ ಪಠೇದಾತ್ಮಚಿನ್ತಕಃ ॥ ೩೨॥

ಆನನ್ದಪೂರಿತಸ್ತೂರ್ಣಂ ಲಭೇದ್ ಮೋಕ್ಷಂ ಸ ಸಾಧಕಃ ।
ಗನ್ಧಾಷ್ಟಕೇನ ವಿಲಿಖೇದ್ರವೌ ಭೂರ್ಜೇ ಜಪನ್ಮನುಮ್ ॥ ೩೩॥

ಪೀತಸೂತ್ರೇಣ ಸಂವೇಷ್ಟ್ಯ ಸೌವರ್ಣೇನಾಥ ವೇಷ್ಟಯೇತ್ ।
ಧಾರಯೇದ್ಗುಟಿಕಾಂ ಮೂರ್ಧ್ನಿ ಲಕ್ಷ್ಮೀನಾರಾಯಣಂ ಸ್ಮರನ್ ॥ ೩೪॥

ರಣೇ ರಿಪುನ್ ವಿಜಿತ್ಯಾಶು ಕಲ್ಯಾಣೀ ಗೃಹಮಾವಿಶೇತ್ ।
ವನ್ಧ್ಯಾ ವಾ ಕಾಕವನ್ಧ್ಯಾ ವಾ ಮೃತವತ್ಸಾ ಚ ಯಾಙ್ಗನಾ ॥ ೩೫॥

ಸಾ ಬಧ್ನೀಯಾನ್ ಕಣ್ಠದೇಶೇ ಲಭೇತ್ ಪುತ್ರಾಂಶ್ಚಿರಾಯುಷಃ ।
ಗುರುಪದೇಶತೋ ಧೃತ್ವಾ ಗುರುಂ ಧ್ಯಾತ್ವಾ ಮನುಂ ಜಪನ್ ॥ ೩೬॥

ವರ್ಣಲಕ್ಷಪುರಶ್ಚರ್ಯಾ ಫಲಮಾಪ್ನೋತಿ ಸಾಧಕಃ ।
ಬಹುನೋಕ್ತೇನ ಕಿಂ ದೇವಿ ಕವಚಸ್ಯಾಸ್ಯ ಪಾರ್ವತಿ ॥ ೩೭॥

ವಿನಾನೇನ ನ ಸಿದ್ಧಿಃ ಸ್ಯಾನ್ಮನ್ತ್ರಸ್ಯಾಸ್ಯ ಮಹೇಶ್ವರಿ ।
ಸರ್ವಾಗಮರಹಸ್ಯಾಢ್ಯಂ ತತ್ವಾತ್ ತತ್ವಂ ಪರಾತ್ ಪರಮ್ ॥ ೩೮॥

ಅಭಕ್ತಾಯ ನ ದಾತವ್ಯಂ ಕುಚೈಲಾಯ ದುರಾತ್ಮನೇ ।
ದೀಕ್ಷಿತಾಯ ಕುಲೀನಾಯ ಸ್ವಶಿಷ್ಯಾಯ ಮಹಾತ್ಮನೇ ॥ ೩೯॥

ಮಹಾಚೀನಪದಸ್ಥಾಯ ದಾತವ್ಯಂ ಕವಚೋತ್ತಮಮ್ ।
ಗುಹ್ಯಂ ಗೋಪ್ಯಂ ಮಹಾದೇವಿ ಲಕ್ಷ್ಮೀನಾರಾಯಣಪ್ರಿಯಮ್ ।
ವಜ್ರಪಞ್ಜರಕಂ ವರ್ಮ ಗೋಪನೀಯಂ ಸ್ವಯೋನಿವತ್ ॥ ೪೦॥

॥ ಇತಿ ಶ್ರೀರುದ್ರಯಾಮಲೇ ತನ್ತ್ರೇ ಶ್ರೀದೇವೀರಹಸ್ಯೇ
ಲಕ್ಷ್ಮೀನಾರಾಯಣಕವಚಂ ಸಮ್ಪೂರ್ಣಮ್ ॥