শ্রীকৃষ্ণ উবাচ
মত্তসিন্ধুরমস্তকোপরি নৃত্যমানপদাম্বুজম্ । ভক্তচিন্তিতসিদ্ধিদানবিচক্ষণং কমলেক্ষণম্ । ভুক্তিমুক্তিফলপ্রদং ভবপদ্মজাঽচ্যুতপূজিতম্ । কৃত্তিবাসসমাশ্রযে মম সর্বসিদ্ধিদমীশ্বরম্ ॥
বিত্তদপ্রিযমর্চিতং কৃতকৃচ্ছ্রতীব্রতপশ্চরৈঃ । মুক্তিকামিভিরাশ্রিতৈর্মুনিভির্দৃঢামলভক্তিভিঃ । মুক্তিদং নিজপাদপঙ্কজসক্তমানসযোগিনাম্ । কৃত্তিবাসসমাশ্রযে মম সর্বসিদ্ধিদমীশ্বরম্ ॥
কৃত্তদক্ষমখাধিপং বরবীরভদ্রগণেন বৈ । যক্ষরাক্ষসমর্ত্যকিন্নরদেবপন্নগবন্দিতম্ । রক্তভুগ্গণনাথহৃদ্ভ্রমরাঞ্চিতাঙ্ঘ্রিসরোরুহম্ । কৃত্তিবাসসমাশ্রযে মম সর্বসিদ্ধিদমীশ্বরম্ ॥
নক্তনাথকলাধরং নগজাপযোধরনীরজা- লিপ্তচন্দনপঙ্ককুঙ্কুমপঙ্কিলামলবিগ্রহম্ । শক্তিমন্তমশেষসৃষ্টিবিধাযকং সকলপ্রভুম্ । কৃত্তিবাসসমাশ্রযে মম সর্বসিদ্ধিদমীশ্বরম্ ॥
রক্তনীরজতুল্যপাদপযোজসন্মণিনূপুরম্ । পত্তনত্রযদেহপাটনপঙ্কজাক্ষশিলীমুখম্ । বিত্তশৈলশরাসনং পৃথুশিঞ্জিনীকৃততক্ষকম্ । কৃত্তিবাসসমাশ্রযে মম সর্বসিদ্ধিদমীশ্বরম্ ॥
ফলশ্রুতিঃ
যঃ পঠেচ্চ দিনে দিনে স্তবপঞ্চরত্নমুমাপতেঃ । প্রাতরেব মযা কৃতং নিখিলাঘতূলমহানলম্ । তস্য পুত্রকলত্রমিত্রধনানি সন্তু কৃপাবলাত্ । তে মহেশ্বর শঙ্করাখিল বিশ্বনাযক শাশ্বত ॥
॥ ইতি শ্রীশিবমহাপুরাণে চ্যুতপুরীমাহাত্ম্যে শ্রীকৃষ্ণ কৃত শ্রীশিবপঞ্চরত্নস্তুতিঃ সম্পূর্ণম্ ॥