ശ്രീകൃഷ്ണ ഉവാച
മത്തസിന്ധുരമസ്തകോപരി നൃത്യമാനപദാമ്ബുജമ് । ഭക്തചിന്തിതസിദ്ധിദാനവിചക്ഷണം കമലേക്ഷണമ് । ഭുക്തിമുക്തിഫലപ്രദം ഭവപദ്മജാഽച്യുതപൂജിതമ് । കൃത്തിവാസസമാശ്രയേ മമ സര്വസിദ്ധിദമീശ്വരമ് ॥
വിത്തദപ്രിയമര്ചിതം കൃതകൃച്ഛ്രതീവ്രതപശ്ചരൈഃ । മുക്തികാമിഭിരാശ്രിതൈര്മുനിഭിര്ദൃഢാമലഭക്തിഭിഃ । മുക്തിദം നിജപാദപങ്കജസക്തമാനസയോഗിനാമ് । കൃത്തിവാസസമാശ്രയേ മമ സര്വസിദ്ധിദമീശ്വരമ് ॥
കൃത്തദക്ഷമഖാധിപം വരവീരഭദ്രഗണേന വൈ । യക്ഷരാക്ഷസമര്ത്യകിന്നരദേവപന്നഗവന്ദിതമ് । രക്തഭുഗ്ഗണനാഥഹൃദ്ഭ്രമരാഞ്ചിതാങ്ഘ്രിസരോരുഹമ് । കൃത്തിവാസസമാശ്രയേ മമ സര്വസിദ്ധിദമീശ്വരമ് ॥
നക്തനാഥകലാധരം നഗജാപയോധരനീരജാ- ലിപ്തചന്ദനപങ്കകുങ്കുമപങ്കിലാമലവിഗ്രഹമ് । ശക്തിമന്തമശേഷസൃഷ്ടിവിധായകം സകലപ്രഭുമ് । കൃത്തിവാസസമാശ്രയേ മമ സര്വസിദ്ധിദമീശ്വരമ് ॥
രക്തനീരജതുല്യപാദപയോജസന്മണിനൂപുരമ് । പത്തനത്രയദേഹപാടനപങ്കജാക്ഷശിലീമുഖമ് । വിത്തശൈലശരാസനം പൃഥുശിഞ്ജിനീകൃതതക്ഷകമ് । കൃത്തിവാസസമാശ്രയേ മമ സര്വസിദ്ധിദമീശ്വരമ് ॥
ഫലശ്രുതിഃ
യഃ പഠേച്ച ദിനേ ദിനേ സ്തവപഞ്ചരത്നമുമാപതേഃ । പ്രാതരേവ മയാ കൃതം നിഖിലാഘതൂലമഹാനലമ് । തസ്യ പുത്രകലത്രമിത്രധനാനി സന്തു കൃപാബലാത് । തേ മഹേശ്വര ശങ്കരാഖില വിശ്വനായക ശാശ്വത ॥
॥ ഇതി ശ്രീശിവമഹാപുരാണേ ച്യുതപുരീമാഹാത്മ്യേ ശ്രീകൃഷ്ണ കൃത ശ്രീശിവപഞ്ചരത്നസ്തുതിഃ സമ്പൂര്ണമ് ॥