śrī durgā aṣṭakam

durge pareśi śubhadeśi parātpareśi, vandye maheśadayite karūṇārṇaveśi |
stutye svadhe sakalatāpahare sureśi, kṛṣṇastute kuru kṛpāṃ lalite'khileśi || 1||

divye nute śrutiśatairvimale bhaveśi, kandarpadārāśatasundari mādhaveśi |
medhe girīśatanaye niyate śiveśi, kṛṣṇastute kuru kṛpāṃ lalite'khileśi || 2||

rāseśvari praṇatatāpahare kuleśi, dharmapriye bhayahare varadāgrageśi |
vāgdevate vidhinute kamalāsaneśi, kṛṣṇastute kuru kṛpāṃ lalite'khileśi || 3||

pūjye mahāvṛṣabhavāhini maṃgaleśi, padme digambari maheśvari kānaneśi |
ramyedhare sakaladevanute gayeśi, kṛṣṇastute kuru kṛpāṃ lalite'khileśi || 4||

śraddhe surā'suranute sakale jaleśi, gaṃge girīśadayite gaṇanāyakeśi |
dakṣe smaśānanilaye suranāyakeśi, kṛṣṇastute kuru kṛpāṃ lalite'khileśi || 5||

tāre kṛpārdranayane madhukaiṭabheśi, vidyeśvareśvari yame nikhalākṣareśi |
ūrje catuḥstani sanātani muktakeśi, kṛṣṇastute kuru kṛpāṃ lalita'khileśi || 6||

mokṣe'sthire tripurasundaripāṭaleśi, māheśvari trinayane prabale makheśi |
tṛṣṇe taraṃgiṇi bale gatide dhruveśi, kṛṣṇastute kuru kṛpāṃ lalite'khileśi || 7||

viśvambhare sakalade vidite jayeśi, vindhyasthite śaśimukhi kṣaṇade dayeśi |
mātaḥ sarojanayane rasike smareśi, kṛṣṇastute kuru kṛpāṃ lalite'khileśi || 8||

durgāṣṭakaṃ paṭhati yaḥ prayataḥ prabhāte, sarvārthadaṃ hariharādinutāṃ vareṇyāṃ |
durgāṃ supūjya mahitāṃ vividhopacāraiḥ, prāpnoti vāṃchitaphalaṃ na cirānmanuṣyaḥ || 9||