ଶ୍ରୀ ଦୁର୍ଗା ଅଷ୍ଟକମ୍

ଦୁର୍ଗେ ପରେଶି ଶୁଭଦେଶି ପରାତ୍ପରେଶି, ଵନ୍ଦ୍ଯେ ମହେଶଦଯିତେ କରୂଣାର୍ଣଵେଶି ।
ସ୍ତୁତ୍ଯେ ସ୍ଵଧେ ସକଲତାପହରେ ସୁରେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୧॥

ଦିଵ୍ଯେ ନୁତେ ଶ୍ରୁତିଶତୈର୍ଵିମଲେ ଭଵେଶି, କନ୍ଦର୍ପଦାରାଶତସୁନ୍ଦରି ମାଧଵେଶି ।
ମେଧେ ଗିରୀଶତନଯେ ନିଯତେ ଶିଵେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୨॥

ରାସେଶ୍ଵରି ପ୍ରଣତତାପହରେ କୁଲେଶି, ଧର୍ମପ୍ରିଯେ ଭଯହରେ ଵରଦାଗ୍ରଗେଶି ।
ଵାଗ୍ଦେଵତେ ଵିଧିନୁତେ କମଲାସନେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୩॥

ପୂଜ୍ଯେ ମହାଵୃଷଭଵାହିନି ମଂଗଲେଶି, ପଦ୍ମେ ଦିଗମ୍ବରି ମହେଶ୍ଵରି କାନନେଶି ।
ରମ୍ଯେଧରେ ସକଲଦେଵନୁତେ ଗଯେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୪॥

ଶ୍ରଦ୍ଧେ ସୁରାଽସୁରନୁତେ ସକଲେ ଜଲେଶି, ଗଂଗେ ଗିରୀଶଦଯିତେ ଗଣନାଯକେଶି ।
ଦକ୍ଷେ ସ୍ମଶାନନିଲଯେ ସୁରନାଯକେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୫॥

ତାରେ କୃପାର୍ଦ୍ରନଯନେ ମଧୁକୈଟଭେଶି, ଵିଦ୍ଯେଶ୍ଵରେଶ୍ଵରି ଯମେ ନିଖଲାକ୍ଷରେଶି ।
ଊର୍ଜେ ଚତୁଃସ୍ତନି ସନାତନି ମୁକ୍ତକେଶି, କୃଷ୍ଣସ୍ତୁତେ କୁରୁ କୃପାଂ ଲଲିତଽଖିଲେଶି ॥ ୬॥

ମୋକ୍ଷେଽସ୍ଥିରେ ତ୍ରିପୁରସୁନ୍ଦରିପାଟଲେଶି, ମାହେଶ୍ଵରି ତ୍ରିନଯନେ ପ୍ରବଲେ ମଖେଶି ।
ତୃଷ୍ଣେ ତରଂଗିଣି ବଲେ ଗତିଦେ ଧ୍ରୁଵେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୭॥

ଵିଶ୍ଵମ୍ଭରେ ସକଲଦେ ଵିଦିତେ ଜଯେଶି, ଵିନ୍ଧ୍ଯସ୍ଥିତେ ଶଶିମୁଖି କ୍ଷଣଦେ ଦଯେଶି ।
ମାତଃ ସରୋଜନଯନେ ରସିକେ ସ୍ମରେଶି, କୃଷ୍ଣସ୍ତୁତେ କୁରୁ କୃପାଂ ଲଲିତେଽଖିଲେଶି ॥ ୮॥

ଦୁର୍ଗାଷ୍ଟକଂ ପଠତି ଯଃ ପ୍ରଯତଃ ପ୍ରଭାତେ, ସର୍ଵାର୍ଥଦଂ ହରିହରାଦିନୁତାଂ ଵରେଣ୍ଯାଂ ।
ଦୁର୍ଗାଂ ସୁପୂଜ୍ଯ ମହିତାଂ ଵିଵିଧୋପଚାରୈଃ, ପ୍ରାପ୍ନୋତି ଵାଂଛିତଫଲଂ ନ ଚିରାନ୍ମନୁଷ୍ଯଃ ॥ ୯॥