শ্রীমদ্ভাগবতম্ ১০.১৪

শ্রীব্রহ্মোবাচ
নৌমীড্য তেঽভ্রবপুষে তডিদম্বরায
গুঞ্জাবতংসপরিপিচ্ছলসন্মুখায ।
বন্যস্রজে কবলবেত্রবিষাণবেণু-
লক্ষ্মশ্রিযে মৃদুপদে পশুপাঙ্গজায ॥ ১ ॥

অস্যাপি দেব বপুষো মদনুগ্রহস্য
স্বেচ্ছামযস্য ন তু ভূতমযস্য কোঽপি ।
নেশে মহি ত্ববসিতুং মনসান্তরেণ
সাক্ষাত্তবৈব কিমুতাত্মসুখানুভূতেঃ ॥ ২ ॥

জ্ঞানে প্রযাসমুদপাস্য নমন্ত এব
জীবন্তি সন্মুখরিতাং ভবদীযবার্তাম্ ।
স্থানে স্থিতাঃ শ্রুতিগতাং তনুবাঙ্মনোভি-
র্যে প্রাযশোঽজিত জিতোঽপ্যসি তৈস্ত্রিলোক্যাম্ ॥ ৩ ॥

শ্রেযঃসৃতিং ভক্তিমুদস্য তে বিভো
ক্লিশ্যন্তি যে কেবলবোধলব্ধযে ।
তেষামসৌ ক্লেশল এব শিষ্যতে
নান্যদ্ যথা স্থূলতুষাবঘাতিনাম্ ॥ ৪ ॥

পুরেহ ভূমন্ বহবোঽপি যোগিন-
স্ত্বদর্পিতেহা নিজকর্মলব্ধযা ।
বিবুধ্য ভক্ত্যৈব কথোপনীতযা
প্রপেদিরেঽঞ্জোঽচ্যুত তে গতিং পরাম্ ॥ ৫ ॥

তথাপি ভূমন্মহিমাগুণস্য তে
বিবোদ্ধুমর্হত্যমলান্তরাত্মভিঃ ।
অবিক্রিযাত্ স্বানুভবাদরূপতো
হ্যনন্যবোধ্যাত্মতযা ন চান্যথা ॥ ৬ ॥

গুণাত্মনস্তেঽপি গুণান্ বিমাতুং
হিতাবতীর্ণস্য ক ঈশিরেঽস্য ।
কালেন যৈর্বা বিমিতাঃ সুকল্পৈ-
র্ভূপাংশবঃ খে মিহিকা দ্যুভাসঃ ॥ ৭ ॥

তত্তেঽনুকম্পাং সুসমীক্ষমাণো
ভুঞ্জান এবাত্মকৃতং বিপাকম্ ।
হৃদ্বাগ্বপুর্ভির্বিদধন্নমস্তে
জীবেত যো মুক্তিপদে স দাযভাক্ ॥ ৮ ॥

পশ্যেশ মেঽনার্যমনন্ত আদ্যে
পরাত্মনি ত্বয্যপি মাযিমাযিনি ।
মাযাং বিতত্যেক্ষিতুমাত্মবৈভবং
হ্যহং কিযানৈচ্ছমিবার্চিরগ্নৌ ॥ ৯ ॥

অতঃ ক্ষমস্বাচ্যুত মে রজোভুবো
হ্যজানতস্ত্বত্পৃথগীশমানিনঃ ।
অজাবলেপান্ধতমোঽন্ধচক্ষুষ
এষোঽনুকম্প্যো মযি নাথবানিতি ॥ ১০ ॥

ক্বাহং তমোমহদহংখচরাগ্নিবার্ভূ-
সংবেষ্টিতাণ্ডঘটসপ্তবিতস্তিকাযঃ ।
ক্বেদৃগ্বিধাবিগণিতাণ্ডপরাণুচর্যা-
বাতাধ্বরোমবিবরস্য চ তে মহিত্বম্ ॥ ১১ ॥

উত্ক্ষেপণং গর্ভগতস্য পাদযোঃ
কিং কল্পতে মাতুরধোক্ষজাগসে ।
কিমস্তিনাস্তিব্যপদেশভূষিতং
তবাস্তি কুক্ষেঃ কিযদপ্যনন্তঃ ॥ ১২ ॥

জগত্ ত্রযান্তোদধিসম্প্লবোদে
নারাযণস্যোদরনাভিনালাত্ ।
বিনির্গতোঽজস্ত্বিতি বাঙ্ন বৈ মৃষা
কিন্ত্বীশ্বর ত্বন্ন বিনির্গতোঽস্মি ॥ ১৩ ॥

নারাযণস্ত্বং ন হি সর্বদেহিনা-
মাত্মাস্যধীশাখিললোকসাক্ষী ।
নারাযণোঽঙ্গং নরভূজলাযনা-
ত্তচ্চাপি সত্যং ন তবৈব মাযা ॥ ১৪ ॥

তচ্চেজ্জলস্থং তব সজ্জগদ্বপুঃ
কিং মে ন দৃষ্টং ভগবংস্তদৈব ।
কিং বা সুদৃষ্টং হৃদি মে তদৈব
কিং নো সপদ্যেব পুনর্ব্যদর্শি ॥ ১৫ ॥

অত্রৈব মাযাধমনাবতারে
হ্যস্য প্রপঞ্চস্য বহিঃ স্ফুটস্য ।
কৃত্স্নস্য চান্তর্জঠরে জনন্যা
মাযাত্বমেব প্রকটীকৃতং তে ॥ ১৬ ॥

যস্য কুক্ষাবিদং সর্বং সাত্মং ভাতি যথা তথা ।
তত্ত্বয্যপীহ তত্ সর্বং কিমিদং মাযযা বিনা ॥ ১৭ ॥

অদ্যৈব ত্বদৃতেঽস্য কিং মম ন তে মাযাত্বমাদর্শিত-
মেকোঽসি প্রথমং ততো ব্রজসুহৃদ্বত্সাঃ সমস্তা অপি ।
তাবন্তোঽসি চতুর্ভুজাস্তদখিলৈঃ সাকং মযোপাসিতা-
স্তাবন্ত্যেব জগন্ত্যভূস্তদমিতং ব্রহ্মাদ্বযং শিষ্যতে ॥ ১৮ ॥

অজানতাং ত্বত্পদবীমনাত্ম-
ন্যাত্মাত্মনা ভাসি বিতত্য মাযাম্ ।
সৃষ্টাবিবাহং জগতো বিধান
ইব ত্বমেষোঽন্ত ইব ত্রিনেত্রঃ ॥ ১৯ ॥

সুরেষ্বৃষিষ্বীশ তথৈব নৃষ্বপি
তির্যক্ষু যাদঃস্বপি তেঽজনস্য ।
জন্মাসতাং দুর্মদনিগ্রহায
প্রভো বিধাতঃ সদনুগ্রহায চ ॥ ২০ ॥

কো বেত্তি ভূমন্ ভগবন্ পরাত্মন্
যোগেশ্বরোতীর্ভবতস্ত্রিলোক্যাম্ ।
ক্ব বা কথং বা কতি বা কদেতি
বিস্তারযন্ক্রীডসি যোগমাযাম্ ॥ ২১ ॥

তস্মাদিদং জগদশেষমসত্স্বরূপং
স্বপ্নাভমস্তধিষণং পুরুদুঃখদুঃখম্ ।
ত্বয্যেব নিত্যসুখবোধতনাবনন্তে
মাযাত উদ্যদপি যত্ সদিবাবভাতি ॥ ২২ ॥

একস্ত্বমাত্মা পুরুষঃ পুরাণঃ
সত্যঃ স্বযংজ্যোতিরনন্ত আদ্যঃ ।
নিত্যোঽক্ষরোঽজস্রসুখো নিরঞ্জনঃ
পূর্ণাদ্বযো মুক্ত উপাধিতোঽমৃতঃ ॥ ২৩ ॥

এবংবিধং ত্বাং সকলাত্মনামপি
স্বাত্মানমাত্মাত্মতযা বিচক্ষতে ।
গুর্বর্কলব্ধোপনিষত্সুচক্ষুষা
যে তে তরন্তীব ভবানৃতাম্বুধিম্ ॥ ২৪ ॥

আত্মানমেবাত্মতযাবিজানতাং
তেনৈব জাতং নিখিলং প্রপঞ্চিতম্ ।
জ্ঞানেন ভূযোঽপি চ তত্ প্রলীযতে
রজ্জ্বামহের্ভোগভবাভবৌ যথা ॥ ২৫ ॥

অজ্ঞানসংজ্ঞৌ ভববন্ধমোক্ষৌ
দ্বৌ নাম নান্যৌ স্ত ঋতজ্ঞভাবাত্ ।
অজস্রচিত্যাত্মনি কেবলে পরে
বিচার্যমাণে তরণাবিবাহনী ॥ ২৬ ॥

ত্বামাত্মানং পরং মত্বা পরমাত্মানমেব চ ।
আত্মা পুনর্বহির্মৃগ্য অহোঽজ্ঞজনতাজ্ঞতা ॥ ২৭ ॥

অন্তর্ভবেঽনন্ত ভবন্তমেব
হ্যতত্ত্যজন্তো মৃগযন্তি সন্তঃ ।
অসন্তমপ্যন্ত্যহিমন্তরেণ
সন্তং গুণং তং কিমু যন্তি সন্তঃ ॥ ২৮ ॥

অথাপি তে দেব পদাম্বুজদ্বয-
প্রসাদলেশানুগৃহীত এব হি ।
জানাতি তত্ত্বং ভগবন্ মহিম্নো
ন চান্য একোঽপি চিরং বিচিন্বন্ ॥ ২৯ ॥

তদস্তু মে নাথ স ভূরিভাগো
ভবেঽত্র বান্যত্র তু বা তিরশ্চাম্ ।
যেনাহমেকোঽপি ভবজ্জনানাং
ভূত্বা নিষেবে তব পাদপল্লবম্ ॥ ৩০ ॥

অহোঽতিধন্যা ব্রজগোরমণ্যঃ
স্তন্যামৃতং পীতমতীব তে মুদা ।
যাসাং বিভো বত্সতরাত্মজাত্মনা
যত্তৃপ্তযেঽদ্যাপি ন চালমধ্বরাঃ ॥ ৩১ ॥

অহো ভাগ্যমহো ভাগ্যং নন্দগোপব্রজৌকসাম্ ।
যন্মিত্রং পরমানন্দং পূর্ণং ব্রহ্ম সনাতনম্ ॥ ৩২ ॥

এষাং তু ভাগ্যমহিমাচ্যুত তাবদাস্তা-
মেকাদশৈব হি বযং বত ভূরিভাগাঃ ।
এতদ্ধৃষীকচষকৈরসকৃত্ পিবামঃ
শর্বাদযোঽঙ্ঘ্য্রুদজমধ্বমৃতাসবং তে ॥ ৩৩ ॥

তদ্ ভূরিভাগ্যমিহ জন্ম কিমপ্যটব্যাং
যদ্ গোকুলেঽপি কতমাঙ্ঘ্রিরজোঽভিষেকম্ ।
যজ্জীবিতং তু নিখিলং ভগবান্ মুকুন্দ-
স্ত্বদ্যাপি যত্পদরজঃ শ্রুতিমৃগ্যমেব ॥ ৩৪ ॥

এষাং ঘোষনিবাসিনামুত ভবান্ কিং দেব রাতেতি ন-
শ্চেতো বিশ্বফলাত্ ফলং ত্বদপরং কুত্রাপ্যযন্ মুহ্যতি ।
সদ্বেষাদিব পূতনাপি সকুলা ত্বামেব দেবাপিতা
যদ্ধামার্থসুহৃত্প্রিযাত্মতনযপ্রাণাশযাস্ত্বত্কৃতে ॥ ৩৫ ॥

তাবদ্ রাগাদযঃ স্তেনাস্তাবত্ কারাগৃহং গৃহম্ ।
তাবন্মোহোঽঙ্ঘ্রিনিগডো যাবত্ কৃষ্ণ ন তে জনাঃ ॥ ৩৬ ॥

প্রপঞ্চং নিষ্প্রপঞ্চোঽপি বিডম্বযসি ভূতলে ।
প্রপন্নজনতানন্দসন্দোহং প্রথিতুং প্রভো ॥ ৩৭ ॥

জানন্ত এব জানন্তু কিং বহূক্ত্যা ন মে প্রভো ।
মনসো বপুষো বাচো বৈভবং তব গোচরঃ ॥ ৩৮ ॥

অনুজানীহি মাং কৃষ্ণ সর্বং ত্বং বেত্সি সর্বদৃক্ ।
ত্বমেব জগতাং নাথো জগদেতত্তবার্পিতম্ ॥ ৩৯ ॥

শ্রীকৃষ্ণ বৃষ্ণিকুলপুষ্করজোষদাযিন্
ক্ষ্মানির্জরদ্বিজপশূদধিবৃদ্ধিকারিন্ ।
উদ্ধর্মশার্বরহর ক্ষিতিরাক্ষসধ্রু-
গাকল্পমার্কমর্হন্ ভগবন্নমস্তে ॥ ৪০ ॥

শ্রীশুক উবাচ
ইত্যভিষ্টূয ভূমানং ত্রিঃ পরিক্রম্য পাদযোঃ ।
নত্বাভীষ্টং জগদ্ধাতা স্বধাম প্রত্যপদ্যত ॥ ৪১ ॥

ততোঽনুজ্ঞাপ্য ভগবান্ স্বভুবং প্রাগবস্থিতান্ ।
বত্সান্ পুলিনমানিন্যে যথাপূর্বসখং স্বকম্ ॥ ৪২ ॥

একস্মিন্নপি যাতেঽব্দে প্রাণেশং চান্তরাত্মনঃ ।
কৃষ্ণমাযাহতা রাজন্ ক্ষণার্ধং মেনিরেঽর্ভকাঃ ॥ ৪৩ ॥

কিং কিং ন বিস্মরন্তীহ মাযামোহিতচেতসঃ ।
যন্মোহিতং জগত্ সর্বমভীক্ষ্ণং বিস্মৃতাত্মকম্ ॥ ৪৪ ॥

ঊচুশ্চ সুহৃদঃ কৃষ্ণং স্বাগতং তেঽতিরংহসা ।
নৈকোঽপ্যভোজি কবল এহীতঃ সাধু ভুজ্যতাম্ ॥ ৪৫ ॥

ততো হসন্ হৃষীকেশোঽভ্যবহৃত্য সহার্ভকৈঃ ।
দর্শযংশ্চর্মাজগরং ন্যবর্তত বনাদ্ ব্রজম্ ॥ ৪৬ ॥

বর্হপ্রসূনবনধাতুবিচিত্রিতাঙ্গঃ
প্রোদ্দামবেণুদলশৃঙ্গরবোত্সবাঢ্যঃ ।
বত্সান্ গৃণন্ননুগগীতপবিত্রকীর্তি-
র্গোপীদৃগুত্সবদৃশিঃ প্রবিবেশ গোষ্ঠম্ ॥ ৪৭ ॥

অদ্যানেন মহাব্যালো যশোদানন্দসূনুনা ।
হতোঽবিতা বযং চাস্মাদিতি বালা ব্রজে জগুঃ ॥ ৪৮ ॥

শ্রীরাজোবাচ
ব্রহ্মন্ পরোদ্ভবে কৃষ্ণে ইযান্ প্রেমা কথং ভবেত্ ।
যোঽভূতপূর্বস্তোকেষু স্বোদ্ভবেষ্বপি কথ্যতাম্ ॥ ৪৯ ॥

শ্রীশুক উবাচ
সর্বেষামপি ভূতানাং নৃপ স্বাত্মৈব বল্লভঃ ।
ইতরেঽপত্যবিত্তাদ্যাস্তদ্বল্লভতযৈব হি ॥ ৫০ ॥

তদ্ রাজেন্দ্র যথা স্নেহঃ স্বস্বকাত্মনি দেহিনাম্ ।
ন তথা মমতালম্বিপুত্রবিত্তগৃহাদিষু ॥ ৫১ ॥

দেহাত্মবাদিনাং পুংসামপি রাজন্যসত্তম ।
যথা দেহঃ প্রিযতমস্তথা ন হ্যনু যে চ তম্ ॥ ৫২ ॥

দেহোঽপি মমতাভাক্ চেত্তর্হ্যসৌ নাত্মবত্ প্রিযঃ ।
যজ্জীর্যত্যপি দেহেঽস্মিন্ জীবিতাশা বলীযসী ॥ ৫৩ ॥

তস্মাত্ প্রিযতমঃ স্বাত্মা সর্বেষামপি দেহিনাম্ ।
তদর্থমেব সকলং জগদেতচ্চরাচরম্ ॥ ৫৪ ॥

কৃষ্ণমেনমবেহি ত্বমাত্মানমখিলাত্মনাম্ ।
জগদ্ধিতায সোঽপ্যত্র দেহীবাভাতি মাযযা ॥ ৫৫ ॥

বস্তুতো জানতামত্র কৃষ্ণং স্থাস্নু চরিষ্ণু চ ।
ভগবদ্রূপমখিলং নান্যদ্ বস্ত্বিহ কিঞ্চন ॥ ৫৬ ॥

সর্বেষামপি বস্তূনাং ভাবার্থো ভবতি স্থিতঃ ।
তস্যাপি ভগবান্ কৃষ্ণঃ কিমতদ্ বস্তু রূপ্যতাম্ ॥ ৫৭ ॥

সমাশ্রিতা যে পদপল্লবপ্লবং
মহত্পদং পুণ্যযশো মুরারেঃ ।
ভবাম্বুধির্বত্সপদং পরং পদং
পদং পদং যদ্ বিপদাং ন তেষাম্ ॥ ৫৮ ॥

এতত্তে সর্বমাখ্যাতং যত্ পৃষ্টোঽহমিহ ত্বযা ।
তত্ কৌমারে হরিকৃতং পৌগণ্ডে পরিকীর্তিতম্ ॥ ৫৯ ॥

এতত্ সুহৃদ্ভিশ্চরিতং মুরারে-
রঘার্দনং শাদ্বলজেমনং চ ।
ব্যক্তেতরদ্ রূপমজোর্বভিষ্টবং
শৃণ্বন্ গৃণন্নেতি নরোঽখিলার্থান্ ॥ ৬০ ॥

এবং বিহারৈঃ কৌমারৈঃ কৌমারং জহতুর্ব্রজে ।
নিলাযনৈঃ সেতুবন্ধৈর্মর্কটোত্প্লবনাদিভিঃ ॥ ৬১ ॥