শ্ৰীমদ্ভাগৱতম্ ১০.৯

শ্ৰীশুক উৱাচ
একদা গৃহদাসীষু যশোদা নন্দগেহিনী ।
কৰ্মান্তৰনিযুক্তাসু নিৰ্মমন্থ স্ৱযং দধি ॥ ১ ॥

যানি যানীহ গীতানি তদ্বালচৰিতানি চ ।
দধিনিৰ্মন্থনে কালে স্মৰন্তী তান্যগাযত ॥ ২ ॥

ক্ষৌমং ৱাসঃ পৃথুকটিতটে বিভ্ৰতী সূত্ৰনদ্ধং
পুত্ৰস্নেহস্নুতকুচযুগং জাতকম্পং চ সুভ্ৰূঃ ।
ৰজ্জ্ৱাকৰ্ষশ্ৰমভুজচলত্কঙ্কণৌ কুণ্ডলে চ
স্ৱিন্নং ৱক্ত্ৰং কবৰৱিগলন্মালতী নিৰ্মমন্থ ॥ ৩ ॥

তাং স্তন্যকাম আসাদ্য মথ্নন্তীং জননীং হৰিঃ ।
গৃহীত্ৱা দধিমন্থানং ন্যষেধত্ প্ৰীতিমাৱহন্ ॥ ৪ ॥

তমঙ্কমাৰূঢমপাযযত্ স্তনং
স্নেহস্নুতং সস্মিতমীক্ষতী মুখম্ ।
অতৃপ্তমুত্সৃজ্য জৱেন সা যযা-
ৱুত্সিচ্যমানে পযসি ত্ৱধিশ্ৰিতে ॥ ৫ ॥

সঞ্জাতকোপঃ স্ফুৰিতাৰুণাধৰং
সন্দশ্য দদ্ভিৰ্দধিমন্থভাজনম্ ।
ভিত্ত্ৱা মৃষাশ্ৰুৰ্দৃষদশ্মনা ৰহো
জঘাস হৈযঙ্গৱমন্তৰং গতঃ ॥ ৬ ॥

উত্তাৰ্য গোপী সুশৃতং পযঃ পুনঃ
প্ৰৱিশ্য সংদৃশ্য চ দধ্যমত্ৰকম্ ।
ভগ্নং ৱিলোক্য স্ৱসুতস্য কৰ্ম ত-
জ্জহাস তং চাপি ন তত্ৰ পশ্যতী ॥ ৭ ॥

উলূখলাঙ্ঘ্ৰেৰুপৰি ৱ্যৱস্থিতং
মৰ্কায কামং দদতং শিচি স্থিতম্ ।
হৈযঙ্গৱং চৌৰ্যৱিশঙ্কিতেক্ষণং
নিৰীক্ষ্য পশ্চাত্ সুতমাগমচ্ছনৈঃ ॥ ৮ ॥

তামাত্তযষ্টিং প্ৰসমীক্ষ্য সত্ৱৰ-
স্ততোঽৱৰুহ্যাপসসাৰ ভীতৱত্ ।
গোপ্যন্ৱধাৱন্ন যমাপ যোগিনাং
ক্ষমং প্ৰৱেষ্টুং তপসেৰিতং মনঃ ॥ ৯ ॥

অন্ৱঞ্চমানা জননী বৃহচ্চল-
চ্ছ্ৰোণীভৰাক্ৰান্তগতিঃ সুমধ্যমা ।
জৱেন ৱিস্ৰংসিতকেশবন্ধন-
চ্যুতপ্ৰসূনানুগতিঃ পৰামৃশত্ ॥ ১০ ॥

কৃতাগসং তং প্ৰৰুদন্তমক্ষিণী
কষন্তমঞ্জন্মষিণী স্ৱপাণিনা ।
উদ্ৱীক্ষমাণং ভযৱিহ্ৱলেক্ষণং
হস্তে গৃহীত্ৱা ভিষযন্ত্যৱাগুৰত্ ॥ ১১ ॥

ত্যক্ত্ৱা যষ্টিং সুতং ভীতং ৱিজ্ঞাযাৰ্ভকৱত্সলা ।
ইযেষ কিল তং বদ্ধুং দাম্নাতদ্ৱীৰ্যকোৱিদা ॥ ১২ ॥

ন চান্তৰ্ন বহিৰ্যস্য ন পূৰ্ৱং নাপি চাপৰম্ ।
পূৰ্ৱাপৰং বহিশ্চান্তৰ্জগতো যো জগচ্চ যঃ ॥ ১৩ ॥

তং মত্ৱাত্মজমৱ্যক্তং মৰ্ত্যলিঙ্গমধোক্ষজম্ ।
গোপিকোলূখলে দাম্না ববন্ধ প্ৰাকৃতং যথা ॥ ১৪ ॥

তদ্ দাম বধ্যমানস্য স্ৱাৰ্ভকস্য কৃতাগসঃ ।
দ্ৱ্যঙ্গুলোনমভূত্তেন সন্দধেঽন্যচ্চ গোপিকা ॥ ১৫ ॥

যদাসীত্তদপি ন্যূনং তেনান্যদপি সন্দধে ।
তদপি দ্ৱ্যঙ্গুলং ন্যূনং যদ্ যদাদত্ত বন্ধনম্ ॥ ১৬ ॥

এৱং স্ৱগেহদামানি যশোদা সন্দধত্যপি ।
গোপীনাং সুস্মযন্তীনাং স্মযন্তী ৱিস্মিতাভৱত্ ॥ ১৭ ॥

স্ৱমাতুঃ স্ৱিন্নগাত্ৰাযা ৱিস্ৰস্তকবৰস্ৰজঃ ।
দৃষ্ট্ৱা পৰিশ্ৰমং কৃষ্ণঃ কৃপযাসীত্ স্ৱবন্ধনে ॥ ১৮ ॥

এৱং সন্দৰ্শিতা হ্যঙ্গ হৰিণা ভৃত্যৱশ্যতা ।
স্ৱৱশেনাপি কৃষ্ণেন যস্যেদং সেশ্ৱৰং ৱশে ॥ ১৯ ॥

নেমং ৱিৰিঞ্চো ন ভৱো ন শ্ৰীৰপ্যঙ্গসংশ্ৰযা ।
প্ৰসাদং লেভিৰে গোপী যত্তত্প্ৰাপ ৱিমুক্তিদাত্ ॥ ২০ ॥

নাযং সুখাপো ভগৱান্দেহিনাং গোপিকাসুতঃ ।
জ্ঞানিনাং চাত্মভূতানাং যথা ভক্তিমতামিহ ॥ ২১ ॥

কৃষ্ণস্তু গৃহকৃত্যেষু ৱ্যগ্ৰাযাং মাতৰি প্ৰভুঃ ।
অদ্ৰাক্ষীদৰ্জুনৌ পূৰ্ৱং গুহ্যকৌ ধনদাত্মজৌ ॥ ২২ ॥

পুৰা নাৰদশাপেন ৱৃক্ষতাং প্ৰাপিতৌ মদাত্ ।
নলকূৱৰমণিগ্ৰীৱাৱিতি খ্যাতৌ শ্ৰিযান্ৱিতৌ ॥ ২৩ ॥