শ্রীমদ্ভাগবতম্ ১০.৯

শ্রীশুক উবাচ
একদা গৃহদাসীষু যশোদা নন্দগেহিনী ।
কর্মান্তরনিযুক্তাসু নির্মমন্থ স্বযং দধি ॥ ১ ॥

যানি যানীহ গীতানি তদ্বালচরিতানি চ ।
দধিনির্মন্থনে কালে স্মরন্তী তান্যগাযত ॥ ২ ॥

ক্ষৌমং বাসঃ পৃথুকটিতটে বিভ্রতী সূত্রনদ্ধং
পুত্রস্নেহস্নুতকুচযুগং জাতকম্পং চ সুভ্রূঃ ।
রজ্জ্বাকর্ষশ্রমভুজচলত্কঙ্কণৌ কুণ্ডলে চ
স্বিন্নং বক্ত্রং কবরবিগলন্মালতী নির্মমন্থ ॥ ৩ ॥

তাং স্তন্যকাম আসাদ্য মথ্নন্তীং জননীং হরিঃ ।
গৃহীত্বা দধিমন্থানং ন্যষেধত্ প্রীতিমাবহন্ ॥ ৪ ॥

তমঙ্কমারূঢমপাযযত্ স্তনং
স্নেহস্নুতং সস্মিতমীক্ষতী মুখম্ ।
অতৃপ্তমুত্সৃজ্য জবেন সা যযা-
বুত্সিচ্যমানে পযসি ত্বধিশ্রিতে ॥ ৫ ॥

সঞ্জাতকোপঃ স্ফুরিতারুণাধরং
সন্দশ্য দদ্ভির্দধিমন্থভাজনম্ ।
ভিত্ত্বা মৃষাশ্রুর্দৃষদশ্মনা রহো
জঘাস হৈযঙ্গবমন্তরং গতঃ ॥ ৬ ॥

উত্তার্য গোপী সুশৃতং পযঃ পুনঃ
প্রবিশ্য সংদৃশ্য চ দধ্যমত্রকম্ ।
ভগ্নং বিলোক্য স্বসুতস্য কর্ম ত-
জ্জহাস তং চাপি ন তত্র পশ্যতী ॥ ৭ ॥

উলূখলাঙ্ঘ্রেরুপরি ব্যবস্থিতং
মর্কায কামং দদতং শিচি স্থিতম্ ।
হৈযঙ্গবং চৌর্যবিশঙ্কিতেক্ষণং
নিরীক্ষ্য পশ্চাত্ সুতমাগমচ্ছনৈঃ ॥ ৮ ॥

তামাত্তযষ্টিং প্রসমীক্ষ্য সত্বর-
স্ততোঽবরুহ্যাপসসার ভীতবত্ ।
গোপ্যন্বধাবন্ন যমাপ যোগিনাং
ক্ষমং প্রবেষ্টুং তপসেরিতং মনঃ ॥ ৯ ॥

অন্বঞ্চমানা জননী বৃহচ্চল-
চ্ছ্রোণীভরাক্রান্তগতিঃ সুমধ্যমা ।
জবেন বিস্রংসিতকেশবন্ধন-
চ্যুতপ্রসূনানুগতিঃ পরামৃশত্ ॥ ১০ ॥

কৃতাগসং তং প্ররুদন্তমক্ষিণী
কষন্তমঞ্জন্মষিণী স্বপাণিনা ।
উদ্বীক্ষমাণং ভযবিহ্বলেক্ষণং
হস্তে গৃহীত্বা ভিষযন্ত্যবাগুরত্ ॥ ১১ ॥

ত্যক্ত্বা যষ্টিং সুতং ভীতং বিজ্ঞাযার্ভকবত্সলা ।
ইযেষ কিল তং বদ্ধুং দাম্নাতদ্বীর্যকোবিদা ॥ ১২ ॥

ন চান্তর্ন বহির্যস্য ন পূর্বং নাপি চাপরম্ ।
পূর্বাপরং বহিশ্চান্তর্জগতো যো জগচ্চ যঃ ॥ ১৩ ॥

তং মত্বাত্মজমব্যক্তং মর্ত্যলিঙ্গমধোক্ষজম্ ।
গোপিকোলূখলে দাম্না ববন্ধ প্রাকৃতং যথা ॥ ১৪ ॥

তদ্ দাম বধ্যমানস্য স্বার্ভকস্য কৃতাগসঃ ।
দ্ব্যঙ্গুলোনমভূত্তেন সন্দধেঽন্যচ্চ গোপিকা ॥ ১৫ ॥

যদাসীত্তদপি ন্যূনং তেনান্যদপি সন্দধে ।
তদপি দ্ব্যঙ্গুলং ন্যূনং যদ্ যদাদত্ত বন্ধনম্ ॥ ১৬ ॥

এবং স্বগেহদামানি যশোদা সন্দধত্যপি ।
গোপীনাং সুস্মযন্তীনাং স্মযন্তী বিস্মিতাভবত্ ॥ ১৭ ॥

স্বমাতুঃ স্বিন্নগাত্রাযা বিস্রস্তকবরস্রজঃ ।
দৃষ্ট্বা পরিশ্রমং কৃষ্ণঃ কৃপযাসীত্ স্ববন্ধনে ॥ ১৮ ॥

এবং সন্দর্শিতা হ্যঙ্গ হরিণা ভৃত্যবশ্যতা ।
স্ববশেনাপি কৃষ্ণেন যস্যেদং সেশ্বরং বশে ॥ ১৯ ॥

নেমং বিরিঞ্চো ন ভবো ন শ্রীরপ্যঙ্গসংশ্রযা ।
প্রসাদং লেভিরে গোপী যত্তত্প্রাপ বিমুক্তিদাত্ ॥ ২০ ॥

নাযং সুখাপো ভগবান্দেহিনাং গোপিকাসুতঃ ।
জ্ঞানিনাং চাত্মভূতানাং যথা ভক্তিমতামিহ ॥ ২১ ॥

কৃষ্ণস্তু গৃহকৃত্যেষু ব্যগ্রাযাং মাতরি প্রভুঃ ।
অদ্রাক্ষীদর্জুনৌ পূর্বং গুহ্যকৌ ধনদাত্মজৌ ॥ ২২ ॥

পুরা নারদশাপেন বৃক্ষতাং প্রাপিতৌ মদাত্ ।
নলকূবরমণিগ্রীবাবিতি খ্যাতৌ শ্রিযান্বিতৌ ॥ ২৩ ॥