ശ്രീമദ്ഭാഗവതമ് ൧൦.൯

ശ്രീശുക ഉവാച
ഏകദാ ഗൃഹദാസീഷു യശോദാ നന്ദഗേഹിനീ ।
കര്മാന്തരനിയുക്താസു നിര്മമന്ഥ സ്വയം ദധി ॥ ൧ ॥

യാനി യാനീഹ ഗീതാനി തദ്ബാലചരിതാനി ച ।
ദധിനിര്മന്ഥനേ കാലേ സ്മരന്തീ താന്യഗായത ॥ ൨ ॥

ക്ഷൌമം വാസഃ പൃഥുകടിതടേ ബിഭ്രതീ സൂത്രനദ്ധം
പുത്രസ്നേഹസ്നുതകുചയുഗം ജാതകമ്പം ച സുഭ്രൂഃ ।
രജ്ജ്വാകര്ഷശ്രമഭുജചലത്കങ്കണൌ കുണ്ഡലേ ച
സ്വിന്നം വക്ത്രം കബരവിഗലന്മാലതീ നിര്മമന്ഥ ॥ ൩ ॥

താം സ്തന്യകാമ ആസാദ്യ മഥ്നന്തീം ജനനീം ഹരിഃ ।
ഗൃഹീത്വാ ദധിമന്ഥാനം ന്യഷേധത് പ്രീതിമാവഹന് ॥ ൪ ॥

തമങ്കമാരൂഢമപായയത് സ്തനം
സ്നേഹസ്നുതം സസ്മിതമീക്ഷതീ മുഖമ് ।
അതൃപ്തമുത്സൃജ്യ ജവേന സാ യയാ-
വുത്സിച്യമാനേ പയസി ത്വധിശ്രിതേ ॥ ൫ ॥

സഞ്ജാതകോപഃ സ്ഫുരിതാരുണാധരം
സന്ദശ്യ ദദ്ഭിര്ദധിമന്ഥഭാജനമ് ।
ഭിത്ത്വാ മൃഷാശ്രുര്ദൃഷദശ്മനാ രഹോ
ജഘാസ ഹൈയങ്ഗവമന്തരം ഗതഃ ॥ ൬ ॥

ഉത്താര്യ ഗോപീ സുശൃതം പയഃ പുനഃ
പ്രവിശ്യ സംദൃശ്യ ച ദധ്യമത്രകമ് ।
ഭഗ്നം വിലോക്യ സ്വസുതസ്യ കര്മ ത-
ജ്ജഹാസ തം ചാപി ന തത്ര പശ്യതീ ॥ ൭ ॥

ഉലൂഖലാങ്ഘ്രേരുപരി വ്യവസ്ഥിതം
മര്കായ കാമം ദദതം ശിചി സ്ഥിതമ് ।
ഹൈയങ്ഗവം ചൌര്യവിശങ്കിതേക്ഷണം
നിരീക്ഷ്യ പശ്ചാത് സുതമാഗമച്ഛനൈഃ ॥ ൮ ॥

താമാത്തയഷ്ടിം പ്രസമീക്ഷ്യ സത്വര-
സ്തതോഽവരുഹ്യാപസസാര ഭീതവത് ।
ഗോപ്യന്വധാവന്ന യമാപ യോഗിനാം
ക്ഷമം പ്രവേഷ്ടും തപസേരിതം മനഃ ॥ ൯ ॥

അന്വഞ്ചമാനാ ജനനീ ബൃഹച്ചല-
ച്ഛ്രോണീഭരാക്രാന്തഗതിഃ സുമധ്യമാ ।
ജവേന വിസ്രംസിതകേശബന്ധന-
ച്യുതപ്രസൂനാനുഗതിഃ പരാമൃശത് ॥ ൧൦ ॥

കൃതാഗസം തം പ്രരുദന്തമക്ഷിണീ
കഷന്തമഞ്ജന്മഷിണീ സ്വപാണിനാ ।
ഉദ്വീക്ഷമാണം ഭയവിഹ്വലേക്ഷണം
ഹസ്തേ ഗൃഹീത്വാ ഭിഷയന്ത്യവാഗുരത് ॥ ൧൧ ॥

ത്യക്ത്വാ യഷ്ടിം സുതം ഭീതം വിജ്ഞായാര്ഭകവത്സലാ ।
ഇയേഷ കില തം ബദ്ധും ദാമ്നാതദ്വീര്യകോവിദാ ॥ ൧൨ ॥

ന ചാന്തര്ന ബഹിര്യസ്യ ന പൂര്വം നാപി ചാപരമ് ।
പൂര്വാപരം ബഹിശ്ചാന്തര്ജഗതോ യോ ജഗച്ച യഃ ॥ ൧൩ ॥

തം മത്വാത്മജമവ്യക്തം മര്ത്യലിങ്ഗമധോക്ഷജമ് ।
ഗോപികോലൂഖലേ ദാമ്നാ ബബന്ധ പ്രാകൃതം യഥാ ॥ ൧൪ ॥

തദ് ദാമ ബധ്യമാനസ്യ സ്വാര്ഭകസ്യ കൃതാഗസഃ ।
ദ്വ്യങ്ഗുലോനമഭൂത്തേന സന്ദധേഽന്യച്ച ഗോപികാ ॥ ൧൫ ॥

യദാസീത്തദപി ന്യൂനം തേനാന്യദപി സന്ദധേ ।
തദപി ദ്വ്യങ്ഗുലം ന്യൂനം യദ് യദാദത്ത ബന്ധനമ് ॥ ൧൬ ॥

ഏവം സ്വഗേഹദാമാനി യശോദാ സന്ദധത്യപി ।
ഗോപീനാം സുസ്മയന്തീനാം സ്മയന്തീ വിസ്മിതാഭവത് ॥ ൧൭ ॥

സ്വമാതുഃ സ്വിന്നഗാത്രായാ വിസ്രസ്തകബരസ്രജഃ ।
ദൃഷ്ട്വാ പരിശ്രമം കൃഷ്ണഃ കൃപയാസീത് സ്വബന്ധനേ ॥ ൧൮ ॥

ഏവം സന്ദര്ശിതാ ഹ്യങ്ഗ ഹരിണാ ഭൃത്യവശ്യതാ ।
സ്വവശേനാപി കൃഷ്ണേന യസ്യേദം സേശ്വരം വശേ ॥ ൧൯ ॥

നേമം വിരിഞ്ചോ ന ഭവോ ന ശ്രീരപ്യങ്ഗസംശ്രയാ ।
പ്രസാദം ലേഭിരേ ഗോപീ യത്തത്പ്രാപ വിമുക്തിദാത് ॥ ൨൦ ॥

നായം സുഖാപോ ഭഗവാന്ദേഹിനാം ഗോപികാസുതഃ ।
ജ്ഞാനിനാം ചാത്മഭൂതാനാം യഥാ ഭക്തിമതാമിഹ ॥ ൨൧ ॥

കൃഷ്ണസ്തു ഗൃഹകൃത്യേഷു വ്യഗ്രായാം മാതരി പ്രഭുഃ ।
അദ്രാക്ഷീദര്ജുനൌ പൂര്വം ഗുഹ്യകൌ ധനദാത്മജൌ ॥ ൨൨ ॥

പുരാ നാരദശാപേന വൃക്ഷതാം പ്രാപിതൌ മദാത് ।
നലകൂവരമണിഗ്രീവാവിതി ഖ്യാതൌ ശ്രിയാന്വിതൌ ॥ ൨൩ ॥