শ্ৰীমদ্ভাগৱতম্ ১১.৩০

শ্ৰীৰাজোৱাচ
ততো মহাভাগৱত উদ্ধৱে নিৰ্গতে ৱনম্ ।
দ্ৱাৰৱত্যাং কিমকৰোদ্ ভগৱান্ ভূতভাৱনঃ ॥ ১ ॥

ব্ৰহ্মশাপোপসংসৃষ্টে স্ৱকুলে যাদৱৰ্ষভঃ ।
প্ৰেযসীং সৰ্ৱনেত্ৰাণাং তনুং স কথমত্যজত্ ॥ ২ ॥

প্ৰত্যাক্ৰষ্টুং নযনমবলা যত্ৰ লগ্নং ন শেকুঃ
কৰ্ণাৱিষ্টং ন সৰতি ততো যত্ সতামাত্মলগ্নম্ ।
যচ্ছ্ৰীৰ্ৱাচাং জনযতি ৰতিং কিং নু মানং কৱীনাং
দৃষ্ট্ৱা জিষ্ণোৰ্যুধি ৰথগতং যচ্চ তত্সাম্যমীযুঃ ॥ ৩ ॥

শ্ৰী ঋষিৰুৱাচ
দিৱি ভুৱ্যন্তৰিক্ষে চ মহোত্পাতান্ সমুত্থিতান্ ।
দৃষ্ট্ৱাসীনান্ সুধৰ্মাযাং কৃষ্ণঃ প্ৰাহ যদূনিদম্ ॥ ৪ ॥

শ্ৰীভগৱানুৱাচ
এতে ঘোৰা মহোত্পাতা দ্ৱাৰ্ৱত্যাং যমকেতৱঃ ।
মুহূৰ্তমপি ন স্থেযমত্ৰ নো যদুপুঙ্গৱাঃ ॥ ৫ ॥

স্ত্ৰিযো বালাশ্চ ৱৃদ্ধাশ্চ শঙ্খোদ্ধাৰং ৱ্ৰজন্ত্ৱিতঃ ।
ৱযং প্ৰভাসং যাস্যামো যত্ৰ প্ৰত্যক্ সৰস্ৱতী ॥ ৬ ॥

তত্ৰাভিষিচ্য শুচয উপোষ্য সুসমাহিতাঃ ।
দেৱতাঃ পূজযিষ্যামঃ স্নপনালেপনাৰ্হণৈঃ ॥ ৭ ॥

ব্ৰাহ্মণাংস্তু মহাভাগান্ কৃতস্ৱস্ত্যযনা ৱযম্ ।
গোভূহিৰণ্যৱাসোভিৰ্গজাশ্ৱৰথৱেশ্মভিঃ ॥ ৮ ॥

ৱিধিৰেষ হ্যৰিষ্টঘ্নো মঙ্গলাযনমুত্তমম্ ।
দেৱদ্ৱিজগৱাং পূজা ভূতেষু পৰমো ভৱঃ ॥ ৯ ॥

ইতি সৰ্ৱে সমাকৰ্ণ্য যদুৱৃদ্ধা মধুদ্ৱিষঃ ।
তথেতি নৌভিৰুত্তীৰ্য প্ৰভাসং প্ৰযযূ ৰথৈঃ ॥ ১০ ॥

তস্মিন্ ভগৱতাদিষ্টং যদুদেৱেন যাদৱাঃ ।
চক্ৰুঃ পৰমযা ভক্ত্যা সৰ্ৱশ্ৰেযোপবৃংহিতম্ ॥ ১১ ॥

ততস্তস্মিন্ মহাপানং পপুৰ্মৈৰেযকং মধু ।
দিষ্টৱিভ্ৰংশিতধিযো যদ্দ্ৰৱৈৰ্ভ্ৰশ্যতে মতিঃ ॥ ১২ ॥

মহাপানাভিমত্তানাং ৱীৰাণাং দৃপ্তচেতসাম্ ।
কৃষ্ণমাযাৱিমূঢানাং সঙ্ঘৰ্ষঃ সুমহানভূত্ ॥ ১৩ ॥

যুযুধুঃ ক্ৰোধসংৰব্ধা ৱেলাযামাততাযিনঃ ।
ধনুৰ্ভিৰসিভিৰ্ভল্লৈৰ্গদাভিস্তোমৰৰ্ষ্টিভিঃ ॥ ১৪ ॥

পতত্পতাকৈ ৰথকুঞ্জৰাদিভিঃ
খৰোষ্ট্ৰগোভিৰ্মহিষৈৰ্নৰৈৰপি ।
মিথঃ সমেত্যাশ্ৱতৰৈঃ সুদুৰ্মদা
ন্যহন্শৰৈৰ্দদ্ভিৰিৱ দ্ৱিপা ৱনে ॥ ১৫ ॥

প্ৰদ্যুম্নসাম্বৌ যুধি ৰূঢমত্সৰাৱ্-
অক্ৰূৰভোজাৱনিৰুদ্ধসাত্যকী ।
সুভদ্ৰসঙ্গ্ৰামজিতৌ সুদাৰুণৌ
গদৌ সুমিত্ৰাসুৰথৌ সমীযতুঃ ॥ ১৬ ॥

অন্যে চ যে ৱৈ নিশঠোল্মুকাদযঃ
সহস্ৰজিচ্ছতজিদ্ভানুমুখ্যাঃ ।
অন্যোন্যমাসাদ্য মদান্ধকাৰিতা
জঘ্নুৰ্মুকুন্দেন ৱিমোহিতা ভৃশম্ ॥ ১৭ ॥

দাশাৰ্হৱৃষ্ণ্যন্ধকভোজসাত্ৱতা
মধ্ৱৰ্বুদা মাথুৰশূৰসেনাঃ ।
ৱিসৰ্জনাঃ কুকুৰাঃ কুন্তযশ্চ
মিথস্তু জঘ্নুঃ সুৱিসৃজ্য সৌহৃদম্ ॥ ১৮ ॥

পুত্ৰা অযুধ্যন্ পিতৃভিৰ্ভ্ৰাতৃভিশ্চ
স্ৱস্ৰীযদৌহিত্ৰপিতৃৱ্যমাতুলৈঃ ।
মিত্ৰাণি মিত্ৰৈঃ সুহৃদঃ সুহৃদ্ভি-
ৰ্জ্ঞাতীংস্ত্ৱহন্ জ্ঞাতয এৱ মূঢাঃ ॥ ১৯ ॥

শৰেষু হীযমানেষু ভজ্যমানেসু ধন্ৱসু ।
শস্ত্ৰেষু ক্ষীযমানেষু মুষ্টিভিৰ্জহ্ৰুৰেৰকাঃ ॥ ২০ ॥

তা ৱজ্ৰকল্পা হ্যভৱন্ পৰিঘা মুষ্টিনা ভৃতাঃ ।
জঘ্নুৰ্দ্ৱিষস্তৈঃ কৃষ্ণেন ৱাৰ্যমাণাস্তু তং চ তে ॥ ২১ ॥

প্ৰত্যনীকং মন্যমানা বলভদ্ৰং চ মোহিতাঃ ।
হন্তুং কৃতধিযো ৰাজন্নাপন্না আততাযিনঃ ॥ ২২ ॥

অথ তাৱপি সঙ্ক্ৰুদ্ধাৱুদ্যম্য কুৰুনন্দন ।
এৰকামুষ্টিপৰিঘৌ চৰন্তৌ জঘ্নতুৰ্যুধি ॥ ২৩ ॥

ব্ৰহ্মশাপোপসৃষ্টানাং কৃষ্ণমাযাৱৃতাত্মনাম্ ।
স্পৰ্ধাক্ৰোধঃ ক্ষযং নিন্যে ৱৈণৱোঽগ্নিৰ্যথা ৱনম্ ॥ ২৪ ॥

এৱং নষ্টেষু সৰ্ৱেষু কুলেষু স্ৱেষু কেশৱঃ ।
অৱতাৰিতো ভুৱো ভাৰ ইতি মেনেঽৱশেষিতঃ ॥ ২৫ ॥

ৰামঃ সমুদ্ৰৱেলাযাং যোগমাস্থায পৌৰুষম্ ।
তত্যাজ লোকং মানুষ্যং সংযোজ্যাত্মানমাত্মনি ॥ ২৬ ॥

ৰামনিৰ্যাণমালোক্য ভগৱান্ দেৱকীসুতঃ ।
নিষসাদ ধৰোপস্থে তুষ্ণীমাসাদ্য পিপ্পলম্ ॥ ২৭ ॥

বিভ্ৰচ্চতুৰ্ভুজং ৰূপং ভ্ৰাজিষ্ণু প্ৰভযা স্ৱযা ।
দিশো ৱিতিমিৰাঃ কুৰ্ৱন্ ৱিধূম ইৱ পাৱকঃ ॥ ২৮ ॥

শ্ৰীৱত্সাঙ্কং ঘনশ্যামং তপ্তহাটকৱৰ্চসম্ ।
কৌশেযাম্বৰযুগ্মেন পৰিৱীতং সুমঙ্গলম্ ॥ ২৯ ॥

সুন্দৰস্মিতৱক্ত্ৰাব্জং নীলকুন্তলমণ্ডিতম্ ।
পুণ্ডৰীকাভিৰামাক্ষং স্ফুৰন্মকৰকুণ্ডলম্ ॥ ৩০ ॥

কটিসূত্ৰব্ৰহ্মসূত্ৰকিৰীটকটকাঙ্গদৈঃ ।
হাৰনূপুৰমুদ্ৰাভিঃ কৌস্তুভেন ৱিৰাজিতম্ ॥ ৩১ ॥

ৱনমালাপৰীতাঙ্গং মূৰ্তিমদ্ভিৰ্নিজাযুধৈঃ ।
কৃত্ৱোৰৌ দক্ষিণে পাদমাসীনং পঙ্কজাৰুণম্ ॥ ৩২ ॥

মুষলাৱশেষাযঃখণ্ডকৃতেষুৰ্লুব্ধকো জৰা ।
মৃগাস্যাকাৰং তচ্চৰণং ৱিৱ্যাধ মৃগশঙ্কযা ॥ ৩৩ ॥

চতুৰ্ভুজং তং পুৰুষং দৃষ্ট্ৱা স কৃতকিল্বিষঃ ।
ভীতঃ পপাত শিৰসা পাদযোৰসুৰদ্ৱিষঃ ॥ ৩৪ ॥

অজানতা কৃতমিদং পাপেন মধুসূদন ।
ক্ষন্তুমৰ্হসি পাপস্য উত্তমঃশ্লোক মেঽনঘ ॥ ৩৫ ॥

যস্যানুস্মৰণং নৃণামজ্ঞানধ্ৱান্তনাশনম্ ।
ৱদন্তি তস্য তে ৱিষ্ণো মযাসাধু কৃতং প্ৰভো ॥ ৩৬ ॥

তন্মাশু জহি ৱৈকুণ্ঠ পাপ্মানং মৃগলুব্ধকম্ ।
যথা পুনৰহং ত্ৱেৱং ন কুৰ্যাং সদতিক্ৰমম্ ॥ ৩৭ ॥

যস্যাত্মযোগৰচিতং ন ৱিদুৰ্ৱিৰিঞ্চো
ৰুদ্ৰাদযোঽস্য তনযাঃ পতযো গিৰাং যে ।
ত্ৱন্মাযযা পিহিতদৃষ্টয এতদঞ্জঃ
কিং তস্য তে ৱযমসদ্গতযো গৃণীমঃ ॥ ৩৮ ॥

শ্ৰীভগৱানুৱাচ
মা ভৈৰ্জৰে ত্ৱমুত্তিষ্ঠ কাম এষ কৃতো হি মে ।
যাহি ত্ৱং মদনুজ্ঞাতঃ স্ৱৰ্গং সুকৃতিনাং পদম্ ॥ ৩৯ ॥

ইত্যাদিষ্টো ভগৱতা কৃষ্ণেনেচ্ছাশৰীৰিণা ।
ত্ৰিঃ পৰিক্ৰম্য তং নত্ৱা ৱিমানেন দিৱং যযৌ ॥ ৪০ ॥

দাৰুকঃ কৃষ্ণপদৱীমন্ৱিচ্ছন্নধিগম্য তাম্ ।
ৱাযুং তুলসিকামোদমাঘ্ৰাযাভিমুখং যযৌ ॥ ৪১ ॥

তং তত্ৰ তিগ্মদ্যুভিৰাযুধৈৰ্ৱৃতং
হ্যশ্ৱত্থমূলে কৃতকেতনং পতিম্ ।
স্নেহপ্লুতাত্মা নিপপাত পাদযো
ৰথাদৱপ্লুত্য সবাষ্পলোচনঃ ॥ ৪২ ॥

অপশ্যতস্ত্ৱচ্চৰণাম্বুজং প্ৰভো
দৃষ্টিঃ প্ৰণষ্টা তমসি প্ৰৱিষ্টা ।
দিশো ন জানে ন লভে চ শান্তিং
যথা নিশাযামুডুপে প্ৰণষ্টে ॥ ৪৩ ॥

ইতি ব্ৰুৱতি সূতে ৱৈ ৰথো গৰুডলাঞ্ছনঃ ।
খমুত্পপাত ৰাজেন্দ্ৰ সাশ্ৱধ্ৱজ উদীক্ষতঃ ॥ ৪৪ ॥

তমন্ৱগচ্ছন্ দিৱ্যানি ৱিষ্ণুপ্ৰহৰণানি চ ।
তেনাতিৱিস্মিতাত্মানং সূতমাহ জনাৰ্দনঃ ॥ ৪৫ ॥

গচ্ছ দ্ৱাৰৱতীং সূত জ্ঞাতীনাং নিধনং মিথঃ ।
সঙ্কৰ্ষণস্য নিৰ্যাণং বন্ধুভ্যো ব্ৰূহি মদ্দশাম্ ॥ ৪৬ ॥

দ্ৱাৰকাযাং চ ন স্থেযং ভৱদ্ভিশ্চ স্ৱবন্ধুভিঃ ।
মযা ত্যক্তাং যদুপুৰীং সমুদ্ৰঃ প্লাৱযিষ্যতি ॥ ৪৭ ॥

স্ৱং স্ৱং পৰিগ্ৰহং সৰ্ৱে আদায পিতৰৌ চ নঃ ।
অৰ্জুনেনাৱিতাঃ সৰ্ৱ ইন্দ্ৰপ্ৰস্থং গমিষ্যথ ॥ ৪৮ ॥

ত্ৱং তু মদ্ধৰ্মমাস্থায জ্ঞাননিষ্ঠ উপেক্ষকঃ ।
মন্মাযাৰচিতামেতাং ৱিজ্ঞাযোপশমং ৱ্ৰজ ॥ ৪৯ ॥

ইত্যুক্তস্তং পৰিক্ৰম্য নমস্কৃত্য পুনঃ পুনঃ ।
তত্পাদৌ শীৰ্ষ্ণ্যুপাধায দুৰ্মনাঃ প্ৰযযৌ পুৰীম্ ॥ ৫০ ॥