శ్రీమద్భాగవతమ్ ౧౧.౩౦

శ్రీరాజోవాచ
తతో మహాభాగవత ఉద్ధవే నిర్గతే వనమ్ ।
ద్వారవత్యాం కిమకరోద్ భగవాన్ భూతభావనః ॥ ౧ ॥

బ్రహ్మశాపోపసంసృష్టే స్వకులే యాదవర్షభః ।
ప్రేయసీం సర్వనేత్రాణాం తనుం స కథమత్యజత్ ॥ ౨ ॥

ప్రత్యాక్రష్టుం నయనమబలా యత్ర లగ్నం న శేకుః
కర్ణావిష్టం న సరతి తతో యత్ సతామాత్మలగ్నమ్ ।
యచ్ఛ్రీర్వాచాం జనయతి రతిం కిం ను మానం కవీనాం
దృష్ట్వా జిష్ణోర్యుధి రథగతం యచ్చ తత్సామ్యమీయుః ॥ ౩ ॥

శ్రీ ఋషిరువాచ
దివి భువ్యన్తరిక్షే చ మహోత్పాతాన్ సముత్థితాన్ ।
దృష్ట్వాసీనాన్ సుధర్మాయాం కృష్ణః ప్రాహ యదూనిదమ్ ॥ ౪ ॥

శ్రీభగవానువాచ
ఏతే ఘోరా మహోత్పాతా ద్వార్వత్యాం యమకేతవః ।
ముహూర్తమపి న స్థేయమత్ర నో యదుపుఙ్గవాః ॥ ౫ ॥

స్త్రియో బాలాశ్చ వృద్ధాశ్చ శఙ్ఖోద్ధారం వ్రజన్త్వితః ।
వయం ప్రభాసం యాస్యామో యత్ర ప్రత్యక్ సరస్వతీ ॥ ౬ ॥

తత్రాభిషిచ్య శుచయ ఉపోష్య సుసమాహితాః ।
దేవతాః పూజయిష్యామః స్నపనాలేపనార్హణైః ॥ ౭ ॥

బ్రాహ్మణాంస్తు మహాభాగాన్ కృతస్వస్త్యయనా వయమ్ ।
గోభూహిరణ్యవాసోభిర్గజాశ్వరథవేశ్మభిః ॥ ౮ ॥

విధిరేష హ్యరిష్టఘ్నో మఙ్గలాయనముత్తమమ్ ।
దేవద్విజగవాం పూజా భూతేషు పరమో భవః ॥ ౯ ॥

ఇతి సర్వే సమాకర్ణ్య యదువృద్ధా మధుద్విషః ।
తథేతి నౌభిరుత్తీర్య ప్రభాసం ప్రయయూ రథైః ॥ ౧౦ ॥

తస్మిన్ భగవతాదిష్టం యదుదేవేన యాదవాః ।
చక్రుః పరమయా భక్త్యా సర్వశ్రేయోపబృంహితమ్ ॥ ౧౧ ॥

తతస్తస్మిన్ మహాపానం పపుర్మైరేయకం మధు ।
దిష్టవిభ్రంశితధియో యద్ద్రవైర్భ్రశ్యతే మతిః ॥ ౧౨ ॥

మహాపానాభిమత్తానాం వీరాణాం దృప్తచేతసామ్ ।
కృష్ణమాయావిమూఢానాం సఙ్ఘర్షః సుమహానభూత్ ॥ ౧౩ ॥

యుయుధుః క్రోధసంరబ్ధా వేలాయామాతతాయినః ।
ధనుర్భిరసిభిర్భల్లైర్గదాభిస్తోమరర్ష్టిభిః ॥ ౧౪ ॥

పతత్పతాకై రథకుఞ్జరాదిభిః
ఖరోష్ట్రగోభిర్మహిషైర్నరైరపి ।
మిథః సమేత్యాశ్వతరైః సుదుర్మదా
న్యహన్శరైర్దద్భిరివ ద్విపా వనే ॥ ౧౫ ॥

ప్రద్యుమ్నసామ్బౌ యుధి రూఢమత్సరావ్-
అక్రూరభోజావనిరుద్ధసాత్యకీ ।
సుభద్రసఙ్గ్రామజితౌ సుదారుణౌ
గదౌ సుమిత్రాసురథౌ సమీయతుః ॥ ౧౬ ॥

అన్యే చ యే వై నిశఠోల్ముకాదయః
సహస్రజిచ్ఛతజిద్భానుముఖ్యాః ।
అన్యోన్యమాసాద్య మదాన్ధకారితా
జఘ్నుర్ముకున్దేన విమోహితా భృశమ్ ॥ ౧౭ ॥

దాశార్హవృష్ణ్యన్ధకభోజసాత్వతా
మధ్వర్బుదా మాథురశూరసేనాః ।
విసర్జనాః కుకురాః కున్తయశ్చ
మిథస్తు జఘ్నుః సువిసృజ్య సౌహృదమ్ ॥ ౧౮ ॥

పుత్రా అయుధ్యన్ పితృభిర్భ్రాతృభిశ్చ
స్వస్రీయదౌహిత్రపితృవ్యమాతులైః ।
మిత్రాణి మిత్రైః సుహృదః సుహృద్భి-
ర్జ్ఞాతీంస్త్వహన్ జ్ఞాతయ ఏవ మూఢాః ॥ ౧౯ ॥

శరేషు హీయమానేషు భజ్యమానేసు ధన్వసు ।
శస్త్రేషు క్షీయమానేషు ముష్టిభిర్జహ్రురేరకాః ॥ ౨౦ ॥

తా వజ్రకల్పా హ్యభవన్ పరిఘా ముష్టినా భృతాః ।
జఘ్నుర్ద్విషస్తైః కృష్ణేన వార్యమాణాస్తు తం చ తే ॥ ౨౧ ॥

ప్రత్యనీకం మన్యమానా బలభద్రం చ మోహితాః ।
హన్తుం కృతధియో రాజన్నాపన్నా ఆతతాయినః ॥ ౨౨ ॥

అథ తావపి సఙ్క్రుద్ధావుద్యమ్య కురునన్దన ।
ఏరకాముష్టిపరిఘౌ చరన్తౌ జఘ్నతుర్యుధి ॥ ౨౩ ॥

బ్రహ్మశాపోపసృష్టానాం కృష్ణమాయావృతాత్మనామ్ ।
స్పర్ధాక్రోధః క్షయం నిన్యే వైణవోఽగ్నిర్యథా వనమ్ ॥ ౨౪ ॥

ఏవం నష్టేషు సర్వేషు కులేషు స్వేషు కేశవః ।
అవతారితో భువో భార ఇతి మేనేఽవశేషితః ॥ ౨౫ ॥

రామః సముద్రవేలాయాం యోగమాస్థాయ పౌరుషమ్ ।
తత్యాజ లోకం మానుష్యం సంయోజ్యాత్మానమాత్మని ॥ ౨౬ ॥

రామనిర్యాణమాలోక్య భగవాన్ దేవకీసుతః ।
నిషసాద ధరోపస్థే తుష్ణీమాసాద్య పిప్పలమ్ ॥ ౨౭ ॥

బిభ్రచ్చతుర్భుజం రూపం భ్రాజిష్ణు ప్రభయా స్వయా ।
దిశో వితిమిరాః కుర్వన్ విధూమ ఇవ పావకః ॥ ౨౮ ॥

శ్రీవత్సాఙ్కం ఘనశ్యామం తప్తహాటకవర్చసమ్ ।
కౌశేయామ్బరయుగ్మేన పరివీతం సుమఙ్గలమ్ ॥ ౨౯ ॥

సున్దరస్మితవక్త్రాబ్జం నీలకున్తలమణ్డితమ్ ।
పుణ్డరీకాభిరామాక్షం స్ఫురన్మకరకుణ్డలమ్ ॥ ౩౦ ॥

కటిసూత్రబ్రహ్మసూత్రకిరీటకటకాఙ్గదైః ।
హారనూపురముద్రాభిః కౌస్తుభేన విరాజితమ్ ॥ ౩౧ ॥

వనమాలాపరీతాఙ్గం మూర్తిమద్భిర్నిజాయుధైః ।
కృత్వోరౌ దక్షిణే పాదమాసీనం పఙ్కజారుణమ్ ॥ ౩౨ ॥

ముషలావశేషాయఃఖణ్డకృతేషుర్లుబ్ధకో జరా ।
మృగాస్యాకారం తచ్చరణం వివ్యాధ మృగశఙ్కయా ॥ ౩౩ ॥

చతుర్భుజం తం పురుషం దృష్ట్వా స కృతకిల్బిషః ।
భీతః పపాత శిరసా పాదయోరసురద్విషః ॥ ౩౪ ॥

అజానతా కృతమిదం పాపేన మధుసూదన ।
క్షన్తుమర్హసి పాపస్య ఉత్తమఃశ్లోక మేఽనఘ ॥ ౩౫ ॥

యస్యానుస్మరణం నృణామజ్ఞానధ్వాన్తనాశనమ్ ।
వదన్తి తస్య తే విష్ణో మయాసాధు కృతం ప్రభో ॥ ౩౬ ॥

తన్మాశు జహి వైకుణ్ఠ పాప్మానం మృగలుబ్ధకమ్ ।
యథా పునరహం త్వేవం న కుర్యాం సదతిక్రమమ్ ॥ ౩౭ ॥

యస్యాత్మయోగరచితం న విదుర్విరిఞ్చో
రుద్రాదయోఽస్య తనయాః పతయో గిరాం యే ।
త్వన్మాయయా పిహితదృష్టయ ఏతదఞ్జః
కిం తస్య తే వయమసద్గతయో గృణీమః ॥ ౩౮ ॥

శ్రీభగవానువాచ
మా భైర్జరే త్వముత్తిష్ఠ కామ ఏష కృతో హి మే ।
యాహి త్వం మదనుజ్ఞాతః స్వర్గం సుకృతినాం పదమ్ ॥ ౩౯ ॥

ఇత్యాదిష్టో భగవతా కృష్ణేనేచ్ఛాశరీరిణా ।
త్రిః పరిక్రమ్య తం నత్వా విమానేన దివం యయౌ ॥ ౪౦ ॥

దారుకః కృష్ణపదవీమన్విచ్ఛన్నధిగమ్య తామ్ ।
వాయుం తులసికామోదమాఘ్రాయాభిముఖం యయౌ ॥ ౪౧ ॥

తం తత్ర తిగ్మద్యుభిరాయుధైర్వృతం
హ్యశ్వత్థమూలే కృతకేతనం పతిమ్ ।
స్నేహప్లుతాత్మా నిపపాత పాదయో
రథాదవప్లుత్య సబాష్పలోచనః ॥ ౪౨ ॥

అపశ్యతస్త్వచ్చరణామ్బుజం ప్రభో
దృష్టిః ప్రణష్టా తమసి ప్రవిష్టా ।
దిశో న జానే న లభే చ శాన్తిం
యథా నిశాయాముడుపే ప్రణష్టే ॥ ౪౩ ॥

ఇతి బ్రువతి సూతే వై రథో గరుడలాఞ్ఛనః ।
ఖముత్పపాత రాజేన్ద్ర సాశ్వధ్వజ ఉదీక్షతః ॥ ౪౪ ॥

తమన్వగచ్ఛన్ దివ్యాని విష్ణుప్రహరణాని చ ।
తేనాతివిస్మితాత్మానం సూతమాహ జనార్దనః ॥ ౪౫ ॥

గచ్ఛ ద్వారవతీం సూత జ్ఞాతీనాం నిధనం మిథః ।
సఙ్కర్షణస్య నిర్యాణం బన్ధుభ్యో బ్రూహి మద్దశామ్ ॥ ౪౬ ॥

ద్వారకాయాం చ న స్థేయం భవద్భిశ్చ స్వబన్ధుభిః ।
మయా త్యక్తాం యదుపురీం సముద్రః ప్లావయిష్యతి ॥ ౪౭ ॥

స్వం స్వం పరిగ్రహం సర్వే ఆదాయ పితరౌ చ నః ।
అర్జునేనావితాః సర్వ ఇన్ద్రప్రస్థం గమిష్యథ ॥ ౪౮ ॥

త్వం తు మద్ధర్మమాస్థాయ జ్ఞాననిష్ఠ ఉపేక్షకః ।
మన్మాయారచితామేతాం విజ్ఞాయోపశమం వ్రజ ॥ ౪౯ ॥

ఇత్యుక్తస్తం పరిక్రమ్య నమస్కృత్య పునః పునః ।
తత్పాదౌ శీర్ష్ణ్యుపాధాయ దుర్మనాః ప్రయయౌ పురీమ్ ॥ ౫౦ ॥