শ্রীমদ্ভাগবতম্ ১১.৩০

শ্রীরাজোবাচ
ততো মহাভাগবত উদ্ধবে নির্গতে বনম্ ।
দ্বারবত্যাং কিমকরোদ্ ভগবান্ ভূতভাবনঃ ॥ ১ ॥

ব্রহ্মশাপোপসংসৃষ্টে স্বকুলে যাদবর্ষভঃ ।
প্রেযসীং সর্বনেত্রাণাং তনুং স কথমত্যজত্ ॥ ২ ॥

প্রত্যাক্রষ্টুং নযনমবলা যত্র লগ্নং ন শেকুঃ
কর্ণাবিষ্টং ন সরতি ততো যত্ সতামাত্মলগ্নম্ ।
যচ্ছ্রীর্বাচাং জনযতি রতিং কিং নু মানং কবীনাং
দৃষ্ট্বা জিষ্ণোর্যুধি রথগতং যচ্চ তত্সাম্যমীযুঃ ॥ ৩ ॥

শ্রী ঋষিরুবাচ
দিবি ভুব্যন্তরিক্ষে চ মহোত্পাতান্ সমুত্থিতান্ ।
দৃষ্ট্বাসীনান্ সুধর্মাযাং কৃষ্ণঃ প্রাহ যদূনিদম্ ॥ ৪ ॥

শ্রীভগবানুবাচ
এতে ঘোরা মহোত্পাতা দ্বার্বত্যাং যমকেতবঃ ।
মুহূর্তমপি ন স্থেযমত্র নো যদুপুঙ্গবাঃ ॥ ৫ ॥

স্ত্রিযো বালাশ্চ বৃদ্ধাশ্চ শঙ্খোদ্ধারং ব্রজন্ত্বিতঃ ।
বযং প্রভাসং যাস্যামো যত্র প্রত্যক্ সরস্বতী ॥ ৬ ॥

তত্রাভিষিচ্য শুচয উপোষ্য সুসমাহিতাঃ ।
দেবতাঃ পূজযিষ্যামঃ স্নপনালেপনার্হণৈঃ ॥ ৭ ॥

ব্রাহ্মণাংস্তু মহাভাগান্ কৃতস্বস্ত্যযনা বযম্ ।
গোভূহিরণ্যবাসোভির্গজাশ্বরথবেশ্মভিঃ ॥ ৮ ॥

বিধিরেষ হ্যরিষ্টঘ্নো মঙ্গলাযনমুত্তমম্ ।
দেবদ্বিজগবাং পূজা ভূতেষু পরমো ভবঃ ॥ ৯ ॥

ইতি সর্বে সমাকর্ণ্য যদুবৃদ্ধা মধুদ্বিষঃ ।
তথেতি নৌভিরুত্তীর্য প্রভাসং প্রযযূ রথৈঃ ॥ ১০ ॥

তস্মিন্ ভগবতাদিষ্টং যদুদেবেন যাদবাঃ ।
চক্রুঃ পরমযা ভক্ত্যা সর্বশ্রেযোপবৃংহিতম্ ॥ ১১ ॥

ততস্তস্মিন্ মহাপানং পপুর্মৈরেযকং মধু ।
দিষ্টবিভ্রংশিতধিযো যদ্দ্রবৈর্ভ্রশ্যতে মতিঃ ॥ ১২ ॥

মহাপানাভিমত্তানাং বীরাণাং দৃপ্তচেতসাম্ ।
কৃষ্ণমাযাবিমূঢানাং সঙ্ঘর্ষঃ সুমহানভূত্ ॥ ১৩ ॥

যুযুধুঃ ক্রোধসংরব্ধা বেলাযামাততাযিনঃ ।
ধনুর্ভিরসিভির্ভল্লৈর্গদাভিস্তোমরর্ষ্টিভিঃ ॥ ১৪ ॥

পতত্পতাকৈ রথকুঞ্জরাদিভিঃ
খরোষ্ট্রগোভির্মহিষৈর্নরৈরপি ।
মিথঃ সমেত্যাশ্বতরৈঃ সুদুর্মদা
ন্যহন্শরৈর্দদ্ভিরিব দ্বিপা বনে ॥ ১৫ ॥

প্রদ্যুম্নসাম্বৌ যুধি রূঢমত্সরাব্-
অক্রূরভোজাবনিরুদ্ধসাত্যকী ।
সুভদ্রসঙ্গ্রামজিতৌ সুদারুণৌ
গদৌ সুমিত্রাসুরথৌ সমীযতুঃ ॥ ১৬ ॥

অন্যে চ যে বৈ নিশঠোল্মুকাদযঃ
সহস্রজিচ্ছতজিদ্ভানুমুখ্যাঃ ।
অন্যোন্যমাসাদ্য মদান্ধকারিতা
জঘ্নুর্মুকুন্দেন বিমোহিতা ভৃশম্ ॥ ১৭ ॥

দাশার্হবৃষ্ণ্যন্ধকভোজসাত্বতা
মধ্বর্বুদা মাথুরশূরসেনাঃ ।
বিসর্জনাঃ কুকুরাঃ কুন্তযশ্চ
মিথস্তু জঘ্নুঃ সুবিসৃজ্য সৌহৃদম্ ॥ ১৮ ॥

পুত্রা অযুধ্যন্ পিতৃভির্ভ্রাতৃভিশ্চ
স্বস্রীযদৌহিত্রপিতৃব্যমাতুলৈঃ ।
মিত্রাণি মিত্রৈঃ সুহৃদঃ সুহৃদ্ভি-
র্জ্ঞাতীংস্ত্বহন্ জ্ঞাতয এব মূঢাঃ ॥ ১৯ ॥

শরেষু হীযমানেষু ভজ্যমানেসু ধন্বসু ।
শস্ত্রেষু ক্ষীযমানেষু মুষ্টিভির্জহ্রুরেরকাঃ ॥ ২০ ॥

তা বজ্রকল্পা হ্যভবন্ পরিঘা মুষ্টিনা ভৃতাঃ ।
জঘ্নুর্দ্বিষস্তৈঃ কৃষ্ণেন বার্যমাণাস্তু তং চ তে ॥ ২১ ॥

প্রত্যনীকং মন্যমানা বলভদ্রং চ মোহিতাঃ ।
হন্তুং কৃতধিযো রাজন্নাপন্না আততাযিনঃ ॥ ২২ ॥

অথ তাবপি সঙ্ক্রুদ্ধাবুদ্যম্য কুরুনন্দন ।
এরকামুষ্টিপরিঘৌ চরন্তৌ জঘ্নতুর্যুধি ॥ ২৩ ॥

ব্রহ্মশাপোপসৃষ্টানাং কৃষ্ণমাযাবৃতাত্মনাম্ ।
স্পর্ধাক্রোধঃ ক্ষযং নিন্যে বৈণবোঽগ্নির্যথা বনম্ ॥ ২৪ ॥

এবং নষ্টেষু সর্বেষু কুলেষু স্বেষু কেশবঃ ।
অবতারিতো ভুবো ভার ইতি মেনেঽবশেষিতঃ ॥ ২৫ ॥

রামঃ সমুদ্রবেলাযাং যোগমাস্থায পৌরুষম্ ।
তত্যাজ লোকং মানুষ্যং সংযোজ্যাত্মানমাত্মনি ॥ ২৬ ॥

রামনির্যাণমালোক্য ভগবান্ দেবকীসুতঃ ।
নিষসাদ ধরোপস্থে তুষ্ণীমাসাদ্য পিপ্পলম্ ॥ ২৭ ॥

বিভ্রচ্চতুর্ভুজং রূপং ভ্রাজিষ্ণু প্রভযা স্বযা ।
দিশো বিতিমিরাঃ কুর্বন্ বিধূম ইব পাবকঃ ॥ ২৮ ॥

শ্রীবত্সাঙ্কং ঘনশ্যামং তপ্তহাটকবর্চসম্ ।
কৌশেযাম্বরযুগ্মেন পরিবীতং সুমঙ্গলম্ ॥ ২৯ ॥

সুন্দরস্মিতবক্ত্রাব্জং নীলকুন্তলমণ্ডিতম্ ।
পুণ্ডরীকাভিরামাক্ষং স্ফুরন্মকরকুণ্ডলম্ ॥ ৩০ ॥

কটিসূত্রব্রহ্মসূত্রকিরীটকটকাঙ্গদৈঃ ।
হারনূপুরমুদ্রাভিঃ কৌস্তুভেন বিরাজিতম্ ॥ ৩১ ॥

বনমালাপরীতাঙ্গং মূর্তিমদ্ভির্নিজাযুধৈঃ ।
কৃত্বোরৌ দক্ষিণে পাদমাসীনং পঙ্কজারুণম্ ॥ ৩২ ॥

মুষলাবশেষাযঃখণ্ডকৃতেষুর্লুব্ধকো জরা ।
মৃগাস্যাকারং তচ্চরণং বিব্যাধ মৃগশঙ্কযা ॥ ৩৩ ॥

চতুর্ভুজং তং পুরুষং দৃষ্ট্বা স কৃতকিল্বিষঃ ।
ভীতঃ পপাত শিরসা পাদযোরসুরদ্বিষঃ ॥ ৩৪ ॥

অজানতা কৃতমিদং পাপেন মধুসূদন ।
ক্ষন্তুমর্হসি পাপস্য উত্তমঃশ্লোক মেঽনঘ ॥ ৩৫ ॥

যস্যানুস্মরণং নৃণামজ্ঞানধ্বান্তনাশনম্ ।
বদন্তি তস্য তে বিষ্ণো মযাসাধু কৃতং প্রভো ॥ ৩৬ ॥

তন্মাশু জহি বৈকুণ্ঠ পাপ্মানং মৃগলুব্ধকম্ ।
যথা পুনরহং ত্বেবং ন কুর্যাং সদতিক্রমম্ ॥ ৩৭ ॥

যস্যাত্মযোগরচিতং ন বিদুর্বিরিঞ্চো
রুদ্রাদযোঽস্য তনযাঃ পতযো গিরাং যে ।
ত্বন্মাযযা পিহিতদৃষ্টয এতদঞ্জঃ
কিং তস্য তে বযমসদ্গতযো গৃণীমঃ ॥ ৩৮ ॥

শ্রীভগবানুবাচ
মা ভৈর্জরে ত্বমুত্তিষ্ঠ কাম এষ কৃতো হি মে ।
যাহি ত্বং মদনুজ্ঞাতঃ স্বর্গং সুকৃতিনাং পদম্ ॥ ৩৯ ॥

ইত্যাদিষ্টো ভগবতা কৃষ্ণেনেচ্ছাশরীরিণা ।
ত্রিঃ পরিক্রম্য তং নত্বা বিমানেন দিবং যযৌ ॥ ৪০ ॥

দারুকঃ কৃষ্ণপদবীমন্বিচ্ছন্নধিগম্য তাম্ ।
বাযুং তুলসিকামোদমাঘ্রাযাভিমুখং যযৌ ॥ ৪১ ॥

তং তত্র তিগ্মদ্যুভিরাযুধৈর্বৃতং
হ্যশ্বত্থমূলে কৃতকেতনং পতিম্ ।
স্নেহপ্লুতাত্মা নিপপাত পাদযো
রথাদবপ্লুত্য সবাষ্পলোচনঃ ॥ ৪২ ॥

অপশ্যতস্ত্বচ্চরণাম্বুজং প্রভো
দৃষ্টিঃ প্রণষ্টা তমসি প্রবিষ্টা ।
দিশো ন জানে ন লভে চ শান্তিং
যথা নিশাযামুডুপে প্রণষ্টে ॥ ৪৩ ॥

ইতি ব্রুবতি সূতে বৈ রথো গরুডলাঞ্ছনঃ ।
খমুত্পপাত রাজেন্দ্র সাশ্বধ্বজ উদীক্ষতঃ ॥ ৪৪ ॥

তমন্বগচ্ছন্ দিব্যানি বিষ্ণুপ্রহরণানি চ ।
তেনাতিবিস্মিতাত্মানং সূতমাহ জনার্দনঃ ॥ ৪৫ ॥

গচ্ছ দ্বারবতীং সূত জ্ঞাতীনাং নিধনং মিথঃ ।
সঙ্কর্ষণস্য নির্যাণং বন্ধুভ্যো ব্রূহি মদ্দশাম্ ॥ ৪৬ ॥

দ্বারকাযাং চ ন স্থেযং ভবদ্ভিশ্চ স্ববন্ধুভিঃ ।
মযা ত্যক্তাং যদুপুরীং সমুদ্রঃ প্লাবযিষ্যতি ॥ ৪৭ ॥

স্বং স্বং পরিগ্রহং সর্বে আদায পিতরৌ চ নঃ ।
অর্জুনেনাবিতাঃ সর্ব ইন্দ্রপ্রস্থং গমিষ্যথ ॥ ৪৮ ॥

ত্বং তু মদ্ধর্মমাস্থায জ্ঞাননিষ্ঠ উপেক্ষকঃ ।
মন্মাযারচিতামেতাং বিজ্ঞাযোপশমং ব্রজ ॥ ৪৯ ॥

ইত্যুক্তস্তং পরিক্রম্য নমস্কৃত্য পুনঃ পুনঃ ।
তত্পাদৌ শীর্ষ্ণ্যুপাধায দুর্মনাঃ প্রযযৌ পুরীম্ ॥ ৫০ ॥