শ্রীমদ্ভাগবতম্ ৫.১৬

রাজোবাচ
উক্তস্ত্বযা ভূমণ্ডলাযামবিশেষো যাবদাদিত্যস্তপতি যত্র চাসৌ জ্যোতিষাং গণৈশ্চন্দ্রমা বা সহ দৃশ্যতে ॥ ১ ॥

তত্রাপি প্রিযব্রতরথচরণপরিখাতৈঃ সপ্তভিঃ সপ্ত সিন্ধব উপক্লৃপ্তা যত এতস্যাঃ সপ্তদ্বীপবিশেষবিকল্পস্ত্বযা ভগবন্ খলু সূচিত এতদেবাখিলমহং মানতো লক্ষণতশ্চ সর্বং বিজিজ্ঞাসামি ॥ ২ ॥

ভগবতো গুণমযে স্থূলরূপ আবেশিতং মনো হ্যগুণেঽপি সূক্ষ্মতম আত্মজ্যোতিষি পরে ব্রহ্মণি ভগবতি বাসুদেবাখ্যে ক্ষমমাবেশিতুং তদু হৈতদ্ গুরোঽর্হস্যনুবর্ণযিতুমিতি ॥ ৩ ॥

ঋষিরুবাচ
ন বৈ মহারাজ ভগবতো মাযাগুণবিভূতেঃ কাষ্ঠাং মনসা বচসা বাধিগন্তুমলং বিবুধাযুষাপি পুরুষস্তস্মাত্প্রাধান্যেনৈব ভূগোলকবিশেষং নামরূপ মানলক্ষণতো ব্যাখ্যাস্যামঃ ॥ ৪ ॥

যো বাযং দ্বীপঃ কুবলযকমলকোশাভ্যন্তরকোশো নিযুতযোজন বিশালঃ সমবর্তুলো যথা পুষ্করপত্রম্ ॥ ৫ ॥

যস্মিন্নব বর্ষাণি নবযোজনসহস্রাযামান্যষ্টভির্মর্যাদাগিরিভিঃ সুবিভক্তানি ভবন্তি ॥ ৬ ॥

এষাং মধ্যে ইলাবৃতং নামাভ্যন্তরবর্ষং যস্য নাভ্যামবস্থিতঃ সর্বতঃ সৌবর্ণঃ কুলগিরিরাজো মেরুর্দ্বীপাযামসমুন্নাহঃ কর্ণিকাভূতঃ কুবলযকমলস্য মূর্ধনি দ্বাত্রিংশত্ সহস্রযোজনবিততো মূলে ষোডশসহস্রং তাবতান্তর্ভূম্যাং প্রবিষ্টঃ ॥ ৭ ॥

উত্তরোত্তরেণেলাবৃতং নীলঃ শ্বেতঃ শৃঙ্গবানিতি ত্রযো রম্যকহিরণ্মযকুরূণাং বর্ষাণাং মর্যাদাগিরযঃ প্রাগাযতা উভযতঃ ক্ষারোদাবধযো দ্বিসহস্রপৃথব একৈকশঃ পূর্বস্মাত্পূর্বস্মাদুত্তর উত্তরো দশাংশাধিকাংশেন দৈর্ঘ্য এব হ্রসন্তি ॥ ৮ ॥

এবং দক্ষিণেনেলাবৃতং নিষধো হেমকূটো হিমালয ইতি প্রাগাযতা যথা
নীলাদযোঽযুতযোজনোত্সেধা হরিবর্ষকিম্পুরুষভারতানাং যথাসঙ্খ্যম্ ॥ ৯ ॥

তথৈবেলাবৃতমপরেণ পূর্বেণ চ মাল্যবদ্গন্ধমাদনাবানীলনিষধাযতৌ দ্বিসহস্রং পপ্রথতুঃ কেতুমালভদ্রাশ্বযোঃ সীমানং বিদধাতে ॥ ১০ ॥

মন্দরো মেরুমন্দরঃ সুপার্শ্বঃ কুমুদ ইত্যযুতযোজনবিস্তারোন্নাহা মেরোশ্চতুর্দিশমবষ্টম্ভগিরয উপক্লৃপ্তাঃ ॥ ১১ ॥

চতুর্ষ্বেতেষু চূতজম্বূকদম্বন্যগ্রোধাশ্চত্বারঃ পাদপ প্রবরাঃ পর্বতকেতব ইবাধিসহস্রযোজনোন্নাহাস্তাবদ্ বিটপবিততযঃ শতযোজনপরিণাহাঃ ॥ ১২ ॥

হ্রদাশ্চত্বারঃ পযোমধ্বিক্ষুরসমৃষ্টজলা যদুপস্পর্শিন উপদেবগণা যোগৈশ্বর্যাণি স্বাভাবিকানি ভরতর্ষভ ধারযন্তি ॥ ১৩ ॥

দেবোদ্যানানি চ ভবন্তি চত্বারি নন্দনং চৈত্ররথং বৈভ্রাজকং সর্বতোভদ্রমিতি ॥ ১৪ ॥

যেষ্বমর পরিবৃঢাঃ সহ সুরললনাললামযূথপতয উপদেবগণৈরুপগীযমানমহিমানঃ কিল বিহরন্তি ॥ ১৫ ॥

মন্দরোত্সঙ্গ একাদশশতযোজনোত্তুঙ্গদেবচূতশিরসো গিরিশিখরস্থূলানি ফলান্যমৃতকল্পানি পতন্তি ॥ ১৬ ॥

তেষাং বিশীর্যমাণানামতিমধুরসুরভিসুগন্ধি বহুলারুণরসোদেনারুণোদা নাম নদী মন্দরগিরিশিখরান্নিপতন্তী পূর্বেণেলাবৃতমুপপ্লাবযতি ॥ ১৭ ॥

যদুপজোষণাদ্ভবান্যা অনুচরীণাং পুণ্যজনবধূনামবযবস্পর্শসুগন্ধবাতো দশযোজনং সমন্তাদনুবাসযতি ॥ ১৮ ॥

এবং জম্বূফলানামত্যুচ্চনিপাতবিশীর্ণানামনস্থিপ্রাযাণামিভকাযনিভানাং রসেন জম্বূ নাম নদী মেরুমন্দরশিখরাদযুতযোজনাদবনিতলে নিপতন্তী দক্ষিণেনাত্মানং যাবদিলাবৃতমুপস্যন্দযতি ॥ ১৯ ॥

তাবদুভযোরপি রোধসোর্যা মৃত্তিকা তদ্রসেনানুবিধ্যমানা বায্বর্কসংযোগবিপাকেন সদামরলোকাভরণং জাম্বূনদং নাম সুবর্ণং ভবতি ॥ ২০ ॥

যদু হ বাব বিবুধাদযঃ সহ যুবতিভির্মুকুটকটককটিসূত্রাদ্যাভরণরূপেণ খলু ধারযন্তি ॥ ২১ ॥

যস্তু মহাকদম্বঃ সুপার্শ্বনিরূঢো যাস্তস্য কোটরেভ্যো বিনিঃসৃতাঃ পঞ্চাযামপরিণাহাঃ পঞ্চ মধুধারাঃ সুপার্শ্বশিখরাত্পতন্ত্যোঽপরেণাত্মানমিলাবৃতমনুমোদযন্তি ॥ ২২ ॥

যা হ্যুপযুঞ্জানানাং মুখনির্বাসিতো বাযুঃ সমন্তাচ্ছতযোজনমনুবাসযতি ॥ ২৩ ॥

এবং কুমুদনিরূঢো যঃ শতবল্শো নাম বটস্তস্য স্কন্ধেভ্যো নীচীনাঃ পযোদধিমধুঘৃতগুডান্নাদ্যম্বরশয্যাসনাভরণাদযঃ সর্ব এব কামদুঘা নদাঃ কুমুদাগ্রাত্পতন্তস্তমুত্তরেণেলাবৃতমুপযোজযন্তি ॥ ২৪ ॥

যানুপজুষাণানাং ন কদাচিদপি প্রজানাং বলীপলিতক্লমস্বেদদৌর্গন্ধ্যজরামযমৃত্যুশীতোষ্ণবৈবর্ণ্যোপসর্গাদযস্তাপবিশেষা ভবন্তি যাবজ্জীবং সুখং নিরতিশযমেব ॥ ২৫ ॥

কুরঙ্গকুররকুসুম্ভবৈকঙ্কত্রিকূটশিশিরপতঙ্গরুচকনিষধশিনীবাসকপিলশঙ্খবৈদূর্যজারুধিহংসঋষভনাগকালঞ্জরনারদাদযো বিংশতিগিরযো মেরোঃ কর্ণিকাযা ইব কেসরভূতা মূলদেশে পরিত উপক্লৃপ্তাঃ ॥ ২৬ ॥

জঠরদেবকূটৌ মেরুং পূর্বেণাষ্টাদশযোজনসহস্রমুদগাযতৌ দ্বিসহস্রং পৃথুতুঙ্গৌ ভবতঃ । এবমপরেণ পবনপারিযাত্রৌ দক্ষিণেন কৈলাসকরবীরৌ প্রাগাযতাবেবমুত্তরতস্ত্রিশৃঙ্গমকরাবষ্টভিরেতৈঃ পরিসৃতোঽগ্নিরিব পরিতশ্চকাস্তি কাঞ্চনগিরিঃ ॥ ২৭ ॥

মেরোর্মূর্ধনি ভগবত আত্মযোনের্মধ্যত উপক্লৃপ্তাং পুরীমযুতযোজনসাহস্রীং সমচতুরস্রাং শাতকৌম্ভীং বদন্তি ॥ ২৮ ॥

তামনুপরিতো লোকপালানামষ্টানাং যথাদিশং যথারূপং তুরীযমানেন পুরোঽষ্টাবুপক্লৃপ্তাঃ ॥ ২৯ ॥