শ্রীমদ্ভাগবতম্ ৫.১৯

শ্রীশুক উবাচ
কিম্পুরুষে বর্ষে ভগবন্তমাদিপুরুষং লক্ষ্মণাগ্রজং সীতাভিরামং রামং তচ্চরণসন্নিকর্ষাভিরতঃ পরমভাগবতো হনুমান্ সহ কিম্পুরুষৈরবিরতভক্তিরুপাস্তে ॥ ১ ॥

আর্ষ্টিষেণেন সহ গন্ধর্বৈরনুগীযমানাং পরমকল্যাণীং ভর্তৃভগবত্কথাং সমুপশৃণোতি স্বযং চেদং গাযতি ॥ ২ ॥

ওঁ নমো ভগবতে উত্তমশ্লোকায নম আর্যলক্ষণশীলব্রতায নম উপশিক্ষিতাত্মন উপাসিতলোকায নমঃ সাধুবাদনিকষণায নমো ব্রহ্মণ্যদেবায মহাপুরুষায মহারাজায নম ইতি ॥ ৩ ॥

যত্তদ্বিশুদ্ধানুভবমাত্রমেকং
স্বতেজসা ধ্বস্তগুণব্যবস্থম্ ।
প্রত্যক্প্রশান্তং সুধিযোপলম্ভনং
হ্যনামরূপং নিরহং প্রপদ্যে ॥ ৪ ॥

মর্ত্যাবতারস্ত্বিহ মর্ত্যশিক্ষণং
রক্ষোবধাযৈব ন কেবলং বিভোঃ ।
কুতোঽন্যথা স্যাদ্রমতঃ স্ব আত্মনঃ
সীতাকৃতানি ব্যসনানীশ্বরস্য ॥ ৫ ॥

ন বৈ স আত্মাত্মবতাং সুহৃত্তমঃ
সক্তস্ত্রিলোক্যাং ভগবান্ বাসুদেবঃ ।
ন স্ত্রীকৃতং কশ্মলমশ্নুবীত
ন লক্ষ্মণং চাপি বিহাতুমর্হতি ॥ ৬ ॥

ন জন্ম নূনং মহতো ন সৌভগং
ন বাঙ্ন বুদ্ধির্নাকৃতিস্তোষহেতুঃ ।
তৈর্যদ্বিসৃষ্টানপি নো বনৌকস-
শ্চকার সখ্যে বত লক্ষ্মণাগ্রজঃ ॥ ৭ ॥

সুরোঽসুরো বাপ্যথ বানরো নরঃ
সর্বাত্মনা যঃ সুকৃতজ্ঞমুত্তমম্ ।
ভজেত রামং মনুজাকৃতিং হরিং
য উত্তরাননযত্কোসলান্দিবমিতি ॥ ৮ ॥

ভারতেঽপি বর্ষে ভগবান্নরনারাযণাখ্য আকল্পান্তমুপচিতধর্মজ্ঞানবৈরাগ্যৈশ্বর্যোপশমোপরমাত্মোপলম্ভনমনুগ্রহাযাত্মবতামনুকম্পযা তপোঽব্যক্তগতিশ্চরতি ॥ ৯ ॥

তং ভগবান্নারদো বর্ণাশ্রমবতীভির্ভারতীভিঃ প্রজাভির্ভগবত্প্রোক্তাভ্যাং সাঙ্খ্যযোগাভ্যাং ভগবদনুভাবোপবর্ণনং সাবর্ণেরুপদেক্ষ্যমাণঃ পরমভক্তিভাবেনোপসরতি ইদং চাভিগৃণাতি ॥ ১০ ॥

ওঁ নমো ভগবতে উপশমশীলাযোপরতানাত্ম্যায নমোঽকিঞ্চনবিত্তায ঋষিঋষভায নরনারাযণায পরমহংসপরমগুরবে আত্মারামাধিপতযে নমো নম ইতি ॥ ১১ ॥

গাযতি চেদম্—
কর্তাস্য সর্গাদিষু যো ন বধ্যতে
ন হন্যতে দেহগতোঽপি দৈহিকৈঃ ।
দ্রষ্টুর্ন দৃগ্যস্য গুণৈর্বিদূষ্যতে
তস্মৈ নমোঽসক্তবিবিক্তসাক্ষিণে ॥ ১২ ॥

ইদং হি যোগেশ্বর যোগনৈপুণং
হিরণ্যগর্ভো ভগবাঞ্জগাদ যত্ ।
যদন্তকালে ত্বযি নির্গুণে মনো
ভক্ত্যা দধীতোজ্ঝিতদুষ্কলেবরঃ ॥ ১৩ ॥

যথৈহিকামুষ্মিককামলম্পটঃ
সুতেষু দারেষু ধনেষু চিন্তযন্ ।
শঙ্কেত বিদ্বান্ কুকলেবরাত্যযাদ্
যস্তস্য যত্নঃ শ্রম এব কেবলম্ ॥ ১৪ ॥

তন্নঃ প্রভো ত্বং কুকলেবরার্পিতাং
ত্বন্মাযযাহংমমতামধোক্ষজ ।
ভিন্দ্যাম যেনাশু বযং সুদুর্ভিদাং
বিধেহি যোগং ত্বযি নঃ স্বভাবমিতি ॥ ১৫ ॥

ভারতেঽপ্যস্মিন্বর্ষে সরিচ্ছৈলাঃ সন্তি বহবো মলযো মঙ্গলপ্রস্থো মৈনাকস্ত্রিকূট ঋষভঃ কূটকঃ কোল্লকঃ সহ্যো দেবগিরিঋর্ষ্যমূকঃ শ্রীশৈলো বেঙ্কটো মহেন্দ্রো বারিধারো বিন্ধ্যঃ শুক্তিমানৃক্ষগিরিঃ পারিযাত্রো দ্রোণশ্চিত্রকূটো গোবর্ধনো রৈবতকঃ ককুভো নীলো গোকামুখ ইন্দ্রকীলঃ কামগিরিরিতি চান্যে চ শতসহস্রশঃ শৈলাস্তেষাং নিতম্বপ্রভবা নদা নদ্যশ্চ সন্ত্যসঙ্খ্যাতাঃ ॥ ১৬ ॥

এতাসামপো ভারত্যঃ প্রজা নামভিরেব পুনন্তীনামাত্মনা চোপস্পৃশন্তি ॥ ১৭ ॥

চন্দ্রবসা তাম্রপর্ণী অবটোদা কৃতমালা বৈহাযসী কাবেরী বেণী পযস্বিনী শর্করাবর্তা তুঙ্গভদ্রা কৃষ্ণা বেণ্যা ভীমরথী গোদাবরী নির্বিন্ধ্যা পযোষ্ণী তাপী রেবা সুরসা নর্মদা চর্মণ্বতী সিন্ধুরন্ধঃ শোণশ্চ নদৌ মহানদী বেদস্মৃতিঋর্ষিকুল্যা ত্রিসামা কৌশিকী মন্দাকিনী যমুনা সরস্বতী দৃষদ্বতী গোমতী সরযূ রোধস্বতী সপ্তবতী সুষোমা শতদ্রূশ্চন্দ্রভাগা মরুদ্বৃধা বিতস্তা অসিক্নী বিশ্বেতি মহানদ্যঃ ॥ ১৮ ॥

অস্মিন্নেব বর্ষে পুরুষৈর্লব্ধজন্মভিঃ শুক্ললোহিতকৃষ্ণবর্ণেন স্বারব্ধেন কর্মণা দিব্যমানুষনারকগতযো বহ্ব্যঃ আত্মন আনুপূর্ব্যেণ সর্বা হ্যেব সর্বেষাং বিধীযন্তে যথাবর্ণবিধানমপবর্গশ্চাপি ভবতি ॥ ১৯ ॥

যোঽসৌ ভগবতি সর্বভূতাত্মন্যনাত্ম্যেঽনিরুক্তেঽনিলযনে পরমাত্মনি বাসুদেবেঽনন্যনিমিত্তভক্তিযোগলক্ষণো নানাগতিনিমিত্তাবিদ্যাগ্রন্থিরন্ধনদ্বারেণ যদা হি মহাপুরুষপুরুষপ্রসঙ্গঃ ॥ ২০ ॥

এতদেব হি দেবা গাযন্তি—
অহো অমীষাং কিমকারি শোভনং
প্রসন্ন এষাং স্বিদুত স্বযং হরিঃ ।
যৈর্জন্ম লব্ধং নৃষু ভারতাজিরে
মুকুন্দসেবৌপযিকং স্পৃহা হি নঃ ॥ ২১ ॥

কিং দুষ্করৈর্নঃ ক্রতুভিস্তপোব্রতৈ-
র্দানাদিভির্বা দ্যুজযেন ফল্গুনা ।
ন যত্র নারাযণপাদপঙ্কজ-
স্মৃতিঃ প্রমুষ্টাতিশযেন্দ্রিযোত্সবাত্ ॥ ২২ ॥

কল্পাযুষাং স্থানজযাত্পুনর্ভবাত্
ক্ষণাযুষাং ভারতভূজযো বরম্ ।
ক্ষণেন মর্ত্যেন কৃতং মনস্বিনঃ
সন্ন্যস্য সংযান্ত্যভযং পদং হরেঃ ॥ ২৩ ॥

ন যত্র বৈকুণ্ঠকথাসুধাপগা
ন সাধবো ভাগবতাস্তদাশ্রযাঃ ।
ন যত্র যজ্ঞেশমখা মহোত্সবাঃ
সুরেশলোকোঽপি ন বৈ স সেব্যতাম্ ॥ ২৪ ॥

প্রাপ্তা নৃজাতিং ত্বিহ যে চ জন্তবো
জ্ঞানক্রিযাদ্রব্যকলাপসম্ভৃতাম্ ।
ন বৈ যতেরন্নপুনর্ভবায তে
ভূযো বনৌকা ইব যান্তি বন্ধনম্ ॥ ২৫ ॥

যৈঃ শ্রদ্ধযা বর্হিষি ভাগশো হবি-
র্নিরুপ্তমিষ্টং বিধিমন্ত্রবস্তুতঃ ।
একঃ পৃথঙ্নামভিরাহুতো মুদা
গৃহ্ণাতি পূর্ণঃ স্বযমাশিষাং প্রভুঃ ॥ ২৬ ॥

সত্যং দিশত্যর্থিতমর্থিতো নৃণাং
নৈবার্থদো যত্পুনরর্থিতা যতঃ ।
স্বযং বিধত্তে ভজতামনিচ্ছতা-
মিচ্ছাপিধানং নিজপাদপল্লবম্ ॥ ২৭ ॥

যদ্যত্র নঃ স্বর্গসুখাবশেষিতং
স্বিষ্টস্য সূক্তস্য কৃতস্য শোভনম্ ।
তেনাজনাভে স্মৃতিমজ্জন্ম নঃ স্যাদ্
বর্ষে হরির্যদ্ভজতাং শং তনোতি ॥ ২৮ ॥

শ্রীশুক উবাচ
জম্বূদ্বীপস্য চ রাজন্নুপদ্বীপানষ্টৌ হৈক উপদিশন্তি সগরাত্মজৈরশ্বান্বেষণ ইমাং মহীং পরিতো নিখনদ্ভিরুপকল্পিতান্ ॥ ২৯ ॥

তদ্যথা স্বর্ণপ্রস্থশ্চন্দ্রশুক্ল আবর্তনো রমণকো মন্দরহরিণঃ পাঞ্চজন্যঃ সিংহলো লঙ্কেতি ॥ ৩০ ॥

এবং তব ভারতোত্তম জম্বূদ্বীপবর্ষবিভাগো যথোপদেশমুপবর্ণিত ইতি ॥ ৩১ ॥