শ্ৰীমদ্ভাগৱতম্ ৫.২

শ্ৰীশুক উৱাচ
এৱং পিতৰি সম্প্ৰৱৃত্তে তদনুশাসনে ৱৰ্তমান আগ্নীধ্ৰো জম্বূদ্ৱীপৌকসঃ প্ৰজা ঔৰসৱদ্ধৰ্মাৱেক্ষমাণঃ পৰ্যগোপাযত্ ॥ ১ ॥

স চ কদাচিত্পিতৃলোককামঃ সুৰৱৰৱনিতাক্ৰীডাচলদ্ৰোণ্যাং ভগৱন্তং ৱিশ্ৱসৃজাং পতিমাভৃতপৰিচৰ্যোপকৰণ আত্মৈকাগ্ৰ্যেণ তপস্ৱ্যাৰাধযাং বভূৱ ॥ ২ ॥

তদুপলভ্য ভগৱানাদিপুৰুষঃ সদসি গাযন্তীং পূৰ্ৱচিত্তিং নামাপ্সৰসমভিযাপযামাস ॥ ৩ ॥

সা চ তদাশ্ৰমোপৱনমতিৰমণীযং ৱিৱিধনিবিডৱিটপিৱিটপনিকৰসংশ্লিষ্টপুৰটলতাৰূঢস্থলৱিহঙ্গমমিথুনৈঃ প্ৰোচ্যমানশ্ৰুতিভিঃ প্ৰতিবোধ্যমানসলিলকুক্কুটকাৰণ্ডৱকলহংসাদিভিৰ্ৱিচিত্ৰমুপকূজিতামলজলাশযকমলাকৰমুপবভ্ৰাম ॥ ৪ ॥

তস্যাঃ সুললিতগমনপদৱিন্যাসগতিৱিলাসাযাশ্চানুপদং খণখণাযমানৰুচিৰচৰণাভৰণস্ৱনমুপাকৰ্ণ্য নৰদেৱকুমাৰঃ সমাধিযোগেনামীলিতনযননলিনমুকুলযুগলমীষদ্ৱিকচয্য ৱ্যচষ্ট ॥ ৫ ॥

তামেৱাৱিদূৰে মধুকৰীমিৱ সুমনস উপজিঘ্ৰন্তীং দিৱিজমনুজমনোনযনাহ্লাদদুঘৈৰ্গতিৱিহাৰৱ্ৰীডাৱিনযাৱলোকসুস্ৱৰাক্ষৰাৱযৱৈৰ্মনসি নৃণাং কুসুমাযুধস্য ৱিদধতীং ৱিৱৰং নিজমুখ ৱিগলিতামৃতাসৱসহাসভাষণামোদমদান্ধমধুকৰনিকৰোপৰোধেন দ্ৰুতপদৱিন্যাসেন ৱল্গুস্পন্দনস্তনকলশকবৰভাৰৰশনাং দেৱীং তদৱলোকনেন ৱিৱৃতাৱসৰস্য ভগৱতো মকৰধ্ৱজস্য ৱশমুপনীতো জডৱদিতি হোৱাচ ॥ ৬ ॥

কা ত্ৱং চিকীৰ্ষসি চ কিং মুনিৱৰ্য শৈলে
মাযাসি কাপি ভগৱত্পৰদেৱতাযাঃ । ৱিজ্যে বিভৰ্ষি ধনুষী সুহৃদাত্মনোঽৰ্থেকিং ৱা মৃগান্মৃগযসে ৱিপিনে প্ৰমত্তান্ ॥ ৭ ॥

বাণাৱিমৌ ভগৱতঃ শতপত্ৰপত্ৰৌশান্তাৱপুঙ্খৰুচিৰাৱতিতিগ্মদন্তৌ । কস্মৈ যুযুঙ্ক্ষসি ৱনে ৱিচৰন্ন ৱিদ্মঃক্ষেমায নো জডধিযাং তৱ ৱিক্ৰমোঽস্তু ॥ ৮ ॥

শিষ্যা ইমে ভগৱতঃ পৰিতঃ পঠন্তিগাযন্তি সাম সৰহস্যমজস্ৰমীশম্ । যুষ্মচ্ছিখাৱিলুলিতাঃ সুমনোঽভিৱৃষ্টীঃসৰ্ৱে ভজন্ত্যৃষিগণা ইৱ ৱেদশাখাঃ ॥ ৯ ॥

ৱাচং পৰং চৰণপঞ্জৰতিত্তিৰীণাংব্ৰহ্মন্নৰূপমুখৰাং শৃণৱাম তুভ্যম্ । লব্ধা কদম্বৰুচিৰঙ্কৱিটঙ্কবিম্বেযস্যামলাতপৰিধিঃ ক্ৱ চ ৱল্কলং তে ॥ ১০ ॥

কিং সম্ভৃতং ৰুচিৰযোৰ্দ্ৱিজ শৃঙ্গযোস্তেমধ্যে কৃশো ৱহসি যত্ৰ দৃশিঃ শ্ৰিতা মে । পঙ্কোঽৰুণঃ সুৰভীৰাত্মৱিষাণ ঈদৃগ্যেনাশ্ৰমং সুভগ মে সুৰভীকৰোষি ॥ ১১ ॥

লোকং প্ৰদৰ্শয সুহৃত্তম তাৱকং মেযত্ৰত্য ইত্থমুৰসাৱযৱাৱপূৰ্ৱৌ । অস্মদ্ৱিধস্য মনউন্নযনৌ বিভৰ্তিবহ্ৱদ্ভুতং সৰসৰাসসুধাদি ৱক্ত্ৰে ॥ ১২ ॥

কা ৱাঽঽত্মৱৃত্তিৰদনাদ্ধৱিৰঙ্গ ৱাতিৱিষ্ণোঃ কলাস্যনিমিষোন্মকৰৌ চ কৰ্ণৌ । উদ্ৱিগ্নমীনযুগলং দ্ৱিজপঙ্ক্তিশোচি-ৰাসন্নভৃঙ্গনিকৰং সৰ ইন্মুখং তে ॥ ১৩ ॥

যোঽসৌ ত্ৱযা কৰসৰোজহতঃ পতঙ্গোদিক্ষু ভ্ৰমন্ ভ্ৰমত এজযতেঽক্ষিণী মে । মুক্তং ন তে স্মৰসি ৱক্ৰজটাৱৰূথংকষ্টোঽনিলো হৰতি লম্পট এষ নীৱীম্ ॥ ১৪ ॥

ৰূপং তপোধন তপশ্চৰতাং তপোঘ্নংহ্যেতত্তু কেন তপসা ভৱতোপলব্ধম্ । চৰ্তুং তপোঽৰ্হসি মযা সহ মিত্ৰ মহ্যংকিং ৱা প্ৰসীদতি স ৱৈ ভৱভাৱনো মে ॥ ১৫ ॥

ন ত্ৱাং ত্যজামি দযিতং দ্ৱিজদেৱদত্তংযস্মিন্মনো দৃগপি নো ন ৱিযাতি লগ্নম্ । মাং চাৰুশৃঙ্গ্যৰ্হসি নেতুমনুৱ্ৰতং তেচিত্তং যতঃ প্ৰতিসৰন্তু শিৱাঃ সচিৱ্যঃ ॥ ১৬ ॥

শ্ৰীশুক উৱাচ
ইতি ললনানুনযাতিৱিশাৰদো গ্ৰাম্যৱৈদগ্ধ্যযা পৰিভাষযা তাং ৱিবুধৱধূং ৱিবুধমতিৰধিসভাজযামাস ॥ ১৭ ॥

সা চ ততস্তস্য ৱীৰযূথপতেৰ্বুদ্ধিশীলৰূপৱযঃশ্ৰিযৌদাৰ্যেণ পৰাক্ষিপ্তমনাস্তেন সহাযুতাযুতপৰিৱত্সৰোপলক্ষণং কালং জম্বূদ্ৱীপপতিনা ভৌমস্ৱৰ্গভোগান্ বুভুজে ॥ ১৮ ॥

তস্যামু হ ৱা আত্মজান্ স ৰাজৱৰ আগ্নীধ্ৰো নাভিকিম্পুৰুষহৰিৱৰ্ষেলাৱৃতৰম্যকহিৰণ্মযকুৰুভদ্ৰাশ্ৱকেতুমালসংজ্ঞান্নৱ পুত্ৰানজনযত্ ॥ ১৯ ॥

সা সূত্ৱাথ সুতান্নৱানুৱত্সৰং গৃহ এৱাপহায পূৰ্ৱচিত্তিৰ্ভূয এৱাজং দেৱমুপতস্থে ॥ ২০ ॥

আগ্নীধ্ৰসুতাস্তে মাতুৰনুগ্ৰহাদৌত্পত্তিকেনৈৱ সংহননবলোপেতাঃ পিত্ৰা ৱিভক্তা আত্মতুল্যনামানি যথাভাগং জম্বূদ্ৱীপৱৰ্ষাণি বুভুজুঃ ॥ ২১ ॥

আগ্নীধ্ৰো ৰাজাতৃপ্তঃ কামানামপ্সৰসমেৱানুদিনমধিমন্যমানস্তস্যাঃ সলোকতাং শ্ৰুতিভিৰৱাৰুন্ধ যত্ৰ পিতৰো মাদযন্তে ॥ ২২ ॥

সম্পৰেতে পিতৰি নৱ ভ্ৰাতৰো মেৰুদুহিতৃৰ্মেৰুদেৱীং প্ৰতিৰূপামুগ্ৰদংষ্ট্ৰীং লতাং ৰম্যাং শ্যামাং নাৰীং ভদ্ৰাং দেৱৱীতিমিতিসংজ্ঞা নৱোদৱহন্ ॥ ২৩ ॥