শ্রীমদ্ভাগবতম্ ৫.২৬

রাজোবাচ
মহর্ষ এতদ্বৈচিত্র্যং লোকস্য কথমিতি ॥ ১ ॥

ঋষিরুবাচ
ত্রিগুণত্বাত্কর্তুঃ শ্রদ্ধযা কর্মগতযঃ পৃথগ্বিধাঃ সর্বা এব সর্বস্য তারতম্যেন ভবন্তি ॥ ২ ॥

অথেদানীং প্রতিষিদ্ধলক্ষণস্যাধর্মস্য তথৈব কর্তুঃ শ্রদ্ধাযা বৈসাদৃশ্যাত্কর্মফলং বিসদৃশং ভবতি যা হ্যনাদ্যবিদ্যযা কৃতকামানাং তত্পরিণামলক্ষণাঃ সৃতযঃ সহস্রশঃ প্রবৃত্তাস্তাসাং প্রাচুর্যেণানুবর্ণযিষ্যামঃ ॥ ৩ ॥

রাজোবাচ
নরকা নাম ভগবন্কিং দেশবিশেষা অথবা বহিস্ত্রিলোক্যা আহোস্বিদন্তরাল ইতি ॥ ৪ ॥

ঋষিরুবাচ
অন্তরাল এব ত্রিজগত্যাস্তু দিশি দক্ষিণস্যামধস্তাদ্ভূমেরুপরিষ্টাচ্চ জলাদ্যস্যামগ্নিষ্বাত্তাদযঃ পিতৃগণা দিশি স্বানাং গোত্রাণাং পরমেণ সমাধিনা সত্যা এবাশিষ আশাসানা নিবসন্তি ॥ ৫ ॥

যত্র হ বাব ভগবান্ পিতৃরাজো বৈবস্বতঃ স্ববিষযং প্রাপিতেষু স্বপুরুষৈর্জন্তুষু সম্পরেতেষু যথাকর্মাবদ্যং দোষমেবানুল্লঙ্ঘিতভগবচ্ছাসনঃ সগণো দমং ধারযতি ॥ ৬ ॥

তত্র হৈকে নরকানেকবিংশতিং গণযন্তি অথ তাংস্তে রাজন্নামরূপলক্ষণতোঽনুক্রমিষ্যামস্তামিস্রোঽন্ধতামিস্রো রৌরবো মহারৌরবঃ কুম্ভীপাকঃ কালসূত্রমসিপত্রবনং সূকরমুখমন্ধকূপঃ কৃমিভোজনঃ সন্দংশস্তপ্তসূর্মির্বজ্রকণ্টকশাল্মলী বৈতরণী পূযোদঃ প্রাণরোধো বিশসনং লালাভক্ষঃ সারমেযাদনমবীচিরযঃপানমিতি । কিঞ্চ ক্ষারকর্দমো রক্ষোগণভোজনঃ শূলপ্রোতো দন্দশূকোঽবটনিরোধনঃ পর্যাবর্তনঃ সূচীমুখমিত্যষ্টাবিংশতির্নরকা বিবিধযাতনাভূমযঃ ॥ ৭ ॥

তত্র যস্তু পরবিত্তাপত্যকলত্রাণ্যপহরতি স হি কালপাশবদ্ধো যমপুরুষৈরতিভযানকৈস্তামিস্রে নরকে বলান্নিপাত্যতে অনশনানুদপানদণ্ডতাডনসন্তর্জনাদিভির্যাতনাভির্যাত্যমানো জন্তুর্যত্র কশ্মলমাসাদিত একদৈব মূর্চ্ছামুপযাতি তামিস্রপ্রাযে ॥ ৮ ॥

এবমেবান্ধতামিস্রে যস্তু বঞ্চযিত্বা পুরুষং দারাদীনুপযুঙ্ক্তে যত্র শরীরী নিপাত্যমানো যাতনাস্থো বেদনযা নষ্টমতির্নষ্টদৃষ্টিশ্চ ভবতি যথা বনস্পতির্বৃশ্চ্যমানমূলস্তস্মাদন্ধতামিস্রং তমুপদিশন্তি ॥ ৯ ॥

যস্ত্বিহ বা এতদহমিতি মমেদমিতি ভূতদ্রোহেণ কেবলং স্বকুটুম্বমেবানুদিনং প্রপুষ্ণাতি স তদিহ বিহায স্বযমেব তদশুভেন রৌরবে নিপততি ॥ ১০ ॥

যে ত্বিহ যথৈবামুনা বিহিংসিতা জন্তবঃ পরত্র যমযাতনামুপগতং ত এব রুরবো ভূত্বা তথা তমেব বিহিংসন্তি তস্মাদ্রৌরবমিত্যাহূ রুরুরিতি সর্পাদতিক্রূরসত্ত্বস্যাপদেশঃ ॥ ১১ ॥

এবমেব মহারৌরবো যত্র নিপতিতং পুরুষং ক্রব্যাদা নাম রুরবস্তং ক্রব্যেণ ঘাতযন্তি যঃ কেবলং দেহম্ভরঃ ॥ ১২ ॥

যস্ত্বিহ বা উগ্রঃ পশূন্ পক্ষিণো বা প্রাণত উপরন্ধযতি তমপকরুণং পুরুষাদৈরপি বিগর্হিতমমুত্র যমানুচরাঃ কুম্ভীপাকে তপ্ততৈলে উপরন্ধযন্তি ॥ ১৩ ॥

যস্ত্বিহ ব্রহ্মধ্রুক স কালসূত্রসংজ্ঞকে নরকে অযুতযোজনপরিমণ্ডলে তাম্রমযে তপ্তখলে উপর্যধস্তাদগ্ন্যর্কাভ্যামতিতপ্যমানেঽভিনিবেশিতঃ ক্ষুত্পিপাসাভ্যাং চ দহ্যমানান্তর্বহিঃশরীর আস্তে শেতে চেষ্টতেঽবতিষ্ঠতি পরিধাবতি চ যাবন্তি পশুরোমাণি তাবদ্বর্ষসহস্রাণি ॥ ১৪ ॥

যস্ত্বিহ বৈ নিজবেদপথাদনাপদ্যপগতঃ পাখণ্ডং চোপগতস্তমসিপত্রবনং প্রবেশ্য কশযা প্রহরন্তি তত্র হাসাবিতস্ততো ধাবমান উভযতোধারৈস্তালবনাসিপত্রৈশ্ছিদ্যমানসর্বাঙ্গো হা হতোঽস্মীতি পরমযা বেদনযা মূর্চ্ছিতঃ পদে পদে নিপততি স্বধর্মহা পাখণ্ডানুগতং ফলং ভুঙ্ক্তে ॥ ১৫ ॥

যস্ত্বিহ বৈ রাজা রাজপুরুষো বা অদণ্ড্যে দণ্ডং প্রণযতি ব্রাহ্মণে বা শরীরদণ্ডং স পাপীযান্নরকেঽমুত্র সূকরমুখে নিপততি তত্রাতিবলৈর্বিনিষ্পিষ্যমাণাবযবো যথৈবেহেক্ষুখণ্ড আর্তস্বরেণ স্বনযন্ ক্বচিন্মূর্চ্ছিতঃ কশ্মলমুপগতো যথৈবেহাদৃষ্টদোষা উপরুদ্ধাঃ ॥ ১৬ ॥

যস্ত্বিহ বৈ ভূতানামীশ্বরোপকল্পিতবৃত্তীনামবিবিক্তপরব্যথানাং স্বযং পুরুষোপকল্পিতবৃত্তির্বিবিক্তপরব্যথো ব্যথামাচরতি স পরত্রান্ধকূপে তদভিদ্রোহেণ নিপততি তত্র হাসৌ তৈর্জন্তুভিঃ পশুমৃগপক্ষিসরীসৃপৈর্মশকযূকামত্কুণমক্ষিকাদিভির্যে কে চাভিদ্রুগ্ধাস্তৈঃ সর্বতোঽভিদ্রুহ্যমাণস্তমসি বিহতনিদ্রানির্বৃতিরলব্ধাবস্থানঃ পরিক্রামতি যথা কুশরীরে জীবঃ ॥ ১৭ ॥

যস্ত্বিহ বা অসংবিভজ্যাশ্নাতি যত্কিঞ্চনোপনতমনির্মিতপঞ্চযজ্ঞো বাযসসংস্তুতঃ স পরত্র কৃমিভোজনে নরকাধমে নিপততি তত্র শতসহস্রযোজনে কৃমিকুণ্ডে কৃমিভূতঃ স্বযং কৃমিভিরেব ভক্ষ্যমাণঃ কৃমিভোজনো যাবত্তদপ্রত্তাপ্রহূতাদোঽনির্বেশমাত্মানং যাতযতে ॥ ১৮ ॥

যস্ত্বিহ বৈ স্তেযেন বলাদ্বা হিরণ্যরত্নাদীনি ব্রাহ্মণস্য বাপহরত্যন্যস্য বানাপদি পুরুষস্তমমুত্র রাজন্ যমপুরুষা অযস্মযৈরগ্নিপিণ্ডৈঃ সন্দংশৈস্ত্বচি নিষ্কুষন্তি ॥ ১৯ ॥

যস্ত্বিহ বা অগম্যাং স্ত্রিযমগম্যং বা পুরুষং যোষিদভিগচ্ছতি তাবমুত্র কশযা তাডযন্তস্তিগ্মযা সূর্ম্যা লোহময্যা পুরুষমালিঙ্গযন্তি স্ত্রিযং চ পুরুষরূপযা সূর্ম্যা ॥ ২০ ॥

যস্ত্বিহ বৈ সর্বাভিগমস্তমমুত্র নিরযে বর্তমানং বজ্রকণ্টকশাল্মলীমারোপ্য নিষ্কর্ষন্তি ॥ ২১ ॥

যে ত্বিহ বৈ রাজন্যা রাজপুরুষা বা অপাখণ্ডা ধর্মসেতূন্ ভিন্দন্তি তে সম্পরেত্য বৈতরণ্যাং নিপতন্তি ভিন্নমর্যাদাস্তস্যাং নিরযপরিখাভূতাযাং নদ্যাং যাদোগণৈরিতস্ততো ভক্ষ্যমাণা আত্মনা ন বিযুজ্যমানাশ্চাসুভিরুহ্যমানাঃ স্বাঘেন কর্মপাকমনুস্মরন্তো বিণ্মূত্রপূযশোণিতকেশনখাস্থিমেদোমাংসবসাবাহিন্যামুপতপ্যন্তে ॥ ২২ ॥

যে ত্বিহ বৈ বৃষলীপতযো নষ্টশৌচাচারনিযমাস্ত্যক্তলজ্জাঃ পশুচর্যাং চরন্তি তে চাপি প্রেত্য পূযবিণ্মূত্রশ্লেষ্মমলাপূর্ণার্ণবে নিপতন্তি তদেবাতিবীভত্সিতমশ্নন্তি ॥ ২৩ ॥

যে ত্বিহ বৈ শ্বগর্দভপতযো ব্রাহ্মণাদযো মৃগযাবিহারা অতীর্থে চ মৃগান্নিঘ্নন্তি তানপি সম্পরেতাঁল্লক্ষ্যভূতান্ যমপুরুষা ইষুভির্বিধ্যন্তি ॥ ২৪ ॥

যে ত্বিহ বৈ দাম্ভিকা দম্ভযজ্ঞেষু পশূন্ বিশসন্তি তানমুষ্মিঁল্লোকে বৈশসে নরকে পতিতান্নিরযপতযো যাতযিত্বা বিশসন্তি ॥ ২৫ ॥

যস্ত্বিহ বৈ সবর্ণাং ভার্যাং দ্বিজো রেতঃ পাযযতি কামমোহিতস্তং পাপকৃতমমুত্র রেতঃকুল্যাযাং পাতযিত্বা রেতঃ সম্পাযযন্তি ॥ ২৬ ॥

যে ত্বিহ বৈ দস্যবোঽগ্নিদা গরদা গ্রামান্ সার্থান্ বা বিলুম্পন্তি রাজানো রাজভটা বা তাংশ্চাপি হি পরেত্য যমদূতা বজ্রদংষ্ট্রাঃ শ্বানঃ সপ্তশতানি বিংশতিশ্চ সরভসং খাদন্তি ॥ ২৭ ॥

যস্ত্বিহ বা অনৃতং বদতি সাক্ষ্যে দ্রব্যবিনিমযে দানে বা কথঞ্চিত্স বৈ প্রেত্য নরকেঽবীচিমত্যধঃশিরা নিরবকাশে যোজনশতোচ্ছ্রাযাদ্ গিরিমূর্ধ্নঃ সম্পাত্যতে যত্র জলমিব স্থলমশ্মপৃষ্ঠমবভাসতে তদবীচিমত্তিলশো বিশীর্যমাণশরীরো ন ম্রিযমাণঃ পুনরারোপিতো নিপততি ॥ ২৮ ॥

যস্ত্বিহ বৈ বিপ্রো রাজন্যো বৈশ্যো বা সোমপীথস্তত্কলত্রং বা সুরাং ব্রতস্থোঽপি বা পিবতি প্রমাদতস্তেষাং নিরযং নীতানামুরসি পদাঽঽক্রম্যাস্যে বহ্নিনা দ্রবমাণং কার্ষ্ণাযসং নিষিঞ্চন্তি ॥ ২৯ ॥

অথ চ যস্ত্বিহ বা আত্মসম্ভাবনেন স্বযমধমো জন্মতপোবিদ্যাচারবর্ণাশ্রমবতো বরীযসো ন বহু মন্যেত স মৃতক এব মৃত্বা ক্ষারকর্দমে নিরযেঽবাক্শিরা নিপাতিতো দুরন্তা যাতনা হ্যশ্নুতে ॥ ৩০ ॥

যে ত্বিহ বৈ পুরুষাঃ পুরুষমেধেন যজন্তে যাশ্চ স্ত্রিযো নৃপশূন্খাদন্তি তাংশ্চ তে পশব ইব নিহতা যমসদনে যাতযন্তো রক্ষোগণাঃ সৌনিকা ইব স্বধিতিনাবদাযাসৃক্পিবন্তি নৃত্যন্তি চ গাযন্তি চ হৃষ্যমাণা যথেহ পুরুষাদাঃ ॥ ৩১ ॥

যে ত্বিহ বা অনাগসোঽরণ্যে গ্রামে বা বৈশ্রম্ভকৈরুপসৃতানুপবিশ্রম্ভয্য জিজীবিষূন্ শূলসূত্রাদিষূপপ্রোতান্ক্রীডনকতযা যাতযন্তি তেঽপি চ প্রেত্য যমযাতনাসু শূলাদিষু প্রোতাত্মানঃ ক্ষুত্তৃড্ভ্যাং চাভিহতাঃ কঙ্কবটাদিভিশ্চেতস্ততস্তিগ্মতুণ্ডৈরাহন্যমানা আত্মশমলং স্মরন্তি ॥ ৩২ ॥

যে ত্বিহ বৈ ভূতান্যুদ্বেজযন্তি নরা উল্বণস্বভাবা যথা দন্দশূকাস্তেঽপি প্রেত্য নরকে দন্দশূকাখ্যে নিপতন্তি যত্র নৃপ দন্দশূকাঃ পঞ্চমুখাঃ সপ্তমুখা উপসৃত্য গ্রসন্তি যথা বিলেশযান্ ॥ ৩৩ ॥

যে ত্বিহ বা অন্ধাবটকুসূলগুহাদিষু ভূতানি নিরুন্ধন্তি তথামুত্র তেষ্বেবোপবেশ্য সগরেণ বহ্নিনা ধূমেন নিরুন্ধন্তি ॥ ৩৪ ॥

যস্ত্বিহ বা অতিথীনভ্যাগতান্ বা গৃহপতিরসকৃদুপগতমন্যুর্দিধক্ষুরিব পাপেন চক্ষুষা নিরীক্ষতে তস্য চাপি নিরযে পাপদৃষ্টেরক্ষিণী বজ্রতুণ্ডা গৃধ্রাঃ কঙ্ককাকবটাদযঃ প্রসহ্যোরু- বলাদুত্পাটযন্তি ॥ ৩৫ ॥

যস্ত্বিহ বা আঢ্যাভিমতিরহঙ্কৃতিস্তির্যক্প্রেক্ষণঃ সর্বতোঽভিবিশঙ্কী অর্থব্যযনাশচিন্তযা পরিশুষ্যমাণহৃদযবদনো নির্বৃতিমনবগতো গ্রহ ইবার্থমভিরক্ষতি স চাপি প্রেত্য তদুত্পাদনোত্কর্ষণসংরক্ষণশমলগ্রহঃ সূচীমুখে নরকে নিপততি যত্র হ বিত্তগ্রহং পাপপুরুষং ধর্মরাজপুরুষা বাযকা ইব সর্বতোঽঙ্গেষু সূত্রৈঃ পরিবযন্তি ॥ ৩৬ ॥

এবংবিধা নরকা যমালযে সন্তি শতশঃ সহস্রশস্তেষু সর্বেষু চ সর্ব এবাধর্মবর্তিনো যে কেচিদিহোদিতা অনুদিতাশ্চাবনিপতে পর্যাযেণ বিশন্তি তথৈব ধর্মানুবর্তিন ইতরত্র ইহ তু পুনর্ভবে ত উভযশেষাভ্যাং নিবিশন্তি ॥ ৩৭ ॥

নিবৃত্তিলক্ষণমার্গ আদাবেব ব্যাখ্যাতঃ । এতাবানেবাণ্ডকোশো যশ্চতুর্দশধা পুরাণেষু বিকল্পিত উপগীযতে যত্তদ্ভগবতো নারাযণস্য সাক্ষান্মহাপুরুষস্য স্থবিষ্ঠং রূপমাত্মমাযাগুণমযমনুবর্ণিতমাদৃতঃ পঠতি শৃণোতি শ্রাবযতি স উপগেযং ভগবতঃ পরমাত্মনোঽগ্রাহ্যমপি শ্রদ্ধাভক্তিবিশুদ্ধবুদ্ধির্বেদ ॥ ৩৮ ॥

শ্রুত্বা স্থূলং তথা সূক্ষ্মং রূপং ভগবতো যতিঃ ।
স্থূলে নির্জিতমাত্মানং শনৈঃ সূক্ষ্মং ধিযা নযেদিতি ॥ ৩৯ ॥

ভূদ্বীপবর্ষসরিদদ্রিনভঃসমুদ্র-
পাতালদিঙ্নরকভাগণলোকসংস্থা ।
গীতা মযা তব নৃপাদ্ভুতমীশ্বরস্য
স্থূলং বপুঃ সকলজীবনিকাযধাম ॥ ৪০ ॥