শ্রীমদ্ভাগবতম্ ৫.৪

শ্রীশুক উবাচ
অথ হ তমুত্পত্ত্যৈবাভিব্যজ্যমানভগবল্লক্ষণং সাম্যোপশমবৈরাগ্যৈশ্বর্যমহাবিভূতিভিরনুদিনমেধমানানুভাবং প্রকৃতযঃ প্রজা ব্রাহ্মণা দেবতাশ্চাবনিতলসমবনাযাতিতরাং জগৃধুঃ ॥ ১ ॥

তস্য হ বা ইত্থং বর্ষ্মণা বরীযসা বৃহচ্ছ্লোকেন চৌজসা বলেন শ্রিযা যশসা বীর্যশৌর্যাভ্যাং চ পিতা ঋষভ ইতীদং নাম চকার ॥ ২ ॥

যস্য হীন্দ্রঃ স্পর্ধমানো ভগবান্ বর্ষে ন ববর্ষ তদবধার্য ভগবানৃষভদেবো যোগেশ্বরঃ প্রহস্যাত্মযোগমাযযা স্ববর্ষমজনাভং নামাভ্যবর্ষত্ ॥ ৩ ॥

নাভিস্তু যথাভিলষিতং সুপ্রজস্ত্বমবরুধ্যাতিপ্রমোদভরবিহ্বলো গদ্গদাক্ষরযা গিরা স্বৈরং গৃহীত নরলোকসধর্মং ভগবন্তং পুরাণপুরুষং মাযাবিলসিতমতির্বত্স তাতেতি সানুরাগমুপলালযন্ পরাং নির্বৃতিমুপগতঃ ॥ ৪ ॥

বিদিতানুরাগমাপৌরপ্রকৃতি জনপদো রাজা নাভিরাত্মজং সমযসেতুরক্ষাযামভিষিচ্য ব্রাহ্মণেষূপনিধায সহ মেরুদেব্যা বিশালাযাং প্রসন্ননিপুণেন তপসা সমাধিযোগেন নরনারাযণাখ্যং ভগবন্তং বাসুদেবমুপাসীনঃ কালেন তন্মহিমানমবাপ ॥ ৫ ॥

যস্য হ পাণ্ডবেয শ্লোকাবুদাহরন্তি—
কো নু তত্কর্ম রাজর্ষের্নাভেরন্বাচরেত্পুমান্ ।
অপত্যতামগাদ্যস্য হরিঃ শুদ্ধেন কর্মণা ॥ ৬ ॥

ব্রহ্মণ্যোঽন্যঃ কুতো নাভের্বিপ্রা মঙ্গলপূজিতাঃ ।
যস্য বর্হিষি যজ্ঞেশং দর্শযামাসুরোজসা ॥ ৭ ॥

অথ হ ভগবানৃষভদেবঃ স্ববর্ষং কর্মক্ষেত্রমনুমন্যমানঃ প্রদর্শিতগুরুকুলবাসো লব্ধবরৈর্গুরুভিরনুজ্ঞাতো গৃহমেধিনাং ধর্মাননুশিক্ষমাণো জযন্ত্যামিন্দ্রদত্তাযামুভযলক্ষণং কর্ম সমাম্নাযাম্নাতমভিযুঞ্জন্নাত্মজানামাত্মসমানানাং শতং জনযামাস ॥ ৮ ॥

যেষাং খলু মহাযোগী ভরতো জ্যেষ্ঠঃ শ্রেষ্ঠগুণ আসীদ্যেনেদং বর্ষং ভারতমিতি ব্যপদিশন্তি ॥ ৯ ॥

তমনু কুশাবর্ত ইলাবর্তো ব্রহ্মাবর্তো মলযঃ কেতুর্ভদ্রসেন ইন্দ্রস্পৃগ্বিদর্ভঃ কীকট ইতি নব নবতি প্রধানাঃ ॥ ১০ ॥

কবির্হবিরন্তরিক্ষঃ প্রবুদ্ধঃ পিপ্পলাযনঃ ।
আবির্হোত্রোঽথ দ্রুমিলশ্চমসঃ করভাজনঃ ॥ ১১ ॥

ইতি ভাগবতধর্মদর্শনা নব মহাভাগবতাস্তেষাং সুচরিতং ভগবন্মহিমোপবৃংহিতং বসুদেবনারদসংবাদমুপশমাযনমুপরিষ্টাদ্বর্ণযিষ্যামঃ ॥ ১২ ॥

যবীযাংস একাশীতির্জাযন্তেযাঃ পিতুরাদেশকরা মহাশালীনা মহাশ্রোত্রিযা যজ্ঞশীলাঃ কর্মবিশুদ্ধা ব্রাহ্মণা বভূবুঃ ॥ ১৩ ॥

ভগবানৃষভসংজ্ঞ আত্মতন্ত্রঃ স্বযং নিত্যনিবৃত্তানর্থপরম্পরঃ কেবলানন্দানুভব ঈশ্বর এব বিপরীতবত্কর্মাণ্যারভমাণঃ কালেনানুগতং ধর্মমাচরণেনোপশিক্ষযন্নতদ্বিদাং সম উপশান্তো মৈত্রঃ কারুণিকো ধর্মার্থযশঃ প্রজানন্দামৃতাবরোধেন গৃহেষু লোকং নিযমযত্ ॥ ১৪ ॥

যদ্যচ্ছীর্ষণ্যাচরিতং তত্তদনুবর্ততে লোকঃ ॥ ১৫ ॥

যদ্যপি স্ববিদিতং সকলধর্মং ব্রাহ্মং গুহ্যং ব্রাহ্মণৈর্দর্শিতমার্গেণ সামাদিভিরুপাযৈর্জনতামনুশশাস ॥ ১৬ ॥

দ্রব্যদেশকালবযঃশ্রদ্ধর্ত্বিগ্বিবিধোদ্দেশোপচিতৈঃ সর্বৈরপি ক্রতুভির্যথোপদেশং শতকৃত্ব ইযাজ ॥ ১৭ ॥

ভগবতর্ষভেণ পরিরক্ষ্যমাণ এতস্মিন্ বর্ষে ন কশ্চন পুরুষো বাঞ্ছত্যবিদ্যমানমিবাত্মনোঽন্যস্মাত্কথঞ্চন কিমপি কর্হিচিদবেক্ষতে ভর্তর্যনুসবনং বিজৃম্ভিতস্নেহাতিশযমন্তরেণ ॥ ১৮ ॥

স কদাচিদটমানো ভগবানৃষভো ব্রহ্মাবর্তগতো ব্রহ্মর্ষিপ্রবরসভাযাং প্রজানাং নিশামযন্তীনামাত্মজানবহিতাত্মনঃ প্রশ্রযপ্রণযভরসুযন্ত্রিতানপ্যুপশিক্ষযন্নিতি হোবাচ ॥ ১৯ ॥