শ্রীমদ্ভাগবতম্ ৬.১৪

শ্রীপরীক্ষিদুবাচ
রজস্তমঃস্বভাবস্য ব্রহ্মন্ বৃত্রস্য পাপ্মনঃ ।
নারাযণে ভগবতি কথমাসীদ্ দৃঢা মতিঃ ॥ ১ ॥

দেবানাং শুদ্ধসত্ত্বানামৃষীণাং চামলাত্মনাম্ ।
ভক্তির্মুকুন্দচরণে ন প্রাযেণোপজাযতে ॥ ২ ॥

রজোভিঃ সমসঙ্খ্যাতাঃ পার্থিবৈরিহ জন্তবঃ ।
তেষাং যে কেচনেহন্তে শ্রেযো বৈ মনুজাদযঃ ॥ ৩ ॥

প্রাযো মুমুক্ষবস্তেষাং কেচনৈব দ্বিজোত্তম ।
মুমুক্ষূণাং সহস্রেষু কশ্চিন্মুচ্যেত সিধ্যতি ॥ ৪ ॥

মুক্তানামপি সিদ্ধানাং নারাযণপরাযণঃ ।
সুদুর্লভঃ প্রশান্তাত্মা কোটিষ্বপি মহামুনে ॥ ৫ ॥

বৃত্রস্তু স কথং পাপঃ সর্বলোকোপতাপনঃ ।
ইত্থং দৃঢমতিঃ কৃষ্ণ আসীত্সঙ্গ্রাম উল্বণে ॥ ৬ ॥

অত্র নঃ সংশযো ভূযাঞ্ছ্রোতুং কৌতূহলং প্রভো ।
যঃ পৌরুষেণ সমরে সহস্রাক্ষমতোষযত্ ॥ ৭ ॥

শ্রীসূত উবাচ
পরীক্ষিতোঽথ সম্প্রশ্নং ভগবান্ বাদরাযণিঃ ।
নিশম্য শ্রদ্দধানস্য প্রতিনন্দ্য বচোঽব্রবীত্ ॥ ৮ ॥

শ্রীশুক উবাচ
শৃণুষ্বাবহিতো রাজন্নিতিহাসমিমং যথা ।
শ্রুতং দ্বৈপাযনমুখান্নারদাদ্দেবলাদপি ॥ ৯ ॥

আসীদ্রাজা সার্বভৌমঃ শূরসেনেষু বৈ নৃপ ।
চিত্রকেতুরিতি খ্যাতো যস্যাসীত্কামধুঙ্মহী ॥ ১০ ॥

তস্য ভার্যাসহস্রাণাং সহস্রাণি দশাভবন্ ।
সান্তানিকশ্চাপি নৃপো ন লেভে তাসু সন্ততিম্ ॥ ১১ ॥

রূপৌদার্যবযোজন্মবিদ্যৈশ্বর্যশ্রিযাদিভিঃ ।
সম্পন্নস্য গুণৈঃ সর্বৈশ্চিন্তা বন্ধ্যাপতেরভূত্ ॥ ১২ ॥

ন তস্য সম্পদঃ সর্বা মহিষ্যো বামলোচনাঃ ।
সার্বভৌমস্য ভূশ্চেযমভবন্প্রীতিহেতবঃ ॥ ১৩ ॥

তস্যৈকদা তু ভবনমঙ্গিরা ভগবানৃষিঃ ।
লোকাননুচরন্নেতানুপাগচ্ছদ্যদৃচ্ছযা ॥ ১৪ ॥

তং পূজযিত্বা বিধিবত্প্রত্যুত্থানার্হণাদিভিঃ ।
কৃতাতিথ্যমুপাসীদত্সুখাসীনং সমাহিতঃ ॥ ১৫ ॥

মহর্ষিস্তমুপাসীনং প্রশ্রযাবনতং ক্ষিতৌ ।
প্রতিপূজ্য মহারাজ সমাভাষ্যেদমব্রবীত্ ॥ ১৬ ॥

অঙ্গিরা উবাচ
অপি তেঽনামযং স্বস্তি প্রকৃতীনাং তথাত্মনঃ ।
যথা প্রকৃতিভির্গুপ্তঃ পুমান্ রাজা চ সপ্তভিঃ ॥ ১৭ ॥

আত্মানং প্রকৃতিষ্বদ্ধা নিধায শ্রেয আপ্নুযাত্ ।
রাজ্ঞা তথা প্রকৃতযো নরদেবাহিতাধযঃ ॥ ১৮ ॥

অপি দারাঃ প্রজামাত্যা ভৃত্যাঃ শ্রেণ্যোঽথ মন্ত্রিণঃ ।
পৌরা জানপদা ভূপা আত্মজা বশবর্তিনঃ ॥ ১৯ ॥

যস্যাত্মানুবশশ্চেত্স্যাত্সর্বে তদ্বশগা ইমে ।
লোকাঃ সপালা যচ্ছন্তি সর্বে বলিমতন্দ্রিতাঃ ॥ ২০ ॥

আত্মনঃ প্রীযতে নাত্মা পরতঃ স্বত এব বা ।
লক্ষযেঽলব্ধকামং ত্বাং চিন্তযা শবলং মুখম্ ॥ ২১ ॥

এবং বিকল্পিতো রাজন্ বিদুষা মুনিনাপি সঃ ।
প্রশ্রযাবনতোঽভ্যাহ প্রজাকামস্ততো মুনিম্ ॥ ২২ ॥

চিত্রকেতুরুবাচ
ভগবন্ কিং ন বিদিতং তপোজ্ঞানসমাধিভিঃ ।
যোগিনাং ধ্বস্তপাপানাং বহিরন্তঃ শরীরিষু ॥ ২৩ ॥

তথাপি পৃচ্ছতো ব্রূযাং ব্রহ্মন্নাত্মনি চিন্তিতম্ ।
ভবতো বিদুষশ্চাপি চোদিতস্ত্বদনুজ্ঞযা ॥ ২৪ ॥

লোকপালৈরপি প্রার্থ্যাঃ সাম্রাজ্যৈশ্বর্যসম্পদঃ ।
ন নন্দযন্ত্যপ্রজং মাং ক্ষুত্তৃট্কামমিবাপরে ॥ ২৫ ॥

ততঃ পাহি মহাভাগ পূর্বৈঃ সহ গতং তমঃ ।
যথা তরেম দুষ্পারং প্রজযা তদ্বিধেহি নঃ ॥ ২৬ ॥

শ্রীশুক উবাচ
ইত্যর্থিতঃ স ভগবান্ কৃপালুর্ব্রহ্মণঃ সুতঃ ।
শ্রপযিত্বা চরুং ত্বাষ্ট্রং ত্বষ্টারমযজদ্বিভুঃ ॥ ২৭ ॥

জ্যেষ্ঠা শ্রেষ্ঠা চ যা রাজ্ঞো মহিষীণাং চ
ভারত ।
নাম্না কৃতদ্যুতিস্তস্যৈ যজ্ঞোচ্ছিষ্টমদাদ্ দ্বিজঃ ॥ ২৮ ॥

অথাহ নৃপতিং রাজন্ ভবিতৈকস্তবাত্মজঃ ।
হর্ষশোকপ্রদস্তুভ্যমিতি
ব্রহ্মসুতো যযৌ ॥ ২৯ ॥

সাপি তত্প্রাশনাদেব চিত্রকেতোরধারযত্ ।
গর্ভং কৃতদ্যুতির্দেবী কৃত্তিকাগ্নেরিবাত্মজম্ ॥ ৩০ ॥

তস্যা অনুদিনং গর্ভঃ শুক্লপক্ষ ইবোডুপঃ ।
ববৃধে শূরসেনেশতেজসা শনকৈর্নৃপ ॥ ৩১ ॥

অথ কাল উপাবৃত্তে কুমারঃ সমজাযত ।
জনযন্ শূরসেনানাং শৃণ্বতাং পরমাং মুদম্ ॥ ৩২ ॥

হৃষ্টো রাজা কুমারস্য স্নাতঃ শুচিরলঙ্কৃতঃ ।
বাচযিত্বাশিষো বিপ্রৈঃ কারযামাস জাতকম্ ॥ ৩৩ ॥

তেভ্যো হিরণ্যং রজতং বাসাংস্যাভরণানি চ ।
গ্রামান্ হযান্ গজান্ প্রাদাদ্ ধেনূনামর্বুদানি ষট্ ॥ ৩৪ ॥

ববর্ষ কামানন্যেষাং পর্জন্য ইব দেহিনাম্ ।
ধন্যং যশস্যমাযুষ্যং কুমারস্য মহামনাঃ ॥ ৩৫ ॥

কৃচ্ছ্রলব্ধেঽথ রাজর্ষেস্তনযেঽনুদিনং পিতুঃ ।
যথা নিঃস্বস্য কৃচ্ছ্রাপ্তে ধনে স্নেহোঽন্ববর্ধত ॥ ৩৬ ॥

মাতুস্ত্বতিতরাং পুত্রে স্নেহো মোহসমুদ্ভবঃ ।
কৃতদ্যুতেঃ সপত্নীনাং প্রজাকামজ্বরোঽভবত্ ॥ ৩৭ ॥

চিত্রকেতোরতিপ্রীতির্যথা দারে প্রজাবতি ।
ন তথান্যেষু সঞ্জজ্ঞে বালং লালযতোঽন্বহম্ ॥ ৩৮ ॥

তাঃ পর্যতপ্যন্নাত্মানং গর্হযন্ত্যোঽভ্যসূযযা ।
আনপত্যেন দুঃখেন রাজ্ঞশ্চানাদরেণ চ ॥ ৩৯ ॥

ধিগপ্রজাং স্ত্রিযং পাপাং পত্যুশ্চাগৃহসম্মতাম্ ।
সুপ্রজাভিঃ সপত্নীভির্দাসীমিব তিরস্কৃতাম্ ॥ ৪০ ॥

দাসীনাং কো নু সন্তাপঃ স্বামিনঃ পরিচর্যযা ।
অভীক্ষ্ণং লব্ধমানানাং দাস্যা দাসীব দুর্ভগাঃ ॥ ৪১ ॥

এবং সন্দহ্যমানানাং সপত্ন্যাঃ পুত্রসম্পদা ।
রাজ্ঞোঽসম্মতবৃত্তীনাং বিদ্বেষো বলবানভূত্ ॥ ৪২ ॥

বিদ্বেষনষ্টমতযঃ স্ত্রিযো দারুণচেতসঃ ।
গরং দদুঃ কুমারায দুর্মর্ষা নৃপতিং প্রতি ॥ ৪৩ ॥

কৃতদ্যুতিরজানন্তী সপত্নীনামঘং মহত্ ।
সুপ্ত এবেতি সঞ্চিন্ত্য নিরীক্ষ্য ব্যচরদ্গৃহে ॥ ৪৪ ॥

শযানং সুচিরং বালমুপধার্য মনীষিণী ।
পুত্রমানয মে ভদ্রে ইতি ধাত্রীমচোদযত্ ॥ ৪৫ ॥

সা শযানমুপব্রজ্য দৃষ্ট্বা চোত্তারলোচনম্ ।
প্রাণেন্দ্রিযাত্মভিস্ত্যক্তং হতাস্মীত্যপতদ্ভুবি ॥ ৪৬ ॥

তস্যাস্তদাকর্ণ্য ভৃশাতুরং স্বরং
ঘ্নন্ত্যাঃ করাভ্যামুর উচ্চকৈরপি ।
প্রবিশ্য রাজ্ঞী ত্বরযাত্মজান্তিকং
দদর্শ বালং সহসা মৃতং সুতম্ ॥ ৪৭ ॥

পপাত ভূমৌ পরিবৃদ্ধযা শুচা
মুমোহ বিভ্রষ্টশিরোরুহাম্বরা ॥ ৪৮ ॥

ততো নৃপান্তঃ পুরবর্তিনো জনা
নরাশ্চ নার্যশ্চ নিশম্য রোদনম্ ।
আগত্য তুল্যব্যসনাঃ সুদুঃখিতা-
স্তাশ্চ ব্যলীকং রুরুদুঃ কৃতাগসঃ ॥ ৪৯ ॥

শ্রুত্বা মৃতং পুত্রমলক্ষিতান্তকং
বিনষ্টদৃষ্টিঃ প্রপতন্ স্খলন্ পথি ।
স্নেহানুবন্ধৈধিতযা শুচা ভৃশং
বিমূর্চ্ছিতোঽনুপ্রকৃতির্দ্বিজৈর্বৃতঃ ॥ ৫০ ॥

পপাত বালস্য স পাদমূলে
মৃতস্য বিস্রস্তশিরোরুহাম্বরঃ ।
দীর্ঘং শ্বসন্ বাষ্পকলোপরোধতো
নিরুদ্ধকণ্ঠো ন শশাক ভাষিতুম্ ॥ ৫১ ॥

পতিং নিরীক্ষ্যোরুশুচার্পিতং তদা
মৃতং চ বালং সুতমেকসন্ততিম্ ।
জনস্য রাজ্ঞী প্রকৃতেশ্চ হৃদ্রুজং
সতী দধানা বিললাপ চিত্রধা ॥ ৫২ ॥

স্তনদ্বযং কুঙ্কুমপঙ্কমণ্ডিতং
নিষিঞ্চতী সাঞ্জনবাষ্পবিন্দুভিঃ ।
বিকীর্য কেশান্ বিগলত্স্রজঃ সুতং
শুশোচ চিত্রং কুররীব সুস্বরম্ ॥ ৫৩ ॥

অহো বিধাতস্ত্বমতীব বালিশো
যস্ত্বাত্মসৃষ্ট্যপ্রতিরূপমীহসে ।
পরে নু জীবত্যপরস্য যা মৃতি-
র্বিপর্যযশ্চেত্ত্বমসি ধ্রুবঃ পরঃ ॥ ৫৪ ॥

ন হি ক্রমশ্চেদিহ মৃত্যুজন্মনোঃ
শরীরিণামস্তু তদাত্মকর্মভিঃ ।
যঃ স্নেহপাশো নিজসর্গবৃদ্ধযে
স্বযং কৃতস্তে তমিমং বিবৃশ্চসি ॥ ৫৫ ॥

ত্বং তাত নার্হসি চ মাং কৃপণামনাথাং
ত্যক্তুং বিচক্ষ্ব পিতরং তব শোকতপ্তম্ ।
অঞ্জস্তরেম ভবতাপ্রজদুস্তরং যদ্
ধ্বান্তং ন যাহ্যকরুণেন যমেন দূরম্ ॥ ৫৬ ॥

উত্তিষ্ঠ তাত ত ইমে শিশবো বযস্যা-
স্ত্বামাহ্বযন্তি নৃপনন্দন সংবিহর্তুম্ ।
সুপ্তশ্চিরং হ্যশনযা চ ভবান্ পরীতো
ভুঙ্ক্ষ্ব স্তনং পিব শুচো হর নঃ স্বকানাম্ ॥ ৫৭ ॥

নাহং তনূজ দদৃশে হতমঙ্গলা তে
মুগ্ধস্মিতং মুদিতবীক্ষণমাননাব্জম্ ।
কিং বা গতোঽস্যপুনরন্বযমন্যলোকং
নীতোঽঘৃণেন ন শৃণোমি কলা গিরস্তে ॥ ৫৮ ॥

শ্রীশুক উবাচ
বিলপন্ত্যা মৃতং পুত্রমিতি চিত্রবিলাপনৈঃ ।
চিত্রকেতুর্ভৃশং তপ্তো মুক্তকণ্ঠো রুরোদ হ ॥ ৫৯ ॥

তযোর্বিলপতোঃ সর্বে দম্পত্যোস্তদনুব্রতাঃ ।
রুরুদুঃ স্ম নরা নার্যঃ সর্বমাসীদচেতনম্ ॥ ৬০ ॥

এবং কশ্মলমাপন্নং নষ্টসংজ্ঞমনাযকম্ ।
জ্ঞাত্বাঙ্গিরা নাম ঋষিরাজগাম সনারদঃ ॥ ৬১ ॥