ଶ୍ରୀମଦ୍ଭାଗଵତମ୍ ୬.୧୪

ଶ୍ରୀପରୀକ୍ଷିଦୁଵାଚ
ରଜସ୍ତମଃସ୍ଵଭାଵସ୍ଯ ବ୍ରହ୍ମନ୍ ଵୃତ୍ରସ୍ଯ ପାପ୍ମନଃ ।
ନାରାଯଣେ ଭଗଵତି କଥମାସୀଦ୍ ଦୃଢା ମତିଃ ॥ ୧ ॥

ଦେଵାନାଂ ଶୁଦ୍ଧସତ୍ତ୍ଵାନାମୃଷୀଣାଂ ଚାମଲାତ୍ମନାମ୍ ।
ଭକ୍ତିର୍ମୁକୁନ୍ଦଚରଣେ ନ ପ୍ରାଯେଣୋପଜାଯତେ ॥ ୨ ॥

ରଜୋଭିଃ ସମସଙ୍ଖ୍ଯାତାଃ ପାର୍ଥିଵୈରିହ ଜନ୍ତଵଃ ।
ତେଷାଂ ଯେ କେଚନେହନ୍ତେ ଶ୍ରେଯୋ ଵୈ ମନୁଜାଦଯଃ ॥ ୩ ॥

ପ୍ରାଯୋ ମୁମୁକ୍ଷଵସ୍ତେଷାଂ କେଚନୈଵ ଦ୍ଵିଜୋତ୍ତମ ।
ମୁମୁକ୍ଷୂଣାଂ ସହସ୍ରେଷୁ କଶ୍ଚିନ୍ମୁଚ୍ଯେତ ସିଧ୍ଯତି ॥ ୪ ॥

ମୁକ୍ତାନାମପି ସିଦ୍ଧାନାଂ ନାରାଯଣପରାଯଣଃ ।
ସୁଦୁର୍ଲଭଃ ପ୍ରଶାନ୍ତାତ୍ମା କୋଟିଷ୍ଵପି ମହାମୁନେ ॥ ୫ ॥

ଵୃତ୍ରସ୍ତୁ ସ କଥଂ ପାପଃ ସର୍ଵଲୋକୋପତାପନଃ ।
ଇତ୍ଥଂ ଦୃଢମତିଃ କୃଷ୍ଣ ଆସୀତ୍ସଙ୍ଗ୍ରାମ ଉଲ୍ବଣେ ॥ ୬ ॥

ଅତ୍ର ନଃ ସଂଶଯୋ ଭୂଯାଞ୍ଛ୍ରୋତୁଂ କୌତୂହଲଂ ପ୍ରଭୋ ।
ଯଃ ପୌରୁଷେଣ ସମରେ ସହସ୍ରାକ୍ଷମତୋଷଯତ୍ ॥ ୭ ॥

ଶ୍ରୀସୂତ ଉଵାଚ
ପରୀକ୍ଷିତୋଽଥ ସମ୍ପ୍ରଶ୍ନଂ ଭଗଵାନ୍ ବାଦରାଯଣିଃ ।
ନିଶମ୍ଯ ଶ୍ରଦ୍ଦଧାନସ୍ଯ ପ୍ରତିନନ୍ଦ୍ଯ ଵଚୋଽବ୍ରଵୀତ୍ ॥ ୮ ॥

ଶ୍ରୀଶୁକ ଉଵାଚ
ଶୃଣୁଷ୍ଵାଵହିତୋ ରାଜନ୍ନିତିହାସମିମଂ ଯଥା ।
ଶ୍ରୁତଂ ଦ୍ଵୈପାଯନମୁଖାନ୍ନାରଦାଦ୍ଦେଵଲାଦପି ॥ ୯ ॥

ଆସୀଦ୍ରାଜା ସାର୍ଵଭୌମଃ ଶୂରସେନେଷୁ ଵୈ ନୃପ ।
ଚିତ୍ରକେତୁରିତି ଖ୍ଯାତୋ ଯସ୍ଯାସୀତ୍କାମଧୁଙ୍ମହୀ ॥ ୧୦ ॥

ତସ୍ଯ ଭାର୍ଯାସହସ୍ରାଣାଂ ସହସ୍ରାଣି ଦଶାଭଵନ୍ ।
ସାନ୍ତାନିକଶ୍ଚାପି ନୃପୋ ନ ଲେଭେ ତାସୁ ସନ୍ତତିମ୍ ॥ ୧୧ ॥

ରୂପୌଦାର୍ଯଵଯୋଜନ୍ମଵିଦ୍ଯୈଶ୍ଵର୍ଯଶ୍ରିଯାଦିଭିଃ ।
ସମ୍ପନ୍ନସ୍ଯ ଗୁଣୈଃ ସର୍ଵୈଶ୍ଚିନ୍ତା ବନ୍ଧ୍ଯାପତେରଭୂତ୍ ॥ ୧୨ ॥

ନ ତସ୍ଯ ସମ୍ପଦଃ ସର୍ଵା ମହିଷ୍ଯୋ ଵାମଲୋଚନାଃ ।
ସାର୍ଵଭୌମସ୍ଯ ଭୂଶ୍ଚେଯମଭଵନ୍ପ୍ରୀତିହେତଵଃ ॥ ୧୩ ॥

ତସ୍ଯୈକଦା ତୁ ଭଵନମଙ୍ଗିରା ଭଗଵାନୃଷିଃ ।
ଲୋକାନନୁଚରନ୍ନେତାନୁପାଗଚ୍ଛଦ୍ଯଦୃଚ୍ଛଯା ॥ ୧୪ ॥

ତଂ ପୂଜଯିତ୍ଵା ଵିଧିଵତ୍ପ୍ରତ୍ଯୁତ୍ଥାନାର୍ହଣାଦିଭିଃ ।
କୃତାତିଥ୍ଯମୁପାସୀଦତ୍ସୁଖାସୀନଂ ସମାହିତଃ ॥ ୧୫ ॥

ମହର୍ଷିସ୍ତମୁପାସୀନଂ ପ୍ରଶ୍ରଯାଵନତଂ କ୍ଷିତୌ ।
ପ୍ରତିପୂଜ୍ଯ ମହାରାଜ ସମାଭାଷ୍ଯେଦମବ୍ରଵୀତ୍ ॥ ୧୬ ॥

ଅଙ୍ଗିରା ଉଵାଚ
ଅପି ତେଽନାମଯଂ ସ୍ଵସ୍ତି ପ୍ରକୃତୀନାଂ ତଥାତ୍ମନଃ ।
ଯଥା ପ୍ରକୃତିଭିର୍ଗୁପ୍ତଃ ପୁମାନ୍ ରାଜା ଚ ସପ୍ତଭିଃ ॥ ୧୭ ॥

ଆତ୍ମାନଂ ପ୍ରକୃତିଷ୍ଵଦ୍ଧା ନିଧାଯ ଶ୍ରେଯ ଆପ୍ନୁଯାତ୍ ।
ରାଜ୍ଞା ତଥା ପ୍ରକୃତଯୋ ନରଦେଵାହିତାଧଯଃ ॥ ୧୮ ॥

ଅପି ଦାରାଃ ପ୍ରଜାମାତ୍ଯା ଭୃତ୍ଯାଃ ଶ୍ରେଣ୍ଯୋଽଥ ମନ୍ତ୍ରିଣଃ ।
ପୌରା ଜାନପଦା ଭୂପା ଆତ୍ମଜା ଵଶଵର୍ତିନଃ ॥ ୧୯ ॥

ଯସ୍ଯାତ୍ମାନୁଵଶଶ୍ଚେତ୍ସ୍ଯାତ୍ସର୍ଵେ ତଦ୍ଵଶଗା ଇମେ ।
ଲୋକାଃ ସପାଲା ଯଚ୍ଛନ୍ତି ସର୍ଵେ ବଲିମତନ୍ଦ୍ରିତାଃ ॥ ୨୦ ॥

ଆତ୍ମନଃ ପ୍ରୀଯତେ ନାତ୍ମା ପରତଃ ସ୍ଵତ ଏଵ ଵା ।
ଲକ୍ଷଯେଽଲବ୍ଧକାମଂ ତ୍ଵାଂ ଚିନ୍ତଯା ଶବଲଂ ମୁଖମ୍ ॥ ୨୧ ॥

ଏଵଂ ଵିକଲ୍ପିତୋ ରାଜନ୍ ଵିଦୁଷା ମୁନିନାପି ସଃ ।
ପ୍ରଶ୍ରଯାଵନତୋଽଭ୍ଯାହ ପ୍ରଜାକାମସ୍ତତୋ ମୁନିମ୍ ॥ ୨୨ ॥

ଚିତ୍ରକେତୁରୁଵାଚ
ଭଗଵନ୍ କିଂ ନ ଵିଦିତଂ ତପୋଜ୍ଞାନସମାଧିଭିଃ ।
ଯୋଗିନାଂ ଧ୍ଵସ୍ତପାପାନାଂ ବହିରନ୍ତଃ ଶରୀରିଷୁ ॥ ୨୩ ॥

ତଥାପି ପୃଚ୍ଛତୋ ବ୍ରୂଯାଂ ବ୍ରହ୍ମନ୍ନାତ୍ମନି ଚିନ୍ତିତମ୍ ।
ଭଵତୋ ଵିଦୁଷଶ୍ଚାପି ଚୋଦିତସ୍ତ୍ଵଦନୁଜ୍ଞଯା ॥ ୨୪ ॥

ଲୋକପାଲୈରପି ପ୍ରାର୍ଥ୍ଯାଃ ସାମ୍ରାଜ୍ଯୈଶ୍ଵର୍ଯସମ୍ପଦଃ ।
ନ ନନ୍ଦଯନ୍ତ୍ଯପ୍ରଜଂ ମାଂ କ୍ଷୁତ୍ତୃଟ୍କାମମିଵାପରେ ॥ ୨୫ ॥

ତତଃ ପାହି ମହାଭାଗ ପୂର୍ଵୈଃ ସହ ଗତଂ ତମଃ ।
ଯଥା ତରେମ ଦୁଷ୍ପାରଂ ପ୍ରଜଯା ତଦ୍ଵିଧେହି ନଃ ॥ ୨୬ ॥

ଶ୍ରୀଶୁକ ଉଵାଚ
ଇତ୍ଯର୍ଥିତଃ ସ ଭଗଵାନ୍ କୃପାଲୁର୍ବ୍ରହ୍ମଣଃ ସୁତଃ ।
ଶ୍ରପଯିତ୍ଵା ଚରୁଂ ତ୍ଵାଷ୍ଟ୍ରଂ ତ୍ଵଷ୍ଟାରମଯଜଦ୍ଵିଭୁଃ ॥ ୨୭ ॥

ଜ୍ଯେଷ୍ଠା ଶ୍ରେଷ୍ଠା ଚ ଯା ରାଜ୍ଞୋ ମହିଷୀଣାଂ ଚ
ଭାରତ ।
ନାମ୍ନା କୃତଦ୍ଯୁତିସ୍ତସ୍ଯୈ ଯଜ୍ଞୋଚ୍ଛିଷ୍ଟମଦାଦ୍ ଦ୍ଵିଜଃ ॥ ୨୮ ॥

ଅଥାହ ନୃପତିଂ ରାଜନ୍ ଭଵିତୈକସ୍ତଵାତ୍ମଜଃ ।
ହର୍ଷଶୋକପ୍ରଦସ୍ତୁଭ୍ଯମିତି
ବ୍ରହ୍ମସୁତୋ ଯଯୌ ॥ ୨୯ ॥

ସାପି ତତ୍ପ୍ରାଶନାଦେଵ ଚିତ୍ରକେତୋରଧାରଯତ୍ ।
ଗର୍ଭଂ କୃତଦ୍ଯୁତିର୍ଦେଵୀ କୃତ୍ତିକାଗ୍ନେରିଵାତ୍ମଜମ୍ ॥ ୩୦ ॥

ତସ୍ଯା ଅନୁଦିନଂ ଗର୍ଭଃ ଶୁକ୍ଲପକ୍ଷ ଇଵୋଡୁପଃ ।
ଵଵୃଧେ ଶୂରସେନେଶତେଜସା ଶନକୈର୍ନୃପ ॥ ୩୧ ॥

ଅଥ କାଲ ଉପାଵୃତ୍ତେ କୁମାରଃ ସମଜାଯତ ।
ଜନଯନ୍ ଶୂରସେନାନାଂ ଶୃଣ୍ଵତାଂ ପରମାଂ ମୁଦମ୍ ॥ ୩୨ ॥

ହୃଷ୍ଟୋ ରାଜା କୁମାରସ୍ଯ ସ୍ନାତଃ ଶୁଚିରଲଙ୍କୃତଃ ।
ଵାଚଯିତ୍ଵାଶିଷୋ ଵିପ୍ରୈଃ କାରଯାମାସ ଜାତକମ୍ ॥ ୩୩ ॥

ତେଭ୍ଯୋ ହିରଣ୍ଯଂ ରଜତଂ ଵାସାଂସ୍ଯାଭରଣାନି ଚ ।
ଗ୍ରାମାନ୍ ହଯାନ୍ ଗଜାନ୍ ପ୍ରାଦାଦ୍ ଧେନୂନାମର୍ବୁଦାନି ଷଟ୍ ॥ ୩୪ ॥

ଵଵର୍ଷ କାମାନନ୍ଯେଷାଂ ପର୍ଜନ୍ଯ ଇଵ ଦେହିନାମ୍ ।
ଧନ୍ଯଂ ଯଶସ୍ଯମାଯୁଷ୍ଯଂ କୁମାରସ୍ଯ ମହାମନାଃ ॥ ୩୫ ॥

କୃଚ୍ଛ୍ରଲବ୍ଧେଽଥ ରାଜର୍ଷେସ୍ତନଯେଽନୁଦିନଂ ପିତୁଃ ।
ଯଥା ନିଃସ୍ଵସ୍ଯ କୃଚ୍ଛ୍ରାପ୍ତେ ଧନେ ସ୍ନେହୋଽନ୍ଵଵର୍ଧତ ॥ ୩୬ ॥

ମାତୁସ୍ତ୍ଵତିତରାଂ ପୁତ୍ରେ ସ୍ନେହୋ ମୋହସମୁଦ୍ଭଵଃ ।
କୃତଦ୍ଯୁତେଃ ସପତ୍ନୀନାଂ ପ୍ରଜାକାମଜ୍ଵରୋଽଭଵତ୍ ॥ ୩୭ ॥

ଚିତ୍ରକେତୋରତିପ୍ରୀତିର୍ଯଥା ଦାରେ ପ୍ରଜାଵତି ।
ନ ତଥାନ୍ଯେଷୁ ସଞ୍ଜଜ୍ଞେ ବାଲଂ ଲାଲଯତୋଽନ୍ଵହମ୍ ॥ ୩୮ ॥

ତାଃ ପର୍ଯତପ୍ଯନ୍ନାତ୍ମାନଂ ଗର୍ହଯନ୍ତ୍ଯୋଽଭ୍ଯସୂଯଯା ।
ଆନପତ୍ଯେନ ଦୁଃଖେନ ରାଜ୍ଞଶ୍ଚାନାଦରେଣ ଚ ॥ ୩୯ ॥

ଧିଗପ୍ରଜାଂ ସ୍ତ୍ରିଯଂ ପାପାଂ ପତ୍ଯୁଶ୍ଚାଗୃହସମ୍ମତାମ୍ ।
ସୁପ୍ରଜାଭିଃ ସପତ୍ନୀଭିର୍ଦାସୀମିଵ ତିରସ୍କୃତାମ୍ ॥ ୪୦ ॥

ଦାସୀନାଂ କୋ ନୁ ସନ୍ତାପଃ ସ୍ଵାମିନଃ ପରିଚର୍ଯଯା ।
ଅଭୀକ୍ଷ୍ଣଂ ଲବ୍ଧମାନାନାଂ ଦାସ୍ଯା ଦାସୀଵ ଦୁର୍ଭଗାଃ ॥ ୪୧ ॥

ଏଵଂ ସନ୍ଦହ୍ଯମାନାନାଂ ସପତ୍ନ୍ଯାଃ ପୁତ୍ରସମ୍ପଦା ।
ରାଜ୍ଞୋଽସମ୍ମତଵୃତ୍ତୀନାଂ ଵିଦ୍ଵେଷୋ ବଲଵାନଭୂତ୍ ॥ ୪୨ ॥

ଵିଦ୍ଵେଷନଷ୍ଟମତଯଃ ସ୍ତ୍ରିଯୋ ଦାରୁଣଚେତସଃ ।
ଗରଂ ଦଦୁଃ କୁମାରାଯ ଦୁର୍ମର୍ଷା ନୃପତିଂ ପ୍ରତି ॥ ୪୩ ॥

କୃତଦ୍ଯୁତିରଜାନନ୍ତୀ ସପତ୍ନୀନାମଘଂ ମହତ୍ ।
ସୁପ୍ତ ଏଵେତି ସଞ୍ଚିନ୍ତ୍ଯ ନିରୀକ୍ଷ୍ଯ ଵ୍ଯଚରଦ୍ଗୃହେ ॥ ୪୪ ॥

ଶଯାନଂ ସୁଚିରଂ ବାଲମୁପଧାର୍ଯ ମନୀଷିଣୀ ।
ପୁତ୍ରମାନଯ ମେ ଭଦ୍ରେ ଇତି ଧାତ୍ରୀମଚୋଦଯତ୍ ॥ ୪୫ ॥

ସା ଶଯାନମୁପଵ୍ରଜ୍ଯ ଦୃଷ୍ଟ୍ଵା ଚୋତ୍ତାରଲୋଚନମ୍ ।
ପ୍ରାଣେନ୍ଦ୍ରିଯାତ୍ମଭିସ୍ତ୍ଯକ୍ତଂ ହତାସ୍ମୀତ୍ଯପତଦ୍ଭୁଵି ॥ ୪୬ ॥

ତସ୍ଯାସ୍ତଦାକର୍ଣ୍ଯ ଭୃଶାତୁରଂ ସ୍ଵରଂ
ଘ୍ନନ୍ତ୍ଯାଃ କରାଭ୍ଯାମୁର ଉଚ୍ଚକୈରପି ।
ପ୍ରଵିଶ୍ଯ ରାଜ୍ଞୀ ତ୍ଵରଯାତ୍ମଜାନ୍ତିକଂ
ଦଦର୍ଶ ବାଲଂ ସହସା ମୃତଂ ସୁତମ୍ ॥ ୪୭ ॥

ପପାତ ଭୂମୌ ପରିଵୃଦ୍ଧଯା ଶୁଚା
ମୁମୋହ ଵିଭ୍ରଷ୍ଟଶିରୋରୁହାମ୍ବରା ॥ ୪୮ ॥

ତତୋ ନୃପାନ୍ତଃ ପୁରଵର୍ତିନୋ ଜନା
ନରାଶ୍ଚ ନାର୍ଯଶ୍ଚ ନିଶମ୍ଯ ରୋଦନମ୍ ।
ଆଗତ୍ଯ ତୁଲ୍ଯଵ୍ଯସନାଃ ସୁଦୁଃଖିତା-
ସ୍ତାଶ୍ଚ ଵ୍ଯଲୀକଂ ରୁରୁଦୁଃ କୃତାଗସଃ ॥ ୪୯ ॥

ଶ୍ରୁତ୍ଵା ମୃତଂ ପୁତ୍ରମଲକ୍ଷିତାନ୍ତକଂ
ଵିନଷ୍ଟଦୃଷ୍ଟିଃ ପ୍ରପତନ୍ ସ୍ଖଲନ୍ ପଥି ।
ସ୍ନେହାନୁବନ୍ଧୈଧିତଯା ଶୁଚା ଭୃଶଂ
ଵିମୂର୍ଚ୍ଛିତୋଽନୁପ୍ରକୃତିର୍ଦ୍ଵିଜୈର୍ଵୃତଃ ॥ ୫୦ ॥

ପପାତ ବାଲସ୍ଯ ସ ପାଦମୂଲେ
ମୃତସ୍ଯ ଵିସ୍ରସ୍ତଶିରୋରୁହାମ୍ବରଃ ।
ଦୀର୍ଘଂ ଶ୍ଵସନ୍ ବାଷ୍ପକଲୋପରୋଧତୋ
ନିରୁଦ୍ଧକଣ୍ଠୋ ନ ଶଶାକ ଭାଷିତୁମ୍ ॥ ୫୧ ॥

ପତିଂ ନିରୀକ୍ଷ୍ଯୋରୁଶୁଚାର୍ପିତଂ ତଦା
ମୃତଂ ଚ ବାଲଂ ସୁତମେକସନ୍ତତିମ୍ ।
ଜନସ୍ଯ ରାଜ୍ଞୀ ପ୍ରକୃତେଶ୍ଚ ହୃଦ୍ରୁଜଂ
ସତୀ ଦଧାନା ଵିଲଲାପ ଚିତ୍ରଧା ॥ ୫୨ ॥

ସ୍ତନଦ୍ଵଯଂ କୁଙ୍କୁମପଙ୍କମଣ୍ଡିତଂ
ନିଷିଞ୍ଚତୀ ସାଞ୍ଜନବାଷ୍ପବିନ୍ଦୁଭିଃ ।
ଵିକୀର୍ଯ କେଶାନ୍ ଵିଗଲତ୍ସ୍ରଜଃ ସୁତଂ
ଶୁଶୋଚ ଚିତ୍ରଂ କୁରରୀଵ ସୁସ୍ଵରମ୍ ॥ ୫୩ ॥

ଅହୋ ଵିଧାତସ୍ତ୍ଵମତୀଵ ବାଲିଶୋ
ଯସ୍ତ୍ଵାତ୍ମସୃଷ୍ଟ୍ଯପ୍ରତିରୂପମୀହସେ ।
ପରେ ନୁ ଜୀଵତ୍ଯପରସ୍ଯ ଯା ମୃତି-
ର୍ଵିପର୍ଯଯଶ୍ଚେତ୍ତ୍ଵମସି ଧ୍ରୁଵଃ ପରଃ ॥ ୫୪ ॥

ନ ହି କ୍ରମଶ୍ଚେଦିହ ମୃତ୍ଯୁଜନ୍ମନୋଃ
ଶରୀରିଣାମସ୍ତୁ ତଦାତ୍ମକର୍ମଭିଃ ।
ଯଃ ସ୍ନେହପାଶୋ ନିଜସର୍ଗଵୃଦ୍ଧଯେ
ସ୍ଵଯଂ କୃତସ୍ତେ ତମିମଂ ଵିଵୃଶ୍ଚସି ॥ ୫୫ ॥

ତ୍ଵଂ ତାତ ନାର୍ହସି ଚ ମାଂ କୃପଣାମନାଥାଂ
ତ୍ଯକ୍ତୁଂ ଵିଚକ୍ଷ୍ଵ ପିତରଂ ତଵ ଶୋକତପ୍ତମ୍ ।
ଅଞ୍ଜସ୍ତରେମ ଭଵତାପ୍ରଜଦୁସ୍ତରଂ ଯଦ୍
ଧ୍ଵାନ୍ତଂ ନ ଯାହ୍ଯକରୁଣେନ ଯମେନ ଦୂରମ୍ ॥ ୫୬ ॥

ଉତ୍ତିଷ୍ଠ ତାତ ତ ଇମେ ଶିଶଵୋ ଵଯସ୍ଯା-
ସ୍ତ୍ଵାମାହ୍ଵଯନ୍ତି ନୃପନନ୍ଦନ ସଂଵିହର୍ତୁମ୍ ।
ସୁପ୍ତଶ୍ଚିରଂ ହ୍ଯଶନଯା ଚ ଭଵାନ୍ ପରୀତୋ
ଭୁଙ୍କ୍ଷ୍ଵ ସ୍ତନଂ ପିବ ଶୁଚୋ ହର ନଃ ସ୍ଵକାନାମ୍ ॥ ୫୭ ॥

ନାହଂ ତନୂଜ ଦଦୃଶେ ହତମଙ୍ଗଲା ତେ
ମୁଗ୍ଧସ୍ମିତଂ ମୁଦିତଵୀକ୍ଷଣମାନନାବ୍ଜମ୍ ।
କିଂ ଵା ଗତୋଽସ୍ଯପୁନରନ୍ଵଯମନ୍ଯଲୋକଂ
ନୀତୋଽଘୃଣେନ ନ ଶୃଣୋମି କଲା ଗିରସ୍ତେ ॥ ୫୮ ॥

ଶ୍ରୀଶୁକ ଉଵାଚ
ଵିଲପନ୍ତ୍ଯା ମୃତଂ ପୁତ୍ରମିତି ଚିତ୍ରଵିଲାପନୈଃ ।
ଚିତ୍ରକେତୁର୍ଭୃଶଂ ତପ୍ତୋ ମୁକ୍ତକଣ୍ଠୋ ରୁରୋଦ ହ ॥ ୫୯ ॥

ତଯୋର୍ଵିଲପତୋଃ ସର୍ଵେ ଦମ୍ପତ୍ଯୋସ୍ତଦନୁଵ୍ରତାଃ ।
ରୁରୁଦୁଃ ସ୍ମ ନରା ନାର୍ଯଃ ସର୍ଵମାସୀଦଚେତନମ୍ ॥ ୬୦ ॥

ଏଵଂ କଶ୍ମଲମାପନ୍ନଂ ନଷ୍ଟସଂଜ୍ଞମନାଯକମ୍ ।
ଜ୍ଞାତ୍ଵାଙ୍ଗିରା ନାମ ଋଷିରାଜଗାମ ସନାରଦଃ ॥ ୬୧ ॥