শ্রীমদ্ভাগবতম্ ৭.১৩

শ্রীনারদ উবাচ
কল্পস্ত্বেবং পরিব্রজ্য দেহমাত্রাবশেষিতঃ ।
গ্রামৈকরাত্রবিধিনা নিরপেক্ষশ্চরেন্মহীম্ ॥ ১ ॥

বিভৃযাদ্ যদ্যসৌ বাসঃ কৌপীনাচ্ছাদনং পরম্ ।
ত্যক্তং ন লিঙ্গাদ্ দণ্ডাদেরন্যত্ কিঞ্চিদনাপদি ॥ ২ ॥

এক এব চরেদ্ভিক্ষুরাত্মারামোঽনপাশ্রযঃ ।
সর্বভূতসুহৃচ্ছান্তো নারাযণপরাযণঃ ॥ ৩ ॥

পশ্যেদাত্মন্যদো বিশ্বং পরে সদসতোঽব্যযে ।
আত্মানং চ পরং ব্রহ্ম সর্বত্র সদসন্মযে ॥ ৪ ॥

সুপ্তিপ্রবোধযোঃ সন্ধাবাত্মনো গতিমাত্মদৃক্ ।
পশ্যন্বন্ধং চ মোক্ষং চ মাযামাত্রং ন বস্তুতঃ ॥ ৫ ॥

নাভিনন্দেদ্ ধ্রুবং মৃত্যুমধ্রুবং বাস্য জীবিতম্ ।
কালং পরং প্রতীক্ষেত ভূতানাং প্রভবাপ্যযম্ ॥ ৬ ॥

নাসচ্ছাস্ত্রেষু সজ্জেত নোপজীবেত জীবিকাম্ ।
বাদবাদাংস্ত্যজেত্তর্কান্পক্ষং কংচ ন সংশ্রযেত্ ॥ ৭ ॥

ন শিষ্যাননুবধ্নীত গ্রন্থান্নৈবাভ্যসেদ্ বহূন্ ।
ন ব্যাখ্যামুপযুঞ্জীত নারম্ভানারভেত্ক্বচিত্ ॥ ৮ ॥

ন যতেরাশ্রমঃ প্রাযো ধর্মহেতুর্মহাত্মনঃ ।
শান্তস্য সমচিত্তস্য বিভৃযাদুত বা ত্যজেত্ ॥ ৯ ॥

অব্যক্তলিঙ্গো ব্যক্তার্থো মনীষ্যুন্মত্তবালবত্ ।
কবির্মূকবদাত্মানং স দৃষ্টযা দর্শযেন্নৃণাম্ ॥ ১০ ॥

অত্রাপ্যুদাহরন্তীমমিতিহাসং পুরাতনম্ ।
প্রহ্রাদস্য চ সংবাদং মুনেরাজগরস্য চ ॥ ১১ ॥

তং শযানং ধরোপস্থে কাবের্যাং সহ্যসানুনি ।
রজস্বলৈস্তনূদেশৈর্নিগূঢামলতেজসম্ ॥ ১২ ॥

দদর্শ লোকান্বিচরন্ লোকতত্ত্ববিবিত্সযা ।
বৃতোঽমাত্যৈঃ কতিপযৈঃ প্রহ্রাদো ভগবত্প্রিযঃ ॥ ১৩ ॥

কর্মণাকৃতিভির্বাচা লিঙ্গৈর্বর্ণাশ্রমাদিভিঃ ।
ন বিদন্তি জনা যং বৈ সোঽসাবিতি ন বেতি চ ॥ ১৪ ॥

তং নত্বাভ্যর্চ্য বিধিবত্পাদযোঃ শিরসা স্পৃশন্ ।
বিবিত্সুরিদমপ্রাক্ষীন্মহাভাগবতোঽসুরঃ ॥ ১৫ ॥

বিভর্ষি কাযং পীবানং সোদ্যমো ভোগবান্যথা ॥ ১৬ ॥

বিত্তং চৈবোদ্যমবতাং ভোগো বিত্তবতামিহ ।
ভোগিনাং খলু দেহোঽযং পীবা ভবতি নান্যথা ॥ ১৭ ॥

ন তে শযানস্য নিরুদ্যমস্য
ব্রহ্মন্নু হার্থো যত এব ভোগঃ ।
অভোগিনোঽযং তব বিপ্র দেহঃ
পীবা যতস্তদ্বদ নঃ ক্ষমং চেত্ ॥ ১৮ ॥

কবিঃ কল্পো নিপুণদৃক্ চিত্রপ্রিযকথঃ সমঃ । লোকস্য কুর্বতঃ কর্ম শেষে তদ্বীক্ষিতাপি বা ॥ ১৯ ॥

শ্রীনারদ উবাচ
\স ইত্থং দৈত্যপতিনা পরিপৃষ্টো মহামুনিঃ ।
স্মযমানস্তমভ্যাহ তদ্বাগমৃতযন্ত্রিতঃ ॥ ২০ ॥

শ্রীব্রাহ্মণ উবাচ
বেদেদমসুরশ্রেষ্ঠ ভবান্ নন্বার্যসম্মতঃ ।
ঈহোপরমযোর্নৃণাং পদান্যধ্যাত্মচক্ষুষা ॥ ২১ ॥

যস্য নারাযণো দেবো ভগবান্হৃদ্গতঃ সদা ।
ভক্ত্যা কেবলযাজ্ঞানং ধুনোতি ধ্বান্তমর্কবত্ ॥ ২২ ॥

তথাপি ব্রূমহে প্রশ্নাংস্তব রাজন্যথাশ্রুতম্ ।
সম্ভাষণীযো হি ভবানাত্মনঃ শুদ্ধিমিচ্ছতা ॥ ২৩ ॥

তৃষ্ণযা ভববাহিন্যা যোগ্যৈঃ কামৈরপূর্যযা ।
কর্মাণি কার্যমাণোঽহং নানাযোনিষু যোজিতঃ ॥ ২৪ ॥

যদৃচ্ছযা লোকমিমং প্রাপিতঃ কর্মভির্ভ্রমন্ ।
স্বর্গাপবর্গযোর্দ্বারং তিরশ্চাং পুনরস্য চ ॥ ২৫ ॥

তত্রাপি দম্পতীনাং চ সুখাযান্যাপনুত্তযে ।
কর্মাণি কুর্বতাং দৃষ্ট্বা নিবৃত্তোঽস্মি বিপর্যযম্ ॥ ২৬ ॥

সুখমস্যাত্মনো রূপং সর্বেহোপরতিস্তনুঃ ।
মনঃসংস্পর্শজান্ দৃষ্ট্বা ভোগান্স্বপ্স্যামি সংবিশন্ ॥ ২৭ ॥

ইত্যেতদাত্মনঃ স্বার্থং সন্তং বিস্মৃত্য বৈ পুমান্ ।
বিচিত্রামসতি দ্বৈতে ঘোরামাপ্নোতি সংসৃতিম্ ॥ ২৮ ॥

জলং তদুদ্ভবৈশ্ছন্নং হিত্বাজ্ঞো জলকাম্যযা ।
মৃগতৃষ্ণামুপাধাবেত্তথান্যত্রার্থদৃক্ স্বতঃ ॥ ২৯ ॥

দেহাদিভির্দৈবতন্ত্রৈরাত্মনঃ সুখমীহতঃ ।
দুঃখাত্যযং চানীশস্য ক্রিযা মোঘাঃ কৃতাঃ কৃতাঃ ॥ ৩০ ॥

আধ্যাত্মিকাদিভির্দুঃখৈরবিমুক্তস্য কর্হিচিত্ ।
মর্ত্যস্য কৃচ্ছ্রোপনতৈরর্থৈঃ কামৈঃ ক্রিযেত কিম্ ॥ ৩১ ॥

পশ্যামি ধনিনাং ক্লেশং লুব্ধানামজিতাত্মনাম্ ।
ভযাদলব্ধনিদ্রাণাং সর্বতোঽভিবিশঙ্কিনাম্ ॥ ৩২ ॥

রাজতশ্চৌরতঃ শত্রোঃ স্বজনাত্পশুপক্ষিতঃ ।
অর্থিভ্যঃ কালতঃ স্বস্মান্নিত্যং প্রাণার্থবদ্ভযম্ ॥ ৩৩ ॥

শোকমোহভযক্রোধরাগক্লৈব্যশ্রমাদযঃ ।
যন্মূলাঃ স্যুর্নৃণাং জহ্যাত্স্পৃহাং প্রাণার্থযোর্বুধঃ ॥ ৩৪ ॥

মধুকারমহাসর্পৌ লোকেঽস্মিন্নো গুরূত্তমৌ ।
বৈরাগ্যং পরিতোষং চ প্রাপ্তা যচ্ছিক্ষযা বযম্ ॥ ৩৫ ॥

বিরাগঃ সর্বকামেভ্যঃ শিক্ষিতো মে মধুব্রতাত্ ।
কৃচ্ছ্রাপ্তং মধুবদ্বিত্তং হত্বাপ্যন্যো হরেত্পতিম্ ॥ ৩৬ ॥

অনীহঃ পরিতুষ্টাত্মা যদৃচ্ছোপনতাদহম্ ।
নো চেচ্ছযে বহ্বহানি মহাহিরিব সত্ত্ববান্ ॥ ৩৭ ॥

ক্বচিদল্পং ক্বচিদ্ভূরি ভুঞ্জেঽন্নং স্বাদ্বস্বাদু বা ।
ক্বচিদ্ভূরি গুণোপেতং গুণহীনমুত ক্বচিত্ ।
শ্রদ্ধযোপহৃতং ক্বাপি কদাচিন্মানবর্জিতম্ ।
ভুঞ্জে ভুক্ত্বাথ কস্মিংশ্চিদ্দিবা নক্তং যদৃচ্ছযা ॥ ৩৮ ॥

ক্ষৌমং দুকূলমজিনং চীরং বল্কলমেব বা ।
বসেঽন্যদপি সম্প্রাপ্তং দিষ্টভুক্তুষ্টধীরহম্ ॥ ৩৯ ॥

ক্বচিচ্ছযে ধরোপস্থে তৃণপর্ণাশ্মভস্মসু ।
ক্বচিত্প্রাসাদপর্যঙ্কে কশিপৌ বা পরেচ্ছযা ॥ ৪০ ॥

ক্বচিত্স্নাতোঽনুলিপ্তাঙ্গঃ সুবাসাঃ স্রগ্ব্যলঙ্কৃতঃ ।
রথেভাশ্বৈশ্চরে
ক্বাপি দিগ্বাসা গ্রহবদ্বিভো ॥ ৪১ ॥

নাহং নিন্দে ন চ স্তৌমি স্বভাববিষমং জনম্ ।
এতেষাং শ্রেয আশাসে
উতৈকাত্ম্যং মহাত্মনি ॥ ৪২ ॥

বিকল্পং জুহুযাচ্চিত্তৌ তাং মনস্যর্থবিভ্রমে ।
মনো বৈকারিকে হুত্বা তং মাযাযাং জুহোত্যনু ॥ ৪৩ ॥

আত্মানুভূতৌ তাং মাযাং জুহুযাত্সত্যদৃঙ্মুনিঃ ।
ততো নিরীহো বিরমেত্ স্বানুভূত্যাত্মনি স্থিতঃ ॥ ৪৪ ॥

স্বাত্মবৃত্তং মযেত্থং তে সুগুপ্তমপি বর্ণিতম্ ।
ব্যপেতং লোকশাস্ত্রাভ্যাং ভবান্হি ভগবত্পরঃ ॥ ৪৫ ॥

শ্রীনারদ উবাচ
ধর্মং পারমহংস্যং বৈ মুনেঃ শ্রুত্বাসুরেশ্বরঃ ।
পূজযিত্বা ততঃ প্রীত আমন্ত্র্যপ্রযযৌ গৃহম্ ॥ ৪৬ ॥