শ্রীমদ্ভাগবতম্ ৮.১২

শ্রীবাদরাযণিরুবাচ
বৃষধ্বজো নিশম্যেদং যোষিদ্রূপেণ দানবান্ । মোহযিত্বা সুরগণান্হরিঃ সোমমপাযযত্ ॥ ১ ॥

বৃষমারুহ্য গিরিশঃ সর্বভূতগণৈর্বৃতঃ । সহ দেব্যা যযৌ দ্রষ্টুং যত্রাস্তে মধুসূদনঃ ॥ ২ ॥

সভাজিতো ভগবতা সাদরং সোমযা ভবঃ ।
সূপবিষ্ট উবাচেদং প্রতিপূজ্য স্মযন্হরিম্ ॥ ৩ ॥

শ্রীমহাদেব উবাচ
দেবদেব জগদ্বযাপিঞ্জগদীশ জগন্ময ।
সর্বেষামপি ভাবানাং ত্বমাত্মা হেতুরীশ্বরঃ ॥ ৪ ॥

আদ্যন্তাবস্য যন্মধ্যমিদমন্যদহং বহিঃ । যতোঽব্যযস্য নৈতানি তত্ সত্যং ব্রহ্ম চিদ্ভবান্ ॥ ৫ ॥

তবৈব চরণাম্ভোজং শ্রেযস্কামা নিরাশিষঃ ।
বিসৃজ্যোভযতঃ সঙ্গং মুনযঃ সমুপাসতে ॥ ৬ ॥

ত্বং ব্রহ্ম পূর্ণমমৃতং বিগুণং বিশোক-
মানন্দমাত্রমবিকারমনন্যদন্যত্ ।
বিশ্বস্য হেতুরুদযস্থিতিসংযমানা-
মাত্মেশ্বরশ্চ তদপেক্ষতযানপেক্ষঃ ॥ ৭ ॥

একস্ত্বমেব সদসদ্দ্বযমদ্বযং চ
স্বর্ণং কৃতাকৃতমিবেহ ন বস্তুভেদঃ ।
অজ্ঞানতস্ত্বযি জনৈর্বিহিতো বিকল্পো
যস্মাদ্ গুণব্যতিকরো নিরুপাধিকস্য ॥ ৮ ॥

ত্বাং ব্রহ্ম কেচিদবযন্ত্যুত ধর্মমেকেএকে পরং সদসতোঃ পুরুষং পরেশম্ । অন্যেঽবযন্তি নবশক্তিযুতং পরং ত্বাংকেচিন্মহাপুরুষমব্যযমাত্মতন্ত্রম্ ॥ ৯ ॥

নাহং পরাযুর্ঋষযো ন মরীচিমুখ্যাজানন্তি যদ্বিরচিতং খলু সত্ত্বসর্গাঃ । যন্মাযযা মুষিতচেতস ঈশ দৈত্য-মর্ত্যাদযঃ কিমুত শশ্বদভদ্রবৃত্তাঃ ॥ ১০ ॥

স ত্বং সমীহিতমদঃ স্থিতিজন্মনাশংভূতেহিতং চ জগতো ভববন্ধমোক্ষৌ । বাযুর্যথা বিশতি খং চ চরাচরাখ্যংসর্বং তদাত্মকতযাবগমোঽবরুন্ত্সে ॥ ১১ ॥

অবতারা মযা দৃষ্টা রমমাণস্য তে গুণৈঃ । সোঽহং তদ্দ্রষ্টুমিচ্ছামি যত্ তে যোষিদ্বপুর্ধৃতম্ ॥ ১২ ॥

যেন সম্মোহিতা দৈত্যাঃ পাযিতাশ্চামৃতং সুরাঃ । তদ্ দিদৃক্ষব আযাতাঃ পরং কৌতূহলং হি নঃ ॥ ১৩ ॥

শ্রীশুক উবাচ
এবমভ্যর্থিতো বিষ্ণুর্ভগবান্ শূলপাণিনা । প্রহস্য ভাবগম্ভীরং গিরিশং প্রত্যভাষত ॥ ১৪ ॥

শ্রীভগবানুবাচ
কৌতূহলায দৈত্যানাং যোষিদ্বেষো মযা ধৃতঃ । পশ্যতা সুরকার্যাণি গতে পীযূষভাজনে ॥ ১৫ ॥

তত্তেঽহং দর্শযিষ্যামি দিদৃক্ষোঃ সুরসত্তম । কামিনাং বহু মন্তব্যং সঙ্কল্পপ্রভবোদযম্ ॥ ১৬ ॥

শ্রীশুক উবাচ
ইতি ব্রুবাণো ভগবাংস্তত্রৈবান্তরধীযত । সর্বতশ্চারযংশ্চক্ষুর্ভব আস্তে সহোমযা ॥ ১৭ ॥

ততো দদর্শোপবনে বরস্ত্রিযংবিচিত্রপুষ্পারুণপল্লবদ্রুমে । বিক্রীডতীং কন্দুকলীলযা লসদ্-দুকূলপর্যস্তনিতম্বমেখলাম্ ॥ ১৮ ॥

আবর্তনোদ্বর্তনকম্পিতস্তন-প্রকৃষ্টহারোরুভরৈঃ পদে পদে । প্রভজ্যমানামিব মধ্যতশ্চলত্-পদপ্রবালং নযতীং ততস্ততঃ ॥ ১৯ ॥

দিক্ষু ভ্রমত্কন্দুকচাপলৈর্ভৃশংপ্রোদ্বিগ্নতারাযতলোললোচনাম্ । স্বকর্ণবিভ্রাজিতকুণ্ডলোল্লসত্-কপোলনীলালকমণ্ডিতাননাম্ ॥ ২০ ॥

শ্লথদ্ দুকূলং কবরীং চ বিচ্যুতাংসন্নহ্যতীং বামকরেণ বল্গুনা । বিনিঘ্নতীমন্যকরেণ কন্দুকংবিমোহযন্তীং জগদাত্মমাযযা ॥ ২১ ॥

তাং বীক্ষ্য দেব ইতি কন্দুকলীলযেষদ্-ব্রীডাস্ফুটস্মিতবিসৃষ্টকটাক্ষমুষ্টঃ । স্ত্রীপ্রেক্ষণপ্রতিসমীক্ষণবিহ্বলাত্মানাত্মানমন্তিক উমাং স্বগণাংশ্চ বেদ ॥ ২২ ॥

তস্যাঃ করাগ্রাত্ স তু কন্দুকো যদাগতো বিদূরং তমনুব্রজত্স্ত্রিযাঃ । বাসঃ সসূত্রং লঘু মারুতোঽহরদ্ভবস্য দেবস্য কিলানুপশ্যতঃ ॥ ২৩ ॥

এবং তাং রুচিরাপাঙ্গীং দর্শনীযাং মনোরমাম্ । দৃষ্ট্বা তস্যাং মনশ্চক্রে বিষজ্জন্ত্যাং ভবঃ কিল ॥ ২৪ ॥

তযাপহৃতবিজ্ঞানস্তত্কৃতস্মরবিহ্বলঃ । ভবান্যা অপি পশ্যন্ত্যা গতহ্রীস্তত্পদং যযৌ ॥ ২৫ ॥

সা তমাযান্তমালোক্য বিবস্ত্রা ব্রীডিতা ভৃশম্ । নিলীযমানা বৃক্ষেষু হসন্তী নান্বতিষ্ঠত ॥ ২৬ ॥

তামন্বগচ্ছদ্ ভগবান্ ভবঃ প্রমুষিতেন্দ্রিযঃ । কামস্য চ বশং নীতঃ করেণুমিব যূথপঃ ॥ ২৭ ॥

সোঽনুব্রজ্যাতিবেগেন গৃহীত্বানিচ্ছতীং স্ত্রিযম্ । কেশবন্ধ উপানীয বাহুভ্যাং পরিষস্বজে ॥ ২৮ ॥

সোপগূঢা ভগবতা করিণা করিণী যথা । ইতস্ততঃ প্রসর্পন্তী বিপ্রকীর্ণশিরোরুহা ॥ ২৯ ॥

আত্মানং মোচযিত্বাঙ্গ সুরর্ষভভুজান্তরাত্ । প্রাদ্রবত্সা পৃথুশ্রোণী মাযা দেববিনির্মিতা ॥ ৩০ ॥

তস্যাসৌ পদবীং রুদ্রো বিষ্ণোরদ্ভুতকর্মণঃ । প্রত্যপদ্যত কামেন বৈরিণেব বিনির্জিতঃ ॥ ৩১ ॥

তস্যানুধাবতো রেতশ্চস্কন্দামোঘরেতসঃ । শুষ্মিণো যূথপস্যেব বাসিতামনুধাবতঃ ॥ ৩২ ॥

যত্র যত্রাপতন্মহ্যাং রেতস্তস্য মহাত্মনঃ । তানি রূপ্যস্য হেম্নশ্চ ক্ষেত্রাণ্যাসন্মহীপতে ॥ ৩৩ ॥

সরিত্সরঃসু শৈলেষু বনেষূপবনেষু চ । যত্র ক্ব চাসন্নৃষযস্তত্র সন্নিহিতো হরঃ ॥ ৩৪ ॥

স্কন্নে রেতসি সোঽপশ্যদাত্মানং দেবমাযযা । জডীকৃতং নৃপশ্রেষ্ঠ সন্ন্যবর্তত কশ্মলাত্ ॥ ৩৫ ॥

অথাবগতমাহাত্ম্য আত্মনো জগদাত্মনঃ । অপরিজ্ঞেযবীর্যস্য ন মেনে তদুহাদ্ভুতম্ ॥ ৩৬ ॥

তমবিক্লবমব্রীডমালক্ষ্য মধুসূদনঃ । উবাচপরমপ্রীতো বিভ্রত্স্বাং পৌরুষীং তনুম্ ॥ ৩৭ ॥

শ্রীভগবানুবাচ
দিষ্টযা ত্বং বিবুধশ্রেষ্ঠ স্বাং নিষ্ঠামাত্মনা স্থিতঃ । যন্মে স্ত্রীরূপযা স্বৈরং মোহিতোঽপ্যঙ্গ মাযযা ॥ ৩৮ ॥

কো নু মেঽতিতরেন্মাযাং বিষক্তস্ত্বদৃতে পুমান্ । তাংস্তান্বিসৃজতীং ভাবান্দুস্তরামকৃতাত্মভিঃ ॥ ৩৯ ॥

সেযং গুণমযী মাযা ন ত্বামভিভবিষ্যতি । মযা সমেতা কালেন কালরূপেণ ভাগশঃ ॥ ৪০ ॥

শ্রীশুক উবাচ
এবং ভগবতা রাজন্ শ্রীবত্সাঙ্কেন সত্কৃতঃ । আমন্ত্র্য তং পরিক্রম্য সগণঃ স্বালযং যযৌ ॥ ৪১ ॥

আত্মাংশভূতাং তাং মাযাং ভবানীং ভগবান্ভবঃ । সম্মতামৃষিমুখ্যানাং প্রীত্যাচষ্টাথ ভারত ॥ ৪২ ॥

অযি ব্যপশ্যস্ত্বমজস্য মাযাংপরস্য পুংসঃ পরদেবতাযাঃ । অহং কলানামৃষভোঽপি মুহ্যেযযাবশোঽন্যে কিমুতাস্বতন্ত্রাঃ ॥ ৪৩ ॥

যং মামপৃচ্ছস্ত্বমুপেত্য যোগাত্সমাসহস্রান্ত উপারতং বৈ । স এষ সাক্ষাত্ পুরুষঃ পুরাণোন যত্র কালো বিশতে ন বেদঃ ॥ ৪৪ ॥

শ্রীশুক উবাচ
ইতি তেঽভিহিতস্তাত বিক্রমঃ শার্ঙ্গধন্বনঃ । সিন্ধোর্নির্মথনে যেন ধৃতঃ পৃষ্ঠে মহাচলঃ ॥ ৪৫ ॥

এতন্মুহুঃ কীর্তযতোঽনুশৃণ্বতো
ন রিষ্যতে জাতু সমুদ্যমঃ ক্বচিত্ ।
যদুত্তমশ্লোকগুণানুবর্ণনং
সমস্তসংসারপরিশ্রমাপহম্ ॥ ৪৬ ॥

অসদবিষযমঙ্ঘ্রিং ভাবগম্যং প্রপন্না-
নমৃতমমরবর্যানাশযত্ সিন্ধুমথ্যম্ ।
কপটযুবতিবেষো মোহযন্যঃ সুরারীং-
স্তমহমুপসৃতানাং কামপূরং নতোঽস্মি ॥ ৪৭ ॥