শ্ৰীমদ্ভাগৱতম্ ৮.১৫

শ্ৰীৰাজোৱাচ
বলেঃ পদত্ৰযং ভূমেঃ কস্মাদ্ধৰিৰযাচত ।
ভূতেশ্ৱৰঃ কৃপণৱল্লব্ধাৰ্থোঽপি ববন্ধ তম্ ॥ ১ ॥

এতদ্ ৱেদিতুমিচ্ছামো মহত্কৌতূহলং হি নঃ ।
যাচ্ঞেশ্ৱৰস্য পূৰ্ণস্য বন্ধনং চাপ্যনাগসঃ ॥ ২ ॥

শ্ৰীশুক উৱাচ
পৰাজিতশ্ৰীৰসুভিশ্চ হাপিতো
হীন্দ্ৰেণ ৰাজন্ভৃগুভিঃ স জীৱিতঃ ।
সৰ্ৱাত্মনা তানভজদ্ ভৃগূন্বলিঃ
শিষ্যো মহাত্মাৰ্থনিৱেদনেন ॥ ৩ ॥

তং ব্ৰাহ্মণা ভৃগৱঃ প্ৰীযমাণা
অযাজযন্ৱিশ্ৱজিতা ত্ৰিণাকম্ ।
জিগীষমাণং ৱিধিনাভিষিচ্য
মহাভিষেকেণ মহানুভাৱাঃ ॥ ৪ ॥

ততো ৰথঃ কাঞ্চনপট্টনদ্ধো
হযাশ্চ হৰ্যশ্ৱতুৰঙ্গৱৰ্ণাঃ ।
ধ্ৱজশ্চ সিংহেন ৱিৰাজমানো
হুতাশনাদাস হৱিৰ্ভিৰিষ্টাত্ ॥ ৫ ॥

ধনুশ্চ দিৱ্যং পুৰটোপনদ্ধং
তূণাৱৰিক্তৌ কৱচং চ দিৱ্যম্ ।
পিতামহস্তস্য দদৌ চ মালা-
মম্লানপুষ্পাং জলজং চ শুক্ৰঃ ॥ ৬ ॥

এৱং স ৱিপ্ৰাৰ্জিতযোধনাৰ্থ-
স্তৈঃ কল্পিতস্ৱস্ত্যযনোঽথ ৱিপ্ৰান্ ।
প্ৰদক্ষিণীকৃত্য কৃতপ্ৰণামঃ
প্ৰহ্লাদমামন্ত্ৰ্য নমশ্চকাৰ ॥ ৭ ॥

অথাৰুহ্য ৰথং দিৱ্যং ভৃগুদত্তং মহাৰথঃ ।
সুস্ৰগ্ধৰোঽথ সন্নহ্য ধন্ৱী খড্গী ধৃতেষুধিঃ ॥ ৮ ॥

হেমাঙ্গদলসব্দাহুঃ স্ফুৰন্মকৰকুণ্ডলঃ ।
ৰৰাজ ৰথমাৰূঢো ধিষ্ণ্যস্থ ইৱ হৱ্যৱাট্ ॥ ৯ ॥

তুল্যৈশ্ৱৰ্যবলশ্ৰীভিঃ স্ৱযূথৈৰ্দৈত্যযূথপৈঃ ।
পিবদ্ভিৰিৱ খং দৃগ্ভিৰ্দহদ্ভিঃ পৰিধীনিৱ ॥ ১০ ॥

ৱৃতো ৱিকৰ্ষন্ মহতীমাসুৰীং ধ্ৱজিনীং ৱিভুঃ ।
যযাৱিন্দ্ৰপুৰীং স্ৱৃদ্ধাং কম্পযন্নিৱ ৰোদসী ॥ ১১ ॥

ৰম্যামুপৱনোদ্যানৈঃ শ্ৰীমদ্ভিৰ্নন্দনাদিভিঃ ।
কূজদ্ৱিহঙ্গমিথুনৈৰ্গাযন্মত্তমধুৱ্ৰতৈঃ ।
প্ৰৱালফলপুষ্পোৰুভাৰশাখামৰদ্ৰুমৈঃ ॥ ১২ ॥

হংসসাৰসচক্ৰাহ্ৱকাৰণ্ডৱকুলাকুলাঃ ।
নলিন্যো যত্ৰ ক্ৰীডন্তি প্ৰমদাঃ সুৰসেৱিতাঃ ॥ ১৩ ॥

আকাশগঙ্গযা দেৱ্যা ৱৃতাং পৰিখভূতযা ।
প্ৰাকাৰেণাগ্নিৱৰ্ণেন সাট্টালেনোন্নতেন চ ॥ ১৪ ॥

ৰুক্মপট্টকপাটৈশ্চ দ্ৱাৰৈঃ স্ফটিকগোপুৰৈঃ ।
জুষ্টাং ৱিভক্তপ্ৰপথাং ৱিশ্ৱকৰ্মৱিনিৰ্মিতাম্ ॥ ১৫ ॥

সভাচত্ৱৰৰথ্যাঢ্যাং ৱিমানৈৰ্ন্যৰ্বুদৈৰ্যুতাম্ ।
শৃঙ্গাটকৈৰ্মণিমযৈৰ্ৱজ্ৰৱিদ্ৰুমৱেদিভিঃ ॥ ১৬ ॥

যত্ৰ নিত্যৱযোৰূপাঃ শ্যামা ৱিৰজৱাসসঃ ।
ভ্ৰাজন্তে ৰূপৱন্নাৰ্যো হ্যৰ্চিৰ্ভিৰিৱ ৱহ্নযঃ ॥ ১৭ ॥

সুৰস্ত্ৰীকেশৱিভ্ৰষ্টনৱসৌগন্ধিকস্ৰজাম্ ।
যত্ৰামোদমুপাদায মাৰ্গ আৱাতি মাৰুতঃ ॥ ১৮ ॥

হেমজালাক্ষনিৰ্গচ্ছদ্ধূমেনাগুৰুগন্ধিনা ।
পাণ্ডুৰেণ প্ৰতিচ্ছন্নমাৰ্গে যান্তি সুৰপ্ৰিযাঃ ॥ ১৯ ॥

মুক্তাৱিতানৈৰ্মণিহেমকেতুভি-
ৰ্নানাপতাকাৱলভীভিৰাৱৃতাম্ ।
শিখণ্ডিপাৰাৱতভৃঙ্গনাদিতাং
ৱৈমানিকস্ত্ৰীকলগীতমঙ্গলাম্ ॥ ২০ ॥

মৃদঙ্গশঙ্খানকদুন্দুভিস্ৱনৈঃ
সতালৱীণামুৰজেষ্টৱেণুভিঃ ।
নৃত্যৈঃ সৱাদ্যৈৰুপদেৱগীতকৈ-
ৰ্মনোৰমাং স্ৱপ্ৰভযা জিতপ্ৰভাম্ ॥ ২১ ॥

যাং ন ৱ্ৰজন্ত্যধৰ্মিষ্ঠাঃ খলা ভূতদ্ৰুহঃ শঠাঃ ।
মানিনঃ কামিনো লুব্ধা এভিৰ্হীনা ৱ্ৰজন্তি যত্ ॥ ২২ ॥

তাং দেৱধানীং স ৱৰূথিনীপতি-
ৰ্বহিঃ সমন্তাদ্ ৰুৰুধে পৃতন্যযা ।
আচাৰ্যদত্তং জলজং মহাস্ৱনং
দধ্মৌ প্ৰযুঞ্জন্ভযমিন্দ্ৰযোষিতাম্ ॥ ২৩ ॥

মঘৱাংস্তমভিপ্ৰেত্য বলেঃ পৰমমুদ্যমম্ ।
সৰ্ৱদেৱগণোপেতো গুৰুমেতদুৱাচ হ ॥ ২৪ ॥

ভগৱন্নুদ্যমো ভূযান্বলেৰ্নঃ পূৰ্ৱৱৈৰিণঃ ।
অৱিষহ্যমিমং মন্যে কেনাসীত্তেজসোৰ্জিতঃ ॥ ২৫ ॥

নৈনং কশ্চিত্ কুতো ৱাপি প্ৰতিৱ্যোঢুমধীশ্ৱৰঃ ।
পিবন্নিৱ মুখেনেদং লিহন্নিৱ দিশো দশ ।
দহন্নিৱ দিশো দৃগ্ভিঃ সংৱৰ্তাগ্নিৰিৱোত্থিতঃ ॥ ২৬ ॥

ব্ৰূহি কাৰণমেতস্য দুৰ্ধৰ্ষত্ৱস্য মদ্ৰিপোঃ ।
ওজঃ সহো বলং তেজো যত এতত্সমুদ্যমঃ ॥ ২৭ ॥

শ্ৰীগুৰুৰুৱাচ
জানামি মঘৱঞ্ছত্ৰোৰুন্নতেৰস্য কাৰণম্ ।
শিষ্যাযোপভৃতং তেজো ভৃগুভিৰ্ব্ৰহ্মৱাদিভিঃ ॥ ২৮ ॥

ওজস্ৱিনং বলিং জেতুং ন সমৰ্থোঽস্তি কশ্চন ।
ভৱদ্ৱিধো ভৱান্ৱাপি ৱৰ্জযিত্ৱেশ্ৱৰং হৰিম্ ।
ৱিজেষ্যতি ন কোঽপ্যেনং ব্ৰহ্মতেজঃসমেধিতম্ ।
নাস্য শক্তঃ পুৰঃ স্থাতুং কৃতান্তস্য যথা জনাঃ ॥ ২৯ ॥

তস্মান্নিলযমুত্সৃজ্য যূযং সৰ্ৱে ত্ৰিৱিষ্টপম্ ।
যাত কালং প্ৰতীক্ষন্তো যতঃ শত্ৰোৰ্ৱিপৰ্যযঃ ॥ ৩০ ॥

এষ ৱিপ্ৰবলোদৰ্কঃ সম্প্ৰত্যূৰ্জিতৱিক্ৰমঃ ।
তেষামেৱাপমানেন সানুবন্ধো ৱিনঙ্ক্ষ্যতি ॥ ৩১ ॥

এৱং সুমন্ত্ৰিতাৰ্থাস্তে গুৰুণাৰ্থানুদৰ্শিনা ।
হিত্ৱা ত্ৰিৱিষ্টপং জগ্মুৰ্গীৰ্ৱাণাঃ কামৰূপিণঃ ॥ ৩২ ॥

দেৱেষ্ৱথ নিলীনেষু বলিৰ্ৱৈৰোচনঃ পুৰীম্ ।
দেৱধানীমধিষ্ঠায ৱশং নিন্যে জগত্ত্ৰযম্ ॥ ৩৩ ॥

তং ৱিশ্ৱজযিনং শিষ্যং ভৃগৱঃ শিষ্যৱত্সলাঃ ।
শতেন হযমেধানামনুৱ্ৰতমযাজযন্ ॥ ৩৪ ॥

ততস্তদনুভাৱেন ভুৱনত্ৰযৱিশ্ৰুতাম্ ।
কীৰ্তিং দিক্ষু ৱিতন্ৱানঃ স ৰেজ উডুৰাডিৱ ॥ ৩৫ ॥

বুভুজে চ শ্ৰিযং স্ৱৃদ্ধাং দ্ৱিজদেৱোপলম্ভিতাম্ ।
কৃতকৃত্যমিৱাত্মানং মন্যমানো মহামনাঃ ॥ ৩৬ ॥