శ్రీమద్భాగవతమ్ ౮.౧౫

శ్రీరాజోవాచ
బలేః పదత్రయం భూమేః కస్మాద్ధరిరయాచత ।
భూతేశ్వరః కృపణవల్లబ్ధార్థోఽపి బబన్ధ తమ్ ॥ ౧ ॥

ఏతద్ వేదితుమిచ్ఛామో మహత్కౌతూహలం హి నః ।
యాచ్ఞేశ్వరస్య పూర్ణస్య బన్ధనం చాప్యనాగసః ॥ ౨ ॥

శ్రీశుక ఉవాచ
పరాజితశ్రీరసుభిశ్చ హాపితో
హీన్ద్రేణ రాజన్భృగుభిః స జీవితః ।
సర్వాత్మనా తానభజద్ భృగూన్బలిః
శిష్యో మహాత్మార్థనివేదనేన ॥ ౩ ॥

తం బ్రాహ్మణా భృగవః ప్రీయమాణా
అయాజయన్విశ్వజితా త్రిణాకమ్ ।
జిగీషమాణం విధినాభిషిచ్య
మహాభిషేకేణ మహానుభావాః ॥ ౪ ॥

తతో రథః కాఞ్చనపట్టనద్ధో
హయాశ్చ హర్యశ్వతురఙ్గవర్ణాః ।
ధ్వజశ్చ సింహేన విరాజమానో
హుతాశనాదాస హవిర్భిరిష్టాత్ ॥ ౫ ॥

ధనుశ్చ దివ్యం పురటోపనద్ధం
తూణావరిక్తౌ కవచం చ దివ్యమ్ ।
పితామహస్తస్య దదౌ చ మాలా-
మమ్లానపుష్పాం జలజం చ శుక్రః ॥ ౬ ॥

ఏవం స విప్రార్జితయోధనార్థ-
స్తైః కల్పితస్వస్త్యయనోఽథ విప్రాన్ ।
ప్రదక్షిణీకృత్య కృతప్రణామః
ప్రహ్లాదమామన్త్ర్య నమశ్చకార ॥ ౭ ॥

అథారుహ్య రథం దివ్యం భృగుదత్తం మహారథః ।
సుస్రగ్ధరోఽథ సన్నహ్య ధన్వీ ఖడ్గీ ధృతేషుధిః ॥ ౮ ॥

హేమాఙ్గదలసబ్దాహుః స్ఫురన్మకరకుణ్డలః ।
రరాజ రథమారూఢో ధిష్ణ్యస్థ ఇవ హవ్యవాట్ ॥ ౯ ॥

తుల్యైశ్వర్యబలశ్రీభిః స్వయూథైర్దైత్యయూథపైః ।
పిబద్భిరివ ఖం దృగ్భిర్దహద్భిః పరిధీనివ ॥ ౧౦ ॥

వృతో వికర్షన్ మహతీమాసురీం ధ్వజినీం విభుః ।
యయావిన్ద్రపురీం స్వృద్ధాం కమ్పయన్నివ రోదసీ ॥ ౧౧ ॥

రమ్యాముపవనోద్యానైః శ్రీమద్భిర్నన్దనాదిభిః ।
కూజద్విహఙ్గమిథునైర్గాయన్మత్తమధువ్రతైః ।
ప్రవాలఫలపుష్పోరుభారశాఖామరద్రుమైః ॥ ౧౨ ॥

హంససారసచక్రాహ్వకారణ్డవకులాకులాః ।
నలిన్యో యత్ర క్రీడన్తి ప్రమదాః సురసేవితాః ॥ ౧౩ ॥

ఆకాశగఙ్గయా దేవ్యా వృతాం పరిఖభూతయా ।
ప్రాకారేణాగ్నివర్ణేన సాట్టాలేనోన్నతేన చ ॥ ౧౪ ॥

రుక్మపట్టకపాటైశ్చ ద్వారైః స్ఫటికగోపురైః ।
జుష్టాం విభక్తప్రపథాం విశ్వకర్మవినిర్మితామ్ ॥ ౧౫ ॥

సభాచత్వరరథ్యాఢ్యాం విమానైర్న్యర్బుదైర్యుతామ్ ।
శృఙ్గాటకైర్మణిమయైర్వజ్రవిద్రుమవేదిభిః ॥ ౧౬ ॥

యత్ర నిత్యవయోరూపాః శ్యామా విరజవాససః ।
భ్రాజన్తే రూపవన్నార్యో హ్యర్చిర్భిరివ వహ్నయః ॥ ౧౭ ॥

సురస్త్రీకేశవిభ్రష్టనవసౌగన్ధికస్రజామ్ ।
యత్రామోదముపాదాయ మార్గ ఆవాతి మారుతః ॥ ౧౮ ॥

హేమజాలాక్షనిర్గచ్ఛద్ధూమేనాగురుగన్ధినా ।
పాణ్డురేణ ప్రతిచ్ఛన్నమార్గే యాన్తి సురప్రియాః ॥ ౧౯ ॥

ముక్తావితానైర్మణిహేమకేతుభి-
ర్నానాపతాకావలభీభిరావృతామ్ ।
శిఖణ్డిపారావతభృఙ్గనాదితాం
వైమానికస్త్రీకలగీతమఙ్గలామ్ ॥ ౨౦ ॥

మృదఙ్గశఙ్ఖానకదున్దుభిస్వనైః
సతాలవీణామురజేష్టవేణుభిః ।
నృత్యైః సవాద్యైరుపదేవగీతకై-
ర్మనోరమాం స్వప్రభయా జితప్రభామ్ ॥ ౨౧ ॥

యాం న వ్రజన్త్యధర్మిష్ఠాః ఖలా భూతద్రుహః శఠాః ।
మానినః కామినో లుబ్ధా ఏభిర్హీనా వ్రజన్తి యత్ ॥ ౨౨ ॥

తాం దేవధానీం స వరూథినీపతి-
ర్బహిః సమన్తాద్ రురుధే పృతన్యయా ।
ఆచార్యదత్తం జలజం మహాస్వనం
దధ్మౌ ప్రయుఞ్జన్భయమిన్ద్రయోషితామ్ ॥ ౨౩ ॥

మఘవాంస్తమభిప్రేత్య బలేః పరమముద్యమమ్ ।
సర్వదేవగణోపేతో గురుమేతదువాచ హ ॥ ౨౪ ॥

భగవన్నుద్యమో భూయాన్బలేర్నః పూర్వవైరిణః ।
అవిషహ్యమిమం మన్యే కేనాసీత్తేజసోర్జితః ॥ ౨౫ ॥

నైనం కశ్చిత్ కుతో వాపి ప్రతివ్యోఢుమధీశ్వరః ।
పిబన్నివ ముఖేనేదం లిహన్నివ దిశో దశ ।
దహన్నివ దిశో దృగ్భిః సంవర్తాగ్నిరివోత్థితః ॥ ౨౬ ॥

బ్రూహి కారణమేతస్య దుర్ధర్షత్వస్య మద్రిపోః ।
ఓజః సహో బలం తేజో యత ఏతత్సముద్యమః ॥ ౨౭ ॥

శ్రీగురురువాచ
జానామి మఘవఞ్ఛత్రోరున్నతేరస్య కారణమ్ ।
శిష్యాయోపభృతం తేజో భృగుభిర్బ్రహ్మవాదిభిః ॥ ౨౮ ॥

ఓజస్వినం బలిం జేతుం న సమర్థోఽస్తి కశ్చన ।
భవద్విధో భవాన్వాపి వర్జయిత్వేశ్వరం హరిమ్ ।
విజేష్యతి న కోఽప్యేనం బ్రహ్మతేజఃసమేధితమ్ ।
నాస్య శక్తః పురః స్థాతుం కృతాన్తస్య యథా జనాః ॥ ౨౯ ॥

తస్మాన్నిలయముత్సృజ్య యూయం సర్వే త్రివిష్టపమ్ ।
యాత కాలం ప్రతీక్షన్తో యతః శత్రోర్విపర్యయః ॥ ౩౦ ॥

ఏష విప్రబలోదర్కః సమ్ప్రత్యూర్జితవిక్రమః ।
తేషామేవాపమానేన సానుబన్ధో వినఙ్క్ష్యతి ॥ ౩౧ ॥

ఏవం సుమన్త్రితార్థాస్తే గురుణార్థానుదర్శినా ।
హిత్వా త్రివిష్టపం జగ్ముర్గీర్వాణాః కామరూపిణః ॥ ౩౨ ॥

దేవేష్వథ నిలీనేషు బలిర్వైరోచనః పురీమ్ ।
దేవధానీమధిష్ఠాయ వశం నిన్యే జగత్త్రయమ్ ॥ ౩౩ ॥

తం విశ్వజయినం శిష్యం భృగవః శిష్యవత్సలాః ।
శతేన హయమేధానామనువ్రతమయాజయన్ ॥ ౩౪ ॥

తతస్తదనుభావేన భువనత్రయవిశ్రుతామ్ ।
కీర్తిం దిక్షు వితన్వానః స రేజ ఉడురాడివ ॥ ౩౫ ॥

బుభుజే చ శ్రియం స్వృద్ధాం ద్విజదేవోపలమ్భితామ్ ।
కృతకృత్యమివాత్మానం మన్యమానో మహామనాః ॥ ౩౬ ॥