শ্রীমদ্ভাগবতম্ ৮.১৫

শ্রীরাজোবাচ
বলেঃ পদত্রযং ভূমেঃ কস্মাদ্ধরিরযাচত ।
ভূতেশ্বরঃ কৃপণবল্লব্ধার্থোঽপি ববন্ধ তম্ ॥ ১ ॥

এতদ্ বেদিতুমিচ্ছামো মহত্কৌতূহলং হি নঃ ।
যাচ্ঞেশ্বরস্য পূর্ণস্য বন্ধনং চাপ্যনাগসঃ ॥ ২ ॥

শ্রীশুক উবাচ
পরাজিতশ্রীরসুভিশ্চ হাপিতো
হীন্দ্রেণ রাজন্ভৃগুভিঃ স জীবিতঃ ।
সর্বাত্মনা তানভজদ্ ভৃগূন্বলিঃ
শিষ্যো মহাত্মার্থনিবেদনেন ॥ ৩ ॥

তং ব্রাহ্মণা ভৃগবঃ প্রীযমাণা
অযাজযন্বিশ্বজিতা ত্রিণাকম্ ।
জিগীষমাণং বিধিনাভিষিচ্য
মহাভিষেকেণ মহানুভাবাঃ ॥ ৪ ॥

ততো রথঃ কাঞ্চনপট্টনদ্ধো
হযাশ্চ হর্যশ্বতুরঙ্গবর্ণাঃ ।
ধ্বজশ্চ সিংহেন বিরাজমানো
হুতাশনাদাস হবির্ভিরিষ্টাত্ ॥ ৫ ॥

ধনুশ্চ দিব্যং পুরটোপনদ্ধং
তূণাবরিক্তৌ কবচং চ দিব্যম্ ।
পিতামহস্তস্য দদৌ চ মালা-
মম্লানপুষ্পাং জলজং চ শুক্রঃ ॥ ৬ ॥

এবং স বিপ্রার্জিতযোধনার্থ-
স্তৈঃ কল্পিতস্বস্ত্যযনোঽথ বিপ্রান্ ।
প্রদক্ষিণীকৃত্য কৃতপ্রণামঃ
প্রহ্লাদমামন্ত্র্য নমশ্চকার ॥ ৭ ॥

অথারুহ্য রথং দিব্যং ভৃগুদত্তং মহারথঃ ।
সুস্রগ্ধরোঽথ সন্নহ্য ধন্বী খড্গী ধৃতেষুধিঃ ॥ ৮ ॥

হেমাঙ্গদলসব্দাহুঃ স্ফুরন্মকরকুণ্ডলঃ ।
ররাজ রথমারূঢো ধিষ্ণ্যস্থ ইব হব্যবাট্ ॥ ৯ ॥

তুল্যৈশ্বর্যবলশ্রীভিঃ স্বযূথৈর্দৈত্যযূথপৈঃ ।
পিবদ্ভিরিব খং দৃগ্ভির্দহদ্ভিঃ পরিধীনিব ॥ ১০ ॥

বৃতো বিকর্ষন্ মহতীমাসুরীং ধ্বজিনীং বিভুঃ ।
যযাবিন্দ্রপুরীং স্বৃদ্ধাং কম্পযন্নিব রোদসী ॥ ১১ ॥

রম্যামুপবনোদ্যানৈঃ শ্রীমদ্ভির্নন্দনাদিভিঃ ।
কূজদ্বিহঙ্গমিথুনৈর্গাযন্মত্তমধুব্রতৈঃ ।
প্রবালফলপুষ্পোরুভারশাখামরদ্রুমৈঃ ॥ ১২ ॥

হংসসারসচক্রাহ্বকারণ্ডবকুলাকুলাঃ ।
নলিন্যো যত্র ক্রীডন্তি প্রমদাঃ সুরসেবিতাঃ ॥ ১৩ ॥

আকাশগঙ্গযা দেব্যা বৃতাং পরিখভূতযা ।
প্রাকারেণাগ্নিবর্ণেন সাট্টালেনোন্নতেন চ ॥ ১৪ ॥

রুক্মপট্টকপাটৈশ্চ দ্বারৈঃ স্ফটিকগোপুরৈঃ ।
জুষ্টাং বিভক্তপ্রপথাং বিশ্বকর্মবিনির্মিতাম্ ॥ ১৫ ॥

সভাচত্বররথ্যাঢ্যাং বিমানৈর্ন্যর্বুদৈর্যুতাম্ ।
শৃঙ্গাটকৈর্মণিমযৈর্বজ্রবিদ্রুমবেদিভিঃ ॥ ১৬ ॥

যত্র নিত্যবযোরূপাঃ শ্যামা বিরজবাসসঃ ।
ভ্রাজন্তে রূপবন্নার্যো হ্যর্চির্ভিরিব বহ্নযঃ ॥ ১৭ ॥

সুরস্ত্রীকেশবিভ্রষ্টনবসৌগন্ধিকস্রজাম্ ।
যত্রামোদমুপাদায মার্গ আবাতি মারুতঃ ॥ ১৮ ॥

হেমজালাক্ষনির্গচ্ছদ্ধূমেনাগুরুগন্ধিনা ।
পাণ্ডুরেণ প্রতিচ্ছন্নমার্গে যান্তি সুরপ্রিযাঃ ॥ ১৯ ॥

মুক্তাবিতানৈর্মণিহেমকেতুভি-
র্নানাপতাকাবলভীভিরাবৃতাম্ ।
শিখণ্ডিপারাবতভৃঙ্গনাদিতাং
বৈমানিকস্ত্রীকলগীতমঙ্গলাম্ ॥ ২০ ॥

মৃদঙ্গশঙ্খানকদুন্দুভিস্বনৈঃ
সতালবীণামুরজেষ্টবেণুভিঃ ।
নৃত্যৈঃ সবাদ্যৈরুপদেবগীতকৈ-
র্মনোরমাং স্বপ্রভযা জিতপ্রভাম্ ॥ ২১ ॥

যাং ন ব্রজন্ত্যধর্মিষ্ঠাঃ খলা ভূতদ্রুহঃ শঠাঃ ।
মানিনঃ কামিনো লুব্ধা এভির্হীনা ব্রজন্তি যত্ ॥ ২২ ॥

তাং দেবধানীং স বরূথিনীপতি-
র্বহিঃ সমন্তাদ্ রুরুধে পৃতন্যযা ।
আচার্যদত্তং জলজং মহাস্বনং
দধ্মৌ প্রযুঞ্জন্ভযমিন্দ্রযোষিতাম্ ॥ ২৩ ॥

মঘবাংস্তমভিপ্রেত্য বলেঃ পরমমুদ্যমম্ ।
সর্বদেবগণোপেতো গুরুমেতদুবাচ হ ॥ ২৪ ॥

ভগবন্নুদ্যমো ভূযান্বলের্নঃ পূর্ববৈরিণঃ ।
অবিষহ্যমিমং মন্যে কেনাসীত্তেজসোর্জিতঃ ॥ ২৫ ॥

নৈনং কশ্চিত্ কুতো বাপি প্রতিব্যোঢুমধীশ্বরঃ ।
পিবন্নিব মুখেনেদং লিহন্নিব দিশো দশ ।
দহন্নিব দিশো দৃগ্ভিঃ সংবর্তাগ্নিরিবোত্থিতঃ ॥ ২৬ ॥

ব্রূহি কারণমেতস্য দুর্ধর্ষত্বস্য মদ্রিপোঃ ।
ওজঃ সহো বলং তেজো যত এতত্সমুদ্যমঃ ॥ ২৭ ॥

শ্রীগুরুরুবাচ
জানামি মঘবঞ্ছত্রোরুন্নতেরস্য কারণম্ ।
শিষ্যাযোপভৃতং তেজো ভৃগুভির্ব্রহ্মবাদিভিঃ ॥ ২৮ ॥

ওজস্বিনং বলিং জেতুং ন সমর্থোঽস্তি কশ্চন ।
ভবদ্বিধো ভবান্বাপি বর্জযিত্বেশ্বরং হরিম্ ।
বিজেষ্যতি ন কোঽপ্যেনং ব্রহ্মতেজঃসমেধিতম্ ।
নাস্য শক্তঃ পুরঃ স্থাতুং কৃতান্তস্য যথা জনাঃ ॥ ২৯ ॥

তস্মান্নিলযমুত্সৃজ্য যূযং সর্বে ত্রিবিষ্টপম্ ।
যাত কালং প্রতীক্ষন্তো যতঃ শত্রোর্বিপর্যযঃ ॥ ৩০ ॥

এষ বিপ্রবলোদর্কঃ সম্প্রত্যূর্জিতবিক্রমঃ ।
তেষামেবাপমানেন সানুবন্ধো বিনঙ্ক্ষ্যতি ॥ ৩১ ॥

এবং সুমন্ত্রিতার্থাস্তে গুরুণার্থানুদর্শিনা ।
হিত্বা ত্রিবিষ্টপং জগ্মুর্গীর্বাণাঃ কামরূপিণঃ ॥ ৩২ ॥

দেবেষ্বথ নিলীনেষু বলির্বৈরোচনঃ পুরীম্ ।
দেবধানীমধিষ্ঠায বশং নিন্যে জগত্ত্রযম্ ॥ ৩৩ ॥

তং বিশ্বজযিনং শিষ্যং ভৃগবঃ শিষ্যবত্সলাঃ ।
শতেন হযমেধানামনুব্রতমযাজযন্ ॥ ৩৪ ॥

ততস্তদনুভাবেন ভুবনত্রযবিশ্রুতাম্ ।
কীর্তিং দিক্ষু বিতন্বানঃ স রেজ উডুরাডিব ॥ ৩৫ ॥

বুভুজে চ শ্রিযং স্বৃদ্ধাং দ্বিজদেবোপলম্ভিতাম্ ।
কৃতকৃত্যমিবাত্মানং মন্যমানো মহামনাঃ ॥ ৩৬ ॥