শ্ৰীমদ্ভাগৱতম্ ৮.২২

শ্ৰীশুক উৱাচ
এৱং ৱিপ্ৰকৃতো ৰাজন্ বলিৰ্ভগৱতাসুৰঃ ।
ভিদ্যমানোঽপ্যভিন্নাত্মা প্ৰত্যাহাৱিক্লৱং ৱচঃ ॥ ১ ॥

শ্ৰীবলিৰুৱাচ
যদ্যুত্তমশ্লোক ভৱান্ মমেৰিতং
ৱচো ৱ্যলীকং সুৰৱৰ্য মন্যতে ।
কৰোম্যৃতং তন্ন ভৱেত্ প্ৰলম্ভনং
পদং তৃতীযং কুৰু শীৰ্ষ্ণি মে নিজম্ ॥ ২ ॥

বিভেমি নাহং নিৰযাত্ পদচ্যুতো
ন পাশবন্ধাদ্ ৱ্যসনাদ্ দুৰত্যযাত্ ।
নৈৱাৰ্থকৃচ্ছ্ৰাদ্ ভৱতো ৱিনিগ্ৰহা-
দসাধুৱাদাদ্ ভৃশমুদ্ৱিজে যথা ॥ ৩ ॥

পুংসাং শ্লাঘ্যতমং মন্যে দণ্ডমৰ্হত্তমাৰ্পিতম্ ।
যং ন মাতা পিতা ভ্ৰাতা সুহৃদশ্চাদিশন্তি হি ॥ ৪ ॥

ত্ৱং নূনমসুৰাণাং নঃ পৰোক্ষঃ পৰমো গুৰুঃ ।
যো নোঽনেকমদান্ধানাং ৱিভ্ৰংশং চক্ষুৰাদিশত্ ॥ ৫ ॥

যস্মিন্ ৱৈৰানুবন্ধেন ৱ্যূঢেন ৱিবুধেতৰাঃ ।
বহৱো লেভিৰে সিদ্ধিং যামু হৈকান্তযোগিনঃ ॥ ৬ ॥

তেনাহং নিগৃহীতোঽস্মি ভৱতা ভূৰিকৰ্মণা ।
বদ্ধশ্চ ৱাৰুণৈঃ পাশৈৰ্নাতিৱ্ৰীডে ন চ ৱ্যথে ॥ ৭ ॥

পিতামহো মে ভৱদীযসম্মতঃ
প্ৰহ্লাদ আৱিষ্কৃতসাধুৱাদঃ ।
ভৱদ্ৱিপক্ষেণ ৱিচিত্ৰৱৈশসং
সম্প্ৰাপিতস্ত্ৱং পৰমঃ স্ৱপিত্ৰা ॥ ৮ ॥

কিমাত্মনানেন জহাতি যোঽন্ততঃ
কিং ৰিক্থহাৰৈঃ স্ৱজনাখ্যদস্যুভিঃ ।
কিং জাযযা সংসৃতিহেতুভূতযা
মৰ্ত্যস্য গেহৈঃ কিমিহাযুষো ৱ্যযঃ ॥ ৯ ॥

ইত্থং স নিশ্চিত্য পিতামহো মহা-
নগাধবোধো ভৱতঃ পাদপদ্মম্ ।
ধ্ৰুৱং প্ৰপেদে হ্যকুতোভযং জনাদ্
ভীতঃ স্ৱপক্ষক্ষপণস্য সত্তম ॥ ১০ ॥

অথাহমপ্যাত্মৰিপোস্তৱান্তিকং
দৈৱেন নীতঃ প্ৰসভং ত্যাজিতশ্ৰীঃ ।
ইদং কৃতান্তান্তিকৱৰ্তি জীৱিতং
যযাধ্ৰুৱং স্তব্ধমতিৰ্ন বুধ্যতে ॥ ১১ ॥

শ্ৰীশুক উৱাচ
তস্যেত্থং ভাষমাণস্য প্ৰহ্লাদো ভগৱত্প্ৰিযঃ ।
আজগাম কুৰুশ্ৰেষ্ঠ ৰাকাপতিৰিৱোত্থিতঃ ॥ ১২ ॥

তমিন্দ্ৰসেনঃ স্ৱপিতামহং শ্ৰিযা
ৱিৰাজমানং নলিনাযতেক্ষণম্ ।
প্ৰাংশুং পিশঙ্গাম্বৰমঞ্জনত্ৱিষং
প্ৰলম্ববাহুং শুভগৰ্ষভমৈক্ষত ॥ ১৩ ॥

তস্মৈ বলিৰ্ৱাৰুণপাশযন্ত্ৰিতঃ
সমৰ্হণং নোপজহাৰ পূৰ্ৱৱত্ ।
ননাম মূৰ্ধ্নাশ্ৰুৱিলোললোচনঃ
সৱ্ৰীডনীচীনমুখো বভূৱ হ ॥ ১৪ ॥

স তত্ৰ হাসীনমুদীক্ষ্য সত্পতিং
হৰিং সুনন্দাদ্যনুগৈৰুপাসিতম্ ।
উপেত্য ভূমৌ শিৰসা মহামনা
ননাম মূৰ্ধ্না পুলকাশ্ৰুৱিক্লৱঃ ॥ ১৫ ॥

শ্ৰীপ্ৰহ্লাদ উৱাচ
ত্ৱযৈৱ দত্তং পদমৈন্দ্ৰমূৰ্জিতং
হৃতং তদেৱাদ্য তথৈৱ শোভনম্ ।
মন্যে মহানস্য কৃতো হ্যনুগ্ৰহো
ৱিভ্ৰংশিতো যচ্ছ্ৰিয আত্মমোহনাত্ ॥ ১৬ ॥

যযা হি ৱিদ্ৱানপি মুহ্যতে যত-
স্তত্ কো ৱিচষ্টে গতিমাত্মনো যথা ।
তস্মৈ নমস্তে জগদীশ্ৱৰায ৱৈ
নাৰাযণাযাখিললোকসাক্ষিণে ॥ ১৭ ॥

শ্ৰীশুক উৱাচ
তস্যানুশৃণ্ৱতো ৰাজন্ প্ৰহ্লাদস্য কৃতাঞ্জলেঃ ।
হিৰণ্যগৰ্ভো ভগৱানুৱাচ মধুসূদনম্ ॥ ১৮ ॥

বদ্ধং ৱীক্ষ্য পতিং সাধ্ৱী তত্পত্নী ভযৱিহ্ৱলা ।
প্ৰাঞ্জলিঃ প্ৰণতোপেন্দ্ৰং বভাষেঽৱাঙ্মুখী নৃপ ॥ ১৯ ॥

শ্ৰীৱিন্ধ্যাৱলিৰুৱাচ
ক্ৰীডাৰ্থমাত্মন ইদং ত্ৰিজগত্ কৃতং তে
স্ৱাম্যং তু তত্ৰ কুধিযোঽপৰ ঈশ কুৰ্যুঃ ।
কৰ্তুঃ প্ৰভোস্তৱ কিমস্যত আৱহন্তি
ত্যক্তহ্ৰিযস্ত্ৱদৱৰোপিতকৰ্তৃৱাদাঃ ॥ ২০ ॥

শ্ৰীব্ৰহ্মোৱাচ
ভূতভাৱন ভূতেশ দেৱদেৱ জগন্ময ।
মুঞ্চৈনং হৃতসৰ্ৱস্ৱং নাযমৰ্হতি নিগ্ৰহম্ ॥ ২১ ॥

কৃত্স্না তেঽনেন দত্তা ভূৰ্লোকাঃ কৰ্মাৰ্জিতাশ্চ যে ।
নিৱেদিতং চ সৰ্ৱস্ৱমাত্মাৱিক্লৱযা ধিযা ॥ ২২ ॥

যত্পাদযোৰশঠধীঃ সলিলং প্ৰদায
দূৰ্ৱাঙ্কুৰৈৰপি ৱিধায সতীং সপৰ্যাম্ ।
অপ্যুত্তমাং গতিমসৌ ভজতে ত্ৰিলোকীং
দাশ্ৱানৱিক্লৱমনাঃ কথমাৰ্তিমৃচ্ছেত্ ॥ ২৩ ॥

শ্ৰীভগৱানুৱাচ
ব্ৰহ্মন্ যমনুগৃহ্ণামি তদ্ৱিশো ৱিধুনোম্যহম্ ।
যন্মদঃ পুৰুষঃ স্তব্ধো লোকং মাং চাৱমন্যতে ॥ ২৪ ॥

যদা কদাচিজ্জীৱাত্মা সংসৰন্ নিজকৰ্মভিঃ ।
নানাযোনিষ্ৱনীশোঽযং পৌৰুষীং গতিমাৱ্ৰজেত্ ॥ ২৫ ॥

জন্মকৰ্মৱযোৰূপৱিদ্যৈশ্ৱৰ্যধনাদিভিঃ ।
যদ্যস্য ন ভৱেত্ স্তম্ভস্তত্ৰাযং মদনুগ্ৰহঃ ॥ ২৬ ॥

মানস্তম্ভনিমিত্তানাং জন্মাদীনাং সমন্ততঃ ।
সৰ্ৱশ্ৰেযঃপ্ৰতীপানাং হন্ত মুহ্যেন্ন মত্পৰঃ ॥ ২৭ ॥

এষ দানৱদৈত্যানামগ্ৰণীঃ কীৰ্তিৱৰ্ধনঃ ।
অজৈষীদজযাং মাযাং সীদন্নপি ন মুহ্যতি ॥ ২৮ ॥

ক্ষীণৰিক্থশ্চ্যুতঃ স্থানাত্ ক্ষিপ্তো বদ্ধশ্চ শত্ৰুভিঃ ।
জ্ঞাতিভিশ্চ পৰিত্যক্তো যাতনামনুযাপিতঃ ॥ ২৯ ॥

গুৰুণা ভৰ্ত্সিতঃ শপ্তো জহৌ সত্যং ন সুৱ্ৰতঃ ।
ছলৈৰুক্তো মযা ধৰ্মো নাযং ত্যজতি সত্যৱাক্ ॥ ৩০ ॥

এষ মে প্ৰাপিতঃ স্থানং দুষ্প্ৰাপমমৰৈৰপি ।
সাৱৰ্ণেৰন্তৰস্যাযং ভৱিতেন্দ্ৰো মদাশ্ৰযঃ ॥ ৩১ ॥

তাৱত্ সুতলমধ্যাস্তাং ৱিশ্ৱকৰ্মৱিনিৰ্মিতম্ ।
যদাধযো ৱ্যাধযশ্চ ক্লমস্তন্দ্ৰা পৰাভৱঃ ।
নোপসৰ্গা নিৱসতাং সম্ভৱন্তি মমেক্ষযা ॥ ৩২ ॥

ইন্দ্ৰসেন মহাৰাজ যাহি ভো ভদ্ৰমস্তু তে ।
সুতলং স্ৱৰ্গিভিঃ প্ৰাৰ্থ্যং জ্ঞাতিভিঃ পৰিৱাৰিতঃ ॥ ৩৩ ॥

ন ত্ৱামভিভৱিষ্যন্তি লোকেশাঃ কিমুতাপৰে ।
ত্ৱচ্ছাসনাতিগান্ দৈত্যাংশ্চক্ৰং মে সূদযিষ্যতি ॥ ৩৪ ॥

ৰক্ষিষ্যে সৰ্ৱতোঽহং ত্ৱাং সানুগং সপৰিচ্ছদম্ ।
সদা সন্নিহিতং ৱীৰ তত্ৰ মাং দ্ৰক্ষ্যতে ভৱান্ ॥ ৩৫ ॥

তত্ৰ দানৱদৈত্যানাং সঙ্গাত্তে ভাৱ আসুৰঃ ।
দৃষ্ট্ৱা মদনুভাৱং ৱৈ সদ্যঃ কুণ্ঠো ৱিনঙ্ক্ষ্যতি ॥ ৩৬ ॥