শ্রীমদ্ভাগবতম্ ৮.২২

শ্রীশুক উবাচ
এবং বিপ্রকৃতো রাজন্ বলির্ভগবতাসুরঃ ।
ভিদ্যমানোঽপ্যভিন্নাত্মা প্রত্যাহাবিক্লবং বচঃ ॥ ১ ॥

শ্রীবলিরুবাচ
যদ্যুত্তমশ্লোক ভবান্ মমেরিতং
বচো ব্যলীকং সুরবর্য মন্যতে ।
করোম্যৃতং তন্ন ভবেত্ প্রলম্ভনং
পদং তৃতীযং কুরু শীর্ষ্ণি মে নিজম্ ॥ ২ ॥

বিভেমি নাহং নিরযাত্ পদচ্যুতো
ন পাশবন্ধাদ্ ব্যসনাদ্ দুরত্যযাত্ ।
নৈবার্থকৃচ্ছ্রাদ্ ভবতো বিনিগ্রহা-
দসাধুবাদাদ্ ভৃশমুদ্বিজে যথা ॥ ৩ ॥

পুংসাং শ্লাঘ্যতমং মন্যে দণ্ডমর্হত্তমার্পিতম্ ।
যং ন মাতা পিতা ভ্রাতা সুহৃদশ্চাদিশন্তি হি ॥ ৪ ॥

ত্বং নূনমসুরাণাং নঃ পরোক্ষঃ পরমো গুরুঃ ।
যো নোঽনেকমদান্ধানাং বিভ্রংশং চক্ষুরাদিশত্ ॥ ৫ ॥

যস্মিন্ বৈরানুবন্ধেন ব্যূঢেন বিবুধেতরাঃ ।
বহবো লেভিরে সিদ্ধিং যামু হৈকান্তযোগিনঃ ॥ ৬ ॥

তেনাহং নিগৃহীতোঽস্মি ভবতা ভূরিকর্মণা ।
বদ্ধশ্চ বারুণৈঃ পাশৈর্নাতিব্রীডে ন চ ব্যথে ॥ ৭ ॥

পিতামহো মে ভবদীযসম্মতঃ
প্রহ্লাদ আবিষ্কৃতসাধুবাদঃ ।
ভবদ্বিপক্ষেণ বিচিত্রবৈশসং
সম্প্রাপিতস্ত্বং পরমঃ স্বপিত্রা ॥ ৮ ॥

কিমাত্মনানেন জহাতি যোঽন্ততঃ
কিং রিক্থহারৈঃ স্বজনাখ্যদস্যুভিঃ ।
কিং জাযযা সংসৃতিহেতুভূতযা
মর্ত্যস্য গেহৈঃ কিমিহাযুষো ব্যযঃ ॥ ৯ ॥

ইত্থং স নিশ্চিত্য পিতামহো মহা-
নগাধবোধো ভবতঃ পাদপদ্মম্ ।
ধ্রুবং প্রপেদে হ্যকুতোভযং জনাদ্
ভীতঃ স্বপক্ষক্ষপণস্য সত্তম ॥ ১০ ॥

অথাহমপ্যাত্মরিপোস্তবান্তিকং
দৈবেন নীতঃ প্রসভং ত্যাজিতশ্রীঃ ।
ইদং কৃতান্তান্তিকবর্তি জীবিতং
যযাধ্রুবং স্তব্ধমতির্ন বুধ্যতে ॥ ১১ ॥

শ্রীশুক উবাচ
তস্যেত্থং ভাষমাণস্য প্রহ্লাদো ভগবত্প্রিযঃ ।
আজগাম কুরুশ্রেষ্ঠ রাকাপতিরিবোত্থিতঃ ॥ ১২ ॥

তমিন্দ্রসেনঃ স্বপিতামহং শ্রিযা
বিরাজমানং নলিনাযতেক্ষণম্ ।
প্রাংশুং পিশঙ্গাম্বরমঞ্জনত্বিষং
প্রলম্ববাহুং শুভগর্ষভমৈক্ষত ॥ ১৩ ॥

তস্মৈ বলির্বারুণপাশযন্ত্রিতঃ
সমর্হণং নোপজহার পূর্ববত্ ।
ননাম মূর্ধ্নাশ্রুবিলোললোচনঃ
সব্রীডনীচীনমুখো বভূব হ ॥ ১৪ ॥

স তত্র হাসীনমুদীক্ষ্য সত্পতিং
হরিং সুনন্দাদ্যনুগৈরুপাসিতম্ ।
উপেত্য ভূমৌ শিরসা মহামনা
ননাম মূর্ধ্না পুলকাশ্রুবিক্লবঃ ॥ ১৫ ॥

শ্রীপ্রহ্লাদ উবাচ
ত্বযৈব দত্তং পদমৈন্দ্রমূর্জিতং
হৃতং তদেবাদ্য তথৈব শোভনম্ ।
মন্যে মহানস্য কৃতো হ্যনুগ্রহো
বিভ্রংশিতো যচ্ছ্রিয আত্মমোহনাত্ ॥ ১৬ ॥

যযা হি বিদ্বানপি মুহ্যতে যত-
স্তত্ কো বিচষ্টে গতিমাত্মনো যথা ।
তস্মৈ নমস্তে জগদীশ্বরায বৈ
নারাযণাযাখিললোকসাক্ষিণে ॥ ১৭ ॥

শ্রীশুক উবাচ
তস্যানুশৃণ্বতো রাজন্ প্রহ্লাদস্য কৃতাঞ্জলেঃ ।
হিরণ্যগর্ভো ভগবানুবাচ মধুসূদনম্ ॥ ১৮ ॥

বদ্ধং বীক্ষ্য পতিং সাধ্বী তত্পত্নী ভযবিহ্বলা ।
প্রাঞ্জলিঃ প্রণতোপেন্দ্রং বভাষেঽবাঙ্মুখী নৃপ ॥ ১৯ ॥

শ্রীবিন্ধ্যাবলিরুবাচ
ক্রীডার্থমাত্মন ইদং ত্রিজগত্ কৃতং তে
স্বাম্যং তু তত্র কুধিযোঽপর ঈশ কুর্যুঃ ।
কর্তুঃ প্রভোস্তব কিমস্যত আবহন্তি
ত্যক্তহ্রিযস্ত্বদবরোপিতকর্তৃবাদাঃ ॥ ২০ ॥

শ্রীব্রহ্মোবাচ
ভূতভাবন ভূতেশ দেবদেব জগন্ময ।
মুঞ্চৈনং হৃতসর্বস্বং নাযমর্হতি নিগ্রহম্ ॥ ২১ ॥

কৃত্স্না তেঽনেন দত্তা ভূর্লোকাঃ কর্মার্জিতাশ্চ যে ।
নিবেদিতং চ সর্বস্বমাত্মাবিক্লবযা ধিযা ॥ ২২ ॥

যত্পাদযোরশঠধীঃ সলিলং প্রদায
দূর্বাঙ্কুরৈরপি বিধায সতীং সপর্যাম্ ।
অপ্যুত্তমাং গতিমসৌ ভজতে ত্রিলোকীং
দাশ্বানবিক্লবমনাঃ কথমার্তিমৃচ্ছেত্ ॥ ২৩ ॥

শ্রীভগবানুবাচ
ব্রহ্মন্ যমনুগৃহ্ণামি তদ্বিশো বিধুনোম্যহম্ ।
যন্মদঃ পুরুষঃ স্তব্ধো লোকং মাং চাবমন্যতে ॥ ২৪ ॥

যদা কদাচিজ্জীবাত্মা সংসরন্ নিজকর্মভিঃ ।
নানাযোনিষ্বনীশোঽযং পৌরুষীং গতিমাব্রজেত্ ॥ ২৫ ॥

জন্মকর্মবযোরূপবিদ্যৈশ্বর্যধনাদিভিঃ ।
যদ্যস্য ন ভবেত্ স্তম্ভস্তত্রাযং মদনুগ্রহঃ ॥ ২৬ ॥

মানস্তম্ভনিমিত্তানাং জন্মাদীনাং সমন্ততঃ ।
সর্বশ্রেযঃপ্রতীপানাং হন্ত মুহ্যেন্ন মত্পরঃ ॥ ২৭ ॥

এষ দানবদৈত্যানামগ্রণীঃ কীর্তিবর্ধনঃ ।
অজৈষীদজযাং মাযাং সীদন্নপি ন মুহ্যতি ॥ ২৮ ॥

ক্ষীণরিক্থশ্চ্যুতঃ স্থানাত্ ক্ষিপ্তো বদ্ধশ্চ শত্রুভিঃ ।
জ্ঞাতিভিশ্চ পরিত্যক্তো যাতনামনুযাপিতঃ ॥ ২৯ ॥

গুরুণা ভর্ত্সিতঃ শপ্তো জহৌ সত্যং ন সুব্রতঃ ।
ছলৈরুক্তো মযা ধর্মো নাযং ত্যজতি সত্যবাক্ ॥ ৩০ ॥

এষ মে প্রাপিতঃ স্থানং দুষ্প্রাপমমরৈরপি ।
সাবর্ণেরন্তরস্যাযং ভবিতেন্দ্রো মদাশ্রযঃ ॥ ৩১ ॥

তাবত্ সুতলমধ্যাস্তাং বিশ্বকর্মবিনির্মিতম্ ।
যদাধযো ব্যাধযশ্চ ক্লমস্তন্দ্রা পরাভবঃ ।
নোপসর্গা নিবসতাং সম্ভবন্তি মমেক্ষযা ॥ ৩২ ॥

ইন্দ্রসেন মহারাজ যাহি ভো ভদ্রমস্তু তে ।
সুতলং স্বর্গিভিঃ প্রার্থ্যং জ্ঞাতিভিঃ পরিবারিতঃ ॥ ৩৩ ॥

ন ত্বামভিভবিষ্যন্তি লোকেশাঃ কিমুতাপরে ।
ত্বচ্ছাসনাতিগান্ দৈত্যাংশ্চক্রং মে সূদযিষ্যতি ॥ ৩৪ ॥

রক্ষিষ্যে সর্বতোঽহং ত্বাং সানুগং সপরিচ্ছদম্ ।
সদা সন্নিহিতং বীর তত্র মাং দ্রক্ষ্যতে ভবান্ ॥ ৩৫ ॥

তত্র দানবদৈত্যানাং সঙ্গাত্তে ভাব আসুরঃ ।
দৃষ্ট্বা মদনুভাবং বৈ সদ্যঃ কুণ্ঠো বিনঙ্ক্ষ্যতি ॥ ৩৬ ॥