శ్రీమద్భాగవతమ్ ౮.౨౨

శ్రీశుక ఉవాచ
ఏవం విప్రకృతో రాజన్ బలిర్భగవతాసురః ।
భిద్యమానోఽప్యభిన్నాత్మా ప్రత్యాహావిక్లవం వచః ॥ ౧ ॥

శ్రీబలిరువాచ
యద్యుత్తమశ్లోక భవాన్ మమేరితం
వచో వ్యలీకం సురవర్య మన్యతే ।
కరోమ్యృతం తన్న భవేత్ ప్రలమ్భనం
పదం తృతీయం కురు శీర్ష్ణి మే నిజమ్ ॥ ౨ ॥

బిభేమి నాహం నిరయాత్ పదచ్యుతో
న పాశబన్ధాద్ వ్యసనాద్ దురత్యయాత్ ।
నైవార్థకృచ్ఛ్రాద్ భవతో వినిగ్రహా-
దసాధువాదాద్ భృశముద్విజే యథా ॥ ౩ ॥

పుంసాం శ్లాఘ్యతమం మన్యే దణ్డమర్హత్తమార్పితమ్ ।
యం న మాతా పితా భ్రాతా సుహృదశ్చాదిశన్తి హి ॥ ౪ ॥

త్వం నూనమసురాణాం నః పరోక్షః పరమో గురుః ।
యో నోఽనేకమదాన్ధానాం విభ్రంశం చక్షురాదిశత్ ॥ ౫ ॥

యస్మిన్ వైరానుబన్ధేన వ్యూఢేన విబుధేతరాః ।
బహవో లేభిరే సిద్ధిం యాము హైకాన్తయోగినః ॥ ౬ ॥

తేనాహం నిగృహీతోఽస్మి భవతా భూరికర్మణా ।
బద్ధశ్చ వారుణైః పాశైర్నాతివ్రీడే న చ వ్యథే ॥ ౭ ॥

పితామహో మే భవదీయసమ్మతః
ప్రహ్లాద ఆవిష్కృతసాధువాదః ।
భవద్విపక్షేణ విచిత్రవైశసం
సమ్ప్రాపితస్త్వం పరమః స్వపిత్రా ॥ ౮ ॥

కిమాత్మనానేన జహాతి యోఽన్తతః
కిం రిక్థహారైః స్వజనాఖ్యదస్యుభిః ।
కిం జాయయా సంసృతిహేతుభూతయా
మర్త్యస్య గేహైః కిమిహాయుషో వ్యయః ॥ ౯ ॥

ఇత్థం స నిశ్చిత్య పితామహో మహా-
నగాధబోధో భవతః పాదపద్మమ్ ।
ధ్రువం ప్రపేదే హ్యకుతోభయం జనాద్
భీతః స్వపక్షక్షపణస్య సత్తమ ॥ ౧౦ ॥

అథాహమప్యాత్మరిపోస్తవాన్తికం
దైవేన నీతః ప్రసభం త్యాజితశ్రీః ।
ఇదం కృతాన్తాన్తికవర్తి జీవితం
యయాధ్రువం స్తబ్ధమతిర్న బుధ్యతే ॥ ౧౧ ॥

శ్రీశుక ఉవాచ
తస్యేత్థం భాషమాణస్య ప్రహ్లాదో భగవత్ప్రియః ।
ఆజగామ కురుశ్రేష్ఠ రాకాపతిరివోత్థితః ॥ ౧౨ ॥

తమిన్ద్రసేనః స్వపితామహం శ్రియా
విరాజమానం నలినాయతేక్షణమ్ ।
ప్రాంశుం పిశఙ్గామ్బరమఞ్జనత్విషం
ప్రలమ్బబాహుం శుభగర్షభమైక్షత ॥ ౧౩ ॥

తస్మై బలిర్వారుణపాశయన్త్రితః
సమర్హణం నోపజహార పూర్వవత్ ।
ననామ మూర్ధ్నాశ్రువిలోలలోచనః
సవ్రీడనీచీనముఖో బభూవ హ ॥ ౧౪ ॥

స తత్ర హాసీనముదీక్ష్య సత్పతిం
హరిం సునన్దాద్యనుగైరుపాసితమ్ ।
ఉపేత్య భూమౌ శిరసా మహామనా
ననామ మూర్ధ్నా పులకాశ్రువిక్లవః ॥ ౧౫ ॥

శ్రీప్రహ్లాద ఉవాచ
త్వయైవ దత్తం పదమైన్ద్రమూర్జితం
హృతం తదేవాద్య తథైవ శోభనమ్ ।
మన్యే మహానస్య కృతో హ్యనుగ్రహో
విభ్రంశితో యచ్ఛ్రియ ఆత్మమోహనాత్ ॥ ౧౬ ॥

యయా హి విద్వానపి ముహ్యతే యత-
స్తత్ కో విచష్టే గతిమాత్మనో యథా ।
తస్మై నమస్తే జగదీశ్వరాయ వై
నారాయణాయాఖిలలోకసాక్షిణే ॥ ౧౭ ॥

శ్రీశుక ఉవాచ
తస్యానుశృణ్వతో రాజన్ ప్రహ్లాదస్య కృతాఞ్జలేః ।
హిరణ్యగర్భో భగవానువాచ మధుసూదనమ్ ॥ ౧౮ ॥

బద్ధం వీక్ష్య పతిం సాధ్వీ తత్పత్నీ భయవిహ్వలా ।
ప్రాఞ్జలిః ప్రణతోపేన్ద్రం బభాషేఽవాఙ్ముఖీ నృప ॥ ౧౯ ॥

శ్రీవిన్ధ్యావలిరువాచ
క్రీడార్థమాత్మన ఇదం త్రిజగత్ కృతం తే
స్వామ్యం తు తత్ర కుధియోఽపర ఈశ కుర్యుః ।
కర్తుః ప్రభోస్తవ కిమస్యత ఆవహన్తి
త్యక్తహ్రియస్త్వదవరోపితకర్తృవాదాః ॥ ౨౦ ॥

శ్రీబ్రహ్మోవాచ
భూతభావన భూతేశ దేవదేవ జగన్మయ ।
ముఞ్చైనం హృతసర్వస్వం నాయమర్హతి నిగ్రహమ్ ॥ ౨౧ ॥

కృత్స్నా తేఽనేన దత్తా భూర్లోకాః కర్మార్జితాశ్చ యే ।
నివేదితం చ సర్వస్వమాత్మావిక్లవయా ధియా ॥ ౨౨ ॥

యత్పాదయోరశఠధీః సలిలం ప్రదాయ
దూర్వాఙ్కురైరపి విధాయ సతీం సపర్యామ్ ।
అప్యుత్తమాం గతిమసౌ భజతే త్రిలోకీం
దాశ్వానవిక్లవమనాః కథమార్తిమృచ్ఛేత్ ॥ ౨౩ ॥

శ్రీభగవానువాచ
బ్రహ్మన్ యమనుగృహ్ణామి తద్విశో విధునోమ్యహమ్ ।
యన్మదః పురుషః స్తబ్ధో లోకం మాం చావమన్యతే ॥ ౨౪ ॥

యదా కదాచిజ్జీవాత్మా సంసరన్ నిజకర్మభిః ।
నానాయోనిష్వనీశోఽయం పౌరుషీం గతిమావ్రజేత్ ॥ ౨౫ ॥

జన్మకర్మవయోరూపవిద్యైశ్వర్యధనాదిభిః ।
యద్యస్య న భవేత్ స్తమ్భస్తత్రాయం మదనుగ్రహః ॥ ౨౬ ॥

మానస్తమ్భనిమిత్తానాం జన్మాదీనాం సమన్తతః ।
సర్వశ్రేయఃప్రతీపానాం హన్త ముహ్యేన్న మత్పరః ॥ ౨౭ ॥

ఏష దానవదైత్యానామగ్రణీః కీర్తివర్ధనః ।
అజైషీదజయాం మాయాం సీదన్నపి న ముహ్యతి ॥ ౨౮ ॥

క్షీణరిక్థశ్చ్యుతః స్థానాత్ క్షిప్తో బద్ధశ్చ శత్రుభిః ।
జ్ఞాతిభిశ్చ పరిత్యక్తో యాతనామనుయాపితః ॥ ౨౯ ॥

గురుణా భర్త్సితః శప్తో జహౌ సత్యం న సువ్రతః ।
ఛలైరుక్తో మయా ధర్మో నాయం త్యజతి సత్యవాక్ ॥ ౩౦ ॥

ఏష మే ప్రాపితః స్థానం దుష్ప్రాపమమరైరపి ।
సావర్ణేరన్తరస్యాయం భవితేన్ద్రో మదాశ్రయః ॥ ౩౧ ॥

తావత్ సుతలమధ్యాస్తాం విశ్వకర్మవినిర్మితమ్ ।
యదాధయో వ్యాధయశ్చ క్లమస్తన్ద్రా పరాభవః ।
నోపసర్గా నివసతాం సమ్భవన్తి మమేక్షయా ॥ ౩౨ ॥

ఇన్ద్రసేన మహారాజ యాహి భో భద్రమస్తు తే ।
సుతలం స్వర్గిభిః ప్రార్థ్యం జ్ఞాతిభిః పరివారితః ॥ ౩౩ ॥

న త్వామభిభవిష్యన్తి లోకేశాః కిముతాపరే ।
త్వచ్ఛాసనాతిగాన్ దైత్యాంశ్చక్రం మే సూదయిష్యతి ॥ ౩౪ ॥

రక్షిష్యే సర్వతోఽహం త్వాం సానుగం సపరిచ్ఛదమ్ ।
సదా సన్నిహితం వీర తత్ర మాం ద్రక్ష్యతే భవాన్ ॥ ౩౫ ॥

తత్ర దానవదైత్యానాం సఙ్గాత్తే భావ ఆసురః ।
దృష్ట్వా మదనుభావం వై సద్యః కుణ్ఠో వినఙ్క్ష్యతి ॥ ౩౬ ॥