শ্রীমদ্ভাগবতম্ ৮.৭

শ্রীশুক উবাচ
তে নাগরাজমামন্ত্র্য ফলভাগেন বাসুকিম্ ।
পরিবীয গিরৌ তস্মিন্ নেত্রমব্ধিং মুদান্বিতাঃ ।
আরেভিরে সুরা যত্তা অমৃতার্থে কুরূদ্বহ ॥ ১ ॥

হরিঃ পুরস্তাজ্জগৃহে পূর্বং দেবাস্ততোঽভবন্ ॥ ২ ॥

তন্নৈচ্ছন্ দৈত্যপতযো মহাপুরুষচেষ্টিতম্ ।
ন গৃহ্ণীমো বযং পুচ্ছমহেরঙ্গমমঙ্গলম্ ।
স্বাধ্যাযশ্রুতসম্পন্নাঃ প্রখ্যাতা জন্মকর্মভিঃ ॥ ৩ ॥

ইতি তূষ্ণীং স্থিতান্দৈত্যান্ বিলোক্য পুরুষোত্তমঃ ।
স্মযমানো বিসৃজ্যাগ্রং পুচ্ছং জগ্রাহ সামরঃ ॥ ৪ ॥

কৃতস্থানবিভাগাস্ত এবং কশ্যপনন্দনাঃ ।
মমন্থুঃ পরমং যত্তা অমৃতার্থং পযোনিধিম্ ॥ ৫ ॥

মথ্যমানেঽর্ণবে সোঽদ্রিরনাধারো হ্যপোঽবিশত্ ।
ধ্রিযমাণোঽপি বলিভির্গৌরবাত্ পাণ্ডুনন্দন ॥ ৬ ॥

তে সুনির্বিণ্ণমনসঃ পরিম্লানমুখশ্রিযঃ ।
আসন্ স্বপৌরুষে নষ্টে দৈবেনাতিবলীযসা ॥ ৭ ॥

বিলোক্য বিঘ্নেশবিধিং তদেশ্বরো
দুরন্তবীর্যোঽবিতথাভিসন্ধিঃ ।
কৃত্বা বপুঃ কচ্ছপমদ্ভুতং মহত্
প্রবিশ্য তোযং গিরিমুজ্জহার ॥ ৮ ॥

তমুত্থিতং বীক্ষ্য কুলাচলং পুনঃ
সমুদ্যতা নির্মথিতুং সুরাসুরাঃ ।
দধার পৃষ্ঠেন স লক্ষযোজন-
প্রস্তারিণা দ্বীপ ইবাপরো মহান্ ॥ ৯ ॥

সুরাসুরেন্দ্রৈর্ভুজবীর্যবেপিতং
পরিভ্রমন্তং গিরিমঙ্গ পৃষ্ঠতঃ ।
বিভ্রত্ তদাবর্তনমাদিকচ্ছপো
মেনেঽঙ্গকণ্ডূযনমপ্রমেযঃ ॥ ১০ ॥

তথাসুরানাবিশদাসুরেণ
রূপেণ তেষাং বলবীর্যমীরযন্ ।
উদ্দীপযন্ দেবগণাংশ্চ বিষ্ণু-
র্দৈবেন নাগেন্দ্রমবোধরূপঃ ॥ ১১ ॥

উপর্যগেন্দ্রং গিরিরাডিবান্য
আক্রম্য হস্তেন সহস্রবাহুঃ ।
তস্থৌ দিবি ব্রহ্মভবেন্দ্রমুখ্যৈ-
রভিষ্টুবদ্ভিঃ সুমনোঽভিবৃষ্টঃ ॥ ১২ ॥

উপর্যধশ্চাত্মনি গোত্রনেত্রযোঃ
পরেণ তে প্রাবিশতা সমেধিতাঃ ।
মমন্থুরব্ধিং তরসা মদোত্কটা
মহাদ্রিণা ক্ষোভিতনক্রচক্রম্ ॥ ১৩ ॥

অহীন্দ্রসাহস্রকঠোরদৃঙ্মুখ-
শ্বাসাগ্নিধূমাহতবর্চসোঽসুরাঃ ।
পৌলোমকালেযবলীল্বলাদযো
দবাগ্নিদগ্ধাঃ সরলা ইবাভবন্ ॥ ১৪ ॥

দেবাংশ্চ তচ্ছ্বাসশিখাহতপ্রভান্
ধূম্রাম্বরস্রগ্বরকঞ্চুকাননান্ ।
সমভ্যবর্ষন্ভগবদ্বশা ঘনা
ববুঃ সমুদ্রোর্ম্যুপগূঢবাযবঃ ॥ ১৫ ॥

মথ্যমানাত্ তথা সিন্ধোর্দেবাসুরবরূথপৈঃ ।
যদা সুধা ন জাযেত নির্মমন্থাজিতঃ স্বযম্ ॥ ১৬ ॥

মেঘশ্যামঃ কনকপরিধিঃ কর্ণবিদ্যোতবিদ্যু-
ন্মূর্ধ্নি ভ্রাজদ্বিলুলিতকচঃ স্রগ্ধরো রক্তনেত্রঃ ।
জৈত্রৈর্দোর্ভির্জগদভযদৈর্দন্দশূকং গৃহীত্বা
মথ্নন্ মথ্না প্রতিগিরিরিবাশোভতাথো ধৃতাদ্রিঃ ॥ ১৭ ॥

নির্মথ্যমানাদুদধেরভূদ্বিষং
মহোল্বণং হালহলাহ্বমগ্রতঃ ।
সম্ভ্রান্তমীনোন্মকরাহিকচ্ছপাত্
তিমিদ্বিপগ্রাহতিমিঙ্গিলাকুলাত্ ॥ ১৮ ॥

তদুগ্রবেগং দিশি দিশ্যুপর্যধো
বিসর্পদুত্সর্পদসহ্যমপ্রতি ।
ভীতাঃ প্রজা দুদ্রুবুরঙ্গ সেশ্বরা
অরক্ষ্যমাণাঃ শরণং সদাশিবম্ ॥ ১৯ ॥

বিলোক্য তং দেববরং ত্রিলোক্যা
ভবায দেব্যাভিমতং মুনীনাম্ ।
আসীনমদ্রাবপবর্গহেতো-
স্তপো জুষাণং স্তুতিভিঃ প্রণেমুঃ ॥ ২০ ॥

শ্রীপ্রজাপতয ঊচুঃ
দেবদেব মহাদেব ভূতাত্মন্ ভূতভাবন ।
ত্রাহি নঃ শরণাপন্নাংস্ত্রৈলোক্যদহনাদ্ বিষাত্ ॥ ২১ ॥

ত্বমেকঃ সর্বজগত ঈশ্বরো বন্ধমোক্ষযোঃ ।
তং ত্বামর্চন্তি কুশলাঃ প্রপন্নার্তিহরং গুরুম্ ॥ ২২ ॥

গুণময্যা স্বশক্ত্যাস্য সর্গস্থিত্যপ্যযান্বিভো ।
ধত্সে যদা স্বদৃগ্ ভূমন্ব্রহ্মবিষ্ণুশিবাভিধাম্ ॥ ২৩ ॥

ত্বং ব্রহ্ম পরমং গুহ্যং সদসদ্ভাবভাবনম্ ।
নানাশক্তিভিরাভাতস্ত্বমাত্মা জগদীশ্বরঃ ॥ ২৪ ॥

ত্বং শব্দযোনির্জগদাদিরাত্মা
প্রাণেন্দ্রিযদ্রব্যগুণঃ স্বভাবঃ ।
কালঃ ক্রতুঃ সত্যমৃতং চ ধর্ম-
স্ত্বয্যক্ষরং যত্ ত্রিবৃদামনন্তি ॥ ২৫ ॥

অগ্নির্মুখং তেঽখিলদেবতাত্মা
ক্ষিতিং বিদুর্লোকভবাঙ্ঘ্রিপঙ্কজম্ ।
কালং গতিং তেঽখিলদেবতাত্মনো
দিশশ্চ কর্ণৌ রসনং জলেশম্ ॥ ২৬ ॥

নাভির্নভস্তে শ্বসনং নভস্বান্
সূর্যশ্চ চক্ষূংষি জলং স্ম রেতঃ ।
পরাবরাত্মাশ্রযণং তবাত্মা
সোমো মনো দ্যৌর্ভগবন্ শিরস্তে ॥ ২৭ ॥

কুক্ষিঃ সমুদ্রা গিরযোঽস্থিসঙ্ঘা
রোমাণি সর্বৌষধিবীরুধস্তে ।
ছন্দাংসি সাক্ষাত্ তব সপ্ত ধাতব-
স্ত্রযীমযাত্মন্ হৃদযং সর্বধর্মঃ ॥ ২৮ ॥

মুখানি পঞ্চোপনিষদস্তবেশ
যৈস্ত্রিংশদষ্টোত্তরমন্ত্রবর্গঃ ।
যত্ তচ্ছিবাখ্যং পরমাত্মতত্ত্বং
দেব স্বযংজ্যোতিরবস্থিতিস্তে ॥ ২৯ ॥

ছাযা ত্বধর্মোর্মিষু যৈর্বিসর্গো
নেত্রত্রযং সত্ত্বরজস্তমাংসি ।
সাঙ্খ্যাত্মনঃ শাস্ত্রকৃতস্তবেক্ষা
ছন্দোমযো দেব ঋষিঃ পুরাণঃ ॥ ৩০ ॥

ন তে গিরিত্রাখিললোকপাল-
বিরিঞ্চবৈকুণ্ঠসুরেন্দ্রগম্যম্ ।
জ্যোতিঃ পরং যত্র রজস্তমশ্চ
সত্ত্বং ন যদ্ ব্রহ্ম নিরস্তভেদম্ ॥ ৩১ ॥

কামাধ্বরত্রিপুরকালগরাদ্যনেক-
ভূতদ্রুহঃ ক্ষপযতঃ স্তুতযে ন তত্ তে ।
যস্ত্বন্তকাল ইদমাত্মকৃতং স্বনেত্র-
বহ্নিস্ফুলিঙ্গশিখযা ভসিতং ন বেদ ॥ ৩২ ॥

যে ত্বাত্মরামগুরুভির্হৃদি চিন্তিতাঙ্ঘ্রি-
দ্বন্দ্বং চরন্তমুমযা তপসাভিতপ্তম্ ।
কত্থন্ত উগ্রপরুষং নিরতং শ্মশানে
তে নূনমূতিমবিদংস্তব হাতলজ্জাঃ ॥ ৩৩ ॥

তত্ তস্য তে সদসতোঃ পরতঃ পরস্য
নাঞ্জঃ স্বরূপগমনে প্রভবন্তি ভূম্নঃ ।
ব্রহ্মাদযঃ কিমুত সংস্তবনে বযং তু
তত্সর্গসর্গবিষযা অপি শক্তিমাত্রম্ ॥ ৩৪ ॥

এতত্ পরং প্রপশ্যামো ন পরং তে মহেশ্বর ।
মৃডনায হি লোকস্য ব্যক্তিস্তেঽব্যক্তকর্মণঃ ॥ ৩৫ ॥

শ্রীশুক উবাচ
তদ্বীক্ষ্য ব্যসনং তাসাং কৃপযা ভৃশপীডিতঃ ।
সর্বভূতসুহৃদ্ দেব ইদমাহ সতীং প্রিযাম্ ॥ ৩৬ ॥

শ্রীশিব উবাচ
অহো বত ভবান্যেতত্ প্রজানাং পশ্য বৈশসম্ ।
ক্ষীরোদমথনোদ্ভূতাত্ কালকূটাদুপস্থিতম্ ॥ ৩৭ ॥

আসাং প্রাণপরীপ্সূনাং বিধেযমভযং হি মে ।
এতাবান্হি প্রভোরর্থো যদ্ দীনপরিপালনম্ ॥ ৩৮ ॥

প্রাণৈঃ স্বৈঃ প্রাণিনঃ পান্তি সাধবঃ ক্ষণভঙ্গুরৈঃ ।
বদ্ধবৈরেষু ভূতেষু মোহিতেষ্বাত্মমাযযা ॥ ৩৯ ॥

পুংসঃ কৃপযতো ভদ্রে সর্বাত্মা প্রীযতে হরিঃ ।
প্রীতে হরৌ ভগবতি প্রীযেঽহং সচরাচরঃ ।
তস্মাদিদং গরং ভুঞ্জে প্রজানাং স্বস্তিরস্তু মে ॥ ৪০ ॥

শ্রীশুক উবাচ
এবমামন্ত্র্য ভগবান্ভবানীং বিশ্বভাবনঃ ।
তদ্ বিষং জগ্ধুমারেভে প্রভাবজ্ঞান্বমোদত ॥ ৪১ ॥

ততঃ করতলীকৃত্য ব্যাপি হালাহলং বিষম্ ।
অভক্ষযন্মহাদেবঃ কৃপযা ভূতভাবনঃ ॥ ৪২ ॥

তস্যাপি দর্শযামাস স্ববীর্যং জলকল্মষঃ ।
যচ্চকার গলে নীলং তচ্চ সাধোর্বিভূষণম্ ॥ ৪৩ ॥

তপ্যন্তে লোকতাপেন সাধবঃ প্রাযশো জনাঃ ।
পরমারাধনং তদ্ধি পুরুষস্যাখিলাত্মনঃ ॥ ৪৪ ॥

নিশম্য কর্ম তচ্ছম্ভোর্দেবদেবস্য মীঢুষঃ ।
প্রজা দাক্ষাযণী ব্রহ্মা বৈকুণ্ঠশ্চ শশংসিরে ॥ ৪৫ ॥

প্রস্কন্নং পিবতঃ পাণের্যত্ কিঞ্চিজ্জগৃহুঃ স্ম তত্ ।
বৃশ্চিকাহিবিষৌষধ্যো দন্দশূকাশ্চ যেঽপরে ॥ ৪৬ ॥