শ্রীমদ্ভাগবতম্ ৯.২৪

শ্রীশুক উবাচ
তস্যাং বিদর্ভোঽজনযত্ পুত্রৌ নাম্না কুশক্রথৌ ।
তৃতীযং রোমপাদং চ বিদর্ভকুলনন্দনম্ ॥ ১ ॥

রোমপাদসুতো বভ্রুর্বভ্রোঃ কৃতিরজাযত ।
উশিকস্তত্সুতস্তস্মাচ্চেদিশ্চৈদ্যাদযো নৃপাঃ ॥ ২ ॥

ক্রথস্য কুন্তিঃ পুত্রোঽভূদ্বৃষ্ণিস্তস্যাথ নির্বৃতিঃ ।
ততো দশার্হো নাম্নাভূত্ তস্য ব্যোমঃ সুতস্ততঃ ॥ ৩ ॥

জীমূতো বিকৃতিস্তস্য যস্য ভীমরথঃ সুতঃ ।
ততো নবরথঃ পুত্রো জাতো দশরথস্ততঃ ॥ ৪ ॥

করম্ভিঃ শকুনেঃ পুত্রো দেবরাতস্তদাত্মজঃ ।
দেবক্ষত্রস্ততস্তস্য মধুঃ কুরুবশাদনুঃ ॥ ৫ ॥

পুরুহোত্রস্ত্বনোঃ পুত্রস্তস্যাযুঃ সাত্বতস্ততঃ ।
ভজমানো ভজির্দিব্যো বৃষ্ণির্দেবাবৃধোঽন্ধকঃ ॥ ৬ ॥

সাত্বতস্য সুতাঃ সপ্ত মহাভোজশ্চ মারিষ ।
ভজমানস্য নিম্লোচিঃ কিঙ্কণো ধৃষ্টিরেব চ ॥ ৭ ॥

একস্যামাত্মজাঃ পত্ন্যামন্যস্যাং চ ত্রযঃ সুতাঃ ।
শতাজিচ্চ সহস্রাজিদযুতাজিদিতি প্রভো ॥ ৮ ॥

বভ্রুর্দেবাবৃধসুতস্তযোঃ শ্লোকৌ পঠন্ত্যমূ ।
যথৈব শৃণুমো দূরাত্ সম্পশ্যামস্তথান্তিকাত্ ॥ ৯ ॥

বভ্রুঃ শ্রেষ্ঠো মনুষ্যাণাং দেবৈর্দেবাবৃধঃ সমঃ ।
পুরুষাঃ পঞ্চষষ্টিশ্চ ষট্ সহস্রাণি চাষ্ট চ ॥ ১০ ॥

যেঽমৃতত্ত্বমনুপ্রাপ্তা বভ্রোর্দেবাবৃধাদপি ।
মহাভোজোঽতিধর্মাত্মা ভোজা আসংস্তদন্বযে ॥ ১১ ॥

বৃষ্ণেঃ সুমিত্রঃ পুত্রোঽভূদ্ যুধাজিচ্চ পরন্তপ ।
শিনিস্তস্যানমিত্রশ্চ নিঘ্নোঽভূদনমিত্রতঃ ॥ ১২ ॥

সত্রাজিতঃ প্রসেনশ্চ নিঘ্নস্যাথাসতুঃ সুতৌ ।
অনমিত্রসুতো যোঽন্যঃ শিনিস্তস্য চ সত্যকঃ ॥ ১৩ ॥

যুযুধানঃ সাত্যকির্বৈ জযস্তস্য কুণিস্ততঃ ।
যুগন্ধরোঽনমিত্রস্য বৃষ্ণিঃ পুত্রোঽপরস্ততঃ ॥ ১৪ ॥

শ্বফল্কশ্চিত্ররথশ্চ গান্দিন্যাং চ শ্বফল্কতঃ ।
অক্রূরপ্রমুখা আসন্ পুত্রা দ্বাদশ বিশ্রুতাঃ ॥ ১৫ ॥

আসঙ্গঃ সারমেযশ্চ মৃদুরো মৃদুবিদ্ গিরিঃ ।
ধর্মবৃদ্ধঃ সুকর্মা চ ক্ষেত্রোপেক্ষোঽরিমর্দনঃ ॥ ১৬ ॥

শত্রুঘ্নো গন্ধমাদশ্চ প্রতিবাহুশ্চ দ্বাদশ ।
তেষাং স্বসা সুচারাখ্যা দ্বাবক্রূরসুতাবপি ॥ ১৭ ॥

দেববানুপদেবশ্চ তথা চিত্ররথাত্মজাঃ ।
পৃথুর্বিদূরথাদ্যাশ্চ বহবো বৃষ্ণিনন্দনাঃ ॥ ১৮ ॥

কুকুরো ভজমানশ্চ শুচিঃ কম্বলবর্হিষঃ । কুকুরস্য সুতো বহ্নির্বিলোমা তনযস্ততঃ ॥ ১৯ ॥

কপোতরোমা তস্যানুঃ সখা যস্য চ তুম্বুরুঃ । অন্ধকাদ্ দুন্দুভিস্তস্মাদবিদ্যোতঃ পুনর্বসুঃ ॥ ২০ ॥

তস্যাহুকশ্চাহুকী চ কন্যা চৈবাহুকাত্মজৌ । দেবকশ্চোগ্রসেনশ্চ চত্বারো দেবকাত্মজাঃ ॥ ২১ ॥

দেববানুপদেবশ্চ সুদেবো দেববর্ধনঃ । তেষাং স্বসারঃ সপ্তাসন্ ধৃতদেবাদযো নৃপ ॥ ২২ ॥

শান্তিদেবোপদেবা চ শ্রীদেবা দেবরক্ষিতা । সহদেবা দেবকী চ বসুদেব উবাহ তাঃ ॥ ২৩ ॥

কংসঃ সুনামা ন্যগ্রোধঃ কঙ্কঃ শঙ্কুঃ সুহূস্তথা । রাষ্ট্রপালোঽথ ধৃষ্টিশ্চ তুষ্টিমানৌগ্রসেনযঃ ॥ ২৪ ॥

কংসা কংসবতী কঙ্কা শূরভূ রাষ্ট্রপালিকা । উগ্রসেনদুহিতরো বসুদেবানুজস্ত্রিযঃ ॥ ২৫ ॥

শূরো বিদূরথাদাসীদ্ ভজমানস্তু তত্সুতঃ । শিনিস্তস্মাত্ স্বযংভোজো হৃদিকস্তত্সুতো মতঃ ॥ ২৬ ॥

দেবমীঢঃ শতধনুঃ কৃতবর্মেতি তত্সুতাঃ । দেবমীঢস্য শূরস্য মারিষা নাম পত্ন্যভূত্ ॥ ২৭ ॥

তস্যাং স জনযামাস দশ পুত্রানকল্মষান্ । বসুদেবং দেবভাগং দেবশ্রবসমানকম্ ॥ ২৮ ॥

সৃঞ্জযং শ্যামকং কঙ্কং শমীকং বত্সকং বৃকম্ । দেবদুন্দুভযো নেদুরানকা যস্য জন্মনি ॥ ২৯ ॥

বসুদেবং হরেঃ স্থানং বদন্ত্যানকদুন্দুভিম্ । পৃথা চ শ্রুতদেবা চ শ্রুতকীর্তিঃ শ্রুতশ্রবাঃ ॥ ৩০ ॥

রাজাধিদেবী চৈতেষাং ভগিন্যঃ পঞ্চ কন্যকাঃ । কুন্তেঃ সখ্যুঃ পিতা শূরো হ্যপুত্রস্য পৃথামদাত্ ॥ ৩১ ॥

সাপ দুর্বাসসো বিদ্যাং দেবহূতীং প্রতোষিতাত্ । তস্যা বীর্যপরীক্ষার্থমাজুহাব রবিং শুচিঃ ॥ ৩২ ॥

তদৈবোপাগতং দেবং বীক্ষ্য বিস্মিতমানসা । প্রত্যযার্থং প্রযুক্তা মে যাহি দেব ক্ষমস্ব মে ॥ ৩৩ ॥

অমোঘং দেবসন্দর্শমাদধে ত্বযি চাত্মজম্ । যোনির্যথা ন দুষ্যেত কর্তাহং তে সুমধ্যমে ॥ ৩৪ ॥

ইতি তস্যাং স আধায গর্ভং সূর্যো দিবং গতঃ । সদ্যঃ কুমারঃ সঞ্জজ্ঞে দ্বিতীয ইব ভাস্করঃ ॥ ৩৫ ॥

তং সাত্যজন্নদীতোযে কৃচ্ছ্রাল্লোকস্য বিভ্যতী । প্রপিতামহস্তামুবাহ পাণ্ডুর্বৈ সত্যবিক্রমঃ ॥ ৩৬ ॥

শ্রুতদেবাং তু কারূষো বৃদ্ধশর্মা সমগ্রহীত্ । যস্যামভূদ্ দন্তবক্র ঋষিশপ্তো দিতেঃ সুতঃ ॥ ৩৭ ॥

কৈকেযো ধৃষ্টকেতুশ্চ শ্রুতকীর্তিমবিন্দত । সন্তর্দনাদযস্তস্যাং পঞ্চাসন্কৈকযাঃ সুতাঃ ॥ ৩৮ ॥

রাজাধিদেব্যামাবন্ত্যৌ জযসেনোঽজনিষ্ট হ । দমঘোষশ্চেদিরাজঃ শ্রুতশ্রবসমগ্রহীত্ ॥ ৩৯ ॥

শিশুপাল়ঃ সুতস্তস্যাঃ কথিতস্তস্য সম্ভবঃ । দেবভাগস্য কংসাযাং চিত্রকেতুবৃহদ্বলৌ ॥ ৪০ ॥

কংসবত্যাং দেবশ্রবসঃ সুবীর ইষুমাংস্তথা । বকঃ কঙ্কাত্ তু কঙ্কাযাং সত্যজিত্পুরুজিত্ তথা ॥ ৪১ ॥

সৃঞ্জযো রাষ্ট্রপাল্যাং চ বৃষদুর্মর্ষণাদিকান্ ।
হরিকেশহিরণ্যাক্ষৌ শূরভূম্যাং চ শ্যামকঃ ॥ ৪২ ॥

মিশ্রকেশ্যামপ্সরসি বৃকাদীন্ বত্সকস্তথা । তক্ষপুষ্করশালাদীন্ দুর্বাক্ষ্যাং বৃক আদধে ॥ ৪৩ ॥

সুমিত্রার্জুনপালাদীন্ সমীকাত্তু সুদামনী । আনকঃ কর্ণিকাযাং বৈ ঋতধামাজযাবপি ॥ ৪৪ ॥

পৌরবী রোহিণী ভদ্রা মদিরা রোচনা ইলা । দেবকীপ্রমুখাশ্চাসন্ পত্ন্য আনকদুন্দুভেঃ ॥ ৪৫ ॥

বলং গদং সারণং চ দুর্মদং বিপুলং ধ্রুবম্ । বসুদেবস্তু রোহিণ্যাং কৃতাদীনুদপাদযত্ ॥ ৪৬ ॥

সুভদ্রো ভদ্রবাহুশ্চ দুর্মদো ভদ্র এব চ । পৌরব্যাস্তনযা হ্যেতে ভূতাদ্যা দ্বাদশাভবন্ ॥ ৪৭ ॥

নন্দোপনন্দকৃতকশূরাদ্যা মদিরাত্মজাঃ । কৌশল্যা কেশিনং ত্বেকমসূত কুলনন্দনম্ ॥ ৪৮ ॥

রোচনাযামতো জাতা হস্তহেমাঙ্গদাদযঃ । ইলাযামুরুবল্কাদীন্ যদুমুখ্যানজীজনত্ ॥ ৪৯ ॥

বিপৃষ্ঠো ধৃতদেবাযামেক আনকদুন্দুভেঃ । শান্তিদেবাত্মজা রাজন্ প্রশমপ্রসিতাদযঃ ॥ ৫০ ॥

রাজন্যকল্পবর্ষাদ্যা উপদেবাসুতা দশ । বসুহংসসুবংশাদ্যাঃ শ্রীদেবাযাস্তু ষট্ সুতাঃ ॥ ৫১ ॥

দেবরক্ষিতযা লব্ধা নব চাত্র গদাদযঃ । বসুদেবঃ সুতানষ্টাবাদধে সহদেবযা ॥ ৫২ ॥

প্রবরশ্রুতমুখ্যাংশ্চ সাক্ষাদ্ ধর্মো বসূনিব । বসুদেবস্তু দেবক্যামষ্ট পুত্রানজীজনত্ ॥ ৫৩ ॥

কীর্তিমন্তং সুষেণং চ ভদ্রসেনমুদারধীঃ । ঋজুং সম্মর্দনং ভদ্রং সঙ্কর্ষণমহীশ্বরম্ ॥ ৫৪ ॥

অষ্টমস্তু তযোরাসীত্ স্বযমেব হরিঃ কিল । সুভদ্রা চ মহাভাগা তব রাজন্ পিতামহী ॥ ৫৫ ॥

যদা যদা হি ধর্মস্য ক্ষযো বৃদ্ধিশ্চ পাপ্মনঃ । তদা তু ভগবানীশ আত্মানং সৃজতে হরিঃ ॥ ৫৬ ॥

ন হ্যস্য জন্মনো হেতুঃ কর্মণো বা মহীপতে । আত্মমাযাং বিনেশস্য পরস্য দ্রষ্টুরাত্মনঃ ॥ ৫৭ ॥

যন্মাযাচেষ্টিতং পুংসঃ স্থিত্যুত্পত্ত্যপ্যযায হি । অনুগ্রহস্তন্নিবৃত্তেরাত্মলাভায চেষ্যতে ॥ ৫৮ ॥

অক্ষৌহিণীনাং পতিভিরসুরৈর্নৃপলাঞ্ছনৈঃ । ভুব আক্রম্যমাণাযা অভারায কৃতোদ্যমঃ ॥ ৫৯ ॥

কর্মাণ্যপরিমেযাণি মনসাপি সুরেশ্বরৈঃ । সহসঙ্কর্ষণশ্চক্রে ভগবান্ মধুসূদনঃ ॥ ৬০ ॥

কলৌ জনিষ্যমাণানাং দুঃখশোকতমোনুদম্ । অনুগ্রহায ভক্তানাং সুপুণ্যং ব্যতনোদ্ যশঃ ॥ ৬১ ॥

যস্মিন্ সত্কর্ণপীযুষে যশস্তীর্থবরে সকৃত্ । শ্রোত্রাঞ্জলিরুপস্পৃশ্য ধুনুতে কর্মবাসনাম্ ॥ ৬২ ॥

ভোজবৃষ্ণ্যন্ধকমধুশূরসেনদশার্হকৈঃ । শ্লাঘনীযেহিতঃ শশ্বত্ কুরুসৃঞ্জযপাণ্ডুভিঃ ॥ ৬৩ ॥

স্নিগ্ধস্মিতেক্ষিতোদারৈর্বাক্যৈর্বিক্রমলীলযা । নৃলোকং রমযামাস মূর্ত্যা সর্বাঙ্গরম্যযা ॥ ৬৪ ॥

যস্যাননং মকরকুণ্ডলচারুকর্ণ-ভ্রাজত্কপোলসুভগং সবিলাসহাসম্ । নিত্যোত্সবং ন ততৃপুর্দৃশিভিঃ পিবন্ত্যোনার্যো নরাশ্চ মুদিতাঃ কুপিতা নিমেশ্চ ॥ ৬৫ ॥

জাতো গতঃ পিতৃগৃহাদ্ ব্রজমেধিতার্থোহত্বা রিপূন্ সুতশতানি কৃতোরুদারঃ । উত্পাদ্য তেষু পুরুষঃ ক্রতুভিঃ সমীজেআত্মানমাত্মনিগমং প্রথযঞ্জনেষু ॥ ৬৬ ॥

পৃথ্ব্যাঃ স বৈ গুরুভরং ক্ষপযন্ কুরূণা-মন্তঃসমুত্থকলিনা যুধি ভূপচম্বঃ । দৃষ্টযা বিধূয বিজযে জযমুদ্বিঘোষ্যপ্রোচ্যোদ্ধবায চ পরং সমগাত্ স্বধাম ॥ ৬৭ ॥
যেঽন্যেঽরবিন্দাক্ষ বিমুক্তমানিন-স্ত্বয্যস্তভাবাদবিশুদ্ধবুদ্ধযঃ । আরুহ্য কৃচ্ছ্রেণ পরং পদং ততঃপতন্ত্যধোঽনাদৃতযুষ্মদঙ্ঘ্রযঃ ॥