viṣṇu mahimā stotram

śrī gaṇeśāya namaḥ |
mahimnaste pāraṃ vidhiharaphaṇīndraprabhṛtayo
vidurnādyapyajñaścalamatiraho nātha nu katham |
vijānīyāmaddhā nalinanayanātmīyavacaso
viśuddhyai vakṣyāmīṣadapi tu tathāpi svamatitaḥ || 1||

yadāhurbrahmaike puruṣamitare karma ca
pare'pare buddhaṃ cānye śivamapi ca dhātāramapare |
tathā śaktiṃ kecidgaṇapatimutārkaṃ ca
sudhiyo matīnāṃ vai bhedāttvamasi tadaśeṣaṃ mama matiḥ || 2||

śivaḥ pādāmbhaste śirasi dhṛtavānādarayutaṃ
tathā śaktiścāsau tava tanujatejomayatanuḥ |
dineśaṃ caivāmuṃ tava nayanamūcustu niyamāstvadanyaḥ
ko dhyeyo jagati kila devo vada vibho || 3||

kvacinmatsyaḥ kūrmaḥ kvacidapi varāho narahariḥ
kvacitkharvo rāmo daśarathasuto nandatanayaḥ |
kvacidbuddhaḥ kalkirviharasi kubhārāpahṛtaye
svatantro'jo nityo vibhurapi tavākrīḍanamidam || 4||

hṛtāmnāyenoktaṃ stavanavaramākarṇya vidhinā
drutaṃ mātsyaṃ dhṛtvā vapurajaraśaṅkhāsuramatho |
kṣayaṃ nītvā mṛtyornigamagaṇamuddhṛtya jaladheraśeṣaṃ
saṅguptaṃ jagadapi ca vedaikaśaraṇam || 5||

nimajjantaṃ vārdhau nagavaramupālokya
sahasā hitārthaṃ devānāṃ kamaṭhavapuṣā''viśya gahanam |
payorāśiṃ pṛṣṭhe tamajita salīlaṃ ghṛtavato
jagaddhātuste'bhūtkimu sulabhabhārāya girikaḥ || 6||

hiraṇyākṣaḥ kṣoṇīmaviśadasuro nakranilayaṃ
samādāyāmartyaiḥ kamalajumukhairambaragataiḥ |
stutenānantātmannaciramavabhāti sma
vighṛtā tvayā daṃṣṭrāgre'sāvavanirakhilā kanduka iva || 7||

hariḥ kvāstītyukte danujapatinā''pūrya
nikhilaṃ jagannādaiḥ stambhānnarahariśarīreṇa karajaiḥ |
samutpatyāśūrāvasuravaramādāritavatastavākhyātā
bhūmankimu jagati no sarvagatatā || 8||

vilokyājaṃ dvārgaṃ kapaṭalaghukāyaṃ suraripurniṣiddho'pi
prādādasuraguruṇātmīyamakhilam |
prasannastadbhaktyā tyajasi kila nādyāpi
bhavanaṃ balerbhaktādhīnyaṃ tava viditamevāmarapate || 9||

samādhāvāsaktaṃ nṛpatitanayairvīkṣya pitaraṃ hataṃ
bāṇai roṣādgurutaramupādāya paraśum |
vinā kṣatraṃ viṣṇo kṣititalamaśeṣaṃ kṛtavaso'sakṛtkiṃ
bhūbhāroddharaṇapaṭutā te na viditā || 10||

samārādhyomeśaṃ tribhuvanamidaṃ vāsavamukhaṃ vaśe
cakre cakrinnagaṇayadaniśaṃ jagadidam |
gato'sau laṅkeśastvaciramatha te bāṇaviṣayaṃ
na kenāptaṃ tvattaḥ phalamavinayasyāsuraripo || 11||

kvaciddivyaṃ śauryaṃ kvacidapi raṇe kāpuruṣatā
kvacidgītājñānaṃ kvacidapi parastrīviharaṇam |
kvacinmṛtsnāśitvaṃ kvacidapi ca vaikuṇṭhavibhavaścaritraṃ
te nūnaṃ śaraṇada vimohāya kudhiyām || 12||

na hiṃsyādityedghruvamavitathaṃ vākyamabudhairathāgnīṣomīyaṃ
paśumiti tu viprairnigaditam |
tavaitannāsthāne'suragaṇavimohāya gadataḥ
samṛddhirnīcānāṃnayakara hi duḥkhāya jagataḥ || 13||

vibhāge varṇānāṃ nigamanicaye cāvanitale
vilupte sañjāto dvijavaragṛhe śambhalapure |
samāruhyāśvaṃ svaṃ lasadasikaro
mlencchanikarānnihantā'syunmattānkila kaliyugānte yugapate || 14||

gabhīre kāsāre jalacaravarākṛṣṭacaraṇo raṇe'śakto
majjannabhayada jale'cintayadasau |
yadā nāgendrastvāṃ sapadi padapāśādapagato gataḥ
svargaṃ sthānaṃ bhavati vipadāṃ te kimu janaḥ || 15||

sutaiḥ pṛṣṭo vedhāḥ prativacanadāne'prabhurasāvathātmanyātmānaṃ
śaraṇamagamattvāṃ trijagatām |
tataste'stātaṅkā yayuratha mudaṃ haṃsavapuṣā
tvayā te sārvajñaṃ prathitamamareśeha kimu no || 16||

samāviddho māturvacanaviśikhairāśu vipinaṃ tapaścakre
gatvā tava paramatoṣāya paramam |
dhruvo lebhe divyaṃ padamacalamalpe'pi vayasi
kimastyasmiṃlloke tvayi varada tuṣṭe duradhigam || 17||

vṛkādbhītastūrṇaṃ svajanabhayabhittvāṃ
paśupatirbhramaṃllokānsarvān śaraṇabhupayāto'tha danujaḥ |
svayaṃ bhasmībhūtastava vacanabhaṅgodgatamatī
rameśāho māyā tava duranumeyā'khilajanaiḥ |18||

hṛtaṃ daityairddaṣṭvā'nṛtaghaṭamajayyaistu nayataḥ kaṭākṣaiḥ
saṃmohaṃ yuvativaraveṣeṇa ditijān |
samagraṃ pīyūṣaṃ subhaga surapūgāya dadataḥ samasyāpi
prāyastava khalu hi bhṛtyeṣvabhiratiḥ || 19||

samākṛṣṭā duṣṭairdupadatanayā'labdhaśaraṇā sabhāyāṃ
sarvātmaṃstava śaraṇamuccairupagatā |
samakṣaṃ sarveṣāmabhavadaciraṃ cīranicayaḥ smṛteste
sāphalyaṃ nayanaviṣayaṃ no kimu satām || 20||

vadantyeke sthānaṃ tava varada vaikuṇṭhamapare
gavāṃ lokaṃ lokaṃ phaṇinilayapātālamitare |
tathānye kṣīrodaṃ hṛdayanalinaṃ cāpi tu satāṃ na manye
tatsthānaṃ tvahamiha ca yatrāsi na vibho || 21||

śivo'haṃ rūdrāṇāmahamamararājo diviṣadāṃ munīnāṃ
vyāso'haṃ suravara samudro'smi sarasām |
kubero yakṣāṇāmiti tava vaco mandamataye na
jāne tajjātaṃ jagati nanu yannāsi bhagavan || 22||

śiro nāko netre śaśidinakarāvambaramuro diśaḥ
śrote vāṇī nigamanikaraste kaṭirilā |
akūpāro bastiścaraṇamapi pātālamiti
vai svarūpaṃ te'jñātvā nṛtanumavajānanti kudhiyaḥ || 23||

śarīraṃ vaikuṇṭhaṃ hṛdayanalinaṃ vāsasadanaṃ
manovṛttistārkṣyo matiriyamatho sāgarasutā |
vihāraste'vasthātritayamasavaḥ pārṣadagaṇo na paśyatyajñā
tvāmiha bahiraho yāti janatā || 24||

sughoraṃ kāntāraṃ viśati ca taḍāgaṃ sugahanaṃ
tathottuṅgaṃ śṛṅgaṃ sapadi ca samārohati gireḥ |
prasūnārthaṃ cetombujamamalamekaṃ tvayi vibho
samarpyājñastūrṇaṃ vata na ca sukhaṃ vindati janaḥ || 25||

kṛtaikāntāvāsā vigatanikhilāśāḥ śamaparā
jitaśvāsocchvāsāstruṭitabhavapāśāḥ suyaminaḥ |
paraṃ jyotiḥ paśyantyanagha yadi paśyantu mama tu
śriyāśliṣṭaṃ bhūyānnayanaviṣayaṃ te kila vapuḥ || 26||

kadā gaṅgottuṅgāmalatarataraṅgācchapuline
vasannāśāpāśādakhilakhaladāśād apagataḥ |
aye lakṣmīkāntāmbujanayana tātāmarapate
prasīdetyājalpannamaravara neṣyāmi samayam || 27||

kadā śṛṅgaiḥ sphīte munigaṇaparīte himanage
drumāvīte śīte suramadhuragīte prativasan |
kvaciddhyānāsakto viṣayasuvirakto bhavaharaṃ
smaraṃste pādābjaṃ janihara sameṣyāmi vilayam || 28||

sudhāpānaṃ jñānaṃ na ca vipuladānaṃ na nigamo
na yāgo no yogo na ca nikhilabhogoparamaṇam |
japo no no tīrthaṃ vratamiha na cograṃ tvayi
tapo vinā bhaktiṃ te'laṃ bhavabhayavināśāya madhuhan || 29||

namaḥ sarveṣṭāya śrutiśikharadṛṣṭāya ca namo
namo'saṃśliṣṭāya tribhuvananiviṣṭāya ca namaḥ |
namovispaṣṭāya praṇavaparimṛṣṭāya ca namo
namaste sarvātmanpunarapi punaste mama namaḥ || 30||

kaṇānkaścidvṛṣṭergaṇananipuṇastūrṇamavanestathā
śeṣānpāṃsūnamita kalayeccāpi tu janaḥ |
nabhaḥ piṇḍīkuryādaśiramapi ceccarmavadidaṃ
tathāpīśāsau te kalayitumalaṃ nākhilaguṇān || 31||

kva māhātmyaṃ sīmojjhitamaviṣayaṃ vedavacasāṃ vibho
te me cetaḥ kva ca vividhatāpāhatamidam |
mayedaṃ yatkiñcidgaditamatha bālyena tu guro
gṛhāṇaitacchuddhārpitamiha na heyaṃ hi mahatām || 32||

iti haristavanaṃ sumanoharaṃparamahaṃsajanena samīritam |
sugamasundarasārapadāspadaṃtadidamastu hareraniśaṃ mude || 33||

gadārathāṅgāmbujakambudhāriṇo ramāsamāśliṣṭatanostanotu naḥ |
bileśayādhīśaśarīraśāyinaḥ śivaṃ stavo'sramayaṃ paraṃ hareḥ || 34||

paṭhedimaṃ yastu naraḥ paraṃ stavaṃ samāhitoghaughaghanaprabhañjanam |
sa vindate'trākhilabhogasampado mahīyate viṣṇupade tato dhruvam || 35||

| iti śrīmatparamahaṃsasvāmibrahmānandaviracitaṃ
śrīviṣṇumahimnaḥ stotraṃ sampūrṇam |