দেবীমাহাত্ম্যম্

॥ দেবী মাহাত্ম্যম্ ॥
॥ শ্রী ॥
॥ শ্রীচণ্ডিকাধ্যানম্ ॥
ওঁ বন্ধূককুসুমাভাসাং পঞ্চমুণ্ডাধিবাসিনীম্ ।
স্ফুরচ্চন্দ্রকলারত্নমুকুটাং মুণ্ডমালিনীম্ ॥
ত্রিনেত্রাং রক্তবসনাং পীনোন্নতঘটস্তনীম্ ।
পুস্তকং চাক্ষমালাং চ বরং চাভযকং ক্রমাত্ ॥
দধতীং সংস্মরেন্নিত্যমুত্তরাম্নাযমানিতাম্ ।
অথবা
যা চণ্ডী মধুকৈটভাদিদৈত্যদলনী যা মাহিষোন্মূলিনী
যা ধূম্রেক্ষণচণ্ডমুণ্ডমথনী যা রক্তবীজাশনী ।
শক্তিঃ শুম্ভনিশুম্ভদৈত্যদলনী যা সিদ্ধিদাত্রী পরা
সা দেবী নবকোটিমূর্তিসহিতা মাং পাতু বিশ্বেশ্বরী ॥

ওঁ অস্য শ্রীঅর্গলাস্তোত্রমন্ত্রস্য বিষ্ণুরৃষিঃ,
অনুষ্টুপ্ ছন্দঃ, শ্রীমহালক্ষ্মীর্দেবতা,
শ্রীজগদম্বাপ্রীতযে সপ্তশতিপাঠাঙ্গত্বেন জপে বিনিযোগঃ ।
ওঁ নমশ্চণ্ডিকাযৈ ।
মার্কণ্ডেয উবাচ।
ওঁ জয ত্বং দেবি চামুণ্ডে জয ভূতাপহারিণি ।
জয সর্বগতে দেবি কালরাত্রি নমোঽস্তু তে ॥ ১॥
জযন্তী মঙ্গলা কালী ভদ্রকালী কপালিনী ।
দুর্গা শিবা ক্ষমা ধাত্রী স্বাহা স্বধা নমোঽস্তু তে ॥ ২॥
মধুকৈটভবিধ্বংসি বিধাতৃবরদে নমঃ ।
রূপং দেহি জযং দেহি যশো দেহি দ্বিষো জহি ॥ ৩॥
মহিষাসুরনির্নাশি ভক্তানাং সুখদে নমঃ ।
রূপং দেহি জযং দেহি যশো দেহি দ্বিষো জহি ॥ ৪॥
ধূম্রনেত্রবধে দেবি ধর্মকামার্থদাযিনি ।
রূপং দেহি জযং দেহি যশো দেহি দ্বিষো জহি ॥ ৫॥
রক্তবীজবধে দেবি চণ্ডমুণ্ডবিনাশিনি ।
রূপং দেহি জযং দেহি যশো দেহি দ্বিষো জহি ॥ ৬॥
নিশুম্ভশুম্ভনির্নাশি ত্রৈলোক্যশুভদে নমঃ ।
রূপং দেহি জযং দেহি যশো দেহি দ্বিষো জহি ॥ ৭॥
বন্দিতাঙ্ঘ্রিযুগে দেবি সর্বসৌভাগ্যদাযিনি ।
রূপং দেহি জযং দেহি যশো দেহি দ্বিষো জহি ॥ ৮॥
অচিন্ত্যরূপচরিতে সর্বশত্রুবিনাশিনি ।
রূপং দেহি জযং দেহি যশো দেহি দ্বিষো জহি ॥ ৯॥
নতেভ্যঃ সর্বদা ভক্ত্যা চাপর্ণে দুরিতাপহে ।
রূপং দেহি জযং দেহি যশো দেহি দ্বিষো জহি ॥ ১০॥
স্তুবদ্ভ্যো ভক্তিপূর্বং ত্বাং চণ্ডিকে ব্যাধিনাশিনি ।
রূপং দেহি জযং দেহি যশো দেহি দ্বিষো জহি ॥ ১১॥
চণ্ডিকে সততং যুদ্ধে জযন্তি পাপনাশিনি ।
রূপং দেহি জযং দেহি যশো দেহি দ্বিষো জহি ॥ ১২॥
দেহি সৌভাগ্যমারোগ্যং দেহি দেবি পরং সুখম্ ।
রূপং দেহি জযং দেহি যশো দেহি দ্বিষো জহি ॥ ১৩॥
বিধেহি দেবি কল্যাণং বিধেহি বিপুলাং শ্রিযম্ ।
রূপং দেহি জযং দেহি যশো দেহি দ্বিষো জহি ॥ ১৪॥
বিধেহি দ্বিষতাং নাশং বিধেহি বলমুচ্চকৈঃ ।
রূপং দেহি জযং দেহি যশো দেহি দ্বিষো জহি ॥ ১৫॥
সুরাসুরশিরোরত্ননিঘৃষ্টচরণেঽম্বিকে ।
রূপং দেহি জযং দেহি যশো দেহি দ্বিষো জহি ॥ ১৬॥
বিদ্যাবন্তং যশস্বন্তং লক্ষ্মীবন্তঞ্চ মাং কুরু ।
রূপং দেহি জযং দেহি যশো দেহি দ্বিষো জহি ॥ ১৭॥
দেবি প্রচণ্ডদোর্দণ্ডদৈত্যদর্পনিষূদিনি ।
রূপং দেহি জযং দেহি যশো দেহি দ্বিষো জহি ॥ ১৮॥
প্রচণ্ডদৈত্যদর্পঘ্নে চণ্ডিকে প্রণতায মে ।
রূপং দেহি জযং দেহি যশো দেহি দ্বিষো জহি ॥ ১৯॥
চতুর্ভুজে চতুর্বক্ত্রসংস্তুতে পরমেশ্বরি ।
রূপং দেহি জযং দেহি যশো দেহি দ্বিষো জহি ॥ ২০॥
কৃষ্ণেন সংস্তুতে দেবি শশ্বদ্ভক্ত্যা সদাম্বিকে ।
রূপং দেহি জযং দেহি যশো দেহি দ্বিষো জহি ॥ ২১॥
হিমাচলসুতানাথসংস্তুতে পরমেশ্বরি ।
রূপং দেহি জযং দেহি যশো দেহি দ্বিষো জহি ॥ ২২॥
ইন্দ্রাণীপতিসদ্ভাবপূজিতে পরমেশ্বরি ।
রূপং দেহি জযং দেহি যশো দেহি দ্বিষো জহি ॥ ২৩॥
দেবি ভক্তজনোদ্দামদত্তানন্দোদযেঽম্বিকে ।
রূপং দেহি জযং দেহি যশো দেহি দ্বিষো জহি ॥ ২৪॥
ভার্যাং মনোরমাং দেহি মনোবৃত্তানুসারিণীম্ ।
রূপং দেহি জযং দেহি যশো দেহি দ্বিষো জহি ॥ ২৫॥
তারিণি দুর্গসংসারসাগরস্যাচলোদ্ভবে ।
রূপং দেহি জযং দেহি যশো দেহি দ্বিষো জহি ॥ ২৬॥
ইদং স্তোত্রং পঠিত্বা তু মহাস্তোত্রং পঠেন্নরঃ ।
সপ্তশতীং সমারাধ্য বরমাপ্নোতি দুর্লভম্ ॥ ২৭॥
॥ ইতি শ্রীমার্কণ্ডেযপুরাণে অর্গলাস্তোত্রং সমাপ্তম্ ॥

ওঁ অস্য শ্রীকীলকমন্ত্রস্য শিবঋষিঃ, অনুষ্টুপ্ ছন্দঃ,
শ্রীমহাসরস্বতী দেবতা, শ্রীজগদম্বাপ্রীত্যর্থং
সপ্তশতীপাঠাঙ্গত্বেন জপে বিনিযোগঃ ।
ওঁ নমশ্চণ্ডিকাযৈ ।
মার্কণ্ডেয উবাচ।
ওঁ বিশুদ্ধজ্ঞানদেহায ত্রিবেদীদিব্যচক্ষুষে ।
শ্রেযঃপ্রাপ্তিনিমিত্তায নমঃ সোমার্ধধারিণে ॥ ১॥
সর্বমেতদ্বিজানীযান্মন্ত্রাণামপি কীলকম্ ।
সোঽপি ক্ষেমমবাপ্নোতি সততং জপ্যতত্পরঃ ॥ ২॥
সিদ্ধ্যন্ত্যুচ্চাটনাদীনি কর্মাণি সকলান্যপি ।
এতেন স্তুবতাং দেবীং স্তোত্রবৃন্দেন ভক্তিতঃ ॥ ৩॥
ন মন্ত্রো নৌষধং তস্য ন কিঞ্চিদপি বিদ্যতে ।
বিনা জপ্যেন সিদ্ধ্যেত্তু সর্বমুচ্চাটনাদিকম্ ॥ ৪॥
সমগ্রাণ্যপি সেত্স্যন্তি লোকশঙ্কামিমাং হরঃ ।
কৃত্বা নিমন্ত্রযামাস সর্বমেবমিদং শুভম্ ॥ ৫॥
স্তোত্রং বৈ চণ্ডিকাযাস্তু তচ্চ গুহ্যং চকার সঃ ।
সমাপ্নোতি স পুণ্যেন তাং যথাবন্নিমন্ত্রণাম্ ॥ ৬॥
সোঽপি ক্ষেমমবাপ্নোতি সর্বমেব ন সংশযঃ ।
কৃষ্ণাযাং বা চতুর্দশ্যামষ্টম্যাং বা সমাহিতঃ ॥ ৭॥
দদাতি প্রতিগৃহ্ণাতি নান্যথৈষা প্রসীদতি ।
ইত্থং রূপেণ কীলেন মহাদেবেন কীলিতম্ ॥ ৮॥
যো নিষ্কীলাং বিধাযৈনাং চণ্ডীং জপতি নিত্যশঃ ।
স সিদ্ধঃ স গণঃ সোঽথ গন্ধর্বো জাযতে ধ্রুবম্ ॥ ৯॥
ন চৈবাপাটবং তস্য ভযং ক্বাপি ন জাযতে ।
নাপমৃত্যুবশং যাতি মৃতে চ মোক্ষমাপ্নুযাত্ ॥ ১০॥
জ্ঞাত্বা প্রারভ্য কুর্বীত হ্যকুর্বাণো বিনশ্যতি ।
ততো জ্ঞাত্বৈব সম্পূর্ণমিদং প্রারভ্যতে বুধৈঃ ॥ ১১॥
সৌভাগ্যাদি চ যত্কিঞ্চিদ্ দৃশ্যতে ললনাজনে ।
তত্সর্বং তত্প্রসাদেন তেন জপ্যমিদং শুভম্ ॥ ১২॥
শনৈস্তু জপ্যমানেঽস্মিন্ স্তোত্রে সম্পত্তিরুচ্চকৈঃ ।
ভবত্যেব সমগ্রাপি ততঃ প্রারভ্যমেব তত্ ॥ ১৩॥
ঐশ্বর্যং তত্প্রসাদেন সৌভাগ্যারোগ্যমেব চ ।
শত্রুহানিঃ পরো মোক্ষঃ স্তূযতে সা ন কিং জনৈঃ ॥ ১৪॥
চণ্ডিকাং হৃদযেনাপি যঃ স্মরেত্ সততং নরঃ ।
হৃদ্যং কামমবাপ্নোতি হৃদি দেবী সদা বসেত্ ॥ ১৫॥
অগ্রতোঽমুং মহাদেবকৃতং কীলকবারণম্ ।
নিষ্কীলঞ্চ তথা কৃত্বা পঠিতব্যং সমাহিতৈঃ ॥ ১৬॥
॥ ইতি শ্রীভগবত্যাঃ কীলকস্তোত্রং সমাপ্তম্ ॥

অস্য শ্রীচণ্ডীকবচস্য ব্রহ্মা ঋষিঃ , অনুষ্টুপ্ ছন্দঃ ,
চামুণ্ডা দেবতা , অঙ্গন্যাসোক্তমাতরো বীজম্ ,
দিগ্বন্ধদেবতাস্তত্বম্ , শ্রীজগদম্বাপ্রীত্যর্থে জপে বিনিযোগঃ ।
ওঁ নমশ্চণ্ডিকাযৈ ।
মার্কণ্ডেয উবাচ।
ওঁ যদ্গুহ্যং পরমং লোকে সর্বরক্ষাকরং নৃণাম্ ।
যন্ন কস্যচিদাখ্যাতং তন্মে ব্রূহি পিতামহ ॥ ১॥
ব্রহ্মোবাচ ।
অস্তি গুহ্যতমং বিপ্র সর্বভূতোপকারকম্ ।
দেব্যাস্তু কবচং পুণ্যং তচ্ছৃণুষ্ব মহামুনে ॥ ২॥
প্রথমং শৈলপুত্রীতি দ্বিতীযং ব্রহ্মচারিণী ।
তৃতীযং চন্দ্রঘণ্টেতি কূষ্মাণ্ডেতি চতুর্থকম্ ॥ ৩॥
পঞ্চমং স্কন্দমাতেতি ষষ্ঠং কাত্যাযনী তথা ।
সপ্তমং কালরাত্রিশ্চ মহাগৌরীতি চাষ্টমম্ ॥ ৪॥
নবমং সিদ্ধিদাত্রী চ নবদুর্গাঃ প্রকীর্তিতাঃ ।
উক্তান্যেতানি নামানি ব্রহ্মণৈব মহাত্মনা ॥ ৫॥
অগ্নিনা দহ্যমানাস্তু শত্রুমধ্যগতা রণে ।
বিষমে দুর্গমে চৈব ভযার্তাঃ শরণং গতাঃ ॥ ৬।
ন তেষাং জাযতে কিঞ্চিদশুভং রণসঙ্কটে ।
আপদং ন চ পশ্যন্তি শোকদুঃখভযঙ্করীম্ ॥ ৭॥
যৈস্তু ভক্ত্যা স্মৃতা নিত্যং তেষাং বৃদ্ধিঃ প্রজাযতে ।
যে ত্বাং স্মরন্তি দেবেশি রক্ষসি তান্ন সংশযঃ ॥ ৮॥
প্রেতসংস্থা তু চামুণ্ডা বারাহী মহিষাসনা ।
ঐন্দ্রী গজসমারূঢা বৈষ্ণবী গরুডাসনা ॥ ৯॥
নারসিংহী মহাবীর্যা শিবদূতী মহাবলা ।
মাহেশ্বরী বৃষারূঢা কৌমারী শিখিবাহনা ॥ ১০॥
লক্ষ্মীঃ পদ্মাসনা দেবী পদ্মহস্তা হরিপ্রিযা ।
শ্বেতরূপধরা দেবী ঈশ্বরী বৃষবাহনা ॥ ১১॥
ব্রাহ্মী হংসসমারূঢা সর্বাভরণভূষিতা ।
ইত্যেতা মাতরঃ সর্বাঃ সর্বযোগসমন্বিতাঃ ॥ ১২॥
নানাভরণশোভাঢ্যা নানারত্নোপশোভিতাঃ ।
শ্রৈষ্ঠৈশ্চ মৌক্তিকৈঃ সর্বা দিব্যহারপ্রলম্বিভিঃ ॥ ১৩॥
ইন্দ্রনীলৈর্মহানীলৈঃ পদ্মরাগৈঃ সুশোভনৈঃ ।
দৃশ্যন্তে রথমারূঢা দেব্যঃ ক্রোধসমাকুলাঃ ॥ ১৪॥
শঙ্খং চক্রং গদাং শক্তিং হলং চ মুসলাযুধম্ ।
খেটকং তোমরং চৈব পরশুং পাশমেব চ ॥ ১৫॥
কুন্তাযুধং ত্রিশূলং চ শার্ঙ্গমাযুধমুত্তমম্ ।
দৈত্যানাং দেহনাশায ভক্তানামভযায চ ॥ ১৬॥
ধারযন্ত্যাযুধানীত্থং দেবানাং চ হিতায বৈ ।
নমস্তেঽস্তু মহারৌদ্রে মহাঘোরপরাক্রমে ॥ ১৭॥
মহাবলে মহোত্সাহে মহাভযবিনাশিনি ।
ত্রাহি মাং দেবি দুষ্প্রেক্ষ্যে শত্রূণাং ভযবর্ধিনি ॥ ১৮॥
প্রাচ্যাং রক্ষতু মামৈন্দ্রী আগ্নেয্যামগ্নিদেবতা ।
দক্ষিণেঽবতু বারাহী নৈরৃত্যাং খড্গধারিণী ॥ ১৯॥
প্রতীচ্যাং বারুণী রক্ষেদ্বাযব্যাং মৃগবাহিনী ।
উদীচ্যাং পাতু কৌবেরী ঈশান্যাং শূলধারিণী ॥ ২০॥
ঊর্ধ্বং ব্রহ্মাণী মে রক্ষেদধস্তাদ্বৈষ্ণবী তথা ।
এবং দশ দিশো রক্ষেচ্চামুণ্ডা শববাহনা ॥ ২১॥
জযা মামগ্রতঃ পাতু বিজযা পাতু পৃষ্ঠতঃ ।
অজিতা বামপার্শ্বে তু দক্ষিণে চাপরাজিতা ॥ ২২॥
শিখাং মে দ্যোতিনী রক্ষেদুমা মূর্ধ্নি ব্যবস্থিতা ।
মালাধরী ললাটে চ ভ্রুবৌ রক্ষেদ্যশস্বিনী ॥ ২৩॥
নেত্রযোশ্চিত্রনেত্রা চ যমঘণ্টা তু পার্শ্বকে ।
ত্রিনেত্রা চ ত্রিশূলেন ভ্রুবোর্মধ্যে চ চণ্ডিকা ॥ ২৪॥
শঙ্খিনী চক্ষুষোর্মধ্যে শ্রোত্রযোর্দ্বারবাসিনী ।
কপোলৌ কালিকা রক্ষেত্ কর্ণমূলে তু শঙ্করী ॥ ২৫॥
নাসিকাযাং সুগন্ধা চ উত্তরোষ্ঠে চ চর্চিকা ।
অধরে চামৃতাবালা জিহ্বাযাং চ সরস্বতী ॥ ২৬॥
দন্তান্ রক্ষতু কৌমারী কণ্ঠদেশে তু চণ্ডিকা ।
ঘণ্টিকাং চিত্রঘণ্টা চ মহামাযা চ তালুকে ॥ ২৭॥
কামাক্ষী চিবুকং রক্ষেদ্বাচং মে সর্বমঙ্গলা ।
গ্রীবাযাং ভদ্রকালী চ পৃষ্ঠবংশে ধনুর্ধরী ॥ ২৮॥
নীলগ্রীবা বহিঃ কণ্ঠে নলিকাং নলকূবরী ।
স্কন্ধযোঃ খড্গিনী রক্ষেদ্ বাহূ মে বজ্রধারিণী ॥ ২৯॥
হস্তযোর্দণ্ডিনী রক্ষেদম্বিকা চাঙ্গুলীষু চ ।
নখাঞ্ছূলেশ্বরী রক্ষেত্ কুক্ষৌ রক্ষেন্নরেশ্বরী ॥ ৩০॥
স্তনৌ রক্ষেন্মহাদেবী মনঃশোকবিনাশিনী ।
হৃদযে ললিতা দেবী উদরে শূলধারিণী ॥ ৩১॥
নাভৌ চ কামিনী রক্ষেদ্ গুহ্যং গুহ্যেশ্বরী তথা ।
মেঢ্রং রক্ষতু দুর্গন্ধা পাযুং মে গুহ্যবাহিনী ॥ ৩২॥
কট্যাং ভগবতী রক্ষেদূরূ মে মেঘবাহনা ।
জঙ্ঘে মহাবলা রক্ষেত্ জানূ মাধবনাযিকা ॥ ৩৩॥
গুল্ফযোর্নারসিংহী চ পাদপৃষ্ঠে তু কৌশিকী ।
পাদাঙ্গুলীঃ শ্রীধরী চ তলং পাতালবাসিনী ॥ ৩৪॥
নখান্ দংষ্ট্রকরালী চ কেশাংশ্চৈবোর্ধ্বকেশিনী ।
রোমকূপেষু কৌমারী ত্বচং যোগীশ্বরী তথা ॥ ৩৫॥
রক্তমজ্জাবসামাংসান্যস্থিমেদাংসি পার্বতী ।
অন্ত্রাণি কালরাত্রিশ্চ পিত্তং চ মুকুটেশ্বরী ॥ ৩৬॥
পদ্মাবতী পদ্মকোশে কফে চূডামণিস্তথা ।
জ্বালামুখী নখজ্বালামভেদ্যা সর্বসন্ধিষু ॥ ৩৭॥
শুক্রং ব্রহ্মাণী মে রক্ষেচ্ছাযাং ছত্রেশ্বরী তথা ।
অহঙ্কারং মনো বুদ্ধিং রক্ষেন্মে ধর্মধারিণী ॥ ৩৮॥
প্রাণাপানৌ তথা ব্যানমুদানং চ সমানকম্ ।
বজ্রহস্তা চ মে রক্ষেত্ প্রাণান্ কল্যাণশোভনা ॥ ৩৯॥
রসে রূপে চ গন্ধে চ শব্দে স্পর্শে চ যোগিনী ।
সত্ত্বং রজস্তমশ্চৈব রক্ষেন্নারাযণী সদা ॥ ৪০॥
আযূ রক্ষতু বারাহী ধর্মং রক্ষতু পার্বতী ।
যশঃ কীর্তিং চ লক্ষ্মীং চ সদা রক্ষতু বৈষ্ণবী ॥ ৪১॥
গোত্রমিন্দ্রাণী মে রক্ষেত্ পশূন্ রক্ষেচ্চ চণ্ডিকা ।
পুত্রান্ রক্ষেন্মহালক্ষ্মীর্ভার্যাং রক্ষতু ভৈরবী ॥ ৪২॥
ধনেশ্বরী ধনং রক্ষেত্ কৌমারী কন্যকাং তথা ।
পন্থানং সুপথা রক্ষেন্মার্গং ক্ষেমঙ্করী তথা ॥ ৪৩॥
রাজদ্বারে মহালক্ষ্মীর্বিজযা সতত স্থিতা ।
রক্ষাহীনং তু যত্ স্থানং বর্জিতং কবচেন তু ॥ ৪৪॥
তত্সর্বং রক্ষ মে দেবি জযন্তী পাপনাশিনী ।
সর্বরক্ষাকরং পুণ্যং কবচং সর্বদা জপেত্ ॥ ৪৫॥
ইদং রহস্যং বিপ্রর্ষে ভক্ত্যা তব মযোদিতম্ ।
পাদমেকং ন গচ্ছেত্ তু যদীচ্ছেচ্ছুভমাত্মনঃ ॥ ৪৬॥
কবচেনাবৃতো নিত্যং যত্র যত্রৈব গচ্ছতি ।
তত্র তত্রার্থলাভশ্ব বিজযঃ সার্বকালিকঃ ॥ ৪৭॥
যং যং চিন্তযতে কামং তং তং প্রাপ্নোতি নিশ্চিতম্ ।
পরমৈশ্বর্যমতুলং প্রাপ্স্যতে ভূতলে পুমান্ ॥ ৪৮॥
নির্ভযো জাযতে মর্ত্যঃ সঙ্গ্রামেষ্বপরাজিতঃ ।
ত্রৈলোক্যে তু ভবেত্পূজ্যঃ কবচেনাবৃতঃ পুমান্ ॥ ৪৯॥
ইদং তু দেব্যাঃ কবচং দেবানামপি দুর্লভম্ ।
যঃ পঠেত্প্রযতো নিত্যং ত্রিসন্ধ্যং শ্রদ্ধযান্বিতঃ ॥ ৫০॥
দৈবীকলা ভবেত্তস্য ত্রৈলোক্যে চাপরাজিতঃ ।
জীবেদ্বর্ষশতং সাগ্রমপমৃত্যুবিবর্জিতঃ ॥ ৫১॥
নশ্যন্তি ব্যাধযঃ সর্বে লূতাবিস্ফোটকাদযঃ ।
স্থাবরং জঙ্গমং চৈব কৃত্রিমং চৈব যদ্বিষম্ ॥ ৫২॥
অভিচারাণি সর্বাণি মন্ত্রযন্ত্রাণি ভূতলে ।
ভূচরাঃ খেচরাশ্চৈব কুলজাশ্চৌপদেশিকাঃ ॥ ৫৩॥
সহজা কুলজা মালা ডাকিনী শাকিনী তথা ।
অন্তরিক্ষচরা ঘোরা ডাকিন্যশ্চ মহারবাঃ ॥ ৫৪॥
গ্রহভূতপিশাচাশ্চ যক্ষগন্ধর্বরাক্ষসাঃ ।
ব্রহ্মরাক্ষসবেতালাঃ কূষ্মাণ্ডা ভৈরবাদযঃ ॥ ৫৫॥
নশ্যন্তি দর্শনাত্তস্য কবচেনাবৃতো হি যঃ ।
মানোন্নতির্ভবেদ্রাজ্ঞস্তেজোবৃদ্ধিঃ পরা ভবেত্ ॥ ৫৬॥
যশোবৃদ্ধির্ভবেত্ পুংসাং কীর্তিবৃদ্ধিশ্চ জাযতে ।
তস্মাত্ জপেত্ সদা ভক্তঃ কবচং কামদং মুনে ॥ ৫৭॥
জপেত্ সপ্তশতীং চণ্ডীং কৃত্বা তু কবচং পুরা ।
নির্বিঘ্নেন ভবেত্ সিদ্ধিশ্চণ্ডীজপসমুদ্ভবা ॥ ৫৮॥
যাবদ্ভূমণ্ডলং ধত্তে সশৈলবনকাননম্ ।
তাবত্তিষ্ঠতি মেদিন্যাং সন্ততিঃ পুত্রপৌত্রিকী ॥ ৫৯॥
দেহান্তে পরমং স্থানং সুরৈরপি সুদুর্লভম্ ।
প্রাপ্নোতি পুরুষো নিত্যং মহামাযাপ্রসাদতঃ ॥ ৬০॥
তত্র গচ্ছতি গত্বাসৌ পুনশ্চাগমনং নহি ।
লভতে পরমং স্থানং শিবেন সমতাং ব্রজেত্ ॥ ৬১॥
॥ ইতি শ্রীমার্কণ্ডেযপুরাণে হরিহরব্রহ্মবিরচিতং
দেবীকবচং সমাপ্তম্ ॥

%
॥ শ্রীদুর্গাযৈ নমঃ ॥
॥ অথ শ্রীদুর্গাসপ্তশতী ॥

বিনিযোগঃ
অস্য শ্রী প্রথমচরিত্রস্য । ব্রহ্মা ঋষিঃ ।
মহাকালী দেবতা । গাযত্রী ছন্দঃ । নন্দা শক্তিঃ ।
রক্তদন্তিকা বীজম্ । অগ্নিস্তত্ত্বম্ ।
ঋগ্বেদঃ স্বরূপম্ । শ্রীমহাকালীপ্রীত্যর্থে
প্রথমচরিত্রজপে বিনিযোগঃ ।
। ধ্যানম্ ।
ওঁ খড্গং চক্রগদেষুচাপপরিঘাঞ্ছূলং ভুশুণ্ডীং শিরঃ
শঙ্খং সন্দধতীং করৈস্ত্রিনযনাং সর্বাঙ্গভূষাবৃতাম্ ।
নীলাশ্মদ্যুতিমাস্যপাদদশকাং সেবে মহাকালিকাং
যামস্তৌত্স্বপিতে হরৌ কমলজো হন্তুং মধুং কৈটভম্ ॥
ওঁ নমশ্চণ্ডিকাযৈ ॥
ওঁ ঐং মার্কণ্ডেয উবাচ॥ ১.১॥
সাবর্ণিঃ সূর্যতনযো যো মনুঃ কথ্যতেঽষ্টমঃ ।
নিশাময তদুত্পত্তিং বিস্তরাদ্গদতো মম ॥ ১.২॥
মহামাযানুভাবেন যথা মন্বন্তরাধিপঃ ।
স বভূব মহাভাগঃ সাবর্ণিস্তনযো রবেঃ ॥ ১.৩॥
স্বারোচিষেঽন্তরে পূর্বং চৈত্রবংশসমুদ্ভবঃ ।
সুরথো নাম রাজাভূত্সমস্তে ক্ষিতিমণ্ডলে ॥ ১.৪॥
তস্য পালযতঃ সম্যক্ প্রজাঃ পুত্রানিবৌরসান্ ।
বভূবুঃ শত্রবো ভূপাঃ কোলাবিধ্বংসিনস্তদা ॥ ১.৫॥
তস্য তৈরভবদ্ যুদ্ধমতিপ্রবলদণ্ডিনঃ ।
ন্যূনৈরপি স তৈর্যুদ্ধে কোলাবিধ্বংসিভির্জিতঃ ॥ ১.৬॥
ততঃ স্বপুরমাযাতো নিজদেশাধিপোঽভবত্ ।
আক্রান্তঃ স মহাভাগস্তৈস্তদা প্রবলারিভিঃ ॥ ১.৭॥
অমাত্যৈর্বলিভির্দুষ্টৈর্দুর্বলস্য দুরাত্মভিঃ ।
কোশো বলং চাপহৃতং তত্রাপি স্বপুরে ততঃ ॥ ১.৮॥
ততো মৃগযাব্যাজেন হৃতস্বাম্যঃ স ভূপতিঃ ।
একাকী হযমারুহ্য জগাম গহনং বনম্ ॥ ১.৯॥
স তত্রাশ্রমমদ্রাক্ষীদ্দ্বিজবর্যস্য মেধসঃ ।
প্রশান্তশ্বাপদাকীর্ণং মুনিশিষ্যোপশোভিতম্ ॥ ১.১০॥
তস্থৌ কঞ্চিত্স কালং চ মুনিনা তেন সত্কৃতঃ ।
ইতশ্চেতশ্চ বিচরংস্তস্মিন্ মুনিবরাশ্রমে ॥ ১.১১॥
সোঽচিন্তযত্তদা তত্র মমত্বাকৃষ্টমানসঃ ।
মত্পূর্বৈঃ পালিতং পূর্বং মযা হীনং পুরং হি তত্ ॥ ১.১২॥
মদ্ভৃত্যৈস্তৈরসদ্বৃত্তৈর্ধর্মতঃ পাল্যতে ন বা ।
ন জানে স প্রধানো মে শূরো হস্তী সদামদঃ ॥ ১.১৩॥
মম বৈরিবশং যাতঃ কান্ ভোগানুপলপ্স্যতে ।
যে মমানুগতা নিত্যং প্রসাদধনভোজনৈঃ ॥ ১.১৪॥
অনুবৃত্তিং ধ্রুবং তেঽদ্য কুর্বন্ত্যন্যমহীভৃতাম্ ।
অসম্যগ্ব্যযশীলৈস্তৈঃ কুর্বদ্ভিঃ সততং ব্যযম্ ॥ ১.১৫॥
সঞ্চিতঃ সোঽতিদুঃখেন ক্ষযং কোশো গমিষ্যতি ।
এতচ্চান্যচ্চ সততং চিন্তযামাস পার্থিবঃ ॥ ১.১৬॥
তত্র বিপ্রাশ্রমাভ্যাশে বৈশ্যমেকং দদর্শ সঃ ।
স পৃষ্টস্তেন কস্ত্বং ভো হেতুশ্চাগমনেঽত্র কঃ ॥ ১.১৭॥
সশোক ইব কস্মাত্ত্বং দুর্মনা ইব লক্ষ্যসে ।
ইত্যাকর্ণ্য বচস্তস্য ভূপতেঃ প্রণযোদিতম্ ॥ ১.১৮॥
প্রত্যুবাচস তং বৈশ্যঃ প্রশ্রযাবনতো নৃপম্ ॥ ১.১৯॥
বৈশ্য উবাচ॥ ১.২০॥
সমাধির্নাম বৈশ্যোঽহমুত্পন্নো ধনিনাং কুলে ॥ ১.২১॥
পুত্রদারৈর্নিরস্তশ্চ ধনলোভাদসাধুভিঃ ।
বিহীনশ্চ ধনৈর্দারৈঃ পুত্রৈরাদায মে ধনম্ ॥ ১.২২॥
বনমভ্যাগতো দুঃখী নিরস্তশ্চাপ্তবন্ধুভিঃ ।
সোঽহং ন বেদ্মি পুত্রাণাং কুশলাকুশলাত্মিকাম্ ॥ ১.২৩॥
প্রবৃত্তিং স্বজনানাং চ দারাণাং চাত্র সংস্থিতঃ ।
কিং নু তেষাং গৃহে ক্ষেমমক্ষেমং কিং নু সাম্প্রতম্ ॥ ১.২৪॥
কথং তে কিং নু সদ্বৃত্তা দুর্বৃত্তাঃ কিং নু মে সুতাঃ ॥ ১.২৫॥
রাজোবাচ ॥ ১.২৬॥
যৈর্নিরস্তো ভবাঁল্লুব্ধৈঃ পুত্রদারাদিভির্ধনৈঃ ॥ ১.২৭॥
তেষু কিং ভবতঃ স্নেহমনুবধ্নাতি মানসম্ ॥ ১.২৮॥
বৈশ্য উবাচ॥ ১.২৯॥
এবমেতদ্যথা প্রাহ ভবানস্মদ্গতং বচঃ ॥ ১.৩০॥
কিং করোমি ন বধ্নাতি মম নিষ্ঠুরতাং মনঃ ।
যৈঃ সন্ত্যজ্য পিতৃস্নেহং ধনলুব্ধৈর্নিরাকৃতঃ ॥ ১.৩১॥
পতিস্বজনহার্দং চ হার্দিতেষ্বেব মে মনঃ ।
কিমেতন্নাভিজানামি জানন্নপি মহামতে ॥ ১.৩২॥
যত্প্রেমপ্রবণং চিত্তং বিগুণেষ্বপি বন্ধুষু ।
তেষাং কৃতে মে নিঃশ্বাসো দৌর্মনস্যং চ জাযতে ॥ ১.৩৩॥
করোমি কিং যন্ন মনস্তেষ্বপ্রীতিষু নিষ্ঠুরম্ ॥ ১.৩৪॥
মার্কণ্ডেয উবাচ॥ ১.৩৫॥
ততস্তৌ সহিতৌ বিপ্র তং মুনিং সমুপস্থিতৌ ॥ ১.৩৬॥
সমাধির্নাম বৈশ্যোঽসৌ স চ পার্থিবসত্তমঃ ।
কৃত্বা তু তৌ যথান্যাযং যথার্হং তেন সংবিদম্ ॥ ১.৩৭॥
উপবিষ্টৌ কথাঃ কাশ্চিচ্চক্রতুর্বৈশ্যপার্থিবৌ ॥ ১.৩৮॥
রাজোবাচ ॥ ১.৩৯॥
ভগবংস্ত্বামহং প্রষ্টুমিচ্ছাম্যেকং বদস্ব তত্ ॥ ১.৪০॥
দুঃখায যন্মে মনসঃ স্বচিত্তাযত্ততাং বিনা ।
মমত্বং গতরাজ্যস্য রাজ্যাঙ্গেষ্বখিলেষ্বপি ॥ ১.৪১॥
জানতোঽপি যথাজ্ঞস্য কিমেতন্মুনিসত্তম ।
অযং চ নিকৃতঃ পুত্রৈর্দারৈর্ভৃত্যৈস্তথোজ্ঝিতঃ ॥ ১.৪২॥
স্বজনেন চ সন্ত্যক্তস্তেষু হার্দী তথাপ্যতি ।
এবমেষ তথাহং চ দ্বাবপ্যত্যন্তদুঃখিতৌ ॥ ১.৪৩॥
দৃষ্টদোষেঽপি বিষযে মমত্বাকৃষ্টমানসৌ ।
তত্কিমেতন্মহাভাগ যন্মোহো জ্ঞানিনোরপি ॥ ১.৪৪॥
মমাস্য চ ভবত্যেষা বিবেকান্ধস্য মূঢতা ॥ ১.৪৫॥
ঋষিরুবাচ ॥ ১.৪৬॥
জ্ঞানমস্তি সমস্তস্য জন্তোর্বিষযগোচরে ॥ ১.৪৭॥
বিষযাশ্চ মহাভাগ যান্তি চৈবং পৃথক্পৃথক্ ।
দিবান্ধাঃ প্রাণিনঃ কেচিদ্রাত্রাবন্ধাস্তথাপরে ॥ ১.৪৮॥
কেচিদ্দিবা তথা রাত্রৌ প্রাণিনস্তুল্যদৃষ্টযঃ ।
জ্ঞানিনো মনুজাঃ সত্যং কিং তু তে ন হি কেবলম্ ॥ ১.৪৯॥
যতো হি জ্ঞানিনঃ সর্বে পশুপক্ষিমৃগাদযঃ ।
জ্ঞানং চ তন্মনুষ্যাণাং যত্তেষাং মৃগপক্ষিণাম্ ॥ ১.৫০॥
মনুষ্যাণাং চ যত্তেষাং তুল্যমন্যত্তথোভযোঃ ।
জ্ঞানেঽপি সতি পশ্যৈতান্ পতঙ্গাঞ্ছাবচঞ্চুষু ॥ ১.৫১॥
কণমোক্ষাদৃতান্ মোহাত্পীড্যমানানপি ক্ষুধা ।
মানুষা মনুজব্যাঘ্র সাভিলাষাঃ সুতান্ প্রতি ॥ ১.৫২॥
লোভাত্ প্রত্যুপকারায নন্বেতান্ কিং ন পশ্যসি ।
তথাপি মমতাবর্ত্তে মোহগর্তে নিপাতিতাঃ ॥ ১.৫৩॥
মহামাযাপ্রভাবেণ সংসারস্থিতিকারিণা ।
তন্নাত্র বিস্মযঃ কার্যো যোগনিদ্রা জগত্পতেঃ ॥ ১.৫৪॥
মহামাযা হরেশ্চৈষা তযা সম্মোহ্যতে জগত্ ।
জ্ঞানিনামপি চেতাংসি দেবী ভগবতী হি সা ॥ ১.৫৫॥
বলাদাকৃষ্য মোহায মহামাযা প্রযচ্ছতি ।
তযা বিসৃজ্যতে বিশ্বং জগদেতচ্চরাচরম্ ॥ ১.৫৬॥
সৈষা প্রসন্না বরদা নৃণাং ভবতি মুক্তযে ।
সা বিদ্যা পরমা মুক্তের্হেতুভূতা সনাতনী ॥ ১.৫৭॥
সংসারবন্ধহেতুশ্চ সৈব সর্বেশ্বরেশ্বরী ॥ ১.৫৮॥
রাজোবাচ ॥ ১.৫৯॥
ভগবন্ কা হি সা দেবী মহামাযেতি যাং ভবান্ ॥ ১.৬০॥
ব্রবীতি কথমুত্পন্না সা কর্মাস্যাশ্চ কিং দ্বিজ ।
যত্প্রভাবা চ সা দেবী যত্স্বরূপা যদুদ্ভবা ॥ ১.৬১॥
তত্সর্বং শ্রোতুমিচ্ছামি ত্বত্তো ব্রহ্মবিদাং বর ॥ ১.৬২॥
ঋষিরুবাচ ॥ ১.৬৩॥
নিত্যৈব সা জগন্মূর্তিস্তযা সর্বমিদং ততম্ ॥ ১.৬৪॥
তথাপি তত্সমুত্পত্তির্বহুধা শ্রূযতাং মম ।
দেবানাং কার্যসিদ্ধ্যর্থমাবির্ভবতি সা যদা ॥ ১.৬৫॥
উত্পন্নেতি তদা লোকে সা নিত্যাপ্যভিধীযতে ।
যোগনিদ্রাং যদা বিষ্ণুর্জগত্যেকার্ণবীকৃতে ॥ ১.৬৬॥
আস্তীর্য শেষমভজত্ কল্পান্তে ভগবান্ প্রভুঃ ।
তদা দ্বাবসুরৌ ঘোরৌ বিখ্যাতৌ মধুকৈটভৌ ॥ ১.৬৭॥
বিষ্ণুকর্ণমলোদ্ভূতৌ হন্তুং ব্রহ্মাণমুদ্যতৌ ।
স নাভিকমলে বিষ্ণোঃ স্থিতো ব্রহ্মা প্রজাপতিঃ ॥ ১.৬৮॥
দৃষ্ট্বা তাবসুরৌ চোগ্রৌ প্রসুপ্তং চ জনার্দনম্ ।
তুষ্টাব যোগনিদ্রাং তামেকাগ্রহৃদযঃ স্থিতঃ ॥ ১.৬৯॥
বিবোধনার্থায হরের্হরিনেত্রকৃতালযাম্ ।
বিশ্বেশ্বরীং জগদ্ধাত্রীং স্থিতিসংহারকারিণীম্ ॥ ১.৭০॥
নিদ্রাং ভগবতীং বিষ্ণোরতুলাং তেজসঃ প্রভুঃ ॥ ১.৭১॥
ব্রহ্মোবাচ ॥ ১.৭২॥
ত্বং স্বাহা ত্বং স্বধা ত্বং হি বষট্কারঃ স্বরাত্মিকা ॥ ১.৭৩॥
সুধা ত্বমক্ষরে নিত্যে ত্রিধা মাত্রাত্মিকা স্থিতা ।
অর্ধমাত্রা স্থিতা নিত্যা যানুচ্চার্যাবিশেষতঃ ॥ ১.৭৪॥
ত্বমেব সন্ধ্যা সাবিত্রী ত্বং দেবি জননী পরা ।
ত্বযৈতদ্ধার্যতে বিশ্বং ত্বযৈতত্ সৃজ্যতে জগত্ ॥ ১.৭৫॥
ত্বযৈতত্ পাল্যতে দেবি ত্বমত্স্যন্তে চ সর্বদা ।
বিসৃষ্টৌ সৃষ্টিরূপা ত্বং স্থিতিরূপা চ পালনে ॥ ১.৭৬॥
তথা সংহৃতিরূপান্তে জগতোঽস্য জগন্মযে ।
মহাবিদ্যা মহামাযা মহামেধা মহাস্মৃতিঃ ॥ ১.৭৭॥
মহামোহা চ ভবতী মহাদেবী মহেশ্বরী ।
প্রকৃতিস্ত্বং চ সর্বস্য গুণত্রযবিভাবিনী ॥ ১.৭৮॥
কালরাত্রির্মহারাত্রির্মোহরাত্রিশ্চ দারুণা ।
ত্বং শ্রীস্ত্বমীশ্বরী ত্বং হ্রীস্ত্বং বুদ্ধির্বোধলক্ষণা ॥ ১.৭৯॥
লজ্জা পুষ্টিস্তথা তুষ্টিস্ত্বং শান্তিঃ ক্ষান্তিরেব চ ।
খড্গিনী শূলিনী ঘোরা গদিনী চক্রিণী তথা ॥ ১.৮০॥
শঙ্খিনী চাপিনী বাণভুশুণ্ডীপরিঘাযুধা ।
সৌম্যা সৌম্যতরাশেষসৌম্যেভ্যস্ত্বতিসুন্দরী ॥ ১.৮১॥
পরাপরাণাং পরমা ত্বমেব পরমেশ্বরী ।
যচ্চ কিঞ্চিত্ক্বচিদ্বস্তু সদসদ্বাখিলাত্মিকে ॥ ১.৮২॥
তস্য সর্বস্য যা শক্তিঃ সা ত্বং কিং স্তূযসে মযা ।
যযা ত্বযা জগত্স্রষ্টা জগত্পাত্যত্তি যো জগত্ ॥ ১.৮৩॥
সোঽপি নিদ্রাবশং নীতঃ কস্ত্বাং স্তোতুমিহেশ্বরঃ ।
বিষ্ণুঃ শরীরগ্রহণমহমীশান এব চ ॥ ১.৮৪॥
কারিতাস্তে যতোঽতস্ত্বাং কঃ স্তোতুং শক্তিমান্ ভবেত্ ।
সা ত্বমিত্থং প্রভাবৈঃ স্বৈরুদারৈর্দেবি সংস্তুতা ॥ ১.৮৫॥
মোহযৈতৌ দুরাধর্ষাবসুরৌ মধুকৈটভৌ ।
প্রবোধং চ জগত্স্বামী নীযতামচ্যুতো লঘু ॥ ১.৮৬॥
বোধশ্চ ক্রিযতামস্য হন্তুমেতৌ মহাসুরৌ ॥ ১.৮৭॥
ঋষিরুবাচ ॥ ১.৮৮॥
এবং স্তুতা তদা দেবী তামসী তত্র বেধসা ॥ ১.৮৯॥
বিষ্ণোঃ প্রবোধনার্থায নিহন্তুং মধুকৈটভৌ ।
নেত্রাস্যনাসিকাবাহুহৃদযেভ্যস্তথোরসঃ ॥ ১.৯০॥
নির্গম্য দর্শনে তস্থৌ ব্রহ্মণোঽব্যক্তজন্মনঃ ।
উত্তস্থৌ চ জগন্নাথস্তযা মুক্তো জনার্দনঃ ॥ ১.৯১॥
একার্ণবেঽহিশযনাত্ততঃ স দদৃশে চ তৌ ।
মধুকৈটভৌ দুরাত্মানাবতিবীর্যপরাক্রমৌ ॥ ১.৯২॥
ক্রোধরক্তেক্ষণাবত্তুং ব্রহ্মাণং জনিতোদ্যমৌ ।
সমুত্থায ততস্তাভ্যাং যুযুধে ভগবান্ হরিঃ ॥ ১.৯৩॥
পঞ্চবর্ষসহস্রাণি বাহুপ্রহরণো বিভুঃ ।
তাবপ্যতিবলোন্মত্তৌ মহামাযাবিমোহিতৌ ॥ ১.৯৪॥
উক্তবন্তৌ বরোঽস্মত্তো ব্রিযতামিতি কেশবম্ ॥ ১.৯৫॥
শ্রীভগবানুবাচ ॥ ১.৯৬॥
ভবেতামদ্য মে তুষ্টৌ মম বধ্যাবুভাবপি ॥ ১.৯৭॥
কিমন্যেন বরেণাত্র এতাবদ্ধি বৃতং মযা ॥ ১.৯৮॥
ঋষিরুবাচ ॥ ১.৯৯॥
বঞ্চিতাভ্যামিতি তদা সর্বমাপোমযং জগত্ ॥ ১.১০০॥
বিলোক্য তাভ্যাং গদিতো ভগবান্ কমলেক্ষণঃ ।
আবাং জহি ন যত্রোর্বী সলিলেন পরিপ্লুতা ॥ ১.১০১॥
ঋষিরুবাচ ॥ ১.১০২॥
তথেত্যুক্ত্বা ভগবতা শঙ্খচক্রগদাভৃতা ।
কৃত্বা চক্রেণ বৈ ছিন্নে জঘনে শিরসী তযোঃ ॥ ১.১০৩॥
এবমেষা সমুত্পন্না ব্রহ্মণা সংস্তুতা স্বযম্ ।
প্রভাবমস্যা দেব্যাস্তু ভূযঃ শ‍ৃণু বদামি তে ॥ ১.১০৪॥
। ঐং ওঁ ।
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
মধুকৈটভবধো নাম প্রথমোঽধ্যাযঃ ॥ ১॥
উবাচ১৪, অর্ধশ্লোকাঃ ২৪, শ্লোকাঃ ৬৬, এবমাদিতঃ ॥ ১০৪॥

বিনিযোগঃ
অস্য শ্রী মধ্যমচরিত্রস্য বিষ্ণুরৃষিঃ ।
শ্রীমহালক্ষ্মীর্দেবতা ।
উষ্ণিক্ ছন্দঃ । শাকম্ভরী শক্তিঃ । দুর্গা বীজম্ ।
বাযুস্তত্ত্বম্ ।
যজুর্বেদঃ স্বরূপম্ । শ্রীমহালক্ষ্মীপ্রীত্যর্থে
মধ্যমচরিত্রজপে বিনিযোগঃ ।
। ধ্যানম্ ।
ওঁ অক্ষস্রক্পরশূ গদেষুকুলিশং পদ্মং ধনুঃ কুণ্ডিকাং
দণ্ডং শক্তিমসিং চ চর্ম জলজং ঘণ্টাং সুরাভাজনম্ ।
শূলং পাশসুদর্শনে চ দধতীং হস্তৈঃ প্রবালপ্রভাং
সেবে সৈরিভমর্দিনীমিহ মহালক্ষ্মীং সরোজস্থিতাম্ ॥
ওঁ হ্রীং ঋষিরুবাচ ॥ ২.১॥
দেবাসুরমভূদ্যুদ্ধং পূর্ণমব্দশতং পুরা ।
মহিষেঽসুরাণামধিপে দেবানাং চ পুরন্দরে ॥ ২.২॥
তত্রাসুরৈর্মহাবীর্যৈর্দেবসৈন্যং পরাজিতম্ ।
জিত্বা চ সকলান্ দেবানিন্দ্রোঽভূন্মহিষাসুরঃ ॥ ২.৩॥
ততঃ পরাজিতা দেবাঃ পদ্মযোনিং প্রজাপতিম্ ।
পুরস্কৃত্য গতাস্তত্র যত্রেশগরুডধ্বজৌ ॥ ২.৪॥
যথাবৃত্তং তযোস্তদ্বন্মহিষাসুরচেষ্টিতম্ ।
ত্রিদশাঃ কথযামাসুর্দেবাভিভববিস্তরম্ ॥ ২.৫॥
সূর্যেন্দ্রাগ্ন্যনিলেন্দূনাং যমস্য বরুণস্য চ ।
অন্যেষাং চাধিকারান্স স্বযমেবাধিতিষ্ঠতি ॥ ২.৬॥
স্বর্গান্নিরাকৃতাঃ সর্বে তেন দেবগণা ভুবি ।
বিচরন্তি যথা মর্ত্যা মহিষেণ দুরাত্মনা ॥ ২.৭॥
এতদ্বঃ কথিতং সর্বমমরারিবিচেষ্টিতম্ ।
শরণং বঃ প্রপন্নাঃ স্মো বধস্তস্য বিচিন্ত্যতাম্ ॥ ২.৮॥
ইত্থং নিশম্য দেবানাং বচাংসি মধুসূদনঃ ।
চকার কোপং শম্ভুশ্চ ভ্রুকুটীকুটিলাননৌ ॥ ২.৯॥
ততোঽতিকোপপূর্ণস্য চক্রিণো বদনাত্ততঃ ।
নিশ্চক্রাম মহত্তেজো ব্রহ্মণঃ শঙ্করস্য চ ॥ ২.১০॥
অন্যেষাং চৈব দেবানাং শক্রাদীনাং শরীরতঃ ।
নির্গতং সুমহত্তেজস্তচ্চৈক্যং সমগচ্ছত ॥ ২.১১॥
অতীব তেজসঃ কূটং জ্বলন্তমিব পর্বতম্ ।
দদৃশুস্তে সুরাস্তত্র জ্বালাব্যাপ্তদিগন্তরম্ ॥ ২.১২॥
অতুলং তত্র তত্তেজঃ সর্বদেবশরীরজম্ ।
একস্থং তদভূন্নারী ব্যাপ্তলোকত্রযং ত্বিষা ॥ ২.১৩॥
যদভূচ্ছাম্ভবং তেজস্তেনাজাযত তন্মুখম্ ।
যাম্যেন চাভবন্ কেশা বাহবো বিষ্ণুতেজসা ॥ ২.১৪॥
সৌম্যেন স্তনযোর্যুগ্মং মধ্যং চৈন্দ্রেণ চাভবত্ ।
বারুণেন চ জঙ্ঘোরূ নিতম্বস্তেজসা ভুবঃ ॥ ২.১৫॥
ব্রহ্মণস্তেজসা পাদৌ তদঙ্গুল্যোঽর্কতেজসা ।
বসূনাং চ করাঙ্গুল্যঃ কৌবেরেণ চ নাসিকা ॥ ২.১৬॥
তস্যাস্তু দন্তাঃ সম্ভূতাঃ প্রাজাপত্যেন তেজসা ।
নযনত্রিতযং জজ্ঞে তথা পাবকতেজসা ॥ ২.১৭॥
ভ্রুবৌ চ সন্ধ্যযোস্তেজঃ শ্রবণাবনিলস্য চ ।
অন্যেষাং চৈব দেবানাং সম্ভবস্তেজসাং শিবা ॥ ২.১৮॥
ততঃ সমস্তদেবানাং তেজোরাশিসমুদ্ভবাম্ ।
তাং বিলোক্য মুদং প্রাপুরমরা মহিষার্দিতাঃ ।
ততো দেবা দদুস্তস্যৈ স্বানি স্বান্যাযুধানি চ ॥ ২.১৯॥
শূলং শূলাদ্বিনিষ্কৃষ্য দদৌ তস্যৈ পিনাকধৃক্ ।
চক্রং চ দত্তবান্ কৃষ্ণঃ সমুত্পাট্য স্বচক্রতঃ ॥ ২.২০॥
শঙ্খং চ বরুণঃ শক্তিং দদৌ তস্যৈ হুতাশনঃ ।
মারুতো দত্তবাংশ্চাপং বাণপূর্ণে তথেষুধী ॥ ২.২১॥
বজ্রমিন্দ্রঃ সমুত্পাট্য কুলিশাদমরাধিপঃ ।
দদৌ তস্যৈ সহস্রাক্ষো ঘণ্টামৈরাবতাদ্গজাত্ ॥ ২.২২॥
কালদণ্ডাদ্যমো দণ্ডং পাশং চাম্বুপতির্দদৌ ।
প্রজাপতিশ্চাক্ষমালাং দদৌ ব্রহ্মা কমণ্ডলুম্ ॥ ২.২৩॥
সমস্তরোমকূপেষু নিজরশ্মীন্ দিবাকরঃ ।
কালশ্চ দত্তবান্ খড্গং তস্যৈ চর্ম চ নির্মলম্ ॥ ২.২৪॥
ক্ষীরোদশ্চামলং হারমজরে চ তথাম্বরে ।
চূডামণিং তথা দিব্যং কুণ্ডলে কটকানি চ ॥ ২.২৫॥
অর্ধচন্দ্রং তথা শুভ্রং কেযূরান্ সর্ববাহুষু ।
নূপুরৌ বিমলৌ তদ্বদ্ গ্রৈবেযকমনুত্তমম্ ॥ ২.২৬॥
অঙ্গুলীযকরত্নানি সমস্তাস্বঙ্গুলীষু চ ।
বিশ্বকর্মা দদৌ তস্যৈ পরশুং চাতিনির্মলম্ ॥ ২.২৭॥
অস্ত্রাণ্যনেকরূপাণি তথাভেদ্যং চ দংশনম্ ।
অম্লানপঙ্কজাং মালাং শিরস্যুরসি চাপরাম্ ॥ ২.২৮॥
অদদজ্জলধিস্তস্যৈ পঙ্কজং চাতিশোভনম্ ।
হিমবান্ বাহনং সিংহং রত্নানি বিবিধানি চ ॥ ২.২৯॥
দদাবশূন্যং সুরযা পানপাত্রং ধনাধিপঃ ।
শেষশ্চ সর্বনাগেশো মহামণিবিভূষিতম্ ॥ ২.৩০॥
নাগহারং দদৌ তস্যৈ ধত্তে যঃ পৃথিবীমিমাম্ ।
অন্যৈরপি সুরৈর্দেবী ভূষণৈরাযুধৈস্তথা ॥ ২.৩১॥
সম্মানিতা ননাদোচ্চৈঃ সাট্টহাসং মুহুর্মুহুঃ ।
তস্যা নাদেন ঘোরেণ কৃত্স্নমাপূরিতং নভঃ ॥ ২.৩২॥
অমাযতাতিমহতা প্রতিশব্দো মহানভূত্ ।
চুক্ষুভুঃ সকলা লোকাঃ সমুদ্রাশ্চ চকম্পিরে ॥ ২.৩৩॥
চচাল বসুধা চেলুঃ সকলাশ্চ মহীধরাঃ ।
জযেতি দেবাশ্চ মুদা তামূচুঃ সিংহবাহিনীম্ ॥ ২.৩৪॥
তুষ্টুবুর্মুনযশ্চৈনাং ভক্তিনম্রাত্মমূর্তযঃ ।
দৃষ্ট্বা সমস্তং সঙ্ক্ষুব্ধং ত্রৈলোক্যমমরারযঃ ॥ ২.৩৫॥
সন্নদ্ধাখিলসৈন্যাস্তে সমুত্তস্থুরুদাযুধাঃ ।
আঃ কিমেতদিতি ক্রোধাদাভাষ্য মহিষাসুরঃ ॥ ২.৩৬॥
অভ্যধাবত তং শব্দমশেষৈরসুরৈর্বৃতঃ ।
স দদর্শ ততো দেবীং ব্যাপ্তলোকত্রযাং ত্বিষা ॥ ২.৩৭॥
পাদাক্রান্ত্যা নতভুবং কিরীটোল্লিখিতাম্বরাম্ ।
ক্ষোভিতাশেষপাতালাং ধনুর্জ্যানিঃস্বনেন তাম্ ॥ ২.৩৮॥
দিশো ভুজসহস্রেণ সমন্তাদ্ব্যাপ্য সংস্থিতাম্ ।
ততঃ প্রববৃতে যুদ্ধং তযা দেব্যা সুরদ্বিষাম্ ॥ ২.৩৯॥
শস্ত্রাস্ত্রৈর্বহুধা মুক্তৈরাদীপিতদিগন্তরম্ ।
মহিষাসুরসেনানীশ্চিক্ষুরাখ্যো মহাসুরঃ ॥ ২.৪০॥
যুযুধে চামরশ্চান্যৈশ্চতুরঙ্গবলান্বিতঃ ।
রথানামযুতৈঃ ষড্ভিরুদগ্রাখ্যো মহাসুরঃ ॥ ২.৪১॥
অযুধ্যতাযুতানাং চ সহস্রেণ মহাহনুঃ ।
পঞ্চাশদ্ভিশ্চ নিযুতৈরসিলোমা মহাসুরঃ ॥ ২.৪২॥
অযুতানাং শতৈঃ ষড্ভির্বাষ্কলো যুযুধে রণে ।
গজবাজিসহস্রৌঘৈরনেকৈঃ পরিবারিতঃ ॥ ২.৪৩॥
বৃতো রথানাং কোট্যা চ যুদ্ধে তস্মিন্নযুধ্যত ।
বিডালাখ্যোঽযুতানাং চ পঞ্চাশদ্ভিরথাযুতৈঃ ॥ ২.৪৪॥
যুযুধে সংযুগে তত্র রথানাং পরিবারিতঃ ।
অন্যে চ তত্রাযুতশো রথনাগহযৈর্বৃতাঃ ॥ ২.৪৫॥
যুযুধুঃ সংযুগে দেব্যা সহ তত্র মহাসুরাঃ ।
কোটিকোটিসহস্রৈস্তু রথানাং দন্তিনাং তথা ॥ ২.৪৬॥
হযানাং চ বৃতো যুদ্ধে তত্রাভূন্মহিষাসুরঃ ।
তোমরৈর্ভিন্দিপালৈশ্চ শক্তিভির্মুসলৈস্তথা ॥ ২.৪৭॥
যুযুধুঃ সংযুগে দেব্যা খড্গৈঃ পরশুপট্টিশৈঃ ।
কেচিচ্চ চিক্ষিপুঃ শক্তীঃ কেচিত্ পাশাংস্তথাপরে ॥ ২.৪৮॥
দেবীং খড্গপ্রহারৈস্তু তে তাং হন্তুং প্রচক্রমুঃ ।
সাপি দেবী ততস্তানি শস্ত্রাণ্যস্ত্রাণি চণ্ডিকা ॥ ২.৪৯॥
লীলযৈব প্রচিচ্ছেদ নিজশস্ত্রাস্ত্রবর্ষিণী ।
অনাযস্তাননা দেবী স্তূযমানা সুরর্ষিভিঃ ॥ ২.৫০॥
মুমোচাসুরদেহেষু শস্ত্রাণ্যস্ত্রাণি চেশ্বরী ।
সোঽপি ক্রুদ্ধো ধুতসটো দেব্যা বাহনকেসরী ॥ ২.৫১॥
চচারাসুরসৈন্যেষু বনেষ্বিব হুতাশনঃ ।
নিঃশ্বাসান্ মুমুচে যাংশ্চ যুধ্যমানা রণেঽম্বিকা ॥ ২.৫২॥
ত এব সদ্যঃ সম্ভূতা গণাঃ শতসহস্রশঃ ।
যুযুধুস্তে পরশুভির্ভিন্দিপালাসিপট্টিশৈঃ ॥ ২.৫৩॥
নাশযন্তোঽসুরগণান্ দেবীশক্ত্যুপবৃংহিতাঃ ।
অবাদযন্ত পটহান্ গণাঃ শঙ্খাংস্তথাপরে ॥ ২.৫৪॥
মৃদঙ্গাংশ্চ তথৈবান্যে তস্মিন্ যুদ্ধমহোত্সবে ।
ততো দেবী ত্রিশূলেন গদযা শক্তিবৃষ্টিভিঃ ॥ ২.৫৫॥
খড্গাদিভিশ্চ শতশো নিজঘান মহাসুরান্ ।
পাতযামাস চৈবান্যান্ ঘণ্টাস্বনবিমোহিতান্ ॥ ২.৫৬॥
অসুরান্ ভুবি পাশেন বদ্ধ্বা চান্যানকর্ষযত্ ।
কেচিদ্ দ্বিধাকৃতাস্তীক্ষ্ণৈঃ খড্গপাতৈস্তথাপরে ॥ ২.৫৭॥
বিপোথিতা নিপাতেন গদযা ভুবি শেরতে ।
বেমুশ্চ কেচিদ্রুধিরং মুসলেন ভৃশং হতাঃ ॥ ২.৫৮॥
কেচিন্নিপতিতা ভূমৌ ভিন্নাঃ শূলেন বক্ষসি ।
নিরন্তরাঃ শরৌঘেণ কৃতাঃ কেচিদ্রণাজিরে ॥ ২.৫৯॥
শ্যেনানুকারিণঃ প্রাণান্ মুমুচুস্ত্রিদশার্দনাঃ ।
কেষাঞ্চিদ্ বাহবশ্ছিন্নাশ্ছিন্নগ্রীবাস্তথাপরে ॥ ২.৬০॥
শিরাংসি পেতুরন্যেষামন্যে মধ্যে বিদারিতাঃ ।
বিচ্ছিন্নজঙ্ঘাস্ত্বপরে পেতুরুর্ব্যাং মহাসুরাঃ ॥ ২.৬১॥
একবাহ্বক্ষিচরণাঃ কেচিদ্দেব্যা দ্বিধাকৃতাঃ ।
ছিন্নেঽপি চান্যে শিরসি পতিতাঃ পুনরুত্থিতাঃ ॥ ২.৬২॥
কবন্ধা যুযুধুর্দেব্যা গৃহীতপরমাযুধাঃ ।
ননৃতুশ্চাপরে তত্র যুদ্ধে তূর্যলযাশ্রিতাঃ ॥ ২.৬৩॥
কবন্ধাশ্ছিন্নশিরসঃ খড্গশক্ত্যৃষ্টিপাণযঃ ।
তিষ্ঠ তিষ্ঠেতি ভাষন্তো দেবীমন্যে মহাসুরাঃ ॥ ২.৬৪॥
পাতিতৈ রথনাগাশ্বৈরসুরৈশ্চ বসুন্ধরা ।
অগম্যা সাভবত্তত্র যত্রাভূত্ স মহারণঃ ॥ ২.৬৫॥
শোণিতৌঘা মহানদ্যঃ সদ্যস্তত্র প্রসুস্রুবুঃ ।
মধ্যে চাসুরসৈন্যস্য বারণাসুরবাজিনাম্ ॥ ২.৬৬॥
ক্ষণেন তন্মহাসৈন্যমসুরাণাং তথাম্বিকা ।
নিন্যে ক্ষযং যথা বহ্নিস্তৃণদারুমহাচযম্ ॥ ২.৬৭॥
স চ সিংহো মহানাদমুত্সৃজন্ ধুতকেসরঃ ।
শরীরেভ্যোঽমরারীণামসূনিব বিচিন্বতি ॥ ২.৬৮॥
দেব্যা গণৈশ্চ তৈস্তত্র কৃতং যুদ্ধং তথাসুরৈঃ ।
যথৈষাং তুতুষুর্দেবাঃ পুষ্পবৃষ্টিমুচো দিবি ॥ ২.৬৯॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
মহিষাসুরসৈন্যবধো নাম দ্বিতীযোঽধ্যাযঃ ॥ ২॥
উবাচ১, অর্ধশ্লোকাঃ ৬৮, শ্লোকাঃ ৬৯, এবমাদিতঃ ॥ ১৭৩॥

। ধ্যানম্ ।
ওঁ উদ্যদ্ভানুসহস্রকান্তিমরুণক্ষৌমাং শিরোমালিকাং
রক্তালিপ্তপযোধরাং জপবটীং বিদ্যামভীতিং বরম্ ।
হস্তাব্জৈর্দধতীং ত্রিনেত্রবিলসদ্বক্ত্রারবিন্দশ্রিযং
দেবীং বদ্ধহিমাংশুরত্নমুকুটাং বন্দেঽরবিন্দস্থিতাম্ ।
ওঁ ঋষিরুবাচ ॥ ৩.১॥
নিহন্যমানং তত্সৈন্যমবলোক্য মহাসুরঃ ।
সেনানীশ্চিক্ষুরঃ কোপাদ্যযৌ যোদ্ধুমথাম্বিকাম্ ॥ ৩.২॥
স দেবীং শরবর্ষেণ ববর্ষ সমরেঽসুরঃ ।
যথা মেরুগিরেঃ শ‍ৃঙ্গং তোযবর্ষেণ তোযদঃ ॥ ৩.৩॥
তস্য ছিত্বা ততো দেবী লীলযৈব শরোত্করান্ ।
জঘান তুরগান্বাণৈর্যন্তারং চৈব বাজিনাম্ ॥ ৩.৪॥
চিচ্ছেদ চ ধনুঃ সদ্যো ধ্বজং চাতিসমুচ্ছৃতম্ ।
বিব্যাধ চৈব গাত্রেষু ছিন্নধন্বানমাশুগৈঃ ॥ ৩.৫॥
সচ্ছিন্নধন্বা বিরথো হতাশ্বো হতসারথিঃ ।
অভ্যধাবত তাং দেবীং খড্গচর্মধরোঽসুরঃ ॥ ৩.৬॥
সিংহমাহত্য খড্গেন তীক্ষ্ণধারেণ মূর্ধনি ।
আজঘান ভুজে সব্যে দেবীমপ্যতিবেগবান্ ॥ ৩.৭॥
তস্যাঃ খড্গো ভুজং প্রাপ্য পফাল নৃপনন্দন ।
ততো জগ্রাহ শূলং স কোপাদরুণলোচনঃ ॥ ৩.৮॥
চিক্ষেপ চ ততস্তত্তু ভদ্রকাল্যাং মহাসুরঃ ।
জাজ্বল্যমানং তেজোভী রবিবিম্বমিবাম্বরাত্ ॥ ৩.৯॥
দৃষ্ট্বা তদাপতচ্ছূলং দেবী শূলমমুঞ্চত ।
তেন তচ্ছতধা নীতং শূলং স চ মহাসুরঃ ॥ ৩.১০॥
হতে তস্মিন্মহাবীর্যে মহিষস্য চমূপতৌ ।
আজগাম গজারূঢশ্চামরস্ত্রিদশার্দনঃ ॥ ৩.১১॥
সোঽপি শক্তিং মুমোচাথ দেব্যাস্তামম্বিকা দ্রুতম্ ।
হুঙ্কারাভিহতাং ভূমৌ পাতযামাস নিষ্প্রভাম্ ॥ ৩.১২॥
ভগ্নাং শক্তিং নিপতিতাং দৃষ্ট্বা ক্রোধসমন্বিতঃ ।
চিক্ষেপ চামরঃ শূলং বাণৈস্তদপি সাচ্ছিনত্ ॥ ৩.১৩॥
ততঃ সিংহঃ সমুত্পত্য গজকুম্ভান্তরে স্থিতঃ ।
বাহুযুদ্ধেন যুযুধে তেনোচ্চৈস্ত্রিদশারিণা ॥ ৩.১৪॥
যুধ্যমানৌ ততস্তৌ তু তস্মান্নাগান্মহীং গতৌ ।
যুযুধাতেঽতিসংরব্ধৌ প্রহারৈরতিদারুণৈঃ ॥ ৩.১৫॥
ততো বেগাত্ খমুত্পত্য নিপত্য চ মৃগারিণা ।
করপ্রহারেণ শিরশ্চামরস্য পৃথক্ কৃতম্ ॥ ৩.১৬॥
উদগ্রশ্চ রণে দেব্যা শিলাবৃক্ষাদিভির্হতঃ ।
দন্তমুষ্টিতলৈশ্চৈব করালশ্চ নিপাতিতঃ ॥ ৩.১৭॥
দেবী ক্রুদ্ধা গদাপাতৈশ্চূর্ণযামাস চোদ্ধতম্ ।
বাষ্কলং ভিন্দিপালেন বাণৈস্তাম্রং তথান্ধকম্ ॥ ৩.১৮॥
উগ্রাস্যমুগ্রবীর্যং চ তথৈব চ মহাহনুম্ ।
ত্রিনেত্রা চ ত্রিশূলেন জঘান পরমেশ্বরী ॥ ৩.১৯॥
বিডালস্যাসিনা কাযাত্ পাতযামাস বৈ শিরঃ ।
দুর্ধরং দুর্মুখং চোভৌ শরৈর্নিন্যে যমক্ষযম্ ॥ ৩.২০॥
এবং সঙ্ক্ষীযমাণে তু স্বসৈন্যে মহিষাসুরঃ ।
মাহিষেণ স্বরূপেণ ত্রাসযামাস তান্ গণান্ ॥ ৩.২১॥
কাংশ্চিত্তুণ্ডপ্রহারেণ খুরক্ষেপৈস্তথাপরান্ ।
লাঙ্গূলতাডিতাংশ্চান্যান্ শ‍ৃঙ্গাভ্যাং চ বিদারিতান্ ॥ ৩.২২॥
বেগেন কাংশ্চিদপরান্নাদেন ভ্রমণেন চ ।
নিঃশ্বাসপবনেনান্যান্পাতযামাস ভূতলে ॥ ৩.২৩॥
নিপাত্য প্রমথানীকমভ্যধাবত সোঽসুরঃ ।
সিংহং হন্তুং মহাদেব্যাঃ কোপং চক্রে ততোঽম্বিকা ॥ ৩.২৪॥
সোঽপি কোপান্মহাবীর্যঃ খুরক্ষুণ্ণমহীতলঃ ।
শ‍ৃঙ্গাভ্যাং পর্বতানুচ্চাংশ্চিক্ষেপ চ ননাদ চ ॥ ৩.২৫॥
বেগভ্রমণবিক্ষুণ্ণা মহী তস্য ব্যশীর্যত ।
লাঙ্গূলেনাহতশ্চাব্ধিঃ প্লাবযামাস সর্বতঃ ॥ ৩.২৬॥
ধুতশ‍ৃঙ্গবিভিন্নাশ্চ খণ্ডং খণ্ডং যযুর্ঘনাঃ ।
শ্বাসানিলাস্তাঃ শতশো নিপেতুর্নভসোঽচলাঃ ॥ ৩.২৭॥
ইতি ক্রোধসমাধ্মাতমাপতন্তং মহাসুরম্ ।
দৃষ্ট্বা সা চণ্ডিকা কোপং তদ্বধায তদাকরোত্ ॥ ৩.২৮॥
সা ক্ষিপ্ত্বা তস্য বৈ পাশং তং ববন্ধ মহাসুরম্ ।
তত্যাজ মাহিষং রূপং সোঽপি বদ্ধো মহামৃধে ॥ ৩.২৯॥
ততঃ সিংহোঽভবত্সদ্যো যাবত্তস্যাম্বিকা শিরঃ ।
ছিনত্তি তাবত্ পুরুষঃ খড্গপাণিরদৃশ্যত ॥ ৩.৩০॥
তত এবাশু পুরুষং দেবী চিচ্ছেদ সাযকৈঃ ।
তং খড্গচর্মণা সার্ধং ততঃ সোঽভূন্মহাগজঃ ॥ ৩.৩১॥
করেণ চ মহাসিংহং তং চকর্ষ জগর্জ চ ।
কর্ষতস্তু করং দেবী খড্গেন নিরকৃন্তত ॥ ৩.৩২॥
ততো মহাসুরো ভূযো মাহিষং বপুরাস্থিতঃ ।
তথৈব ক্ষোভযামাস ত্রৈলোক্যং সচরাচরম্ ॥ ৩.৩৩॥
ততঃ ক্রুদ্ধা জগন্মাতা চণ্ডিকা পানমুত্তমম্ ।
পপৌ পুনঃ পুনশ্চৈব জহাসারুণলোচনা ॥ ৩.৩৪॥
ননর্দ চাসুরঃ সোঽপি বলবীর্যমদোদ্ধতঃ ।
বিষাণাভ্যাং চ চিক্ষেপ চণ্ডিকাং প্রতি ভূধরান্ ॥ ৩.৩৫॥
সা চ তান্প্রহিতাংস্তেন চূর্ণযন্তী শরোত্করৈঃ ।
উবাচতং মদোদ্ধূতমুখরাগাকুলাক্ষরম্ ॥ ৩.৩৬॥
দেব্যুবাচ॥ ৩.৩৭॥
গর্জ গর্জ ক্ষণং মূঢ মধু যাবত্পিবাম্যহম্ ।
মযা ত্বযি হতেঽত্রৈব গর্জিষ্যন্ত্যাশু দেবতাঃ ॥ ৩.৩৮॥
ঋষিরুবাচ ॥ ৩.৩৯॥
এবমুক্ত্বা সমুত্পত্য সারূঢা তং মহাসুরম্ ।
পাদেনাক্রম্য কণ্ঠে চ শূলেনৈনমতাডযত্ ॥ ৩.৪০॥
ততঃ সোঽপি পদাক্রান্তস্তযা নিজমুখাত্তদা ।
অর্ধনিষ্ক্রান্ত এবাসীদ্দেব্যা বীর্যেণ সংবৃতঃ ॥ ৩.৪১॥
অর্ধনিষ্ক্রান্ত এবাসৌ যুধ্যমানো মহাসুরঃ ।
তযা মহাসিনা দেব্যা শিরশ্ছিত্ত্বা নিপাতিতঃ ॥ ৩.৪২॥
ততো হাহাকৃতং সর্বং দৈত্যসৈন্যং ননাশ তত্ ।
প্রহর্ষং চ পরং জগ্মুঃ সকলা দেবতাগণাঃ ॥ ৩.৪৩॥
তুষ্টুবুস্তাং সুরা দেবীং সহদিব্যৈর্মহর্ষিভিঃ ।
জগুর্গন্ধর্বপতযো ননৃতুশ্চাপ্সরোগণাঃ ॥ ৩.৪৪॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
মহিষাসুরবধো নাম তৃতীযোঽধ্যাযঃ ॥ ৩॥
উবাচ৩, অর্ধশ্লোকাঃ ৪১, শ্লোকাঃ ৪৪, এবমাদিতঃ ॥ ২১৭॥

। ধ্যানম্ ।
ওঁ কালাভ্রাভাং কটাক্ষৈররিকুলভযদাং মৌলিবদ্ধেন্দুরেখাং
শঙ্খং চক্রং কৃপাণং ত্রিশিখমপি করৈরুদ্বহন্তীং ত্রিনেত্রাম্ ।
সিংহস্কন্ধাধিরূঢাং ত্রিভুবনমখিলং তেজসা পূরযন্তীং
ধ্যাযেদ্দুর্গাং জযাখ্যাং ত্রিদশপরিবৃতাং সেবিতাং সিদ্ধিকামৈঃ ॥
ওঁ ঋষিরুবাচ ॥ ৪.১॥
শক্রাদযঃ সুরগণা নিহতেঽতিবীর্যে
তস্মিন্দুরাত্মনি সুরারিবলে চ দেব্যা ।
তাং তুষ্টুবুঃ প্রণতিনম্রশিরোধরাংসা
বাগ্ভিঃ প্রহর্ষপুলকোদ্গমচারুদেহাঃ ॥ ৪.২॥
দেব্যা যযা ততমিদং জগদাত্মশক্ত্যা
নিঃশেষদেবগণশক্তিসমূহমূর্ত্যা ।
তামম্বিকামখিলদেবমহর্ষিপূজ্যাং
ভক্ত্যা নতাঃ স্ম বিদধাতু শুভানি সা নঃ ॥ ৪.৩॥
যস্যাঃ প্রভাবমতুলং ভগবাননন্তো
ব্রহ্মা হরশ্চ ন হি বক্তুমলং বলং চ ।
সা চণ্ডিকাখিলজগত্পরিপালনায
নাশায চাশুভভযস্য মতিং করোতু ॥ ৪.৪॥
যা শ্রীঃ স্বযং সুকৃতিনাং ভবনেষ্বলক্ষ্মীঃ
পাপাত্মনাং কৃতধিযাং হৃদযেষু বুদ্ধিঃ ।
শ্রদ্ধা সতাং কুলজনপ্রভবস্য লজ্জা
তাং ত্বাং নতাঃ স্ম পরিপালয দেবি বিশ্বম্ ॥ ৪.৫॥
কিং বর্ণযাম তব রূপমচিন্ত্যমেতত্
কিঞ্চাতিবীর্যমসুরক্ষযকারি ভূরি ।
কিং চাহবেষু চরিতানি তবাতি যানি
সর্বেষু দেব্যসুরদেবগণাদিকেষু ॥ ৪.৬॥
হেতুঃ সমস্তজগতাং ত্রিগুণাপি দোষৈ-
র্ন জ্ঞাযসে হরিহরাদিভিরপ্যপারা ।
সর্বাশ্রযাখিলমিদং জগদংশভূত-
মব্যাকৃতা হি পরমা প্রকৃতিস্ত্বমাদ্যা ॥ ৪.৭॥
যস্যাঃ সমস্তসুরতা সমুদীরণেন
তৃপ্তিং প্রযাতি সকলেষু মখেষু দেবি ।
স্বাহাসি বৈ পিতৃগণস্য চ তৃপ্তিহেতু-
রুচ্চার্যসে ত্বমত এব জনৈঃ স্বধা চ ॥ ৪.৮॥
যা মুক্তিহেতুরবিচিন্ত্যমহাব্রতা ত্বং
অভ্যস্যসে সুনিযতেন্দ্রিযতত্ত্বসারৈঃ ।
মোক্ষার্থিভির্মুনিভিরস্তসমস্তদোষৈ-
র্বিদ্যাসি সা ভগবতী পরমা হি দেবি ॥ ৪.৯॥
শব্দাত্মিকা সুবিমলর্গ্যজুষাং নিধান-
মুদ্গীথরম্যপদপাঠবতাং চ সাম্নাম্ ।
দেবি ত্রযী ভগবতী ভবভাবনায
বার্তাসি সর্বজগতাং পরমার্তিহন্ত্রী ॥ ৪.১০॥
মেধাসি দেবি বিদিতাখিলশাস্ত্রসারা
দুর্গাসি দুর্গভবসাগরনৌরসঙ্গা ।
শ্রীঃ কৈটভারিহৃদযৈককৃতাধিবাসা
গৌরী ত্বমেব শশিমৌলিকৃতপ্রতিষ্ঠা ॥ ৪.১১॥
ঈষত্সহাসমমলং পরিপূর্ণচন্দ্র-
বিম্বানুকারি কনকোত্তমকান্তিকান্তম্ ।
অত্যদ্ভুতং প্রহৃতমাত্তরুষা তথাপি
বক্ত্রং বিলোক্য সহসা মহিষাসুরেণ ॥ ৪.১২॥
দৃষ্ট্বা তু দেবি কুপিতং ভ্রুকুটীকরাল-
মুদ্যচ্ছশাঙ্কসদৃশচ্ছবি যন্ন সদ্যঃ ।
প্রাণান্ মুমোচ মহিষস্তদতীব চিত্রং
কৈর্জীব্যতে হি কুপিতান্তকদর্শনেন ॥ ৪.১৩॥
দেবি প্রসীদ পরমা ভবতী ভবায
সদ্যো বিনাশযসি কোপবতী কুলানি ।
বিজ্ঞাতমেতদধুনৈব যদস্তমেত-
ন্নীতং বলং সুবিপুলং মহিষাসুরস্য ॥ ৪.১৪॥
তে সম্মতা জনপদেষু ধনানি তেষাং
তেষাং যশাংসি ন চ সীদতি বন্ধুবর্গঃ ।
ধন্যাস্ত এব নিভৃতাত্মজভৃত্যদারা
যেষাং সদাভ্যুদযদা ভবতী প্রসন্না ॥ ৪.১৫॥
ধর্ম্যাণি দেবি সকলানি সদৈব কর্মা-
ণ্যত্যাদৃতঃ প্রতিদিনং সুকৃতী করোতি ।
স্বর্গং প্রযাতি চ ততো ভবতী প্রসাদা-
ল্লোকত্রযেঽপি ফলদা ননু দেবি তেন ॥ ৪.১৬॥
দুর্গে স্মৃতা হরসি ভীতিমশেষজন্তোঃ
স্বস্থৈঃ স্মৃতা মতিমতীব শুভাং দদাসি ।
দারিদ্র্যদুঃখভযহারিণি কা ত্বদন্যা
সর্বোপকারকরণায সদার্দ্রচিত্তা ॥ ৪.১৭॥
এভির্হতৈর্জগদুপৈতি সুখং তথৈতে
কুর্বন্তু নাম নরকায চিরায পাপম্ ।
সঙ্গ্রামমৃত্যুমধিগম্য দিবং প্রযান্তু
মত্বেতি নূনমহিতান্বিনিহংসি দেবি ॥ ৪.১৮॥
দৃষ্ট্বৈব কিং ন ভবতী প্রকরোতি ভস্ম
সর্বাসুরানরিষু যত্প্রহিণোষি শস্ত্রম্ ।
লোকান্প্রযান্তু রিপবোঽপি হি শস্ত্রপূতা
ইত্থং মতির্ভবতি তেষ্বহিতেষুসাধ্বী ॥ ৪.১৯॥
খড্গপ্রভানিকরবিস্ফুরণৈস্তথোগ্রৈঃ
শূলাগ্রকান্তিনিবহেন দৃশোঽসুরাণাম্ ।
যন্নাগতা বিলযমংশুমদিন্দুখণ্ড-
যোগ্যাননং তব বিলোকযতাং তদেতত্ ॥ ৪.২০॥
দুর্বৃত্তবৃত্তশমনং তব দেবি শীলং
রূপং তথৈতদবিচিন্ত্যমতুল্যমন্যৈঃ ।
বীর্যং চ হন্তৃ হৃতদেবপরাক্রমাণাং
বৈরিষ্বপি প্রকটিতৈব দযা ত্বযেত্থম্ ॥ ৪.২১॥
কেনোপমা ভবতু তেঽস্য পরাক্রমস্য
রূপং চ শত্রুভযকার্যতিহারি কুত্র ।
চিত্তে কৃপা সমরনিষ্ঠুরতা চ দৃষ্টা
ত্বয্যেব দেবি বরদে ভুবনত্রযেঽপি ॥ ৪.২২॥
ত্রৈলোক্যমেতদখিলং রিপুনাশনেন
ত্রাতং ত্বযা সমরমূর্ধনি তেঽপি হত্বা ।
নীতা দিবং রিপুগণা ভযমপ্যপাস্তম্
অস্মাকমুন্মদসুরারিভবং নমস্তে ॥ ৪.২৩॥
শূলেন পাহি নো দেবি পাহি খড্গেন চাম্বিকে ।
ঘণ্টাস্বনেন নঃ পাহি চাপজ্যানিঃস্বনেন চ ॥ ৪.২৪॥
প্রাচ্যাং রক্ষ প্রতীচ্যাং চ চণ্ডিকে রক্ষ দক্ষিণে ।
ভ্রামণেনাত্মশূলস্য উত্তরস্যাং তথেশ্বরি ॥ ৪.২৫॥
সৌম্যানি যানি রূপাণি ত্রৈলোক্যে বিচরন্তি তে ।
যানি চাত্যন্তঘোরাণি তৈ রক্ষাস্মাংস্তথা ভুবম্ ॥ ৪.২৬॥
খড্গশূলগদাদীনি যানি চাস্ত্রানি তেঽম্বিকে ।
করপল্লবসঙ্গীনি তৈরস্মান্রক্ষ সর্বতঃ ॥ ৪.২৭॥
ঋষিরুবাচ ॥ ৪.২৮॥
এবং স্তুতা সুরৈর্দিব্যৈঃ কুসুমৈর্নন্দনোদ্ভবৈঃ ।
অর্চিতা জগতাং ধাত্রী তথা গন্ধানুলেপনৈঃ ॥ ৪.২৯॥
ভক্ত্যা সমস্তৈস্ত্রিদশৈর্দিব্যৈর্ধূপৈঃ সুধূপিতা ।
প্রাহ প্রসাদসুমুখী সমস্তান্ প্রণতান্ সুরান্ ॥ ৪.৩০॥
দেব্যুবাচ॥ ৪.৩১॥
ব্রিযতাং ত্রিদশাঃ সর্বে যদস্মত্তোঽভিবাঞ্ছিতম্ ॥ ৪.৩২॥
দেবা ঊচুঃ ॥ ৪.৩৩॥
ভগবত্যা কৃতং সর্বং ন কিঞ্চিদবশিষ্যতে ॥ ৪.৩৪॥
যদযং নিহতঃ শত্রুরস্মাকং মহিষাসুরঃ ।
যদি চাপি বরো দেযস্ত্বযাস্মাকং মহেশ্বরি ॥ ৪.৩৫॥
সংস্মৃতা সংস্মৃতা ত্বং নো হিংসেথাঃ পরমাপদঃ ।
যশ্চ মর্ত্যঃ স্তবৈরেভিস্ত্বাং স্তোষ্যত্যমলাননে ॥ ৪.৩৬॥
তস্য বিত্তর্দ্ধিবিভবৈর্ধনদারাদিসম্পদাম্ ।
বৃদ্ধযেঽস্মত্প্রসন্না ত্বং ভবেথাঃ সর্বদাম্বিকে ॥ ৪.৩৭॥
ঋষিরুবাচ ॥ ৪.৩৮॥
ইতি প্রসাদিতা দেবৈর্জগতোঽর্থে তথাত্মনঃ ।
তথেত্যুক্ত্বা ভদ্রকালী বভূবান্তর্হিতা নৃপ ॥ ৪.৩৯॥
ইত্যেতত্কথিতং ভূপ সম্ভূতা সা যথা পুরা ।
দেবী দেবশরীরেভ্যো জগত্ত্রযহিতৈষিণী ॥ ৪.৪০॥
পুনশ্চ গৌরীদেহাত্সা সমুদ্ভূতা যথাভবত্ ।
বধায দুষ্টদৈত্যানাং তথা শুম্ভনিশুম্ভযোঃ ॥ ৪.৪১॥
রক্ষণায চ লোকানাং দেবানামুপকারিণী ।
তচ্ছৃণুষ্ব মযাখ্যাতং যথাবত্কথযামি তে ॥ ৪.৪২॥
। হ্রীং ওঁ ।
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে
দেবীমাহাত্ম্যে শক্রাদিস্তুতির্নাম চতুর্থোঽধ্যাযঃ ॥ ৪॥
উবাচ৫, অর্ধশ্লোকৌ ২, শ্লোকাঃ ৩৫, এবমাদিতঃ ॥ ২৫৯॥

বিনিযোগঃ
অস্য শ্রী উত্তরচরিত্রস্য রুদ্র ঋষিঃ ।
শ্রীমহাসরস্বতী দেবতা ।
অনুষ্টুপ্ ছন্দঃ । ভীমা শক্তিঃ । ভ্রামরী বীজম্ ।
সূর্যস্তত্ত্বম্ ।
সামবেদঃ স্বরূপম্ । শ্রীমহাসরস্বতীপ্রীত্যর্থে
উত্তরচরিত্রপাঠে বিনিযোগঃ ।
। ধ্যানম্ ।
ঘণ্টাশূলহলানি শঙ্খমুসলে চক্রং ধনুঃ সাযকং
হস্তাব্জৈর্দধতীং ঘনান্তবিলসচ্ছীতাংশুতুল্যপ্রভাম্ ।
গৌরীদেহসমুদ্ভবাং ত্রিজগতামাধারভূতাং মহা-
পূর্বামত্র সরস্বতীমনুভজে শুম্ভাদিদৈত্যার্দিনীম্ ॥
ওঁ ক্লীং ঋষিরুবাচ ॥ ৫.১॥
পুরা শুম্ভনিশুম্ভাভ্যামসুরাভ্যাং শচীপতেঃ ।
ত্রৈলোক্যং যজ্ঞভাগাশ্চ হৃতা মদবলাশ্রযাত্ ॥ ৫.২॥
তাবেব সূর্যতাং তদ্বদধিকারং তথৈন্দবম্ ।
কৌবেরমথ যাম্যং চ চক্রাতে বরুণস্য চ ॥ ৫.৩॥
তাবেব পবনর্দ্ধিং চ চক্রতুর্বহ্নিকর্ম চ ।
ততো দেবা বিনির্ধূতা ভ্রষ্টরাজ্যাঃ পরাজিতাঃ ॥ ৫.৪॥
হৃতাধিকারাস্ত্রিদশাস্তাভ্যাং সর্বে নিরাকৃতাঃ ।
মহাসুরাভ্যাং তাং দেবীং সংস্মরন্ত্যপরাজিতাম্ ॥ ৫.৫॥
তযাস্মাকং বরো দত্তো যথাপত্সু স্মৃতাখিলাঃ ।
ভবতাং নাশযিষ্যামি তত্ক্ষণাত্পরমাপদঃ ॥ ৫.৬॥
ইতি কৃত্বা মতিং দেবা হিমবন্তং নগেশ্বরম্ ।
জগ্মুস্তত্র ততো দেবীং বিষ্ণুমাযাং প্রতুষ্টুবুঃ ॥ ৫.৭॥
দেবা ঊচুঃ ॥ ৫.৮॥
নমো দেব্যৈ মহাদেব্যৈ শিবাযৈ সততং নমঃ ।
নমঃ প্রকৃত্যৈ ভদ্রাযৈ নিযতাঃ প্রণতাঃ স্ম তাম্ ॥ ৫.৯॥
রৌদ্রাযৈ নমো নিত্যাযৈ গৌর্যৈ ধাত্র্যৈ নমো নমঃ ।
জ্যোত্স্নাযৈ চেন্দুরূপিণ্যৈ সুখাযৈ সততং নমঃ ॥ ৫.১০॥
কল্যাণ্যৈ প্রণতাং বৃদ্ধ্যৈ সিদ্ধ্যৈ কুর্মো নমো নমঃ ।
নৈরৃত্যৈ ভূভৃতাং লক্ষ্ম্যৈ শর্বাণ্যৈ তে নমো নমঃ ॥ ৫.১১॥
দুর্গাযৈ দুর্গপারাযৈ সারাযৈ সর্বকারিণ্যৈ ।
খ্যাত্যৈ তথৈব কৃষ্ণাযৈ ধূম্রাযৈ সততং নমঃ ॥ ৫.১২॥
অতিসৌম্যাতিরৌদ্রাযৈ নতাস্তস্যৈ নমো নমঃ ।
নমো জগত্প্রতিষ্ঠাযৈ দেব্যৈ কৃত্যৈ নমো নমঃ ॥ ৫.১৩॥
যা দেবী সর্বভূতেষু বিষ্ণুমাযেতি শব্দিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.১৪-১৬॥
যা দেবী সর্বভূতেষু চেতনেত্যভিধীযতে ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.১৭-১৯॥
যা দেবী সর্বভূতেষু বুদ্ধিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.২০-২২॥
যা দেবী সর্বভূতেষু নিদ্রারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.২৩-২৫॥
যা দেবী সর্বভূতেষু ক্ষুধারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.২৬-২৮॥
যা দেবী সর্বভূতেষু ছাযারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.২৯-৩১॥
যা দেবী সর্বভূতেষু শক্তিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৩২-৩৪॥
যা দেবী সর্বভূতেষু তৃষ্ণারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৩৫-৩৭॥
যা দেবী সর্বভূতেষু ক্ষান্তিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৩৮-৪০॥
যা দেবী সর্বভূতেষু জাতিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৪১-৪৩॥
যা দেবী সর্বভূতেষু লজ্জারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৪৪-৪৬॥
যা দেবী সর্বভূতেষু শান্তিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৪৭-৪৯॥
যা দেবী সর্বভূতেষু শ্রদ্ধারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৫০-৫২॥
যা দেবী সর্বভূতেষু কান্তিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৫৩-৫৫॥
যা দেবী সর্বভূতেষু লক্ষ্মীরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৫৬-৫৮॥
যা দেবী সর্বভূতেষু বৃত্তিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৫৯-৬১॥
যা দেবী সর্বভূতেষু স্মৃতিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৬২-৬৪॥
যা দেবী সর্বভূতেষু দযারূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৬৫-৬৭॥
যা দেবী সর্বভূতেষু তুষ্টিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৬৮-৭০॥
যা দেবী সর্বভূতেষু মাতৃরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৭১-৭৩॥
যা দেবী সর্বভূতেষু ভ্রান্তিরূপেণ সংস্থিতা ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৭৪-৭৬॥
ইন্দ্রিযাণামধিষ্ঠাত্রী ভূতানাং চাখিলেষু যা ।
ভূতেষু সততং তস্যৈ ব্যাপ্ত্যৈ দেব্যৈ নমো নমঃ ॥ ৫.৭৭॥
চিতিরূপেণ যা কৃত্স্নমেতদ্ ব্যাপ্য স্থিতা জগত্ ।
নমস্তস্যৈ নমস্তস্যৈ নমস্তস্যৈ নমো নমঃ ॥ ৫.৭৮-৮০॥
স্তুতা সুরৈঃ পূর্বমভীষ্টসংশ্রযা-
ত্তথা সুরেন্দ্রেণ দিনেষু সেবিতা ।
করোতু সা নঃ শুভহেতুরীশ্বরী
শুভানি ভদ্রাণ্যভিহন্তু চাপদঃ ॥ ৫.৮১॥
যা সাম্প্রতং চোদ্ধতদৈত্যতাপিতৈ-
রস্মাভিরীশা চ সুরৈর্নমস্যতে ।
যা চ স্মৃতা তত্ক্ষণমেব হন্তি নঃ
সর্বাপদো ভক্তিবিনম্রমূর্তিভিঃ ॥ ৫.৮২॥
ঋষিরুবাচ ॥ ৫.৮৩॥
এবং স্তবাভিযুক্তানাং দেবানাং তত্র পার্বতী ।
স্নাতুমভ্যাযযৌ তোযে জাহ্নব্যা নৃপনন্দন ॥ ৫.৮৪॥
সাব্রবীত্তান্ সুরান্ সুভ্রূর্ভবদ্ভিঃ স্তূযতেঽত্র কা ।
শরীরকোশতশ্চাস্যাঃ সমুদ্ভূতাব্রবীচ্ছিবা ॥ ৫.৮৫॥
স্তোত্রং মমৈতত্ক্রিযতে শুম্ভদৈত্যনিরাকৃতৈঃ ।
দেবৈঃ সমেতৈঃ সমরে নিশুম্ভেন পরাজিতৈঃ ॥ ৫.৮৬॥
শরীরকোশাদ্যত্তস্যাঃ পার্বত্যা নিঃসৃতাম্বিকা ।
কৌশিকীতি সমস্তেষু ততো লোকেষু গীযতে ॥ ৫.৮৭॥
তস্যাং বিনির্গতাযাং তু কৃষ্ণাভূত্সাপি পার্বতী ।
কালিকেতি সমাখ্যাতা হিমাচলকৃতাশ্রযা ॥ ৫.৮৮॥
ততোঽম্বিকাং পরং রূপং বিভ্রাণাং সুমনোহরম্ ।
দদর্শ চণ্ডো মুণ্ডশ্চ ভৃত্যৌ শুম্ভনিশুম্ভযোঃ ॥ ৫.৮৯॥
তাভ্যাং শুম্ভায চাখ্যাতা সাতীব সুমনোহরা ।
কাপ্যাস্তে স্ত্রী মহারাজ ভাসযন্তী হিমাচলম্ ॥ ৫.৯০॥
নৈব তাদৃক্ ক্বচিদ্রূপং দৃষ্টং কেনচিদুত্তমম্ ।
জ্ঞাযতাং কাপ্যসৌ দেবী গৃহ্যতাং চাসুরেশ্বর ॥ ৫.৯১॥
স্ত্রীরত্নমতিচার্বঙ্গী দ্যোতযন্তী দিশস্ত্বিষা ।
সা তু তিষ্ঠতি দৈত্যেন্দ্র তাং ভবান্ দ্রষ্টুমর্হতি ॥ ৫.৯২॥
যানি রত্নানি মণযো গজাশ্বাদীনি বৈ প্রভো ।
ত্রৈলোক্যে তু সমস্তানি সাম্প্রতং ভান্তি তে গৃহে ॥ ৫.৯৩॥
ঐরাবতঃ সমানীতো গজরত্নং পুরন্দরাত্ ।
পারিজাততরুশ্চাযং তথৈবোচ্চৈঃশ্রবা হযঃ ॥ ৫.৯৪॥
বিমানং হংসসংযুক্তমেতত্তিষ্ঠতি তেঽঙ্গণে ।
রত্নভূতমিহানীতং যদাসীদ্বেধসোঽদ্ভুতম্ ॥ ৫.৯৫॥
নিধিরেষ মহাপদ্মঃ সমানীতো ধনেশ্বরাত্ ।
কিঞ্জল্কিনীং দদৌ চাব্ধির্মালামম্লানপঙ্কজাম্ ॥ ৫.৯৬॥
ছত্রং তে বারুণং গেহে কাঞ্চনস্রাবি তিষ্ঠতি ।
তথাযং স্যন্দনবরো যঃ পুরাসীত্প্রজাপতেঃ ॥ ৫.৯৭॥
মৃত্যোরুত্ক্রান্তিদা নাম শক্তিরীশ ত্বযা হৃতা ।
পাশঃ সলিলরাজস্য ভ্রাতুস্তব পরিগ্রহে ॥ ৫.৯৮॥
নিশুম্ভস্যাব্ধিজাতাশ্চ সমস্তা রত্নজাতযঃ ।
বহ্নিরপি দদৌ তুভ্যমগ্নিশৌচে চ বাসসী ॥ ৫.৯৯॥
এবং দৈত্যেন্দ্র রত্নানি সমস্তান্যাহৃতানি তে ।
স্ত্রীরত্নমেষা কল্যাণী ত্বযা কস্মান্ন গৃহ্যতে ॥ ৫.১০০॥
ঋষিরুবাচ ॥ ৫.১০১॥
নিশম্যেতি বচঃ শুম্ভঃ স তদা চণ্ডমুণ্ডযোঃ ।
প্রেষযামাস সুগ্রীবং দূতং দেব্যা মহাসুরম্ ॥ ৫.১০২॥
ইতি চেতি চ বক্তব্যা সা গত্বা বচনান্মম ।
যথা চাভ্যেতি সম্প্রীত্যা তথা কার্যং ত্বযা লঘু ॥ ৫.১০৩॥
স তত্র গত্বা যত্রাস্তে শৈলোদ্দেশেঽতিশোভনে ।
তাং চ দেবীং ততঃ প্রাহ শ্লক্ষ্ণং মধুরযা গিরা ॥ ৫.১০৪॥
দূত উবাচ॥ ৫.১০৫॥
দেবি দৈত্যেশ্বরঃ শুম্ভস্ত্রৈলোক্যে পরমেশ্বরঃ ।
দূতোঽহং প্রেষিতস্তেন ত্বত্সকাশমিহাগতঃ ॥ ৫.১০৬॥
অব্যাহতাজ্ঞঃ সর্বাসু যঃ সদা দেবযোনিষু ।
নির্জিতাখিলদৈত্যারিঃ স যদাহ শ‍ৃণুষ্ব তত্ ॥ ৫.১০৭॥
মম ত্রৈলোক্যমখিলং মম দেবা বশানুগাঃ ।
যজ্ঞভাগানহং সর্বানুপাশ্নামি পৃথক্ পৃথক্ ॥ ৫.১০৮॥
ত্রৈলোক্যে বররত্নানি মম বশ্যান্যশেষতঃ ।
তথৈব গজরত্নং চ হৃতং দেবেন্দ্রবাহনম্ ॥ ৫.১০৯॥
ক্ষীরোদমথনোদ্ভূতমশ্বরত্নং মমামরৈঃ ।
উচ্চৈঃশ্রবসসংজ্ঞং তত্প্রণিপত্য সমর্পিতম্ ॥ ৫.১১০॥
যানি চান্যানি দেবেষু গন্ধর্বেষূরগেষু চ ।
রত্নভূতানি ভূতানি তানি ময্যেব শোভনে ॥ ৫.১১১॥
স্ত্রীরত্নভূতাং ত্বাং দেবি লোকে মন্যামহে বযম্ ।
সা ত্বমস্মানুপাগচ্ছ যতো রত্নভুজো বযম্ ॥ ৫.১১২॥
মাং বা মমানুজং বাপি নিশুম্ভমুরুবিক্রমম্ ।
ভজ ত্বং চঞ্চলাপাঙ্গি রত্নভূতাসি বৈ যতঃ ॥ ৫.১১৩॥
পরমৈশ্বর্যমতুলং প্রাপ্স্যসে মত্পরিগ্রহাত্ ।
এতদ্বুদ্ধ্যা সমালোচ্য মত্পরিগ্রহতাং ব্রজ ॥ ৫.১১৪॥
ঋষিরুবাচ ॥ ৫.১১৫॥
ইত্যুক্তা সা তদা দেবী গম্ভীরান্তঃস্মিতা জগৌ ।
দুর্গা ভগবতী ভদ্রা যযেদং ধার্যতে জগত্ ॥ ৫.১১৬॥
দেব্যুবাচ॥ ৫.১১৭॥
সত্যমুক্তং ত্বযা নাত্র মিথ্যা কিঞ্চিত্ত্বযোদিতম্ ।
ত্রৈলোক্যাধিপতিঃ শুম্ভো নিশুম্ভশ্চাপি তাদৃশঃ ॥ ৫.১১৮॥
কিং ত্বত্র যত্প্রতিজ্ঞাতং মিথ্যা তত্ক্রিযতে কথম্ ।
শ্রূযতামল্পবুদ্ধিত্বাত্প্রতিজ্ঞা যা কৃতা পুরা ॥ ৫.১১৯॥
যো মাং জযতি সঙ্গ্রামে যো মে দর্পং ব্যপোহতি ।
যো মে প্রতিবলো লোকে স মে ভর্তা ভবিষ্যতি ॥ ৫.১২০॥
তদাগচ্ছতু শুম্ভোঽত্র নিশুম্ভো বা মহাবলঃ ।
মাং জিত্বা কিং চিরেণাত্র পাণিং গৃহ্ণাতু মে লঘু ॥ ৫.১২১॥
দূত উবাচ॥ ৫.১২২॥
অবলিপ্তাসি মৈবং ত্বং দেবি ব্রূহি মমাগ্রতঃ ।
ত্রৈলোক্যে কঃ পুমাংস্তিষ্ঠেদগ্রে শুম্ভনিশুম্ভযোঃ ॥ ৫.১২৩॥
অন্যেষামপি দৈত্যানাং সর্বে দেবা ন বৈ যুধি ।
তিষ্ঠন্তি সম্মুখে দেবি কিং পুনঃ স্ত্রী ত্বমেকিকা ॥ ৫.১২৪॥
ইন্দ্রাদ্যাঃ সকলা দেবাস্তস্থুর্যেষাং ন সংযুগে ।
শুম্ভাদীনাং কথং তেষাং স্ত্রী প্রযাস্যসি সম্মুখম্ ॥ ৫.১২৫॥
সা ত্বং গচ্ছ মযৈবোক্তা পার্শ্বং শুম্ভনিশুম্ভযোঃ ।
কেশাকর্ষণনির্ধূতগৌরবা মা গমিষ্যসি ॥ ৫.১২৬॥
দেব্যুবাচ॥ ৫.১২৭॥
এবমেতদ্ বলী শুম্ভো নিশুম্ভশ্চাপিতাদৃশঃ ।
কিং করোমি প্রতিজ্ঞা মে যদনালোচিতা পুরা ॥ ৫.১২৮॥
স ত্বং গচ্ছ মযোক্তং তে যদেতত্সর্বমাদৃতঃ ।
তদাচক্ষ্বাসুরেন্দ্রায স চ যুক্তং করোতু যত্ ॥ ৫.১২৯॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
দেব্যা দূতসংবাদো নাম পঞ্চমোঽধ্যাযঃ ॥ ৫॥
উবাচ৯, ত্রিপান্মন্ত্রাঃ ৬৬, শ্লোকাঃ ৫৪, এবমাদিতঃ ॥ ৩৮৮॥

। ধ্যানম্ ।
ওঁ নাগাধীশ্বরবিষ্টরাং ফণিফণোত্তংসোরু রত্নাবলী-
ভাস্বদ্দেহলতাং দিবাকরনিভাং নেত্রত্রযোদ্ভাসিতাম্ ।
মালাকুম্ভকপালনীরজকরাং চন্দ্রার্ধচূডাং পরাং
সর্বজ্ঞেশ্বরভৈরবাঙ্গনিলযাং পদ্মাবতীং চিন্তযে ॥
ওঁ ঋষিরুবাচ ॥ ৬.১॥
ইত্যাকর্ণ্য বচো দেব্যাঃ স দূতোঽমর্ষপূরিতঃ ।
সমাচষ্ট সমাগম্য দৈত্যরাজায বিস্তরাত্ ॥ ৬.২॥
তস্য দূতস্য তদ্বাক্যমাকর্ণ্যাসুররাট্ ততঃ ।
সক্রোধঃ প্রাহ দৈত্যানামধিপং ধূম্রলোচনম্ ॥ ৬.৩॥
হে ধূম্রলোচনাশু ত্বং স্বসৈন্যপরিবারিতঃ ।
তামানয বলাদ্দুষ্টাং কেশাকর্ষণবিহ্বলাম্ ॥ ৬.৪॥
তত্পরিত্রাণদঃ কশ্চিদ্যদি বোত্তিষ্ঠতেঽপরঃ ।
স হন্তব্যোঽমরো বাপি যক্ষো গন্ধর্ব এব বা ॥ ৬.৫॥
ঋষিরুবাচ ॥ ৬.৬॥
তেনাজ্ঞপ্তস্ততঃ শীঘ্রং স দৈত্যো ধূম্রলোচনঃ ।
বৃতঃ ষষ্ট্যা সহস্রাণামসুরাণাং দ্রুতং যযৌ ॥ ৬.৭॥
স দৃষ্ট্বা তাং ততো দেবীং তুহিনাচলসংস্থিতাম্ ।
জগাদোচ্চৈঃ প্রযাহীতি মূলং শুম্ভনিশুম্ভযোঃ ॥ ৬.৮॥
ন চেত্প্রীত্যাদ্য ভবতী মদ্ভর্তারমুপৈষ্যতি ।
ততো বলান্নযাম্যেষ কেশাকর্ষণবিহ্বলাম্ ॥ ৬.৯॥
দেব্যুবাচ॥ ৬.১০॥
দৈত্যেশ্বরেণ প্রহিতো বলবান্বলসংবৃতঃ ।
বলান্নযসি মামেবং ততঃ কিং তে করোম্যহম্ ॥ ৬.১১॥
ঋষিরুবাচ ॥ ৬.১২॥
ইত্যুক্তঃ সোঽভ্যধাবত্তামসুরো ধূম্রলোচনঃ ।
হুঙ্কারেণৈব তং ভস্ম সা চকারাম্বিকা তদা ॥ ৬.১৩॥
অথ ক্রুদ্ধং মহাসৈন্যমসুরাণাং তথাম্বিকা ।
ববর্ষ সাযকৈস্তীক্ষ্ণৈস্তথা শক্তিপরশ্বধৈঃ ॥ ৬.১৪॥
ততো ধুতসটঃ কোপাত্কৃত্বা নাদং সুভৈরবম্ ।
পপাতাসুরসেনাযাং সিংহো দেব্যাঃ স্ববাহনঃ ॥ ৬.১৫॥
কাংশ্চিত্করপ্রহারেণ দৈত্যানাস্যেন চাপরান্ ।
আক্রান্ত্যা চাধরেণান্যান্ জঘান স মহাসুরান্ ॥ ৬.১৬॥
কেষাঞ্চিত্পাটযামাস নখৈঃ কোষ্ঠানি কেসরী ।
তথা তলপ্রহারেণ শিরাংসি কৃতবান্পৃথক্ ॥ ৬.১৭॥
বিচ্ছিন্নবাহুশিরসঃ কৃতাস্তেন তথাপরে ।
পপৌ চ রুধিরং কোষ্ঠাদন্যেষাং ধুতকেসরঃ ॥ ৬.১৮॥
ক্ষণেন তদ্বলং সর্বং ক্ষযং নীতং মহাত্মনা ।
তেন কেসরিণা দেব্যা বাহনেনাতিকোপিনা ॥ ৬.১৯॥
শ্রুত্বা তমসুরং দেব্যা নিহতং ধূম্রলোচনম্ ।
বলং চ ক্ষযিতং কৃত্স্নং দেবীকেসরিণা ততঃ ॥ ৬.২০॥
চুকোপ দৈত্যাধিপতিঃ শুম্ভঃ প্রস্ফুরিতাধরঃ ।
আজ্ঞাপযামাস চ তৌ চণ্ডমুণ্ডৌ মহাসুরৌ ॥ ৬.২১॥
হে চণ্ড হে মুণ্ড বলৈর্বহুভিঃ পরিবারিতৌ ।
তত্র গচ্ছত গত্বা চ সা সমানীযতাং লঘু ॥ ৬.২২॥
কেশেষ্বাকৃষ্য বদ্ধ্বা বা যদি বঃ সংশযো যুধি ।
তদাশেষাযুধৈঃ সর্বৈরসুরৈর্বিনিহন্যতাম্ ॥ ৬.২৩॥
তস্যাং হতাযাং দুষ্টাযাং সিংহে চ বিনিপাতিতে ।
শীঘ্রমাগম্যতাং বদ্ধ্বা গৃহীত্বা তামথাম্বিকাম্ ॥ ৬.২৪॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
শুম্ভনিশুম্ভসেনানীধূম্রলোচনবধো নাম ষষ্ঠোঽধ্যাযঃ ॥ ৬॥
উবাচ৪, শ্লোকাঃ ২৪, এবমাদিতঃ ॥ ৪১২॥

। ধ্যানম্ ।
ওঁ ধ্যাযেযং রত্নপীঠে শুককলপঠিতং শ‍ৃণ্বতীং শ্যামলাঙ্গীং
ন্যস্তৈকাংঘ্রিং সরোজে শশিশকলধরাং বল্লকীং বাদযন্তীম্ ।
কল্হারাবদ্ধমালাং নিযমিতবিলসচ্চোলিকাং রত্নবস্ত্রাং
মাতঙ্গী শঙ্কপাত্রাং মধুরমধুমদাং চিত্রকোদ্ভাসিভালাম্ ॥
ওঁ ঋষিরুবাচ ॥ ৭.১॥
আজ্ঞপ্তাস্তে ততো দৈত্যাশ্চণ্ডমুণ্ডপুরোগমাঃ ।
চতুরঙ্গবলোপেতা যযুরভ্যুদ্যতাযুধাঃ ॥ ৭.২॥
দদৃশুস্তে ততো দেবীমীষদ্ধাসাং ব্যবস্থিতাম্ ।
সিংহস্যোপরি শৈলেন্দ্রশ‍ৃঙ্গে মহতি কাঞ্চনে ॥ ৭.৩॥
তে দৃষ্ট্বা তাং সমাদাতুমুদ্যমং চক্রুরুদ্যতাঃ ।
আকৃষ্টচাপাসিধরাস্তথান্যে তত্সমীপগাঃ ॥ ৭.৪॥
ততঃ কোপং চকারোচ্চৈরম্বিকা তানরীন্প্রতি ।
কোপেন চাস্যা বদনং মষীবর্ণমভূত্তদা ॥ ৭.৫॥
ভ্রুকুটীকুটিলাত্তস্যা ললাটফলকাদ্দ্রুতম্ ।
কালী করালবদনা বিনিষ্ক্রান্তাসিপাশিনী ॥ ৭.৬॥
বিচিত্রখট্বাঙ্গধরা নরমালাবিভূষণা ।
দ্বীপিচর্মপরীধানা শুষ্কমাংসাতিভৈরবা ॥ ৭.৭॥
অতিবিস্তারবদনা জিহ্বাললনভীষণা ।
নিমগ্নারক্তনযনা নাদাপূরিতদিঙ্মুখা ॥ ৭.৮॥
সা বেগেনাভিপতিতা ঘাতযন্তী মহাসুরান্ ।
সৈন্যে তত্র সুরারীণামভক্ষযত তদ্বলম্ ॥ ৭.৯॥
পার্ষ্ণিগ্রাহাঙ্কুশগ্রাহযোধঘণ্টাসমন্বিতান্ ।
সমাদাযৈকহস্তেন মুখে চিক্ষেপ বারণান্ ॥ ৭.১০॥
তথৈব যোধং তুরগৈ রথং সারথিনা সহ ।
নিক্ষিপ্য বক্ত্রে দশনৈশ্চর্বযন্ত্যতিভৈরবম্ ॥ ৭.১১॥
একং জগ্রাহ কেশেষু গ্রীবাযামথ চাপরম্ ।
পাদেনাক্রম্য চৈবান্যমুরসান্যমপোথযত্ ॥ ৭.১২॥
তৈর্মুক্তানি চ শস্ত্রাণি মহাস্ত্রাণি তথাসুরৈঃ ।
মুখেন জগ্রাহ রুষা দশনৈর্মথিতান্যপি ॥ ৭.১৩॥
বলিনাং তদ্বলং সর্বমসুরাণাং দুরাত্মনাম্ ।
মমর্দাভক্ষযচ্চান্যানন্যাংশ্চাতাডযত্তদা ॥ ৭.১৪॥
অসিনা নিহতাঃ কেচিত্কেচিত্খট্বাঙ্গতাডিতাঃ ।
জগ্মুর্বিনাশমসুরা দন্তাগ্রাভিহতাস্তথা ॥ ৭.১৫॥
ক্ষণেন তদ্বলং সর্বমসুরাণাং নিপাতিতম্ ।
দৃষ্ট্বা চণ্ডোঽভিদুদ্রাব তাং কালীমতিভীষণাম্ ॥ ৭.১৬॥
শরবর্ষৈর্মহাভীমৈর্ভীমাক্ষীং তাং মহাসুরঃ ।
ছাদযামাস চক্রৈশ্চ মুণ্ডঃ ক্ষিপ্তৈঃ সহস্রশঃ ॥ ৭.১৭॥
তানি চক্রাণ্যনেকানি বিশমানানি তন্মুখম্ ।
বভুর্যথার্কবিম্বানি সুবহূনি ঘনোদরম্ ॥ ৭.১৮॥
ততো জহাসাতিরুষা ভীমং ভৈরবনাদিনী ।
কালী করালবদনা দুর্দর্শদশনোজ্জ্বলা ॥ ৭.১৯॥
উত্থায চ মহাসিংহং দেবী চণ্ডমধাবত ।
গৃহীত্বা চাস্য কেশেষু শিরস্তেনাসিনাচ্ছিনত্ ॥ ৭.২০॥
অথ মুণ্ডোঽভ্যধাবত্তাং দৃষ্ট্বা চণ্ডং নিপাতিতম্ ।
তমপ্যপাতযদ্ভূমৌ সা খড্গাভিহতং রুষা ॥ ৭.২১॥
হতশেষং ততঃ সৈন্যং দৃষ্ট্বা চণ্ডং নিপাতিতম্ ।
মুণ্ডং চ সুমহাবীর্যং দিশো ভেজে ভযাতুরম্ ॥ ৭.২২॥
শিরশ্চণ্ডস্য কালী চ গৃহীত্বা মুণ্ডমেব চ ।
প্রাহ প্রচণ্ডাট্টহাসমিশ্রমভ্যেত্য চণ্ডিকাম্ ॥ ৭.২৩॥
মযা তবাত্রোপহৃতৌ চণ্ডমুণ্ডৌ মহাপশূ ।
যুদ্ধযজ্ঞে স্বযং শুম্ভং নিশুম্ভং চ হনিষ্যসি ॥ ৭.২৪॥
ঋষিরুবাচ ॥ ৭.২৫॥
তাবানীতৌ ততো দৃষ্ট্বা চণ্ডমুণ্ডৌ মহাসুরৌ ।
উবাচকালীং কল্যাণী ললিতং চণ্ডিকা বচঃ ॥ ৭.২৬॥
যস্মাচ্চণ্ডং চ মুণ্ডং চ গৃহীত্বা ত্বমুপাগতা ।
চামুণ্ডেতি ততো লোকে খ্যাতা দেবী ভবিষ্যসি ॥ ৭.২৭॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
চণ্ডমুণ্ডবধো নাম সপ্তমোঽধ্যাযঃ ॥ ৭॥
উবাচ২, শ্লোকাঃ ২৫, এবমাদিতঃ ॥ ৪৩৯॥

। ধ্যানম্ ।
ওঁ অরুণাং করুণাতরঙ্গিতাক্ষীং
ধৃতপাশাঙ্কুশবাণাচাপহস্তাম্ ।
অণিমাদিভিরাবৃতাং মযূখৈ-
রহমিত্যেব বিভাবযে ভবানীম্ ॥
ওঁ ঋষিরুবাচ ॥ ৮.১॥
চণ্ডে চ নিহতে দৈত্যে মুণ্ডে চ বিনিপাতিতে ।
বহুলেষু চ সৈন্যেষু ক্ষযিতেষ্বসুরেশ্বরঃ ॥ ৮.২॥
ততঃ কোপপরাধীনচেতাঃ শুম্ভঃ প্রতাপবান্ ।
উদ্যোগং সর্বসৈন্যানাং দৈত্যানামাদিদেশ হ ॥ ৮.৩॥
অদ্য সর্ববলৈর্দৈত্যাঃ ষডশীতিরুদাযুধাঃ ।
কম্বূনাং চতুরশীতির্নির্যান্তু স্ববলৈর্বৃতাঃ ॥ ৮.৪॥
কোটিবীর্যাণি পঞ্চাশদসুরাণাং কুলানি বৈ ।
শতং কুলানি ধৌম্রাণাং নির্গচ্ছন্তু মমাজ্ঞযা ॥ ৮.৫॥
কালকা দৌর্হৃদা মৌর্বাঃ কালিকেযাস্তথাসুরাঃ ।
যুদ্ধায সজ্জা নির্যান্তু আজ্ঞযা ত্বরিতা মম ॥ ৮.৬॥
ইত্যাজ্ঞাপ্যাসুরপতিঃ শুম্ভো ভৈরবশাসনঃ ।
নির্জগাম মহাসৈন্যসহস্রৈর্বহুভির্বৃতঃ ॥ ৮.৭॥
আযান্তং চণ্ডিকা দৃষ্ট্বা তত্সৈন্যমতিভীষণম্ ।
জ্যাস্বনৈঃ পূরযামাস ধরণীগগনান্তরম্ ॥ ৮.৮॥
ততঃ সিংহো মহানাদমতীব কৃতবান্নৃপ ।
ঘণ্টাস্বনেন তান্নাদানম্বিকা চোপবৃংহযত্ ॥ ৮.৯॥
ধনুর্জ্যাসিংহঘণ্টানাং নাদাপূরিতদিঙ্মুখা ।
নিনাদৈর্ভীষণৈঃ কালী জিগ্যে বিস্তারিতাননা ॥ ৮.১০॥
তং নিনাদমুপশ্রুত্য দৈত্যসৈন্যৈশ্চতুর্দিশম্ ।
দেবী সিংহস্তথা কালী সরোষৈঃ পরিবারিতাঃ ॥ ৮.১১॥
এতস্মিন্নন্তরে ভূপ বিনাশায সুরদ্বিষাম্ ।
ভবাযামরসিংহানামতিবীর্যবলান্বিতাঃ ॥ ৮.১২॥
ব্রহ্মেশগুহবিষ্ণূনাং তথেন্দ্রস্য চ শক্তযঃ ।
শরীরেভ্যো বিনিষ্ক্রম্য তদ্রূপৈশ্চণ্ডিকাং যযুঃ ॥ ৮.১৩॥
যস্য দেবস্য যদ্রূপং যথা ভূষণবাহনম্ ।
তদ্বদেব হি তচ্ছক্তিরসুরান্যোদ্ধুমাযযৌ ॥ ৮.১৪॥
হংসযুক্তবিমানাগ্রে সাক্ষসূত্রকমণ্ডলুঃ ।
আযাতা ব্রহ্মণঃ শক্তির্ব্রহ্মাণীত্যভিধীযতে ॥ ৮.১৫॥
মাহেশ্বরী বৃষারূঢা ত্রিশূলবরধারিণী ।
মহাহিবলযা প্রাপ্তা চন্দ্ররেখাবিভূষণা ॥ ৮.১৬॥
কৌমারী শক্তিহস্তা চ মযূরবরবাহনা ।
যোদ্ধুমভ্যাযযৌ দৈত্যানম্বিকা গুহরূপিণী ॥ ৮.১৭॥
তথৈব বৈষ্ণবী শক্তির্গরুডোপরি সংস্থিতা ।
শঙ্খচক্রগদাশার্ঙ্গখড্গহস্তাভ্যুপাযযৌ ॥ ৮.১৮॥
যজ্ঞবারাহমতুলং রূপং যা বিভ্রতো হরেঃ ।
শক্তিঃ সাপ্যাযযৌ তত্র বারাহীং বিভ্রতী তনুম্ ॥ ৮.১৯॥
নারসিংহী নৃসিংহস্য বিভ্রতী সদৃশং বপুঃ ।
প্রাপ্তা তত্র সটাক্ষেপক্ষিপ্তনক্ষত্রসংহতিঃ ॥ ৮.২০॥
বজ্রহস্তা তথৈবৈন্দ্রী গজরাজোপরি স্থিতা ।
প্রাপ্তা সহস্রনযনা যথা শক্রস্তথৈব সা ॥ ৮.২১॥
ততঃ পরিবৃতস্তাভিরীশানো দেবশক্তিভিঃ ।
হন্যন্তামসুরাঃ শীঘ্রং মম প্রীত্যাহ চণ্ডিকাম্ ॥ ৮.২২॥
ততো দেবীশরীরাত্তু বিনিষ্ক্রান্তাতিভীষণা ।
চণ্ডিকা শক্তিরত্যুগ্রা শিবাশতনিনাদিনী ॥ ৮.২৩॥
সা চাহ ধূম্রজটিলমীশানমপরাজিতা ।
দূত ত্বং গচ্ছ ভগবন্ পার্শ্বং শুম্ভনিশুম্ভযোঃ ॥ ৮.২৪॥
ব্রূহি শুম্ভং নিশুম্ভং চ দানবাবতিগর্বিতৌ ।
যে চান্যে দানবাস্তত্র যুদ্ধায সমুপস্থিতাঃ ॥ ৮.২৫॥
ত্রৈলোক্যমিন্দ্রো লভতাং দেবাঃ সন্তু হবির্ভুজঃ ।
যূযং প্রযাত পাতালং যদি জীবিতুমিচ্ছথ ॥ ৮.২৬॥
বলাবলেপাদথ চেদ্ভবন্তো যুদ্ধকাঙ্ক্ষিণঃ ।
তদাগচ্ছত তৃপ্যন্তু মচ্ছিবাঃ পিশিতেন বঃ ॥ ৮.২৭॥
যতো নিযুক্তো দৌত্যেন তযা দেব্যা শিবঃ স্বযম্ ।
শিবদূতীতি লোকেঽস্মিংস্ততঃ সা খ্যাতিমাগতা ॥ ৮.২৮॥
তেঽপি শ্রুত্বা বচো দেব্যাঃ শর্বাখ্যাতং মহাসুরাঃ ।
অমর্ষাপূরিতা জগ্মুর্যত্র কাত্যাযনী স্থিতা ॥ ৮.২৯॥
ততঃ প্রথমমেবাগ্রে শরশক্ত্যৃষ্টিবৃষ্টিভিঃ ।
ববর্ষুরুদ্ধতামর্ষাস্তাং দেবীমমরারযঃ ॥ ৮.৩০॥
সা চ তান্ প্রহিতান্ বাণাঞ্ছূলশক্তিপরশ্বধান্ ।
চিচ্ছেদ লীলযাধ্মাতধনুর্মুক্তৈর্মহেষুভিঃ ॥ ৮.৩১॥
তস্যাগ্রতস্তথা কালী শূলপাতবিদারিতান্ ।
খট্বাঙ্গপোথিতাংশ্চারীন্কুর্বতী ব্যচরত্তদা ॥ ৮.৩২॥
কমণ্ডলুজলাক্ষেপহতবীর্যান্ হতৌজসঃ ।
ব্রহ্মাণী চাকরোচ্ছত্রূন্যেন যেন স্ম ধাবতি ॥ ৮.৩৩॥
মাহেশ্বরী ত্রিশূলেন তথা চক্রেণ বৈষ্ণবী ।
দৈত্যাঞ্জঘান কৌমারী তথা শক্ত্যাতিকোপনা ॥ ৮.৩৪॥
ঐন্দ্রী কুলিশপাতেন শতশো দৈত্যদানবাঃ ।
পেতুর্বিদারিতাঃ পৃথ্ব্যাং রুধিরৌঘপ্রবর্ষিণঃ ॥ ৮.৩৫॥
তুণ্ডপ্রহারবিধ্বস্তা দংষ্ট্রাগ্রক্ষতবক্ষসঃ ।
বারাহমূর্ত্যা ন্যপতংশ্চক্রেণ চ বিদারিতাঃ ॥ ৮.৩৬॥
নখৈর্বিদারিতাংশ্চান্যান্ ভক্ষযন্তী মহাসুরান্ ।
নারসিংহী চচারাজৌ নাদাপূর্ণদিগম্বরা ॥ ৮.৩৭॥
চণ্ডাট্টহাসৈরসুরাঃ শিবদূত্যভিদূষিতাঃ ।
পেতুঃ পৃথিব্যাং পতিতাংস্তাংশ্চখাদাথ সা তদা ॥ ৮.৩৮॥
ইতি মাতৃগণং ক্রুদ্ধং মর্দযন্তং মহাসুরান্ ।
দৃষ্ট্বাভ্যুপাযৈর্বিবিধৈর্নেশুর্দেবারিসৈনিকাঃ ॥ ৮.৩৯॥
পলাযনপরান্দৃষ্ট্বা দৈত্যান্মাতৃগণার্দিতান্ ।
যোদ্ধুমভ্যাযযৌ ক্রুদ্ধো রক্তবীজো মহাসুরঃ ॥ ৮.৪০॥
রক্তবিন্দুর্যদা ভূমৌ পতত্যস্য শরীরতঃ ।
সমুত্পততি মেদিন্যাং তত্প্রমাণো মহাসুরঃ ॥ ৮.৪১॥
যুযুধে স গদাপাণিরিন্দ্রশক্ত্যা মহাসুরঃ ।
ততশ্চৈন্দ্রী স্ববজ্রেণ রক্তবীজমতাডযত্ ॥ ৮.৪২॥
কুলিশেনাহতস্যাশু বহু সুস্রাব শোণিতম্ ।
সমুত্তস্থুস্ততো যোধাস্তদ্রূপাস্তত্পরাক্রমাঃ ॥ ৮.৪৩॥
যাবন্তঃ পতিতাস্তস্য শরীরাদ্রক্তবিন্দবঃ ।
তাবন্তঃ পুরুষা জাতাস্তদ্বীর্যবলবিক্রমাঃ ॥ ৮.৪৪॥
তে চাপি যুযুধুস্তত্র পুরুষা রক্তসম্ভবাঃ ।
সমং মাতৃভিরত্যুগ্রশস্ত্রপাতাতিভীষণম্ ॥ ৮.৪৫॥
পুনশ্চ বজ্রপাতেন ক্ষতমস্য শিরো যদা ।
ববাহ রক্তং পুরুষাস্ততো জাতাঃ সহস্রশঃ ॥ ৮.৪৬॥
বৈষ্ণবী সমরে চৈনং চক্রেণাভিজঘান হ ।
গদযা তাডযামাস ঐন্দ্রী তমসুরেশ্বরম্ ॥ ৮.৪৭॥
বৈষ্ণবীচক্রভিন্নস্য রুধিরস্রাবসম্ভবৈঃ ।
সহস্রশো জগদ্ব্যাপ্তং তত্প্রমাণৈর্মহাসুরৈঃ ॥ ৮.৪৮॥
শক্ত্যা জঘান কৌমারী বারাহী চ তথাসিনা ।
মাহেশ্বরী ত্রিশূলেন রক্তবীজং মহাসুরম্ ॥ ৮.৪৯॥
স চাপি গদযা দৈত্যঃ সর্বা এবাহনত্ পৃথক্ ।
মাতৄঃ কোপসমাবিষ্টো রক্তবীজো মহাসুরঃ ॥ ৮.৫০॥
তস্যাহতস্য বহুধা শক্তিশূলাদিভির্ভুবি ।
পপাত যো বৈ রক্তৌঘস্তেনাসঞ্ছতশোঽসুরাঃ ॥ ৮.৫১॥
তৈশ্চাসুরাসৃক্সম্ভূতৈরসুরৈঃ সকলং জগত্ ।
ব্যাপ্তমাসীত্ততো দেবা ভযমাজগ্মুরুত্তমম্ ॥ ৮.৫২॥
তান্ বিষণ্ণান্ সুরান্ দৃষ্ট্বা চণ্ডিকা প্রাহসত্বরম্ ।
উবাচকালীং চামুণ্ডে বিস্তীর্ণং বদনং কুরু ॥ ৮.৫৩॥
মচ্ছস্ত্রপাতসম্ভূতান্ রক্তবিন্দূন্ মহাসুরান্ ।
রক্তবিন্দোঃ প্রতীচ্ছ ত্বং বক্ত্রেণানেন বেগিনা ॥ ৮.৫৪॥
ভক্ষযন্তী চর রণে তদুত্পন্নান্মহাসুরান্ ।
এবমেষ ক্ষযং দৈত্যঃ ক্ষেণরক্তো গমিষ্যতি ॥ ৮.৫৫॥
ভক্ষ্যমাণাস্ত্বযা চোগ্রা ন চোত্পত্স্যন্তি চাপরে ।
ইত্যুক্ত্বা তাং ততো দেবী শূলেনাভিজঘান তম্ ॥ ৮.৫৬॥
মুখেন কালী জগৃহে রক্তবীজস্য শোণিতম্ ।
ততোঽসাবাজঘানাথ গদযা তত্র চণ্ডিকাম্ ॥ ৮.৫৭॥
ন চাস্যা বেদনাং চক্রে গদাপাতোঽল্পিকামপি ।
তস্যাহতস্য দেহাত্তু বহু সুস্রাব শোণিতম্ ॥ ৮.৫৮॥
যতস্ততস্তদ্বক্ত্রেণ চামুণ্ডা সম্প্রতীচ্ছতি ।
মুখে সমুদ্গতা যেঽস্যা রক্তপাতান্মহাসুরাঃ ॥ ৮.৫৯॥
তাংশ্চখাদাথ চামুণ্ডা পপৌ তস্য চ শোণিতম্ ।
দেবী শূলেন বজ্রেণ বাণৈরসিভিরৃষ্টিভিঃ ॥ ৮.৬০॥
জঘান রক্তবীজং তং চামুণ্ডাপীতশোণিতম্ ।
স পপাত মহীপৃষ্ঠে শস্ত্রসঙ্ঘসমাহতঃ ॥ ৮.৬১॥
নীরক্তশ্চ মহীপাল রক্তবীজো মহাসুরঃ ।
ততস্তে হর্ষমতুলমবাপুস্ত্রিদশা নৃপ ॥ ৮.৬২॥
তেষাং মাতৃগণো জাতো ননর্তাসৃঙ্মদোদ্ধতঃ ॥ ৮.৬৩॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
রক্তবীজবধো নামাষ্টমোঽধ্যাযঃ ॥ ৮॥
উবাচ১, অর্ধশ্লোকঃ ১, শ্লোকাঃ ৬১, এবমাদিতঃ ॥ ৫০২॥

। ধ্যানম্ ।
ওঁ বন্ধূককাঞ্চননিভং রুচিরাক্ষমালাং
পাশাঙ্কুশৌ চ বরদাং নিজবাহুদণ্ডৈঃ ।
বিভ্রাণমিন্দুশকলাভরণং ত্রিনেত্র-
মর্ধাংবিকেশমনিশং বপুরাশ্রযামি ॥
ওঁ রাজোবাচ ॥ ৯.১॥
বিচিত্রমিদমাখ্যাতং ভগবন্ ভবতা মম ।
দেব্যাশ্চরিতমাহাত্ম্যং রক্তবীজবধাশ্রিতম্ ॥ ৯.২॥
ভূযশ্চেচ্ছাম্যহং শ্রোতুং রক্তবীজে নিপাতিতে ।
চকার শুম্ভো যত্কর্ম নিশুম্ভশ্চাতিকোপনঃ ॥ ৯.৩॥
ঋষিরুবাচ ॥ ৯.৪॥
চকার কোপমতুলং রক্তবীজে নিপাতিতে ।
শুম্ভাসুরো নিশুম্ভশ্চ হতেষ্বন্যেষু চাহবে ॥ ৯.৫॥
হন্যমানং মহাসৈন্যং বিলোক্যামর্ষমুদ্বহন্ ।
অভ্যধাবন্নিশুম্ভোঽথ মুখ্যযাসুরসেনযা ॥ ৯.৬॥
তস্যাগ্রতস্তথা পৃষ্ঠে পার্শ্বযোশ্চ মহাসুরাঃ ।
সন্দষ্টৌষ্ঠপুটাঃ ক্রুদ্ধা হন্তুং দেবীমুপাযযুঃ ॥ ৯.৭॥
আজগাম মহাবীর্যঃ শুম্ভোঽপি স্ববলৈর্বৃতঃ ।
নিহন্তুং চণ্ডিকাং কোপাত্কৃত্বা যুদ্ধং তু মাতৃভিঃ ॥ ৯.৮॥
ততো যুদ্ধমতীবাসীদ্দেব্যা শুম্ভনিশুম্ভযোঃ ।
শরবর্ষমতীবোগ্রং মেঘযোরিব বর্ষতোঃ ॥ ৯.৯॥
চিচ্ছেদাস্তাঞ্ছরাংস্তাভ্যাং চণ্ডিকা স্বশরোত্করৈঃ ।
তাডযামাস চাঙ্গেষু শস্ত্রৌঘৈরসুরেশ্বরৌ ॥ ৯.১০॥
নিশুম্ভো নিশিতং খড্গং চর্ম চাদায সুপ্রভম্ ।
অতাডযন্মূর্ধ্নি সিংহং দেব্যা বাহনমুত্তমম্ ॥ ৯.১১॥
তাডিতে বাহনে দেবী ক্ষুরপ্রেণাসিমুত্তমম্ ।
নিশুম্ভস্যাশু চিচ্ছেদ চর্ম চাপ্যষ্টচন্দ্রকম্ ॥ ৯.১২॥
ছিন্নে চর্মণি খড্গে চ শক্তিং চিক্ষেপ সোঽসুরঃ ।
তামপ্যস্য দ্বিধা চক্রে চক্রেণাভিমুখাগতাম্ ॥ ৯.১৩॥
কোপাধ্মাতো নিশুম্ভোঽথ শূলং জগ্রাহ দানবঃ ।
আযাতং মুষ্টিপাতেন দেবী তচ্চাপ্যচূর্ণযত্ ॥ ৯.১৪॥
আবিদ্যাথ গদাং সোঽপি চিক্ষেপ চণ্ডিকাং প্রতি ।
সাপি দেব্যাস্ ত্রিশূলেন ভিন্না ভস্মত্বমাগতা ॥ ৯.১৫॥
ততঃ পরশুহস্তং তমাযান্তং দৈত্যপুঙ্গবম্ ।
আহত্য দেবী বাণৌঘৈরপাতযত ভূতলে ॥ ৯.১৬॥
তস্মিন্নিপতিতে ভূমৌ নিশুম্ভে ভীমবিক্রমে ।
ভ্রাতর্যতীব সঙ্ক্রুদ্ধঃ প্রযযৌ হন্তুমম্বিকাম্ ॥ ৯.১৭॥
স রথস্থস্তথাত্যুচ্চৈর্গৃহীতপরমাযুধৈঃ ।
ভুজৈরষ্টাভিরতুলৈর্ব্যাপ্যাশেষং বভৌ নভঃ ॥ ৯.১৮॥
তমাযান্তং সমালোক্য দেবী শঙ্খমবাদযত্ ।
জ্যাশব্দং চাপি ধনুষশ্চকারাতীব দুঃসহম্ ॥ ৯.১৯॥
পূরযামাস ককুভো নিজঘণ্টাস্বনেন চ ।
সমস্তদৈত্যসৈন্যানাং তেজোবধবিধাযিনা ॥ ৯.২০॥
ততঃ সিংহো মহানাদৈস্ত্যাজিতেভমহামদৈঃ ।
পূরযামাস গগনং গাং তথৈব দিশো দশ ॥ ৯.২১॥
ততঃ কালী সমুত্পত্য গগনং ক্ষ্মামতাডযত্ ।
করাভ্যাং তন্নিনাদেন প্রাক্স্বনাস্তে তিরোহিতাঃ ॥ ৯.২২॥
অট্টাট্টহাসমশিবং শিবদূতী চকার হ ।
বৈঃ শব্দৈরসুরাস্ত্রেসুঃ শুম্ভঃ কোপং পরং যযৌ ॥ ৯.২৩॥
দুরাত্মংস্তিষ্ঠ তিষ্ঠেতি ব্যাজহারাম্বিকা যদা ।
তদা জযেত্যভিহিতং দেবৈরাকাশসংস্থিতৈঃ ॥ ৯.২৪॥
শুম্ভেনাগত্য যা শক্তির্মুক্তা জ্বালাতিভীষণা ।
আযান্তী বহ্নিকূটাভা সা নিরস্তা মহোল্কযা ॥ ৯.২৫॥
সিংহনাদেন শুম্ভস্য ব্যাপ্তং লোকত্রযান্তরম্ ।
নির্ঘাতনিঃস্বনো ঘোরো জিতবানবনীপতে ॥ ৯.২৬॥
শুম্ভমুক্তাঞ্ছরান্দেবী শুম্ভস্তত্প্রহিতাঞ্ছরান্ ।
চিচ্ছেদ স্বশরৈরুগ্রৈঃ শতশোঽথ সহস্রশঃ ॥ ৯.২৭॥
ততঃ সা চণ্ডিকা ক্রুদ্ধা শূলেনাভিজঘান তম্ ।
স তদাভিহতো ভূমৌ মূর্চ্ছিতো নিপপাত হ ॥ ৯.২৮॥
ততো নিশুম্ভঃ সম্প্রাপ্য চেতনামাত্তকার্মুকঃ ।
আজঘান শরৈর্দেবীং কালীং কেসরিণং তথা ॥ ৯.২৯॥
পুনশ্চ কৃত্বা বাহূনামযুতং দনুজেশ্বরঃ ।
চক্রাযুধেন দিতিজশ্ছাদযামাস চণ্ডিকাম্ ॥ ৯.৩০॥
ততো ভগবতী ক্রুদ্ধা দুর্গা দুর্গার্তিনাশিনী ।
চিচ্ছেদ দেবী চক্রাণি স্বশরৈঃ সাযকাংশ্চ তান্ ॥ ৯.৩১॥
ততো নিশুম্ভো বেগেন গদামাদায চণ্ডিকাম্ ।
অভ্যধাবত বৈ হন্তুং দৈত্যসৈন্যসমাবৃতঃ ॥ ৯.৩২॥
তস্যাপতত এবাশু গদাং চিচ্ছেদ চণ্ডিকা ।
খড্গেন শিতধারেণ স চ শূলং সমাদদে ॥ ৯.৩৩॥
শূলহস্তং সমাযান্তং নিশুম্ভমমরার্দনম্ ।
হৃদি বিব্যাধ শূলেন বেগাবিদ্ধেন চণ্ডিকা ॥ ৯.৩৪॥
ভিন্নস্য তস্য শূলেন হৃদযান্নিঃসৃতোঽপরঃ ।
মহাবলো মহাবীর্যস্তিষ্ঠেতি পুরুষো বদন্ ॥ ৯.৩৫॥
তস্য নিষ্ক্রামতো দেবী প্রহস্য স্বনবত্ততঃ ।
শিরশ্চিচ্ছেদ খড্গেন ততোঽসাবপতদ্ভুবি ॥ ৯.৩৬॥
ততঃ সিংহশ্চখাদোগ্রদংষ্ট্রাক্ষুণ্ণশিরোধরান্ ।
অসুরাংস্তাংস্তথা কালী শিবদূতী তথাপরান্ ॥ ৯.৩৭॥
কৌমারীশক্তিনির্ভিন্নাঃ কেচিন্নেশুর্মহাসুরাঃ ।
ব্রহ্মাণীমন্ত্রপূতেন তোযেনান্যে নিরাকৃতাঃ ॥ ৯.৩৮॥
মাহেশ্বরীত্রিশূলেন ভিন্নাঃ পেতুস্তথাপরে ।
বারাহীতুণ্ডঘাতেন কেচিচ্চূর্ণীকৃতা ভুবি ॥ ৯.৩৯॥
খণ্ডং খণ্ডং চ চক্রেণ বৈষ্ণব্যা দানবাঃ কৃতাঃ ।
বজ্রেণ চৈন্দ্রীহস্তাগ্রবিমুক্তেন তথাপরে ॥ ৯.৪০॥
কেচিদ্বিনেশুরসুরাঃ কেচিন্নষ্টা মহাহবাত্ ।
ভক্ষিতাশ্চাপরে কালীশিবদূতীমৃগাধিপৈঃ ॥ ৯.৪১॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
নিশুম্ভবধো নাম নবমোঽধ্যাযঃ ॥ ৯॥
উবাচ২, অর্ধশ্লোকাঃ ৩৯, শ্লোকাঃ ৪১, এবমাদিতঃ ॥ ৫৪৩॥

। ধ্যানম্ ।
ওঁ উত্তপ্তহেমরুচিরাং রবিচন্দ্রবহ্নি-
নেত্রাং ধনুশ্শরযুতাঙ্কুশপাশশূলম্ ।
রম্যৈর্ভুজৈশ্চ দধতীং শিবশক্তিরূপাং
কামেশ্বরীং হৃদি ভজামি ধৃতেন্দুলেখাম্ ॥
ওঁ ঋষিরুবাচ ॥ ১০.১॥
নিশুম্ভং নিহতং দৃষ্ট্বা ভ্রাতরং প্রাণসম্মিতম্ ।
হন্যমানং বলং চৈব শুম্ভঃ ক্রুদ্ধোঽব্রবীদ্বচঃ ॥ ১০.২॥
বলাবলেপদুষ্টে ত্বং মা দুর্গে গর্বমাবহ ।
অন্যাসাং বলমাশ্রিত্য যুদ্ধ্যসে চাতিমানিনী ॥ ১০.৩॥
দেব্যুবাচ॥ ১০.৪॥
একৈবাহং জগত্যত্র দ্বিতীযা কা মমাপরা ।
পশ্যৈতা দুষ্ট ময্যেব বিশন্ত্যো মদ্বিভূতযঃ ॥ ১০.৫॥
ততঃ সমস্তাস্তা দেব্যো ব্রহ্মাণীপ্রমুখা লযম্ ।
তস্যা দেব্যাস্তনৌ জগ্মুরেকৈবাসীত্তদাম্বিকা ॥ ১০.৬॥
দেব্যুবাচ॥ ১০.৭॥
অহং বিভূত্যা বহুভিরিহ রূপৈর্যদাস্থিতা ।
তত্সংহৃতং মযৈকৈব তিষ্ঠাম্যাজৌ স্থিরো ভব ॥ ১০.৮॥
ঋষিরুবাচ ॥ ১০.৯॥
ততঃ প্রববৃতে যুদ্ধং দেব্যাঃ শুম্ভস্য চোভযোঃ ।
পশ্যতাং সর্বদেবানামসুরাণাং চ দারুণম্ ॥ ১০.১০॥
শরবর্ষৈঃ শিতৈঃ শস্ত্রৈস্তথা চাস্ত্রৈঃ সুদারুণৈঃ ।
তযোর্যুদ্ধমভূদ্ভূযঃ সর্বলোকভযঙ্করম্ ॥ ১০.১১॥
দিব্যান্যস্ত্রাণি শতশো মুমুচে যান্যথাম্বিকা ।
বভঞ্জ তানি দৈত্যেন্দ্রস্তত্প্রতীঘাতকর্তৃভিঃ ॥ ১০.১২॥
মুক্তানি তেন চাস্ত্রাণি দিব্যানি পরমেশ্বরী ।
বভঞ্জ লীলযৈবোগ্রহুঙ্কারোচ্চারণাদিভিঃ ॥ ১০.১৩॥
ততঃ শরশতৈর্দেবীমাচ্ছাদযত সোঽসুরঃ ।
সাপি তত্কুপিতা দেবী ধনুশ্চিচ্ছেদ চেষুভিঃ ॥ ১০.১৪॥
ছিন্নে ধনুষি দৈত্যেন্দ্রস্তথা শক্তিমথাদদে ।
চিচ্ছেদ দেবী চক্রেণ তামপ্যস্য করে স্থিতাম্ ॥ ১০.১৫॥
ততঃ খড্গমুপাদায শতচন্দ্রং চ ভানুমত্ ।
অভ্যধা বত তাং দেবীং দৈত্যানামধিপেশ্বরঃ ॥ ১০.১৬॥
তস্যাপতত এবাশু খড্গং চিচ্ছেদ চণ্ডিকা ।
ধনুর্মুক্তৈঃ শিতৈর্বাণৈশ্চর্ম চার্ককরামলম্ ।
অশ্বাংশ্চ পাতযামাস রথং সারথিনা সহ ॥ ১০.১৭॥
হতাশ্বঃ স তদা দৈত্যশ্ছিন্নধন্বা বিসারথিঃ ।
জগ্রাহ মুদ্গরং ঘোরমম্বিকানিধনোদ্যতঃ ॥ ১০.১৮॥
চিচ্ছেদাপততস্তস্য মুদ্গরং নিশিতৈঃ শরৈঃ ।
তথাপি সোঽভ্যধাবত্তাং মুষ্টিমুদ্যম্য বেগবান্ ॥ ১০.১৯॥
স মুষ্টিং পাতযামাস হৃদযে দৈত্যপুঙ্গবঃ ।
দেব্যাস্তং চাপি সা দেবী তলেনোরস্যতাডযত্ ॥ ১০.২০॥
তলপ্রহারাভিহতো নিপপাত মহীতলে ।
স দৈত্যরাজঃ সহসা পুনরেব তথোত্থিতঃ ॥ ১০.২১॥
উত্পত্য চ প্রগৃহ্যোচ্চৈর্দেবীং গগনমাস্থিতঃ ।
তত্রাপি সা নিরাধারা যুযুধে তেন চণ্ডিকা ॥ ১০.২২॥
নিযুদ্ধং খে তদা দৈত্যশ্চণ্ডিকা চ পরস্পরম্ ।
চক্রতুঃ প্রথমং সিদ্ধমুনিবিস্মযকারকম্ ॥ ১০.২৩॥
ততো নিযুদ্ধং সুচিরং কৃত্বা তেনাম্বিকা সহ ।
উত্পাট্য ভ্রামযামাস চিক্ষেপ ধরণীতলে ॥ ১০.২৪॥
স ক্ষিপ্তো ধরণীং প্রাপ্য মুষ্টিমুদ্যম্য বেগবান্ ।
অভ্যধাবত দুষ্টাত্মা চণ্ডিকানিধনেচ্ছযা ॥ ১০.২৫॥
তমাযান্তং ততো দেবী সর্বদৈত্যজনেশ্বরম্ ।
জগত্যাং পাতযামাস ভিত্ত্বা শূলেন বক্ষসি ॥ ১০.২৬॥
স গতাসুঃ পপাতোর্ব্যাং দেবী শূলাগ্রবিক্ষতঃ ।
চালযন্ সকলাং পৃথ্বীং সাব্ধিদ্বীপাং সপর্বতাম্ ॥ ১০.২৭॥
ততঃ প্রসন্নমখিলং হতে তস্মিন্ দুরাত্মনি ।
জগত্স্বাস্থ্যমতীবাপ নির্মলং চাভবন্নভঃ ॥ ১০.২৮॥
উত্পাতমেঘাঃ সোল্কা যে প্রাগাসংস্তে শমং যযুঃ ।
সরিতো মার্গবাহিন্যস্তথাসংস্তত্র পাতিতে ॥ ১০.২৯॥
ততো দেবগণাঃ সর্বে হর্ষনির্ভরমানসাঃ ।
বভূবুর্নিহতে তস্মিন্ গন্ধর্বা ললিতং জগুঃ ॥ ১০.৩০॥
অবাদযংস্তথৈবান্যে ননৃতুশ্চাপ্সরোগণাঃ ।
ববুঃ পুণ্যাস্তথা বাতাঃ সুপ্রভোঽভূদ্দিবাকরঃ ॥ ১০.৩১॥
জজ্বলুশ্চাগ্নযঃ শান্তাঃ শান্তা দিগ্জনিতস্বনাঃ ॥ ১০.৩২॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে
দেবীমাহাত্ম্যে শুম্ভবধো নাম দশমোঽধ্যাযঃ ॥ ১০॥

। ধ্যানম্ ।
ওঁ বালরবিদ্যুতিমিন্দুকিরীটাং তুঙ্গকুচাং নযনত্রযযুক্তাম্ ।
স্মেরমুখীং বরদাঙ্কুশপাশাভীতিকরাং প্রভজে ভুবনেশীম্ ॥
ওঁ ঋষিরুবাচ ॥ ১১.১॥
দেব্যা হতে তত্র মহাসুরেন্দ্রে
সেন্দ্রাঃ সুরা বহ্নিপুরোগমাস্তাম্ ।
কাত্যাযনীং তুষ্টুবুরিষ্টলাভাদ্
বিকাশিবক্ত্রাব্জবিকাশিতাশাঃ ॥ ১১.২॥
দেবি প্রপন্নার্তিহরে প্রসীদ
প্রসীদ মাতর্জগতোঽখিলস্য ।
প্রসীদ বিশ্বেশ্বরি পাহি বিশ্বং
ত্বমীশ্বরী দেবি চরাচরস্য ॥ ১১.৩॥
আধারভূতা জগতস্ত্বমেকা
মহীস্বরূপেণ যতঃ স্থিতাসি ।
অপাং স্বরূপস্থিতযা ত্বযৈত-
দাপ্যাযতে কৃত্স্নমলঙ্ঘ্যবীর্যে ॥ ১১.৪॥
ত্বং বৈষ্ণবীশক্তিরনন্তবীর্যা
বিশ্বস্য বীজং পরমাসি মাযা ।
সম্মোহিতং দেবি সমস্তমেতত্
ত্বং বৈ প্রসন্না ভুবি মুক্তিহেতুঃ ॥ ১১.৫॥
বিদ্যাঃ সমস্তাস্তব দেবি ভেদাঃ
স্ত্রিযঃ সমস্তাঃ সকলা জগত্সু ।
ত্বযৈকযা পূরিতমম্বযৈতত্
কা তে স্তুতিঃ স্তব্যপরাপরোক্তিঃ ॥ ১১.৬॥
সর্বভূতা যদা দেবী ভুক্তিমুক্তিপ্রদাযিনী ।
ত্বং স্তুতা স্তুতযে কা বা ভবন্তু পরমোক্তযঃ ॥ ১১.৭॥
সর্বস্য বুদ্ধিরূপেণ জনস্য হৃদি সংস্থিতে ।
স্বর্গাপবর্গদে দেবি নারাযণি নমোঽস্তু তে ॥ ১১.৮॥
কলাকাষ্ঠাদিরূপেণ পরিণামপ্রদাযিনি ।
বিশ্বস্যোপরতৌ শক্তে নারাযণি নমোঽস্তু তে ॥ ১১.৯॥
সর্বমঙ্গলমাঙ্গল্যে শিবে সর্বার্থসাধিকে ।
শরণ্যে ত্র্যম্বকে গৌরি নারাযণি নমোঽস্তু তে ॥ ১১.১০॥
সৃষ্টিস্থিতিবিনাশানাং শক্তিভূতে সনাতনি ।
গুণাশ্রযে গুণমযে নারাযণি নমোঽস্তু তে ॥ ১১.১১॥
শরণাগতদীনার্তপরিত্রাণপরাযণে ।
সর্বস্যার্তিহরে দেবি নারাযণি নমোঽস্তু তে ॥ ১১.১২॥
হংসযুক্তবিমানস্থে ব্রহ্মাণীরূপধারিণি ।
কৌশাম্ভঃক্ষরিকে দেবি নারাযণি নমোঽস্তু তে ॥ ১১.১৩॥
ত্রিশূলচন্দ্রাহিধরে মহাবৃষভবাহিনি ।
মাহেশ্বরীস্বরূপেণ নারাযণি নমোঽস্তুতে ॥ ১১.১৪॥
মযূরকুক্কুটবৃতে মহাশক্তিধরেঽনঘে ।
কৌমারীরূপসংস্থানে নারাযণি নমোঽস্তু তে ॥ ১১.১৫॥
শঙ্খচক্রগদাশার্ঙ্গগৃহীতপরমাযুধে ।
প্রসীদ বৈষ্ণবীরূপে নারাযণি নমোঽস্তু তে ॥ ১১.১৬॥
গৃহীতোগ্রমহাচক্রে দংষ্ট্রোদ্ধৃতবসুন্ধরে ।
বরাহরূপিণি শিবে নারাযণি নমোঽস্তু তে ॥ ১১.১৭॥
নৃসিংহরূপেণোগ্রেণ হন্তুং দৈত্যান্ কৃতোদ্যমে ।
ত্রৈলোক্যত্রাণসহিতে নারাযণি নমোঽস্তু তে ॥ ১১.১৮॥
কিরীটিনি মহাবজ্রে সহস্রনযনোজ্জ্বলে ।
বৃত্রপ্রাণহরে চৈন্দ্রি নারাযণি নমোঽস্তু তে ॥ ১১.১৯॥
শিবদূতীস্বরূপেণ হতদৈত্যমহাবলে ।
ঘোররূপে মহারাবে নারাযণি নমোঽস্তু তে ॥ ১১.২০॥
দংষ্ট্রাকরালবদনে শিরোমালাবিভূষণে ।
চামুণ্ডে মুণ্ডমথনে নারাযণি নমোঽস্তু তে ॥ ১১.২১॥
লক্ষ্মি লজ্জে মহাবিদ্যে শ্রদ্ধে পুষ্টি স্বধে ধ্রুবে ।
মহারাত্রি মহামাযে নারাযণি নমোঽস্তু তে ॥ ১১.২২॥
মেধে সরস্বতি বরে ভূতি বাভ্রবি তামসি ।
নিযতে ত্বং প্রসীদেশে নারাযণি নমোঽস্তুতে ॥ ১১.২৩॥
সর্বস্বরূপে সর্বেশে সর্বশক্তিসমন্বিতে ।
ভযেভ্যস্ত্রাহি নো দেবি দুর্গে দেবি নমোঽস্তু তে ॥ ১১.২৪॥
এতত্তে বদনং সৌম্যং লোচনত্রযভূষিতম্ ।
পাতু নঃ সর্বভূতেভ্যঃ কাত্যাযনি নমোঽস্তু তে ॥ ১১.২৫॥
জ্বালাকরালমত্যুগ্রমশেষাসুরসূদনম্ ।
ত্রিশূলং পাতু নো ভীতের্ভদ্রকালি নমোঽস্তু তে ॥ ১১.২৬॥
হিনস্তি দৈত্যতেজাংসি স্বনেনাপূর্য যা জগত্ ।
সা ঘণ্টা পাতু নো দেবি পাপেভ্যো নঃ সুতানিব ॥ ১১.২৭॥
অসুরাসৃগ্বসাপঙ্কচর্চিতস্তে করোজ্জ্বলঃ ।
শুভায খড্গো ভবতু চণ্ডিকে ত্বাং নতা বযম্ ॥ ১১.২৮॥
রোগানশেষানপহংসি তুষ্টা
রুষ্টা তু কামান্ সকলানভীষ্টান্ ।
ত্বামাশ্রিতানাং ন বিপন্নরাণাং
ত্বামাশ্রিতা হ্যাশ্রযতাং প্রযান্তি ॥ ১১.২৯॥
এতত্কৃতং যত্কদনং ত্বযাদ্য
ধর্মদ্বিষাং দেবি মহাসুরাণাম্ ।
রূপৈরনেকৈর্বহুধাত্মমূর্তিং
কৃত্বাম্বিকে তত্প্রকরোতি কান্যা ॥ ১১.৩০॥
বিদ্যাসু শাস্ত্রেষু বিবেকদীপে-
ষ্বাদ্যেষু বাক্যেষু চ কা ত্বদন্যা ।
মমত্বগর্তেঽতিমহান্ধকারে
বিভ্রামযত্যেতদতীব বিশ্বম্ ॥ ১১.৩১॥
রক্ষাংসি যত্রোগ্রবিষাশ্চ নাগা
যত্রারযো দস্যুবলানি যত্র ।
দাবানলো যত্র তথাব্ধিমধ্যে
তত্র স্থিতা ত্বং পরিপাসি বিশ্বম্ ॥ ১১.৩২॥
বিশ্বেশ্বরি ত্বং পরিপাসি বিশ্বং
বিশ্বাত্মিকা ধারযসীহ বিশ্বম্ ।
বিশ্বেশবন্দ্যা ভবতী ভবন্তি
বিশ্বাশ্রযা যে ত্বযি ভক্তিনম্রাঃ ॥ ১১.৩৩॥
দেবি প্রসীদ পরিপালয নোঽরিভীতে-
র্নিত্যং যথাসুরবধাদধুনৈব সদ্যঃ ।
পাপানি সর্বজগতাং প্রশমং নযাশু
উত্পাতপাকজনিতাংশ্চ মহোপসর্গান্ ॥ ১১.৩৪॥
প্রণতানাং প্রসীদ ত্বং দেবি বিশ্বার্তিহারিণি ।
ত্রৈলোক্যবাসিনামীড্যে লোকানাং বরদা ভব ॥ ১১.৩৫॥
দেব্যুবাচ॥ ১১.৩৬॥
বরদাহং সুরগণা বরং যন্মনসেচ্ছথ ।
তং বৃণুধ্বং প্রযচ্ছামি জগতামুপকারকম্ ॥ ১১.৩৭॥
দেবা ঊচুঃ ॥ ১১.৩৮॥
সর্বাবাধাপ্রশমনং ত্রৈলোক্যস্যাখিলেশ্বরি ।
এবমেব ত্বযা কার্যমস্মদ্বৈরিবিনাশনম্ ॥ ১১.৩৯॥
দেব্যুবাচ॥ ১১.৪০॥
বৈবস্বতেঽন্তরে প্রাপ্তে অষ্টাবিংশতিমে যুগে ।
শুম্ভো নিশুম্ভশ্চৈবান্যাবুত্পত্স্যেতে মহাসুরৌ ॥ ১১.৪১॥
নন্দগোপগৃহে জাতা যশোদাগর্ভসম্ভবা ।
ততস্তৌ নাশযিষ্যামি বিন্ধ্যাচলনিবাসিনী ॥ ১১.৪২॥
পুনরপ্যতিরৌদ্রেণ রূপেণ পৃথিবীতলে ।
অবতীর্য হনিষ্যামি বৈপ্রচিত্তাংশ্চ দানবান্ ॥ ১১.৪৩॥
ভক্ষযন্ত্যাশ্চ তানুগ্রান্ বৈপ্রচিত্তান্ মহাসুরান্ ।
রক্তা দন্তা ভবিষ্যন্তি দাডিমীকুসুমোপমাঃ ॥ ১১.৪৪॥
ততো মাং দেবতাঃ স্বর্গে মর্ত্যলোকে চ মানবাঃ ।
স্তুবন্তো ব্যাহরিষ্যন্তি সততং রক্তদন্তিকাম্ ॥ ১১.৪৫॥
ভূযশ্চ শতবার্ষিক্যামনাবৃষ্ট্যামনম্ভসি ।
মুনিভিঃ সংস্মৃতা ভূমৌ সম্ভবিষ্যাম্যযোনিজা ॥ ১১.৪৬॥
ততঃ শতেন নেত্রাণাং নিরীক্ষিষ্যাম্যহং মুনীন্ ।
কীর্তযিষ্যন্তি মনুজাঃ শতাক্ষীমিতি মাং ততঃ ॥ ১১.৪৭॥
ততোঽহমখিলং লোকমাত্মদেহসমুদ্ভবৈঃ ।
ভরিষ্যামি সুরাঃ শাকৈরাবৃষ্টেঃ প্রাণধারকৈঃ ॥ ১১.৪৮॥
শাকম্ভরীতি বিখ্যাতিং তদা যাস্যাম্যহং ভুবি ।
তত্রৈব চ বধিষ্যামি দুর্গমাখ্যং মহাসুরম্ ॥ ১১.৪৯॥
দুর্গাদেবীতি বিখ্যাতং তন্মে নাম ভবিষ্যতি ।
পুনশ্চাহং যদা ভীমং রূপং কৃত্বা হিমাচলে ॥ ১১.৫০॥
রক্ষাংসি ভক্ষযিষ্যামি মুনীনাং ত্রাণকারণাত্ ।
তদা মাং মুনযঃ সর্বে স্তোষ্যন্ত্যানম্রমূর্তযঃ ॥ ১১.৫১॥
ভীমাদেবীতি বিখ্যাতং তন্মে নাম ভবিষ্যতি ।
যদারুণাখ্যস্ত্রৈলোক্যে মহাবাধাং করিষ্যতি ॥ ১১.৫২॥
তদাহং ভ্রামরং রূপং কৃত্বাসঙ্খ্যেযষট্পদম্ ।
ত্রৈলোক্যস্য হিতার্থায বধিষ্যামি মহাসুরম্ ॥ ১১.৫৩॥
ভ্রামরীতি চ মাং লোকাস্তদা স্তোষ্যন্তি সর্বতঃ ।
ইত্থং যদা যদা বাধা দানবোত্থা ভবিষ্যতি ॥ ১১.৫৪॥
তদা তদাবতীর্যাহং করিষ্যাম্যরিসঙ্ক্ষযম্ ॥ ১১.৫৫॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
নারাযণীস্তুতির্নামৈকাদশোঽধ্যাযঃ ॥ ১১॥
উবাচ৪, অর্ধশ্লোকঃ ১, শ্লোকাঃ ৫০, এবমাদিতঃ ॥ ৬৩০॥

। ধ্যানম্ ।
ওঁ বিদ্যুদ্ধামসমপ্রভাং মৃগপতিস্কন্ধস্থিতাং ভীষণাং
কন্যাভিঃ করবাল়খেটবিলসধস্তাভিরাসেবিতাম্ ।
হস্তৈশ্চক্রগদাসিখেটবিশিখাংশ্চাপং গুণং তর্জনীং
বিভ্রাণামনলাত্মিকাং শশিধরাং দুর্গাং ত্রিনেত্রাং ভজে ॥
ওঁ দেব্যুবাচ॥ ১২.১॥
এভিঃ স্তবৈশ্চ মাং নিত্যং স্তোষ্যতে যঃ সমাহিতঃ ।
তস্যাহং সকলাং বাধাং শমযিষ্যাম্যসংশযম্ ॥ ১২.২॥
মধুকৈটভনাশং চ মহিষাসুরঘাতনম্ ।
কীর্তযিষ্যন্তি যে তদ্বদ্বধং শুম্ভনিশুম্ভযোঃ ॥ ১২.৩॥
অষ্টম্যাং চ চতুর্দশ্যাং নবম্যাং চৈকচেতসঃ ।
শ্রোষ্যন্তি চৈব যে ভক্ত্যা মম মাহাত্ম্যমুত্তমম্ ॥ ১২.৪॥
ন তেষাং দুষ্কৃতং কিঞ্চিদ্দুষ্কৃতোত্থা ন চাপদঃ ।
ভবিষ্যতি ন দারিদ্র্যং ন চৈবেষ্টবিযোজনম্ ॥ ১২.৫॥
শত্রুভ্যো ন ভযং তস্য দস্যুতো বা ন রাজতঃ ।
ন শস্ত্রানলতোযৌঘাত্ কদাচিত্ সম্ভবিষ্যতি ॥ ১২.৬॥
তস্মান্মমৈতন্মাহাত্ম্যং পঠিতব্যং সমাহিতৈঃ ।
শ্রোতব্যং চ সদা ভক্ত্যা পরং স্বস্ত্যযনং মহত্ ॥ ১২.৭॥
উপসর্গানশেষাংস্তু মহামারীসমুদ্ভবান্ ।
তথা ত্রিবিধমুত্পাতং মাহাত্ম্যং শমযেন্মম ॥ ১২.৮॥
যত্রৈতত্পঠ্যতে সম্যঙ্নিত্যমাযতনে মম ।
সদা ন তদ্বিমোক্ষ্যামি সান্নিধ্যং তত্র মে স্থিতম্ ॥ ১২.৯॥
বলিপ্রদানে পূজাযামগ্নিকার্যে মহোত্সবে ।
সর্বং মমৈতন্মাহাত্ম্যম্ উচ্চার্যং শ্রাব্যমেব চ ॥ ১২.১০॥
জানতাজানতা বাপি বলিপূজাং যথা কৃতাম্ ।
প্রতীক্ষিষ্যাম্যহং প্রীত্যা বহ্নিহোমং তথাকৃতম্ ॥ ১২.১১॥
শরত্কালে মহাপূজা ক্রিযতে যা চ বার্ষিকী ।
তস্যাং মমৈতন্মাহাত্ম্যং শ্রুত্বা ভক্তিসমন্বিতঃ ॥ ১২.১২॥
সর্বাবাধাবিনির্মুক্তো ধনধান্যসমন্বিতঃ ।
মনুষ্যো মত্প্রসাদেন ভবিষ্যতি ন সংশযঃ ॥ ১২.১৩॥
শ্রুত্বা মমৈতন্মাহাত্ম্যং তথা চোত্পত্তযঃ শুভাঃ ।
পরাক্রমং চ যুদ্ধেষু জাযতে নির্ভযঃ পুমান্ ॥ ১২.১৪॥
রিপবঃ সঙ্ক্ষযং যান্তি কল্যাণং চোপপদ্যতে ।
নন্দতে চ কুলং পুংসাং মাহাত্ম্যং মম শ‍ৃণ্বতাম্ ॥ ১২.১৫॥
শান্তিকর্মণি সর্বত্র তথা দুঃস্বপ্নদর্শনে ।
গ্রহপীডাসু চোগ্রাসু মাহাত্ম্যং শ‍ৃণুযান্মম ॥ ১২.১৬॥
উপসর্গাঃ শমং যান্তি গ্রহপীডাশ্চ দারুণাঃ ।
দুঃস্বপ্নং চ নৃভির্দৃষ্টং সুস্বপ্নমুপজাযতে ॥ ১২.১৭॥
বালগ্রহাভিভূতানাং বালানাং শান্তিকারকম্ ।
সঙ্ঘাতভেদে চ নৃণাং মৈত্রীকরণমুত্তমম্ ॥ ১২.১৮॥
দুর্বৃত্তানামশেষাণাং বলহানিকরং পরম্ ।
রক্ষোভূতপিশাচানাং পঠনাদেব নাশনম্ ॥ ১২.১৯॥
সর্বং মমৈতন্মাহাত্ম্যং মম সন্নিধিকারকম্ ।
পশুপুষ্পার্ঘ্যধূপৈশ্চ গন্ধদীপৈস্তথোত্তমৈঃ ॥ ১২.২০॥
বিপ্রাণাং ভোজনৈর্হোমৈঃ প্রোক্ষণীযৈরহর্নিশম্ ।
অন্যৈশ্চ বিবিধৈর্ভোগৈঃ প্রদানৈর্বত্সরেণ যা ॥ ১২.২১॥
প্রীতির্মে ক্রিযতে সাস্মিন্ সকৃদুচ্চরিতে শ্রুতে ।
শ্রুতং হরতি পাপানি তথারোগ্যং প্রযচ্ছতি ॥ ১২.২২॥
রক্ষাং করোতি ভূতেভ্যো জন্মনাং কীর্তনং মম ।
যুদ্ধেষু চরিতং যন্মে দুষ্টদৈত্যনিবর্হণম্ ॥ ১২.২৩॥
তস্মিঞ্ছ্রুতে বৈরিকৃতং ভযং পুংসাং ন জাযতে ।
যুষ্মাভিঃ স্তুতযো যাশ্চ যাশ্চ ব্রহ্মর্ষিভিঃ কৃতাঃ ॥ ১২.২৪॥
ব্রহ্মণা চ কৃতাস্তাস্তু প্রযচ্ছন্তু শুভাং মতিম্ ।
অরণ্যে প্রান্তরে বাপি দাবাগ্নিপরিবারিতঃ ॥ ১২.২৫॥
দস্যুভির্বা বৃতঃ শূন্যে গৃহীতো বাপি শত্রুভিঃ ।
সিংহব্যাঘ্রানুযাতো বা বনে বা বনহস্তিভিঃ ॥ ১২.২৬॥
রাজ্ঞা ক্রুদ্ধেন চাজ্ঞপ্তো বধ্যো বন্ধগতোঽপি বা ।
আঘূর্ণিতো বা বাতেন স্থিতঃ পোতে মহার্ণবে ॥ ১২.২৭॥
পতত্সু চাপি শস্ত্রেষু সঙ্গ্রামে ভৃশদারুণে ।
সর্বাবাধাসু ঘোরাসু বেদনাভ্যর্দিতোঽপি বা ॥ ১২.২৮॥
স্মরন্ মমৈতচ্চরিতং নরো মুচ্যেত সঙ্কটাত্ ।
মম প্রভাবাত্সিংহাদ্যা দস্যবো বৈরিণস্তথা ॥ ১২.২৯॥
দূরাদেব পলাযন্তে স্মরতশ্চরিতং মম ॥ ১২.৩০॥
ঋষিরুবাচ ॥ ১২.৩১॥
ইত্যুক্ত্বা সা ভগবতী চণ্ডিকা চণ্ডবিক্রমা ॥ ১২.৩২॥
পশ্যতাং সর্বদেবানাং তত্রৈবান্তরধীযত ।
তেঽপি দেবা নিরাতঙ্কাঃ স্বাধিকারান্যথা পুরা ॥ ১২.৩৩॥
যজ্ঞভাগভুজঃ সর্বে চক্রুর্বিনিহতারযঃ ।
দৈত্যাশ্চ দেব্যা নিহতে শুম্ভে দেবরিপৌ যুধি ॥ ১২.৩৪॥
জগদ্বিধ্বংসকে তস্মিন্ মহোগ্রেঽতুলবিক্রমে ।
নিশুম্ভে চ মহাবীর্যে শেষাঃ পাতালমাযযুঃ ॥ ১২.৩৫॥
এবং ভগবতী দেবী সা নিত্যাপি পুনঃ পুনঃ ।
সম্ভূয কুরুতে ভূপ জগতঃ পরিপালনম্ ॥ ১২.৩৬॥
তযৈতন্মোহ্যতে বিশ্বং সৈব বিশ্বং প্রসূযতে ।
সা যাচিতা চ বিজ্ঞানং তুষ্টা ঋদ্ধিং প্রযচ্ছতি ॥ ১২.৩৭॥
ব্যাপ্তং তযৈতত্সকলং ব্রহ্মাণ্ডং মনুজেশ্বর ।
মহাদেব্যা মহাকালী মহামারীস্বরূপযা ॥ ১২.৩৮॥
সৈব কালে মহামারী সৈব সৃষ্টির্ভবত্যজা ।
স্থিতিং করোতি ভূতানাং সৈব কালে সনাতনী ॥ ১২.৩৯॥
ভবকালে নৃণাং সৈব লক্ষ্মীর্বৃদ্ধিপ্রদা গৃহে ।
সৈবাভাবে তথালক্ষ্মীর্বিনাশাযোপজাযতে ॥ ১২.৪০॥
স্তুতা সম্পূজিতা পুষ্পৈর্গন্ধধূপাদিভিস্তথা ।
দদাতি বিত্তং পুত্রাংশ্চ মতিং ধর্মে গতিং শুভাম্ ॥ ১২.৪১॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
ভগবতী বাক্যং দ্বাদশোঽধ্যাযঃ ॥ ১২॥
উবাচ২, অর্ধশ্লোকৌ ২, শ্লোকাঃ ৩৭, এবমাদিতঃ ॥ ৬৭১॥

। ধ্যানম্ ।
ওঁ বালার্কমণ্ডলাভাসাং চতুর্বাহুং ত্রিলোচনাম্ ।
পাশাঙ্কুশবরাভীতির্ধারযন্তীং শিবাং ভজে ॥
ওঁ ঋষিরুবাচ ॥ ১৩.১॥
এতত্তে কথিতং ভূপ দেবীমাহাত্ম্যমুত্তমম্ ।
এবং প্রভাবা সা দেবী যযেদং ধার্যতে জগত্ ॥ ১৩.২॥
বিদ্যা তথৈব ক্রিযতে ভগবদ্বিষ্ণুমাযযা ।
তযা ত্বমেষ বৈশ্যশ্চ তথৈবান্যে বিবেকিনঃ ॥ ১৩.৩॥
মোহ্যন্তে মোহিতাশ্চৈব মোহমেষ্যন্তি চাপরে ।
তামুপৈহি মহারাজ শরণং পরমেশ্বরীম্ ॥ ১৩.৪॥
আরাধিতা সৈব নৃণাং ভোগস্বর্গাপবর্গদা ॥ ১৩.৫॥
মার্কণ্ডেয উবাচ॥ ১৩.৬॥
ইতি তস্য বচঃ শ্রুত্বা সুরথঃ স নরাধিপঃ ॥ ১৩.৭॥
প্রণিপত্য মহাভাগং তমৃষিং সংশিতব্রতম্ ।
নির্বিণ্ণোঽতিমমত্বেন রাজ্যাপহরণেন চ ॥ ১৩.৮॥
জগাম সদ্যস্তপসে স চ বৈশ্যো মহামুনে ।
সন্দর্শনার্থমম্বাযা নদীপুলিনমাস্থিতঃ ॥ ১৩.৯॥
স চ বৈশ্যস্তপস্তেপে দেবীসূক্তং পরং জপন্ ।
তৌ তস্মিন্ পুলিনে দেব্যাঃ কৃত্বা মূর্তিং মহীমযীম্ ॥ ১৩.১০॥
অর্হণাং চক্রতুস্তস্যাঃ পুষ্পধূপাগ্নিতর্পণৈঃ ।
নিরাহারৌ যতাত্মানৌ তন্মনস্কৌ সমাহিতৌ ॥ ১৩.১১॥
দদতুস্তৌ বলিং চৈব নিজগাত্রাসৃগুক্ষিতম্ ।
এবং সমারাধযতোস্ত্রিভির্বর্ষৈর্যতাত্মনোঃ ॥ ১৩.১২॥
পরিতুষ্টা জগদ্ধাত্রী প্রত্যক্ষং প্রাহ চণ্ডিকা ॥ ১৩.১৩॥
দেব্যুবাচ॥ ১৩.১৪॥
যত্প্রার্থ্যতে ত্বযা ভূপ ত্বযা চ কুলনন্দন ।
মত্তস্তত্প্রাপ্যতাং সর্বং পরিতুষ্টা দদামিতে ॥ ১৩.১৫॥
মার্কণ্ডেয উবাচ॥ ১৩.১৬॥
ততো বব্রে নৃপো রাজ্যমবিভ্রংশ্যন্যজন্মনি ।
অত্রৈব চ নিজং রাজ্যং হতশত্রুবলং বলাত্ ॥ ১৩.১৭॥
সোঽপি বৈশ্যস্ততো জ্ঞানং বব্রে নির্বিণ্ণমানসঃ ।
মমেত্যহমিতি প্রাজ্ঞঃ সঙ্গবিচ্যুতিকারকম্ ॥ ১৩.১৮॥
দেব্যুবাচ॥ ১৩.১৯॥
স্বল্পৈরহোভির্নৃপতে স্বং রাজ্যং প্রাপ্স্যতে ভবান্ ॥ ১৩.২০॥
হত্বা রিপূনস্খলিতং তব তত্র ভবিষ্যতি ॥ ১৩.২১॥
মৃতশ্চ ভূযঃ সম্প্রাপ্য জন্ম দেবাদ্বিবস্বতঃ ॥ ১৩.২২॥
সাবর্ণিকো মনুর্নাম ভবান্ভুবি ভবিষ্যতি ॥ ১৩.২৩॥
বৈশ্যবর্য ত্বযা যশ্চ বরোঽস্মত্তোঽভিবাঞ্ছিতঃ ॥ ১৩.২৪॥
তং প্রযচ্ছামি সংসিদ্ধ্যৈ তব জ্ঞানং ভবিষ্যতি ॥ ১৩.২৫॥
মার্কণ্ডেয উবাচ॥ ১৩.২৬॥
ইতি দত্ত্বা তযোর্দেবী যথাভিলষিতং বরম্ ॥ ১৩.২৭॥
বভূবান্তর্হিতা সদ্যো ভক্ত্যা তাভ্যামভিষ্টুতা ।
এবং দেব্যা বরং লব্ধ্বা সুরথঃ ক্ষত্রিযর্ষভঃ ॥ ১৩.২৮॥
সূর্যাজ্জন্ম সমাসাদ্য সাবর্ণির্ভবিতা মনুঃ ॥ ১৩.২৯॥
এবং দেব্যা বরং লব্ধ্বা সুরথঃ ক্ষত্রিযর্ষভঃ ।
সূর্যাজ্জন্ম সমাসাদ্য সাবর্ণির্ভবিতা মনুঃ ॥ ক্লীং ওঁ ॥
॥ স্বস্তি শ্রীমার্কণ্ডেযপুরাণে সাবর্ণিকে মন্বন্তরে দেবীমাহাত্ম্যে
সুরথবৈশ্যযোর্বরপ্রদানং নাম ত্রযোদশোঽধ্যাযঃ ॥ ১৩॥
উবাচ৬, অর্ধশ্লোকাঃ ১১, শ্লোকাঃ ১২, এবমাদিতঃ ॥ ৭০০॥
সমস্তা উবাচমন্ত্রাঃ ৫৭, অর্ধশ্লোকাঃ ৪২, শ্লোকাঃ ৫৩৫, অবদানানি ৬৬ ॥
॥ শ্রীসপ্তশতীদেবীমাহাত্ম্যং সমাপ্তম্ ॥
॥ ওঁ তত্ সত্ ওঁ ॥

ওঁ অপরাধশতং কৃত্বা জগদম্বেতি চোচ্চরেত্ ।
যাং গতিং সমবাপ্নোতি ন তাং ব্রহ্মাদযঃ সুরাঃ ॥ ১॥
সাপরাধোঽস্মি শরণং প্রাপ্তস্ত্বাং জগদম্বিকে ।
ইদানীমনুকম্প্যোঽহং যথেচ্ছসি তথা কুরু ॥ ২॥
অজ্ঞানাদ্বিস্মৃতের্ভ্রান্ত্যা যন্ন্যূনমধিকং কৃতম্ ।
তত্সর্বং ক্ষম্যতাং দেবি প্রসীদ পরমেশ্বরি ॥ ৩॥
কামেশ্বরি জগন্মাতঃ সচ্চিদানন্দবিগ্রহে ।
গৃহাণার্চামিমাং প্রীত্যা প্রসীদ পরমেশ্বরি ॥ ৪॥
সর্বরূপমযী দেবী সর্বং দেবীমযং জগত্ ।
অতোঽহং বিশ্বরূপাং ত্বাং নমামি পরমেশ্বরীম্ ॥ ৫॥
যদক্ষরং পরিভ্রষ্টং মাত্রাহীনঞ্চ যদ্ভবেত্ ।
পূর্ণং ভবতু তত্ সর্বং ত্বত্প্রসাদান্মহেশ্বরি ॥ ৬॥
যদত্র পাঠে জগদম্বিকে মযা
বিসর্গবিন্দ্বক্ষরহীনমীরিতম্ ।
তদস্তু সম্পূর্ণতমং প্রসাদতঃ
সঙ্কল্পসিদ্ধিশ্চ সদৈব জাযতাম্ ॥ ৭॥
যন্মাত্রাবিন্দুবিন্দুদ্বিতযপদপদদ্বন্দ্ববর্ণাদিহীনং
ভক্ত্যাভক্ত্যানুপূর্বং প্রসভকৃতিবশাত্ ব্যক্তমব্যক্তমম্ব ।
মোহাদজ্ঞানতো বা পঠিতমপঠিতং সাম্প্রতং তে স্তবেঽস্মিন্
তত্ সর্বং সাঙ্গমাস্তাং ভগবতি বরদে ত্বত্প্রসাদাত্ প্রসীদ ॥ ৮॥
প্রসীদ ভগবত্যম্ব প্রসীদ ভক্তবত্সলে ।
প্রসাদং কুরু মে দেবি দুর্গে দেবি নমোঽস্তু তে ॥ ৯॥
॥ ইতি অপরাধক্ষমাপণস্তোত্রং সমাপ্তম্ ॥

ওঁ অহং রুদ্রেভির্বসুভিশ্চরাম্যহ-
মাদিত্যৈরুত বিশ্বদেবৈঃ ।
অহং মিত্রাবরুণোভা বিভর্ম্যহ-
মিন্দ্রাগ্নী অহমশ্বিনোভা ॥ ১॥
অহং সোমমাহনসং বিভর্ম্যহং
ত্বষ্টারমুত পূষণং ভগম্ ।
অহং দধামি দ্রবিণং হবিষ্মতে
সুপ্রাব্যে যজমানায সুন্বতে ॥ ২॥
অহং রাষ্ট্রী সঙ্গমনী বসূনাং
চিকিতুষী প্রথমা যজ্ঞিযানাম্ ।
তাং মা দেবা ব্যদধুঃ পুরুত্রা
ভূরিস্থাত্রাং ভূর্যাবেশযন্তীম্ ॥ ৩॥
মযা সো অন্নমত্তি যো বিপশ্যতি
যঃ প্রাণিতি য ঈং শ‍ৃণোত্যুক্তম্ ।
অমন্তবো মাং ত উপক্ষিযন্তি
শ্রুধি শ্রুত শ্রদ্ধিবং তে বদামি ॥ ৪॥
অহমেব স্বযমিদং বদামি জুষ্টং
দেবেভিরুত মানুষেভিঃ ।
যং কামযে তং তমুগ্রং কৃণোমি
তং ব্রহ্মাণং তমৃষিং তং সুমেধাম্ ॥ ৫॥
অহং রুদ্রায ধনুরা তনোমি
ব্রহ্মদ্বিষে শরবে হন্তবা উ ।
অহং জনায সমদং কৃণোম্যহং
দ্যাবাপৃথিবী আ বিবেশ ॥ ৬॥
অহং সুবে পিতরমস্য মূর্ধন্
মম যোনিরপ্স্বন্তঃ সমুদ্রে ।
ততো বি তিষ্ঠে ভুবনানু বিশ্বো-
তামূং দ্যাং বর্ষ্মণোপ স্পৃশামি ॥ ৭॥
অহমেব বাত ইব প্র বাম্যা-
রভমাণা ভুবনানি বিশ্বা ।
পরো দিবা পর এনা পৃথিব্যৈ-
তাবতী মহিনা সং বভূব ॥ ৮॥
॥ ইতি ঋগ্বেদোক্তং দেবীসূক্তং সমাপ্তম্ ॥
॥ ওঁ তত্ সত্ ওঁ ॥